Genesi

41 Ge mengwaga e mebedi e fedile, Farao a lora a eme Nokeng ya Nile. 2 A lora a bona dikgomo tše šupago tše dibotse tša go nona di etšwa Nokeng ya Nile, gomme di be di fula bjang kgauswi le noka yeo. 3 Bjale go be go na le dikgomo tše dingwe tše šupago tšeo di bego di le ka morago ga tšona di etšwa Nokeng ya Nile. Di be di sa kgahliše e bile di otile, gomme di ile tša ema kgauswi le dikgomo tšela tše dingwe kgauswi le noka yeo. 4 Bjale dikgomo tšeo tša go ota tša ja dikgomo tšela tše šupago tše dibotse tša go nona. Ke moka Farao a phafoga.

5 Farao o ile a boela a robala gomme a lora gape. O ile a lora a bona diako tše šupago tša mabele di etšwa lehlakeng letee, di nonne e bile e le tše dibotse. 6 Ka morago ga moo gwa mela diako tše dingwe tša mabele tše šupago tše disesane tšeo di tšhumilwego ke phefo ya ka bohlabela. 7 Ke moka diako tšeo tše disesane tša metša diako tšela tše dingwe tše di nonnego. Farao a napa a phafoga gomme a lemoga gore o be a lora.

8 Mesong o ile a tshwenyega kudu. Ka gona a romela molaetša wa gore go bitšwe batho ka moka ba Egepeta bao ba dirago maleatlana le ba bohlale. Farao o ile a ba laodišetša ditoro tša gagwe, eupša gwa se be le yo a kgonago go mo hlalosetša tšona.

9 Ke moka yo mogolo wa batšheladino a bolela le Farao a re: “Lehono gona ke ipolela dibe. 10 Wena Farao o be o galefetše bahlanka ba gago. Ke moka wa golega nna le yo mogolo wa baapei ba dinkgwa ntlong ya yo mogolo wa ba go hlokomela bagolegwa. 11 Ka morago ga moo nna le yena re ile ra lora ditoro bošegong bjo botee. Yo mongwe le yo mongwe wa rena a lora toro yeo e nago le tlhaloso ya yona. 12 Le gona re be re na le lesogana la Moheberu, leo e lego mohlanka wa yo mogolo wa ba go hlokomela bagolegwa. Ge re mo laodišetša ditoro tša rena, o ile a hlalosetša yo mongwe le yo mongwe toro ya gagwe. 13 Go ile gwa direga ka wona mokgwa woo a re hlaloseditšego ka gona. Wena o ile wa mpušetša mošomong wa ka, eupša wa fega yo mogolo wa baapei ba dinkgwa koteng.”

14 Farao o ile a romela molaetša wa gore Josefa a bitšwe, ke moka ba ile ba mo ntšha kapejana tronkong. Ka gona o ile a kota ditedu le hlogo, a apara diaparo tše dingwe gomme a ya go Farao. 15 Ke moka Farao a re go Josefa: “Ke lorile toro, eupša ga go na yo a kgonago go e hlalosa. Bjale ke kwele ba re ge motho a go botša toro ya gagwe o kgona go e hlalosa.” 16 Josefa a araba Farao a re: “Nna yena nka se kgone go e hlalosa, eupša Modimo ke yena a tlago go go fa tlhaloso e kgahlišago.”

17 Farao a botša Josefa a re: “Ke lorile ke eme kgauswi le Noka ya Nile. 18 Ge ke be ke le moo, go ile gwa tšwelela dikgomo tše šupago tše dibotse tša go nona di etšwa Nokeng ya Nile, gomme tša fula bjang moo. 19 E bile go be go na le dikgomo tše dingwe tše šupago ka morago ga tšona tšeo di bego di sa kgahliše e bile di otile. Ga sa nka ka bona dikgomo tša go ota go swana le tšona mo nageng ka moka ya Egepeta. 20 Dikgomo tšeo tša go ota tša ja tšela tše dingwe tše šupago tša go nona. 21 Di ile tša di ja eupša gwa se bonagale gore di di jele, ka gobane di be di sa otile kudu go swana le mathomong. Ka gona ke ile ka phafoga.

