Go Phološa Bophelo Nakong ya Tlala
1. Ke mogato ofe o bohlale woo Josefa a ilego a o gata nakong ya nywaga ya mokhora, gomme ka mafelelo afe?
KAPEJANA ka morago ga gore Josefa a kgethwe e le Molaki wa dijo, o ile a putlaganya naga ya Egipita. O be a šetše a rulagantše ditaba nakong ya ge nywaga ya mokhora e thoma. Bjale naga e ile ya thoma go tšweletša dijo tše dintši kudu! Josefa o ile a tšwela pele a kgobela dijo tše tšwago mašemong a motse o mongwe le o mongwe, gomme a di boloka motseng. O ile a tšwela pele a “kxobela mabele a kaka lešabašaba la lewatlê, ba bá ba lesa le xo a êla, ka xobane a be a se sa kxôna xo êlwa.”—Genesi 41:46-49.
2. Ke ka boikgafo bofe bja motho ka noši moo batho ba bego ba kgona go hwetša dijo?
2 Nywaga e šupago ya mokhora e ile ya fela gomme tlala e ile ya thoma go etša ge Jehofa a ile a bolela e sa le pele, tlala yeo e bego e se ya Egipita feela, eupja e le “ya dinaxeng ka moka.” Nakong ya ge batho bao ba bego ba wetšwe ke tlala kua Egipita ba thoma go llela Farao gore a ba nee bogobe, Farao o ile a ba botša gore: “Yang xo Josefa, Le dirê se a tl’o xo Le botša sôna.” Josefa o ile a rekišetša ba-Egipita mabele go fihlela ba felelwa ke tšhelete. Ka morago o ile a dumela gore ba lefe ka diruiwa tša bona. Mafelelong batho ba ile ba tla go Josefa ba re: “Rêka rena batho le mašemo a rena ka dijô; ’me rena le mašemo a rena re tlo ba bahlanka ba Farao.” Ka gona Josefa o ile a rekela Farao naga ka moka ya Egipita.—Genesi 41:53-57; 47:13-20.
Thušo Bakeng sa Phepo ya Moya
3. Ke sedirišwa sefe seo Jesu a ilego a bolela ka sona e sa le pele bakeng sa go nea dijo ka nako e swanetšego?
3 Bjalo ka ge mabele ao Josefa a bego a a aba a be a bolela bophelo go ba-Egipita, ka mo go swanago dijo tša kgonthe tša moya di a nyakega bakeng sa go fepa Bakriste bao ba fetogago bahlanka ba Jehofa ka boineelo bja bona go Yena ka Josefa o Mogolo, Jesu Kriste. Jesu nakong ya bodiredi bja gagwe bja lefaseng o ile a bolela e sa le pele gore balatedi ba gagwe ba tloditšwego bao ba sepelago mehlaleng ya gagwe ba be ba tla rwala boikarabelo bja go aba dithušo tše. O ile a botšiša: “Byale ké mang molaki e a bôtêxaxo yo bohlale, yo mong wa xaxwe a mmeilexo xo laka bahlanka ba xaxwe le xo ba fa dijô ka lebaka la xôna? Wa Iehlôxônôlô e tlo ba molaki eo, mong wa xaxwe xe a e-tla, a mo hwetša a dira tšôna tšêo.”—Mateo 24:45, 46.
4. Tokišetšo yeo e dirilwego ke sehlopha sa “molaki” lehono e dumelelana bjang le seo se bego se rulagantšwe mehleng ya Josefa?
4 Mašaledi a botegago a sehlopha se sa “molaki yo bohlale” lehono a nyakišiša ka gohle Mangwalong go bona gore dihlatse tše di ineetšego tša Jehofa gotee le batho ba thabelago ka ntle lefaseng, ba hwetša dijo tše di phološago bophelo tša moya. Boikarabelo bjo bo lebelelwa e le modiro o mokgethwa gomme bo dirwa e le tirelo e kgethwa go Jehofa. Go feta moo, “molaki” o rulagantše diphuthego gomme o di neile dipuku tša Beibele tše dintši moo e lego gore ba na le “peu” e ntši ya Mmušo yeo ba kago go e gaša phatlalatša mašemong ao ba a abetšwego. Se se swana le mehleng ya Josefa, nakong ya ge a be a kgobokanya batho metseng gomme a ba nea mabele e sego feela bakeng sa dijo, eupja gaešita le bakeng sa go bjala ba lebeletše go tlo buna ka morago.—Genesi 47:21-25; Mareka 4:14, 20; Mateo 28:19, 20.
