Puku ya Bobedi ya Dikoronika

6 Ka yona nako yeo Solomone a re: “Jehofa o itše o tla dula leswiswing le lesoleso. 2 Gona bjale ke go agetše ntlo ya maemo a godimo, e lego lefelo leo o tlago go dula go lona go ya go ile.”

3 Ke moka kgoši ya retologa ya thoma go šegofatša setšhaba ka moka sa Isiraele mola setšhaba seo ka moka se be se eme. 4 Ya re: “A go retwe Jehofa Modimo wa Isiraele, yena yoo ka molomo wa gagwe a tshepišitšego Dafida tate gomme a phetha seo a se tshepišitšego,* a re: 5 ‘Go tloga letšatšing leo ke ntšhitšego setšhaba sa ka nageng ya Egepeta, melokong ka moka ya Isiraele ga se ka kgetha motse woo go wona go ka agelwago ntlo yeo e tlago go dira gore leina la ka le retwe. Ebile ga se ka kgetha motho gore e be moetapele wa setšhaba sa ka sa Isiraele. 6 Eupša ke kgethile Jerusalema gore leina la ka le retwe moo, ebile ke kgethile Dafida gore a buše setšhaba sa ka sa Isiraele.’ 7 Dafida tate o be a ratile ka pelo ya gagwe ka moka go aga ntlo yeo e tlago go dira gore leina la Jehofa Modimo wa Isiraele le retwe. 8 Eupša Jehofa a re go Dafida tate: ‘O be o ratile ka pelo ya gago ka moka go agela leina la ka ntlo. Ruri ke mo gobotse gore o be o kganyoga go dira bjalo. 9 Eupša wena o ka se age ntlo yeo, e tla agwa ke morwa wa gago yoo o tlago go mmelegelwa.’* 10 Jehofa o phethile tshepišo yeo a e dirilego ka gobane ke hlatlame Dafida tate gomme ka dula setulong sa bogoši sa Isiraele go etša ge Jehofa a be a tshepišitše. Le gona ke agetše Jehofa Modimo wa Isiraele ntlo yeo e tlago go dira gore leina la gagwe le retwe, 11 ebile ntlong yeo ke beile Areka yeo e swerego kgwerano yeo Jehofa a e dirilego le setšhaba sa Isiraele.”

12 Ke moka Solomone a ema pele ga aletare ya Jehofa ka pele ga setšhaba ka moka sa Isiraele, gomme a emišetša matsogo a gagwe godimo. 13 (Ka gobane Solomone o be a dirile sethala sa koporo gomme a se beile gare ga lapa. Botelele bja sona e be e le dimithara tše 2,5,* bophara bja sona e le dimithara tše 2,5 gomme botelele bja sona go ya godimo e le dimithara tše 1,5* ke moka a ema godimo ga sona.) A khunama pele ga setšhaba sa Isiraele ka moka, ke moka a emišetša matsogo a gagwe godimo. 14 A re: “Wena Jehofa Modimo wa Isiraele, ga go na Modimo yo a swanago le wena magodimong goba lefaseng. O boloka kgwerano ebile o bontšha bahlanka ba gago bao ba go hlankelago ka dipelo tša bona ka moka gore o a ba rata.* 15 O phethile seo o bego o se tshepišitše Dafida tate, yoo e lego mohlanka wa gago. O mo tshepišitše ka molomo wa gago gomme lehono o phethile* seo o mo tshepišitšego sona. 16 Bjale wena Jehofa Modimo wa Isiraele, phetha seo o se tshepišitšego Dafida tate mohlanka wa gago, ge o be o re: ‘Ge barwa ba gago ba ka hlokomela tsela yeo ba sepelago ka yona ka gore ba kwe molao wa ka go swana le ge wena o dirile, molokong wa gago go tla dula go na le setlogolo sa gago seo se dutšego setulong sa bogoši sa Isiraele.’ 17 Bjale wena Jehofa Modimo wa Isiraele, anke o phethagatše seo o se tshepišitšego Dafida mohlanka wa gago.

18 “Eupša na wena Modimo, ruri o ka dula le batho lefaseng? Gaešita le legodimo, lona legodimo la magodimo ga le kgone go go lekana. Bjale ntlo ye ke go agetšego yona e tla go lekana bjang? 19 Hle Jehofa Modimo wa ka, theetša thapelo ya ka le kgopelo ya gore o nkgaugele, nna mohlanka wa gago. O theetše le sello sa ge ke go llela gore o nthuše gotee le thapelo yeo nna mohlanka wa gago ke e rapelago pele ga gago. 20 Anke mahlo a gago a dule a lebeletše ntlo ye bošego le mosegare, e lego lefelo leo o boletšego ka lona wa re o tla bea leina la gago moo, gore o theetše thapelo yeo nna mohlanka wa gago ke e rapelago ke lebeletše lefelong le. 21 Anke o theetše ge nna mohlanka wa gago ke go lopa gore o nthuše, le ge setšhaba sa gago sa Isiraele se go lopa se lebeletše lefelong le. Anke o kwe o le lefelong leo o dulago go lona magodimong, o re kwe o be o re lebalele.

22 “Ge motho a ka senyetša wa gabo gomme a gapeletšwa go dira keno* ke moka a re a le ka tlase ga keno yeo a tla pele ga aletare ya gago ka ntlong ye, 23 gona anke wena o kwe o le magodimong gomme o ahlole bahlanka ba gago ka gore o otle yo mobe ka baka la seo a se dirilego gomme o mo dire gore a ikarabele ka dilo tšeo a di dirilego, le ka go bolela gore wa go loka ga a na molato gomme o mo putse ka baka la dilo tša go loka tšeo a di dirilego.

