Jeremia
23 Jehofa o re: “Go madimabe badiši bao ba fedišago e bile ba gašanya dinku tšeo ke di hlokometšego!”
2 Se ke seo Jehofa Modimo wa Isiraele a se bolelago ka badiši bao ba dišago setšhaba sa gagwe: “Lena le gašantše dinku tša ka, le di tšitlantše e bile ga se la ba le taba le tšona.”
“Bjale nka se le kwele bohloko ka baka la dilo tše mpe tšeo le di dirago,” o realo Jehofa.
3 “Nna ke tla kgoboketša dinku tša ka tšeo di šetšego go tšwa dinageng ka moka tšeo ke bego ke di phatlalaleditše go tšona, ke tla di bušetša mo di fulago gona gomme di tla tswala ya ba tše dintšhi. 4 Ke tla di nyakela badiši bao ba tlago go di diša. Di ka se sa tšhaba e bile di ka se sa tšhoga selo, gomme go ka se be le yeo e lahlegago,” o realo Jehofa.
5 Jehofa o re: “Tsebang gore go tla matšatši ao ka ona ke tlago go kgetha kgoši ya go loka yeo e tšwago lelokong la Dafida gore e buše.* E tla dira dilo ka temogo gomme ya ahlola ka toka le ka go loka nageng ka moka. 6 Mehleng ya kgoši yeo, Juda e tla phološwa gomme Isiraele e tla dula e šireletšegile. Le gona leina la kgoši yeo e tla ba, Go Loka ga Rena go tšwa go Jehofa.”
7 Jehofa o re: “Tsebang gore go tla matšatši ao ka ona ba ka se sa rego: ‘Re ikana ka Jehofa yo a phelago yo a ntšhitšego setšhaba sa Baisiraele nageng ya Egepeta,’” 8 eupša ba tla re: ‘Re ikana ka Jehofa yo a phelago yo a ntšhitšego ditlogolwana tša setšhaba sa Baisiraele nageng ya leboa le dinageng ka moka tšeo a bego a ba phatlalaleditše go tšona,’ gomme ba tla dula nageng ya bona.”
9 Ke re go baporofeta:
Pelo ya ka e kwele bohloko.
Marapo a ka ka moka a a thothomela.
Ke swana le motho yo a tagilwego le yo a ganwago ke beine,
Ka baka la lentšu la Jehofa
Le ka baka la mantšu a gagwe a makgethwa.
10 Naga e tletše dihlotlolo.
Naga e a lla ka gobane e rogakilwe,
Le mafelo ao diphoofolo di fulago go ona lešokeng a omile.
Baporofeta ba dira dilo tše mpe, e bile ba diriša matla a bona gampe.
11 “Baporofeta le baperisita ba gobogile.
Ke hweditše bobe bja bona gaešita le ka ntlong ya ka,” o realo Jehofa.
12 “Tsela ya bona e tla thelela e bile ya ba ya leswiswi,
Ba tla thedimoga gomme ba wa.
Ka gobane ke tla ba tlišetša masetlapelo
Ngwageng wa ge ke ba otla,” o realo Jehofa.
13 “Ke bone selo se se šišimišago go baporofeta ba Samaria.
Ba porofeta ka leina la Baali,
E bile ba aroša setšhaba sa ka sa Isiraele.
14 Le gona ke bone dilo tše šoro go baporofeta ba Jerusalema.
Ba dira bohlotlolo e bile ba bolela maaka,
Ba hlohleletša badiradibe
E bile ga ba tlogele go dira dilo tše mpe.
Ka moka ga bona ke no bona ba swana le Sodoma,
Gomme batho bao ba dulago motseng woo ba swana le Gomora.”
15 Ka gona Jehofa wa madira o bolela mabapi le baporofeta bao gore:
“Ke ba dira gore ba je lengana,
E bile ke ba nea meetse ao a nago le mpholo gore ba a nwe.
Ka gobane bohlanogi bo tletše gohle mo nageng ka baka la baporofeta ba Jerusalema.”
16 Jehofa wa madira o re:
“Le se ke la theetša mantšu a baporofeta bao ba le porofetelago.
Ba a le lahletša.
Dilo tšeo ba di bonago diponong ba itlhametše tšona,
Ga di tšwe go Jehofa.
17 Ba bolela gantšhintšhi le batho bao ba sa ntlhomphego ba re,
‘Jehofa o itše: “Le tla ba le khutšo,”’
Gomme go ba dihlogo tše thata ba re go bona:
‘Le ka se welwe ke masetlapelo.’
18 Ke mang yo a emego gare ga bagwera ba Jehofa
Gore a bone le go kwa lentšu la gagwe?