5. (a) Ke tlhokomelo efe e kgethegilego yeo “molaki” a e neago go tšeo di nyakwago tša lapa nakong ya mathata? (b) ‘Bontši’ bja dijo tša moya ka 1986 bo swana bjang le dijo tša morago mehleng ya Josefa?
5 Gaešita lege modiro wa go bolela phatlalatša o thibetšwe, gomme Dihlatse tša Jehofa di tlaišwa, “molaki e a bôtêxaxo” o lebelela go abja mo ga dijo tša moya e le boikarabelo bjo bo kgethwa. (Ditiro 5:29, 41, 42; 14:19-22) Ge dikotsi di tšwelela, tše bjalo ka madimo, mafula, ditšhišinyego tša lefase, “molaki” o bona gore tšeo di nyakwago mmeleng le moyeng tša ntlo ya Modimo di a hwetšwa. Gaešita le bao ba lego dikampeng tša tshwenyo ba ile ba fihlelelwa gantši ka mantšu a gatišitšwego. Mellwane ya setšhaba ga e dumelelwe go thibela go abja ga dijo tša moya go bao ba di nyakago. Gore go tšwelwe pele go abja tše, go nyakega sebete, tumelo go Jehofa, gomme gantši le bohlale bjo bogolo. Lefaseng ka bophara ka 1986 feela, “molaki” o ile a tšweletša bontši bjo bogolo bja Dibeibele le dipuku tša matlakala a thata tše 43 958 303 gotee le dimakasine tše 550 216 455, ka kgonthe ‘ke bontši bjo bo lekanago le lešabašaba la lewatle.’
Go Itefeletša, Kotlo, goba Kgaugelo?
6, 7. (a) Tlala e ile ya dira bjang gore banababo Josefa ba lesome ba ikwišetše fase pele ga gagwe? (b) Ke ka ditsela dife Josefa ka noši a bego a le tekong?
6 Mafelelong tlala e ile ya tsena nageng ya Kanana. Jakobo o ile a roma banababo Josefa ba lesome Egipita gore ba yo reka mabele. Eupja ga se a roma Benjamini ngwanabo Josefa wa mmagwe, ka baka la go boifa, ka ge a ile a re, “e se bê mohlomongwê a wêlwa ke kotsi.” Ka ge Josefa e be e le yena yo a bego a rekiša, banababo ba ile ba tla go yena gomme ba khunama pele ga gagwe. Gaešita le ge ba se ba ka ba lemoga ngwanabo bona, fela Josefa o ile a ba tseba.—Genesi 42:1-7.
7 Josefa bjale o ile a thoma go gopola ditoro tša gagwe tša pele tša mabapi le bona. Eupja o be a swanetše go dira’ng? Na o be a swanetše go itefeletša? Nakong ya ge ba tloga ba nyaka thušo, na o be a swanetše go ba lebalela tsela yeo ba ilego ba mo swara ka yona? Go thwe’ng ka manyami a magolo a tatagwe? Na se se swanetše go lebalwa? Banababo bjale ba ikwa bjang ka phošo e kgolo yeo ba ilego ba e dira? Josefa le yena o be a le tekong tabeng ye. Na boitshwaro bja gagwe bo be bo tla dumelelana le kgopolo yeo Josefa o Mogolo, Jesu Kriste a bego a tla e bontšha ka morago, ka ge bo hlalositšwe go 1 Petro 2:22, 23: “Yêna a sa kaxo a dira sebe, yo molomong wa xaxwe xo sa kaxo xwa hwetša bofora, E a sa kaxo a roxa xe a roxwa, a se šupeletše xe a hlokofatšwa, a di xafêla Eo a ahlolaxo ka xo loká.”