24 “Le gona ge setšhaba sa gago sa Isiraele se ka fenywa ke manaba a sona ka ge se dulela go go direla sebe, eupša sa boela go wena sa reta leina la gago, sa rapela gomme sa kgopela gore o se gaugele se le pele ga gago ka ntlong ye, 25 gona anke o se kwe o le magodimong gomme o se lebalele sebe sa sona ke moka o se bušetše nageng yeo o e filego sona le borakgolokhukhu ba sona.

26 “Ge magodimo a ka tswalelwa gomme pula ya se ne ka ge setšhaba se dulela go go direla sebe gomme sa rapela se lebeletše lefelong le, sa reta leina la gago sa ba sa itsholela sebe sa sona ka ge o ile wa se kokobetša, 27 gona anke o kwe o le magodimong gomme o lebalele bahlanka ba gago sebe sa bona, sona setšhaba sa Isiraele. Ka gobane o tla se ruta tsela e botse yeo se swanetšego go sepela ka yona gomme wa neša pula nageng yeo o e filego setšhaba sa gago e le bohwa.

28 “Ge nageng go ka wa tlala goba gwa ba le leuba la bolwetši goba ge dibjalo di ka thoma go omelela goba tša senywa ke phišo e kgolo goba ditšie tše dintšhi goba ge e ba manaba a setšhaba sa gago a ka se dikanetša go o mongwe wa metse yeo e lego nageng yeo goba ge se ka welwa ke mohuta le ge e le ofe wa kotlo goba wa bolwetši, 29 gona ge motho le ge e le ofe goba setšhaba sa gago ka moka sa Isiraele se ka go rapela goba sa go kgopela gore o se gaugele, (ka gobane motho yo mongwe le yo mongwe o tseba kotlo yeo e mo wetšego le bohloko bjo a bo kwago) ge se rapela se emišeditše diatla tša sona godimo se lebeletše ntlong ye 30 anke o kwe o le magodimong moo o dulago gona, o ba lebalele ke moka o putse yo mongwe le yo mongwe go ya ka dilo ka moka tšeo a di dirilego ka gobane o tseba dipelo tša bona (ke wena feela o tlogago o tseba pelo ya motho yo mongwe le yo mongwe), 31 gore ba go boife ka gore ba sepele ditseleng tša gago ka moka nakong ka moka ya ge ba dutše ba phela nageng yeo o e filego borakgolokhukhu ba rena.

32 “Le gona ge motho yo a tšwago nageng e nngwe, yo e sego wa setšhaba sa gago sa Isiraele le yo a tšwago nageng ya kgole gomme a tlile ka baka la ge a kwele ka leina la gago le legolo le seatla sa gago se matla gotee le kamoo o ilego wa otlolla seatla sa gago gore o thuše gomme a tla a go rapela a lebeletše ntlong ye, 33 gona anke o theetše o le magodimong moo o dulago gona gomme o dire dilo ka moka tšeo motho yo a tšwago nageng e nngwe a go kgopelago tšona e le gore batho ba lefaseng ka moka ba tsebe leina la gago gomme ba go boife go etša ge setšhaba sa gago sa Isiraele se go boifa, a tsebe le gore leina la gago le be le dutše le bitšwa ntlong ye yeo ke e agilego.

34 “Ge setšhaba sa gago se ka ya go lwa le manaba a sona ka tsela yeo o se laetšego ka yona gomme sa go rapela se lebeletše motse woo o o kgethilego le ntlo ye ke e agetšego leina la gago, 35 gona anke o kwe thapelo ya sona o be o se kwe ge se go lopa o le magodimong gomme o se ahlolele

36 “Ge se ka go direla sebe (ka gobane ga go na motho yo a sa dirego sebe), gomme wena wa se galefela, wa se tlogela gore manaba a sona a se fenye, ke moka bao ba se thopilego ba se iša bothopša nageng ya kgole goba ya kgauswi, 37 gomme sa re ge se le nageng yeo se thopetšwego go yona sa fetoša monagano wa sona, sa boela go wena gomme sa go lopa gore o se gaugele se le nageng yeo se thopetšwego go yona, sa re: ‘Re dirile sebe, re fošitše ebile re dirile dilo tše mpe,’ 38 ke moka sa boela go wena ka dipelo tša sona ka moka le ka moya wa sona ka moka se le nageng yeo se lego mathopša go yona, yona naga yeo se thopetšwego go yona , gomme sa rapela se lebeletše nageng yeo o e filego borakgolokhukhu ba sona le motseng woo o o kgethilego gotee le ntlo yeo ke e agetšego leina la gago, 39 gona anke o kwe thapelo ya sona le kgopelo ya sona ya gore o se gaugele o le magodimong moo o dulago gona gomme o se ahlolele, o be o lebalele setšhaba sa gago seo se go diretšego sebe.

40 “Bjale wena Modimo wa ka, hle anke o re bone gomme o re kwe ge re go rapela re le ka mo tempeleng ye. 41 Hle Jehofa Modimo, bjale anke o ye lefelong la gago leo o tlago go khutša go lona, wena le Areka ya gago yeo e bontšhago gore o na le matla. Wena Jehofa Modimo, anke baperisita ba gago ba bontšhe gore ke wena o phološago batho. Anke bao ba go tshepagalelago ba thabe ka baka la dilo tše dibotse tšeo o di dirago. 42 Hle Jehofa Modimo, o se ke wa tlogela kgoši ya gago yeo o e tloditšego. Eka o ka gopola botho* bjoo o bo bontšhitšego mohlanka wa gago Dafida.”