22 “Ka morago ga moo ke ile ka lora ke bona diako tše šupago tša mabele di etšwa lehlakeng letee, di nonne e bile e le tše dibotse. 23 Ke moka gwa mela diako tše dingwe tša mabele tše šupago tša go omelela, tše disesane tšeo di tšhumilwego ke phefo ya ka bohlabela. 24 Diako tšeo tše disesane di ile tša metša diako tšela tše šupago tše dibotse. Ka gona ke ile ka botša batho ba go dira maleatlana toro ye, eupša gwa se be le yo a kgonago go ntlhalosetša yona.”

25 Ke moka Josefa a re go Farao: “Wena Farao ditoro tša gago di na le tlhaloso e tee. Modimo wa nnete o go boditše seo a tlago go se dira. 26 Dikgomo tše šupago tše dibotse di emela mengwaga e šupago. Le diako tša mabele tše šupago tše dibotse di emela mengwaga e šupago. Ditoro tša gago di na le tlhaloso e tee. 27 Dikgomo tše šupago tša go ota le tša go se kgahliše tšeo di ilego tša tšwelela ka morago ga tšona di emela mengwaga e šupago. Ke moka diako tša mabele tše šupago tšeo di se nago selo tšeo di tšhumilwego ke phefo ya ka bohlabela e tla ba mengwaga e šupago ya tlala. 28 Ka gona, bjalo ka ge ke boletše le wena Farao, Modimo wa nnete o go bontšhitše seo a tlago go se dira.

29 “Go tlo ba le mengwaga e šupago yeo go tlago go ba le dijo tše dintši nageng ka moka ya Egepeta. 30 Eupša ka morago go tla latela mengwaga e šupago ya tlala, gomme batho ba tla lebala gore go kile gwa ba le dijo tše dintši nageng ya Egepeta. Go tla ba le tlala e kgolo nageng. 31 Batho ba tlo lebala gore go kile gwa ba le dijo tše dintši mo nageng, ka gobane tlala yeo e tlago go tla e tlo ba e šoro kudu. 32 Wena Farao o lorile se gabedi ka gobane Modimo wa nnete o kgonthišeditše gore o tla dira dilo tšeo ka moka, e bile o tla di dira kapelapela.

33 “Bjale wena Farao nyaka monna yo a nago le kwešišo le bohlale, gomme o mo kgethe gore a hlokomele naga ya Egepeta ka moka. 34 Anke Farao a kgethe matona ao a tlago go hlokomela naga ye, ke moka go mekgobo e mengwe le e mengwe e mehlano yeo batho ba e bunnego, ba swanetše go tliša o tee go Farao mengwageng ka moka e šupago ya ge go na le dijo tše dintši. 35 Le gona anke ba kgoboketše dijo ka moka mengwageng ye e tlago ya ge go tla be go na le dijo tše dintši, ba kgoboketše dijo tšeo metseng gomme ba di bee gabotse. Dijo tšeo e tla ba tša Farao. 36 Dijo tšeo e tla ba tša go fepa naga mengwageng e šupago ya tlala yeo e tlago go wela naga ya Egepeta, e le gore diruiwa le batho ba se ke ba hwa ka baka la tlala.”