8. Josefa o be a tla hlahlwa ke eng, e lego seo se bontšhago eng ge e le ka Jesu le barutiwa ba Gagwe?
8 Ka ge Josefa a be a kgona go bona tlhahlo ya Jehofa go phethagatšweng ga ditiragalo tše, gona o be a tla ela hloko gore a theetše melao le melao ya motheo ya Modimo. Ka tsela e swanago, Jesu ka mehla o be a fišegela go dira ‘thato ya Tatagwe’ ka ge a ile a nea bophelo bjo bo sa felego go ‘mang le mang e a dumelago go yena.’ (Johane 6:37-40) Ka ge e le “batseta ’bakeng sa Kriste,” barutiwa ba gagwe ba tloditšwego le bona ba phethagatša boikarabelo bja bona bjo bokgethwa, ka go ‘botša batho mantšu a bophelo bjo.’—2 Ba-Korinthe 5:20; Ditiro 5:20.
9, 10. (a) Ke tsela efe yeo Josefa bjale a ilego a e tšea, gomme ka baka la’ng? (b) Josefa o ile a bontšha bjang kwelo-bohloko e swanago le ya Jesu?
9 Josefa ga se a ka a ikutolla go banababo di sa tloga fase. Go e na le moo, o ile a bolela le bona ka bogale ka go diriša mohlatholodi a re: “Le bahlodi”! Ka ge ba ile ba bolela ka ngwanabo bona e monyenyane, Josefa o ile a laela gore ba kgonthišiše gore ba a rereša ka go tla le yena Egipita. Josefa o ile a ba kwa ge ba boledišana ka go itshola ba re ditiragalo tše di ba wela ka baka la gore ba ile ba mo rekiša, yena Josefa, bohlankeng. Josefa a furalela, gomme a lla. Lega go le bjalo, o ile a tlema Simeone e le mogolegwa go fihlela ba boa le Benjamini.—Genesi 42:9-24.
10 Josefa o be a sa itefeletše bakeng sa bobe bjo a bo dirilwego. O be a rata go bona ge e ba go itshola ga bona e le ga kgonthe, e le mo go tšwago gare-gare dipelong tša bona, e le gore ba ka gaugelwa. (Maleaki 3:7; Jakobo 4:8) Josefa ka kgopolo ya kwelo-bohloko ye e swanago le yeo Jesu a bego a tla e bontšha, ga se a tlatša mekotla ya bona ka mabele feela, eupja gape o ile a ba bušetša tšhelete ya bona molomong wa mokotla wa o mongwe le o mongwe. Go feta moo, o ile a ba nea mefago bakeng sa leeto la bona.—Genesi 42:25-35; bapiša le Mateo 11: 28-30.
11. (a) Ge nako e dutše e e-ya, Jakobo o ile a gapeletšega go dira’ng, gomme ke ka baka la’ng a ile a feleletša ka go dumela? (b) Ba-Roma 8:32 le 1 Johane 4:10 di re kgonthišetša bjang ka lerato la Modimo ka mo go swanago?
11 Ge nako e dutše e e-ya ba ile ba fetša dijo tšeo ba bego ba di rekile Egipita. Jakobo o ile a kgopela barwa ba gagwe ba senyane gore ba boele ba yo reka tše dingwe gape tše oketšegilego. Nakong e fetilego, o ile a kgopela mabapi le Benjamini, ka gore: “Morwa’ke a ka se kê a sepela le lena! Moxol’waxwe o hwile; xo šetše yêna à nnoši; xe a ka wêlwa ke kotsi mo leetong la lena, xôna meriri e mebududu ya-ka Le tlo e fološetša felô xa bahu ka bohloko.” Lega go le bjalo, ka morago ga go phegelelwa kudu le go ikemišetša ga Juda go rwala boikarabelo bakeng sa Benjamini, Jakobo ka go se rate o ile a dumela go ba dumelela gore ba sepele le mošemane.—Genesi 42:36-43:14.
12, 13. (a) Josefa o ile a dira bjang teko ya go utolla maikwelo a dipelo tša banababo? (b) Mafelelo a a ile a nea bjang Josefa motheo bakeng sa go bontšha kgaugelo?