Ke mang yo a ilego a theetša gabotse lentšu la gagwe e le gore a le kwe?
19 Bonang! Ledimo la Jehofa le tla tšubutla le galefile,
Le tla tšubutla ka godimo ga dihlogo tša batho ba babe go swana le ledimo le šoro.
20 Bogale bja Jehofa bo ka se gomele morago
Ntle le gore a phethe seo pelo ya gagwe e nyakago go se dira.
Lena le tla kwešiša taba ye gabotse mehleng ya bofelo.
21 “Ga se ka roma baporofeta, eupša bona ba kitimile.
Ga se ka bolela le bona, eupša bona ba porofetile.
22 Eupša ge nkabe ba ile ba ema gare ga bagwera ba ka,
Ba be ba tla dira gore batho ba ka ba kwe mantšu a ka,
Le gona ba be ba tla dira gore ba tlogele mekgwa ya bona e mebe le dilo tše mpe tšeo ba di dirago.”
23 Jehofa o re: “Ga ke bone feela dilo tšeo di diregago kgauswi, eupša ke bona le dilo tšeo di diregago kgole.”
24 “Na go na le motho yo a ka ikutago moo nka se kgonego go mmona?” O realo Jehofa.
“Goba na nka se kgone go bona dilo ka moka legodimong le lefaseng?” O realo Jehofa.
25 “Ke kwele baporofeta bao ba porofetago maaka ka leina la ka, ba re: ‘Ke lorile! Ke lorile!’ 26 Baporofeta ba ba tla dula ba porofeta maaka go fihlela neng? Ke baporofeta bao ba porofetago boradia bja dipelo tša bona. 27 Ba nyaka go dira gore batho ba ka ba lebale leina la ka ka go botšana ditoro tšeo ba di lorilego, go no swana le ge botatago bona ba ile ba lebala leina la ka ka baka la ge ba be ba rapela Baali. 28 Anke moporofeta yo a lorilego a bolele toro yeo ya gagwe, eupša anke moporofeta yo a kwelego molaetša wa ka a o bolele ka go rereša.”
“Mahlaka a ka swana bjang le mabele?” O realo Jehofa.
29 Jehofa o re: “Na lentšu la ka ga le swane le mollo, le gona na ga le swane le hamola yeo e pšhatlago letlapa?”
30 Jehofa o re: “Ke lwa le baporofeta bao ba fetošago molaetša wa ka gore ba botše batho seo bona ba se nyakago.”
31 Jehofa o re: “Ke tla otla baporofeta bao ba bolelago tša bona ba re: ‘Modimo o re!’”
32 Jehofa o re: “Ke lwa le baporofeta bao ba bolelago ditoro tša maaka, gomme ba aroša batho ba ka ka baka la maaka a bona le go ikgantšha ga bona,”
“Eupša ga se ka ba roma goba ka ba laela gore ba dire seo. Ka gona ba ka se hole batho ba ka selo,” o realo Jehofa.
33 “Ge moporofeta goba moperisita goba batho ba ba re: ‘Molaetša wo o swana le morwalo wa Jehofa.’ Wena o re: ‘“Lena batho ke lena le lego morwalo, gomme nna ke tla le lahla,” o realo Jehofa.’ 34 Ge e ba moporofeta goba moperisita goba motho yo mongwe mo setšhabeng yo a rego: ‘Molaetša wa Jehofa ke morwalo,’ gona nna ke tla otla motho yoo le ba lapa la gagwe. 35 Motho yo mongwe le yo mongwe o botša motho yo mongwe le ngwanabo a re: ‘Jehofa o arabile a reng? Le gona Jehofa o boletše a reng?’ 36 Eupša le se ke la hlwa le bolela ka morwalo wa Jehofa, ka gobane morwalo ke seo yo mongwe le yo mongwe wa lena a se bolelago. E bile le fetošitše molaetša wa Modimo yo a phelago, e lego yena Jehofa wa madira, Modimo wa rena.
37 “Wena o tla araba moporofeta wa re: ‘Jehofa o go arabile a reng? Le gona Jehofa o rileng? 38 Ge e ba le duletše gore: “Molaetša wa Jehofa ke morwalo,” gona Jehofa o re: “Le ge ke ile ka le botša gore le se ke la re molaetša wa Jehofa ke morwalo, lena le ile la no tšwela pele le re molaetša wa Jehofa ke morwalo,”’ 39 ka gona ke tla le lahlela kgole le nna, lena le motse wo ke o neilego lena le borakgolokhukhu ba lena. 40 Ke tla le goboša ka ba ka le tlontlolla go ya go ile, e lego selo seo se ka se tsogego sa lebalwa.”’”