37 Taba ye ya kgahla Farao le bahlanka ba gagwe ka moka. 38 Ka gona Farao a re go bahlanka ba gagwe: “Na go na le motho yo mongwe yo a swanago le Josefa yo a thušwago ke moya wa Modimo?” 39 Ke moka Farao a re go Josefa: “Ka ge Modimo a dirile gore o tsebe dilo tše ka moka, ga go na yo a nago le kwešišo le bohlale go swana le wena. 40 Bjale ke wena o tlago go hlokomela ntlo ya ka, gomme setšhaba sa ka se tla kwa dilo ka moka tšeo o di bolelago. Ke nna feela ke tlago go go feta ka gobane ke le kgoši.” 41 Ke moka Farao a re go Josefa: “Tseba gore ke go kgetha gore o hlokomele naga ka moka ya Egepeta.” 42 Ka gona Farao a rola palamonwana ya gagwe seatleng sa gagwe a e rweša Josefa, gomme a mo apeša diaparo tše dibotse tša maemo a godimo, a ba a mo rweša le tšhaene ya gauta molaleng. 43 Le gona, o ile a mo fa kariki ya gagwe ya maemo a bobedi ka go hlomphega, gore batho ba tle ba mo hlomphe ka go goeletša ka gore, “Afreke!”* Ka gona a mmea gore a hlokomele naga ka moka ya Egepeta.

44 Farao a tšwela pele a re go Josefa: “Le ge nna ke le Farao, batho ka moka ba tla kwa wena, ga go na motho yo a tla dirago selo ka ntle le tumelelo ya gago.” 45 Ka morago ga moo Farao a reela Josefa leina a re ke Tsafenathe-panea, gomme a mo fa Asenatha morwedi wa Potifera moprista wa kua Oni gore e be mosadi wa gagwe. Josefa a hlokomela dilo ka moka tšeo di bego di dirwa nageng ya Egepeta. 46 Josefa o be a na le mengwaga e 30 ge a be a ema pele ga Farao kgoši ya Egepeta.

Ka morago ga moo Josefa a tloga go Farao a tšama a sepela le naga ka moka ya Egepeta a e lebelela. 47 Mengwageng e šupago ya ge go be go na le dijo tše dintši, naga e ile ya tšweletša mabele a mantši kudu. 48 Josefa a kgoboketša dijo ka moka tša mengwaga e šupago tša nageng ya Egepeta, gomme a di boloka metseng e megolo ya Egepeta. Motseng o mongwe le o mongwe o be a boloka dijo tše di tšwago mašemong a moo. 49 Josefa a tšwela pele a kgoboketša mabele gomme ya ba a mantšintši go swana le santa ya lewatle, go fihlela ge mafelelong ba tlogela go a bala ka ge e be e le a mantšintši.

50 Pele ga ge ngwaga wa mathomo wa tlala o ka fihla, Asenatha morwedi wa Potifera moprista wa kua Oni, o ile a belegela Josefa barwa ba babedi. 51 Josefa a reela morwa wa gagwe wa mathomo leina a re ke Manase,* ka gobane o itše: “Modimo o ntebaditše mathata a ka ka moka le batho ka moka ba lapeng la tate.” 52 O ile a reela morwa wa gagwe wa bobedi leina la Efuraime,* ka gobane o itše: “Modimo o dirile gore ke be le bana nageng yeo ke tlaišegilego go yona.”

53 Mafelelong mengwaga e šupago ya ge go na le dijo tše dintši nageng ya Egepeta ya fela, 54 ke moka gwa thoma mengwaga e šupago ya tlala go etša ge Josefa a boletše. Go ile gwa ba le tlala dinageng ka moka, eupša nageng ya Egepeta ka moka go be go na le dijo. 55 Mafelelong naga ka moka ya Egepeta ya welwa ke tlala gomme batho ba kgopela dijo go Farao. Ke moka Farao a botša Baegepeta ka moka a re: “Eyang go Josefa gomme le dire selo se sengwe le se sengwe seo a le botšago sona.” 56 Tlala yeo e ile ya wela lefase ka moka. Ge tlala e be e ipha matla nageng ya Egepeta, Josefa o ile a bula mafelo ka moka ao ba bego ba bolokela mabele gomme a a rekišetša Baegepeta. 57 Le gona, batho ba lefaseng ka moka ba tla Egepeta go tlo reka dijo go Josefa, ka gobane tlala e be e iphile matla lefaseng ka moka.