12 Josefa ge a bona gore Benjamini o tlile le banababo, o ile a ba laleletša ntlong ya gagwe moo a ilego a dira monyanya. O ile a nea Benjamini karolo e fetago ya ba bangwe ga hlano. Ka gona Josefa o ile a leka banababo la mafelelo. O ile a bušetša tšhelete ya o mongwe le o mongwe ka mokotleng wa gagwe gape, eupja senwelo sa gagwe sa silifera se ile sa tsenywa molomong wa mokotla wa Benjamini. Ka morago ga ge ba sepetše, Josefa o ile a roma molaki wa gagwe gore a yo ba bea molato wa bohodu le go tsoma senwelo ka mekotleng ya bona. Ge se hweditšwe ka mokotleng wa Benjamini, banababo ba ile ba gagola diaparo tša bona. Ba ile ba bušetšwa morago gore ba yo lebana le Josefa. Juda o ile a kgopela tshwarelo ka go tšwa pelong a ithapa go ba mohlanka legatong la Benjamini e le gore mošemane a ka boela go tatagwe.—Genesi 43:15-44:34.
13 Bjale ge Josefa a kgodišegile ka go fetoga ga dipelo tša banababo, ga se a ka a hlwa a sa kgona go laola maikwelo a gagwe. Ka morago ga ge a laetše batho ba bangwe bohle gore ba tšwe, Josefa o ile a re: “Ké nna Josefa ngwan’abô-lena yo Le mo rekišitšexo a išwa Egipita. Byale Le se kê la hlwa lè belaêla Lè sêtlêxa dipelo ka xe Le nthekišitše ka tla mono. Ka xobane xe Modimo a ntlišitše fá, e be e le xore ke Le êtê pele; e bê e le xo phološa batho; . . . xore Le se kê la fedišwa mo lefaseng, xore Le phedišwê Le bê lešaba le lexolo la baphološwa.” Ka gona o ile a re go banababo: “Akxofišang Le yê xo tate Le mmotšê Le re: . . . tlaa xó nna, O se diêxe. O tlo axa naxeng ya Gosene, . . . Ke tlo xo babalêla Ò le fá, ka xobane xo s’e-tla nywaga e mehlano ya tlala. Tlaa, xore O se tlo ba modiidi, Ò na le ba lapa la xaxo, le dilô tšohle tša xaxo.”—Genesi 45:4-15.
14. Ke ditaba dife tše di thabišago tšeo di ilego tša išwa go Jakobo?
14 Ge Farao a kwele ditaba tša mabapi le banababo Josefa, o ile a botša Josefa gore a tšee dikoloi tša naga ya Egipita gomme a yo tšea tatagwe le ba lapa la gagwe ka moka a ba tliše Egipita ka gobane tše botse tša naga e be e tla ba tša bona. Jakobo ge a e-kwa se se diregilego o ile a lapologa moyeng gomme a kgotsa: “Xo hwetše! Josefa ngwan’ake ó sa phela. Ke tlo ya ke mmônê kè sešo ka hwa.”—Genesi 45:16-28.
Mokhora wa Dijo tša Moya
15. Mo nakong ye re lebelela go mang bakeng sa dijo tša moya, gomme re ka holofela bjang dijo tše dintši?
15 Se ka moka se bolela’ng go rena lehono? Neng le neng ge re tsoma dijo tša rena tša moya, re lebelela go Yo a fetago Farao yo botho wa mehleng ya Josefa. Ke Morena yo a Phagamego Jehofa, yo a re neago dijo le tlhahlo mehleng ye ya lefsifsi ya lefase le swerwego ke tlala ya therešo ya Beibele. Re dirile ka matla a rena ohle mabapi le dikgahlego tsa Mmušo wa gagwe, mo e ka rego re tliša karolo ya rena ya lesome ngwakong wa gagwe wa polokelo. A kamoo a ilego a bula kudu “nthoba tša lexodimo” gomme a re tšhollela tšhegofatšo ‘wa go re tlalela’!—Maleaki 3:10.
16. (a) Ke kae feela moo go ka hwetšwago “dijo” tše phološago bophelo lehono? (b) Go bjalwa ga “mabele” bakeng sa batho ba bolawago ke tlala go ile gwa katološwa bjang?
