Genesi

29 Ka morago ga moo Jakobo a tšwela pele ka leeto la gagwe gomme a ya nageng ya batho ba ka Bohlabela. 2 Bjale a bona sediba nageng yeo gomme go be go na le mehlape e meraro ya dinku e khuditše kgauswi le sona, ka ge badiši ba be ba tlwaetše go nweša mehlape ya bona meetse sedibeng seo. Go be go na le leswika le legolo la go tswalela sediba seo. 3 Ge mehlape ka moka e be e kgobokane moo, ba be ba kgokološa leswika leo ba le tloša gomme ba nweša mehlape ya bona, ka morago ga moo ba bušetša leswika leo la go tswalela sediba.

4 Ke moka Jakobo a re go bona: “Bana bešo, le tšwa kae?” Bona ba re: “Re tšwa Harane.” 5 A re go bona: “Na le tseba Labane setlogolo sa Nahoro?” Bona ba re: “Ee, re a mo tseba.” 6 Ke moka a re go bona: “Na o sa phetše gabotse?” Bona ba re: “Ee, o sa phetše gabotse. E bile Ragele morwedi wa gagwe šo o tla le dinku!” 7 Yena a re: “E sa le mosegare wa sekgalela. Ga se nako ya go kgoboketša mehlape. Nwešang dinku tše meetse ke moka le yo di fudiša.” 8 Bona ba re: “Ga se ra dumelelwa go dira bjalo go fihlela ge mehlape ka moka e kgobokeditšwe gomme re kgokološitše leswika re le tlošitše sedibeng. Ke moka e tla ba gona re nwešago dinku meetse.”

9 Ya re a sa bolela le bona Ragele a tla le dinku tša tatagwe, ka ge e be e le modiši. 10 Ge Jakobo a bona Ragele morwedi wa Labane malomeagwe a etla le dinku, kapelapela a batamela a kgokološa leswika a le tloša sedibeng a nweša dinku tša Labane malomeagwe. 11 Ke moka Jakobo a khisa Ragele a hlaboša lentšu gomme a lla. 12 Jakobo a botša Ragele gore ke yena motlogolo wa tatagwe le gore ke yena morwa wa Rebeka. Ke moka Ragele a kitima a yo botša tatagwe.

13 Ge Labane a kwele ka Jakobo le gore e be e le motlogolo wa gagwe, o ile a kitima a yo mo gahlanetša. Ke moka a mo gokarela a mo khisa gomme a mo iša ntlong ya gagwe. Jakobo a anegela Labane dilo ka moka tšeo di mo diragaletšego. 14 Ka morago ga moo Labane a re go yena: “Ka nnete o tloga o le wa gešo.” Ke moka a dula le yena kgwedi ka moka.

15 Ka gona Labane a re go Jakobo: “Na o tla ntlhankela ke sa go patele selo, feela ka gobane o le motlogolo wa ka? Mpotše gore ke go patele ka eng.” 16 Labane o be a na le barwedi ba babedi. Leina la yo mogolo e be e le Lea gomme la yo monyenyane e le Ragele. 17 Mahlo a Lea a be a sa kgahliše, mola Ragele yena a be a bopegile gabotse e bile e le yo mobotse. 18 Jakobo o be a rata Ragele. Ka gona a re: “Ke ikemišeditše go go šomela mengwaga e šupago gore o mphe Ragele morwedi wa gago yo monyenyane.” 19 Ke moka Labane a re: “Go kaone gore ke mo nee wena go e na le gore ke mo nee monna yo mongwe. Wena tšwela pele o dula le nna.” 20 Jakobo a šomela Labane mengwaga e šupago gore a mo nee Ragele, eupša mengwaga yeo ya no swana le matšatšinyana feela go yena ka ge a be a rata Ragele.

21 Ke moka Jakobo a re go Labane: “Nnee mosadi wa ka ke robale le yena, ka gobane nako yela re bego re kwane ka yona e fedile.” 22 Ka gona Labane a dira monyanya, gomme a bitša batho ka moka ba lefelong leo. 23 Eupša ya re e le bošego a tšea Lea morwedi wa gagwe a mo tliša go Jakobo ke moka a robala le yena. 24 Le gona Labane o be a na le mohlanka wa mosadi yo leina la gagwe e bego e le Silipa. Ka gona o ile a mo tšea a mo nea Lea gore e be mohlanka wa gagwe. 25 Mesong e latelago, Jakobo a makala a tsoga le Lea. Ke moka a re go Labane: “Ke ka baka la’ng o ntirile dilo tše? Akere ke go hlanketše ka baka la Ragele? Bjale go re’ng o nthadiile?” 26 Ke moka Labane a re: “Mo ga gabo rena re nyadiša morwedi yo mogolo pele ke moka gwa latela yo monyenyane. 27 Fetša beke ye ya monyanya o ipshina le mosadi yo. Ka morago ga moo o tla hwetša mosadi yo yo mongwe, eupša wena o swanetše go ntlhankela mengwaga e mengwe e šupago.” 28 Jakobo a dira bjalo, ke moka ge beke yeo e fedile, Labane a mo nea Ragele morwedi wa gagwe gore e be mosadi wa gagwe. 29 Labane o be a na le mohlanka yo mongwe wa mosadi yoo leina la gagwe e bego e le Biliha. O ile a mo nea Ragele gore e be mohlanka wa gagwe.

30 Jakobo a robala le Ragele gomme a mo rata kudu go feta Lea, ke moka a šomela Labane mengwaga e mengwe e šupago. 31 Ge Jehofa a bona gore Jakobo o be a rata Ragele kudu go feta Lea, o ile a dira gore Lea a be le bana* eupša Ragele yena a se ke a kgona go ba le bana. 32 Lea a ima a belega morwa gomme a mo reela leina la Rubeni,* ka gobane o be a re: “Jehofa o bone mohlako wa ka, bjale gona monna wa ka o tla nthata.” 33 Lea o ile a ima gape gomme a belega morwa, ke moka a re: “Jehofa o ntheeditše, ka gore monna wa ka o be a sa nthate gomme gona bjale o nneile le ngwana yo.” Ka gona a mo reela leina la Simeone.* 34 Lea a ima gape gomme a belega morwa, a re: “Bjale gona monna wa ka o tla nkgomarela, ka gobane ke mmelegetše barwa ba bararo.” Ka gona a reelwa leina la Lefi.* 35 Le gona a ima gape gomme a belega morwa, a re: “Bjale gona ke tla reta Jehofa.” Ka gona a mo reela leina la Juda.* Ka morago ga moo a tšwa a tlogetše go belega.