Puku ya Bobedi ya Samuele
10 Ka morago ga moo kgoši ya Baamoni ya hlokofala gomme Hanuni morwa wa yona a buša legatong la yona. 2 Ke moka Dafida a re: “Ke tla bontšha Hanuni morwa wa Nahashi botho* ka ge tatagwe a mpontšhitše botho.” Ka gona Dafida a roma bahlanka ba gagwe gore ba yo mo homotša ka ge a hlokofaletšwe ke tatagwe. Eupša ge bahlanka ba Dafida ba fihla nageng ya Baamoni, 3 Baetapele ba Baamoni ba re go Hanuni mong wa bona: “Na o nagana gore Dafida o hlompha tatago ge a romela batho gore ba tle ba go homotše? Na Dafida ga se a romela bahlanka ba gagwe go tlo hlola motse e le gore a tle a o hlasele?” 4 Ka gona Hanuni a tšea bahlanka ba Dafida a kota ditedu tša bona ka thoko e tee gomme a ripa diaparo tša bona mo maragong ke moka a re ba sepele. 5 Ge Dafida a botšwa seo se diregilego, gateetee o ile a romela banna gore ba ba gahlanetše, ka gobane banna bao ba be ba tlontlolotšwe kudu. Ke moka kgoši ya re go bona: “Dulang Jeriko go fihlela ditedu tša lena di gola, ke moka le tla kgona le boa.”
6 Ka morago Baamoni ba lemoga gore Dafida o ba hloile kudu, ke moka ba romela batho gore ba yo hira Basiria ba Bethe-rehobo le Basiria ba Tsoba, ba hira mašole a 20 000 a go sepela ka maoto, ba hira kgoši ya Maaka le banna ba 1 000 gomme kua Ishitobo ba hira banna ba 12 000. 7 Ge Dafida a ekwa ka seo, a romela Joaba le mašole ka moka go akaretša le mašole a gagwe a matla. 8 Baamoni ba tšwa ba itokišetša ntwa keiting ya motse gomme Basiria ba Tsoba le ba Rehobo gotee le mašole a Ishitobo le a Maaka, le bona ba be ba eme ba nnoši ba itokišeditše ntwa kua molaleng.
9 Ge Joaba a bona gore o be a hlaselwa ke manaba ka pele le ka morago, o ile a kgetha a mangwe a mašole a gagwe a matla Isiraeleng, a a lokišeletša ntwa gore a yo lwa le Basiria. 10 A bea ngwanabo e lego Abishai gore e be molaodi wa mašole a mangwe ka moka, e le gore ba itokišeletše go yo lwa le Baamoni. 11 Ke moka a re: “Ge Basiria ba le kgauswi le go mphenya, wena o tle o nthuše. Eupša ge e ba Baamoni ba le kgauswi le go go fenya, gona nna ke tla tla ke go thuša. 12 Re swanetše go ba matla gomme re lwele batho ba gabo rena le metse ya Modimo wa rena ka sebete gomme Jehofa yena o tla dira seo a bonago se lokile.”
13 Ke moka Joaba le mašole ao a bego a na le yena ba tšwa ba yo lwa le Basiria gomme Basiria ba tšhaba pele ga gagwe. 14 Ge Baamoni ba bona gore Basiria ba tšhabile, ba tšhaba Abishai gomme ba boela motseng. Ka morago Joaba a tlogela go rakediša Baamoni gomme a boela Jerusalema.
15 Ge Basiria ba bona gore Baisiraele ba ba fentše, ba ile ba kgobokana gape. 16 Ka gona, Hadadesere a roma batho gore ba yo bitša Basiria bao ba bego ba le tikologong ya Noka,* ba tla Helama gomme Shobake molaodi wa mašole a Hadadesere a ba etile pele.
17 Ge Dafida a ekwa seo, gateetee a kgobokanya mašole ka moka a Baisiraele gomme a tshela Noka ya Jorodane a tla Helama. Ke moka Basiria ba itokišeletša ntwa gomme ba ya go lwa le Dafida. 18 Eupša Basiria ba ile ba tšhaba Baisiraele, gomme Dafida a bolaya mašole a 700 ao a bego a nametše dikoloi tša ntwa le mašole a 40 000 a Basiria ao a bego a nametše dipere. Ke moka a bolaya Shobake molaodi wa mašole a bona gomme a hwela moo. 19 Ge dikgoši ka moka, tšeo e bego e le bahlanka ba Hadadesere di bona gore Baisiraele ba di fentše, kapejana di ile tša dira khutšo le Baisiraele gomme tša ba hlankela. Ka gona Basiria ba tšhaba go thuša Baamoni gape.