16 Ka letsogong le letona la Jehofa ke Molaodi wa gagwe wa Dijo, yo mo nakong ye e lego kgoši e beilwego sedulong sa bogoši, Jesu yo a tagafaditšwego. (Ditiro 2:34-36) Ka ge batho ba be ba swanetše go ithekiša e le bahlanka gore ba tšwele pele ba phela, ka gona lehono ka moka bao ba nyakago go tšwela pele ba phela ba swanetše go tla go Jesu, gomme ba fetoga balatedi ba gagwe ba ineetšego go Modimo. (Luka 9:23, 24) Go etša ge Jakobo a ile a lebiša barwa ba gagwe go Josefa bakeng sa go hwetša dijo, ka mo go swanago Jehofa o lebiša batho bao ba sokologilego go Morwa wa gagwe yo a ratwago, Jesu Kriste. (Johane 6:44, 48-51) Jesu o kgobokanya balatedi ba gagwe diphuthegong tše tiilego tše swanago le motse tše fetago 52 000 lefaseng ka moka lehono moo ba fepjago ka dijo tše dintši tša moya gomme ba newa “mabêlê” a mantši kudu e le “peu” ya go bjala mašemong. (Genesi 47:23, 24; Mateo 13:4-9, 18-23) Dihlatse tše tša Jehofa ke badiri ba ratago gakaakang! Ba bantši ba bona ba ithapela tirelo ya nako e tletšego ya bobulamadibogo, gomme mo e ka bago ba 595 896 ba bona ba bile le karolo e le tlhora, modirong wo wo e lego tokelo kgweding e tee ngwagola. Seo se dira palogare ya babulamadibogo ba 11 phuthegong e nngwe le e nngwe!
17. Ke pego efe e nngwe ya boporofeta yeo e swanago le go kopana ga banababo Josefa ba lesome le yena?
17 Ke mo go lemogegago gore banababo Josefa ka moka ba lesome, bao mo nakong ye ba sokologilego dikgopolong le medirong ya bona ya pele, ba be ba le batee le yena kua Egipita, yeo yona gotee le Sodoma di swantšhetšago lefase leo Jesu a ilego a bolaelwa go lona. (Kutollo 11:8) Se se re gopotša Sakaria 8:20-23, yeo e feleletšago ka go hlalosa “banna ba lesome” bao ba rego, “Anke re ye le lena,” ke gore ba ye le batho ba Jehofa ba tloditšwego bao mašaledi a bona a sa dutšego a dira mono lefaseng.
18. Lerato le le kgethegilego leo le ilego la bontšhwa Benjamini le swantšhetša eng mehleng yeno?
18 Lega go le bjalo, go thwe’ng ka ngwanabo Josefa wa mmagwe, Benjamini, yoo go belegwa ga gagwe mo go thata go ilego gwa dira gore mosadi wa Jakobo yo a rategago Ragele a hwe? Benjamini o be a ratwa ka mo go kgethegilego ke Josefa, yo ka ntle le pelaelo a bego a ikwa a le kgaufsi kudu le morwa yo wa mmagwe. Se ka ntle le pelaelo ke sona seo se dirilego gore Benjamini a hwetše karolo e fetago ya banababo gahlano nakong ya ge banababo ka moka ba 12 ba be ba kopanywa gape ka lekga la mathomo monyanyeng ka ngwakong wa Josefa. Na Benjamini ga a swantšhetše gabotse mašaledi a Dihlatse tše tloditšwego lehono, bao bontši bja ba dutšego ba phela ba ilego ba kgobokeletšwa ka lehlakoreng la Morena go tloga ka 1919? Sehlopha se sa “Benjamini” ka kgonthe se ile sa hwetša karolo e kgethegilego e tšwago go Jehofa ka ge ‘moya wa gagwe e le hlatse ya go kwana le moya wa bona.’ (Ba-Roma 8:16) Ba le bona ba be ba dutše ba lekwa ge e ba ba botega mola “dinku” tša Morena di dutše di ba direla.—Mateo 25:34-40.
19. Ke go swana gofe mo go swanetšego go elwa hloko magareng ga go hudugela ga malapa a Isiraele Gosene le go kgobokanywa ga batho ba Modimo lehono?
19 Ke mo go kgahlišago gore nakong ya ge Farao a be a rulaganya go yo tšea Jakobo le lapa la gagwe gore ba tle Egipita, “batho” ba banna bao ba ilego ba dula moo e bile ba 70, yeo e lego go atiša 7 ka 10. (Genesi 46:26, 27) Dipalo tše tše pedi di dirišwa kudu Mangwalong ka moka, gantši “7” e bontšha go phethega ga tša legodimo gomme “10” e bontšha go phethega ga tša lefaseng. (Kutollo 1:4, 12, 16; 2:10; 17:12) Se se swantšhetša boemo lehono, e lego nako ya ge re ka letela gore Jehofa o tla tliša “nageng” ya gagwe, paradeiseng ya moya yeo re e thabelago mo nakong ye, motho o mongwe le o mongwe wa lapa la gagwe la Dihlatse. (Bapiša le Ba-Efeso 1:10) “Morêna ó tseba ba xaxwe,” gomme gaešita le mo nakong ye o ba bea ‘nageng mo go phadišago’ ka ge Gosene e be e le bjalo morago kua nakong ya ge Farao a be a buša.—Genesi 47:5, 6, Phetolelo ya Kgale; 2 Timotheo 2:19.
