Habakuku
1 Nna moporofeta Habakuku* ke kwele molaetša o latelago ponong, ke moka ka re:
2 Wena Jehofa, ke tla llela gore o nthuše go fihlela neng? O tla kwa sello sa ka neng?
Ke tla kgopela gore o nthuše go fihlela neng? O tla mphološa neng go dilo tše šoro tšeo di diregago?
3 Ke ka baka la’ng o ntira gore ke bone dilo tše mpe?
Ke ka baka la’ng o tlogela batho ba gatelela ba bangwe?
Ke ka baka la’ng batho ba senya e bile ba dira bošoro mo pele ga ka?
Ke ka baka la’ng dintwa le dingangišano di oketšega?
4 Batho ga ba latele molao,
E bile ga go ahlolwe ka toka.
Batho ba babe ba buša bao ba lokilego,
Ke ka baka leo go se nago toka.
5 “Lena batho, lebelelang ditšhaba le be le di lebeledišiše!
Di lebeleleng le maketše e bile le tlabegile,
Ka gobane mehleng ya lena
Go tla direga selo seo le ka se se tshepego gaešita le ge le se hlaloseditšwe.
6 Ka gobane ke tliša Bakaladea go lena,
E lego batho ba bašoro le bao ba dirago dilo ka lebelo.
Ba ya go gongwe le go gongwe mo lefaseng
Gore ba tšee dinaga tšeo e sego tša bona.
7 Bakaladea ba a boifiša e bile batho ba a ba tšhaba.
Ba ipeela melao e bile ba na le matla.
8 Dipere tša bona di šia mapogo ka lebelo,
E bile bošego di kotsi kudu go feta diphiri.
Dipere tša bona tša ntwa di dula di kitima,
E bile di tšwa kgole.
Bakaladea ba kitima go swana le ntšhu ge e phakišetša go yo topa dijo.
9 Ka moka ga bona ba fela pelo ya go bolaya batho.
Difahlego tša bona di galefile kudu go swana le phefo yeo e tšwago ka bohlabela,
E bile mathopša a bona ke a mantšhi go swana le santa.
10 Ba kwera dikgoši
E bile ba sega babuši.
Ba sega mafelo ka moka ao a šireleditšwego,
Ba kgobela ditšhila kgauswi le maboto a motse gore ba di namele gomme ba thope motse.
11 Ba ya pele go swana le moya wo o fokago, ke moka ba tsena motseng.
Ba tla ba le molato
Ka gobane ba bolela gore modimo wa bona ke yena a ba filego matla.”
12 Jehofa, na ga se wa ba gona go tloga kgalekgale?
Wena o Modimo wa ka yo Mokgethwa e bile ga o hwe.
Wena Jehofa o kgethile Bakaladea gore ba re ahlole.
Wena Leswika la ka, o ba kgethile gore ba re otle.
13 Mahlo a gago a sekile kudu e bile ga a kgone go lebelela dilo tše mpe,
Le gona, o ka se dule o lebeletše ge go direga dilo tše mpe.
Bjale ke ka baka la’ng o tlogela batho ba dira dilo tša bofora?
Ke ka baka la’ng o homola ge o bona batho ba babe ba buša batho bao ba lokilego go feta bona?
14 Ke ka baka la’ng o dumelela batho gore ba lebelelwe tše e kego ke dihlapi tša ka lewatleng,
Le go swana le diphedi tša ka lewatleng tšeo go se nago yo a di bušago?
15 Ba ka moka, Bakaladea ba ba swere ba diriša huku ya go swara dihlapi.
Ba ba swara le ka nete ya go swara dihlapi,
Gomme ba ba kgobokeletša ka neteng yeo ya go rea dihlapi.
Ke ka baka leo ba thabago kudu.
16 Ke ka baka leo ba direlago nete ya bona ya go rea dihlapi dihlabelo,
Ba ba ba e direla le diorelo,
Ka gobane dinete tše tša go rea dihlapi di ba thuša gore ba hwetše dijo tše dibose,
Le tšeo di nago le phepo.
17 Na Bakaladea ba tla dulela go tlatša dinete tša bona ka dihlapi?
Na ba tla dula ba bolaya ditšhaba ntle le go di kwela bohloko?