Mukokambisilana Mwacibadwa

Zecicita Filipo

VIDYO: Filipo Olalikila Nduna ya ku Itiyopiya

1. Onelelani VIDYO, olo ŵelengani Machitidwe 8:​30, 31. Pavuli pake, yankhani makonsho aŵa:

1. Kansi Filipo eyambisha tyani makambisilano?

2. Ndaŵa yanji njila iyi yenze yacibadwa yoyambishilamo makambisilano koma soti yophunzisa kanthu kuli munalume uyu?

Kansi Tingaphunzilenji Kufumila Kuli Filipo?

2. Kulaŵizhyana mwacibadwa kungacitishe munthu muyakine kunkhala wodekha koma soti wokonzeka kumvwishila uthenga wasu.

Tolelani Cisanzo ca Filipo

3. Mukonkhala chelu. Mungaphunzile zinyinji zokhuza munthu mwa kulolesha mwakucitila pamenso koma soti magesica yakucita. Kansi munthu uyu oonesha kuti ofunishisha kulaŵila namwe? Mungayambishe makambisilano a m’Baibo mwa kukonsha kuti, “Kansi muziŵa kuti . . . ?” Mukopewa kupitilizhya kulaŵizhyana na munthu wamene ooneka kuti ofuna lini kulaŵila namwe.

4. Mukonkhala oleza mtima. Mukopewa kunkhala na maganizo akuti mufunika kuyambisha makambisilano a m’Baibo nthawi yamene iyo. M’malo mwake, mukoyembekezela nthawi yoyenela kuti mukoyambisha makambisilano mwacibadwa. Nthawi ziyakine, izi zingatanthauze kuyembekezela mpaka nthawi iyakine pati mukankhale na makambisilano na munthu uyu.

5. Mukonkhala okonzeka kucinja. Munthu angayambishe nkhani yamene mwenzoiyembekezela lini. Tetyo, mufunika kunkhala okonzeka kukambilana naye nkhani yamene ingamupindulishe olo kuti izi zingatanthauze kuti mulaŵizhyane naye nkhani yamene muliyoikonzekele.