20. Go sa šetšwe tlala ya moya lehono, ke ka baka la’ng re swanetše go thaba?
20 Mehleng ya Josefa nywaga ya tlala e latetše nywaga ya mokhora. Lehono tlala le mokhora di ba gona ka nako e swanago. Ka go fapana le tlala ya moya e lego lefaseng le sa šegofatšwego ke Jehofa, ruri go na le mokhora wa dijo tša moya lefelong la Jehofa la borapedi. (Jesaya 25:6-9; Kutollo 7:16, 17) Ee, gaešita lege go e-na le tlala ya go llela go kwa mantšu a Jehofa Bojakaneng, go ya kamoo Amosi a boletšego ka gona e sa le pele, ruri lentšu la Jehofa le lona le ata le e-tšwa go Jerusalema wa legodimo. Seo se re dira gore re thabe gakaakang!—Amosi 8:11; Jesaya 2:2, 3; 65:17, 18.
21. (a) Ke tokelo efe e kgolo yeo re nago le yona lehono? (b) Ke eng seo re swanetšego go se leboga, gomme re ka bontšha bjang ditebogo tša rena?
21 Lehono, ka tlase ga tlhahlo ya Josefa o Mogolo, Jesu Kriste re na le tokelo e kgolo ya go bokanywa diphuthegong tše swanago le motse. Moo re ka ba le monyanya wa dijo tše dintši tše humišago tša moya gomme ra ba ra bjala dipeu tša therešo le go phatlalatša ditaba tše di lokilego tša gore dijo tša moya di a hwetšwa. Se re se dira gore re hole bohle bao ba amogelago dithulaganyo le ditokišetšo tšeo ba di rulaganyeditšwego ka lerato ke Mmuši wa Legohle, Jehofa. Re ka leboga gakaakang Modimo wa rena ka baka la mpho ya Morwa wa gagwe, Josefa o Mogolo yo a dirago e le Molaodi yo bohlale wa dijo tša moya! Ke yena yo a kgethilwego ke Jehofa gore a be Mophološi wa bophelo mo nakong ye ya tlala ya moya. Eka o mongwe le o mongwe wa rena a ka bontšha mafolofolo ge a nea tirelo e kgethwa ka go latela mohlala wa gagwe gomme a eteletšwe pele ke yena!
Na o Bona go Swana?
◻ Josefa o ile a swantšhetša Jesu bjang e le Molaodi wa Dijo?
◻ Ke eng seo se bapetšwago le go ba mohlanka wa Modimo ka boineelo papading ya Josefa?
◻ Ke seka sefe seo se ilego sa bontšhwa ke Josefa le Jesu e le mohlala go rena lehono?
◻ Go swana le mehleng ya Josefa, ke thulaganyo efe ya kgonthe ya go abja ga dijo tsa moya yeo e lego gona lehono?
◻ Go hlahloba ga rena papadi ye go swanetše go re tutueletsa go dira’ng?
[Pictures on page 16, 17]
Lefaseng leo le apareditšwego ke tlala ya moya, Josefa o Mogolo o nea diio tše dintši kudu go bohle bao ba tlago go yena ka tumelo
Go etša ge banababo Josefa ba lesome ba ile ba bontšha boikokobetšo go Josefa, ruri lešaba le legolo mo nakong ye le lemoga ditshwanelo tša Kriste tša go laola
Ka go swana le batho ba 70 ba lapa la Jakobo, ruri palo e feletšego ya “dinku” tša Jehofa e fihla ‘nageng’ e botse, paradeiseng ya moya yeo re e thabelago mo nakong ye
[Seswantšho go letlakala 18]
Sehlopha sa mehlengyeno sa Benjamini se bontšhitšwe lerato le kgethegilego ke Kriste, gomme se amogela dijo tše dintši ‘ka nako ya gona’