Aborahama—Mogwera wa Modimo

NAGA e nngwe yeo batho ba ilego ba yo dula go yona ka morago ga Meetsefula e be e bitšwa Uri. E ile ya ba motse o mogolo wo o bego o na le dintlo tše dibotse. Eupša batho ba moo ba be ba rapela medimo ya maaka. Se ke seo ba bego ba se dira le kua Babele. Batho ba Uri le Babele ba be ba sa swane le Noa le morwa wa gagwe Sheme, bao ba ilego ba tšwela pele ba hlankela Jehofa.

Mafelelong, ka morago ga nywaga e 350 meetsefula a fetile, Noa yo a botegago o ile a hwa. E bile feela ka morago ga nywaga e mebedi moo monna yo o mmonago mo seswantšhong a ilego a belegwa. Modimo o be a mo rata kudu. Leina la gagwe e be e le Aborahama. O be a dula le lapa la gagwe motseng woo wa Uri.

Ka letšatši le lengwe, Jehofa o ile a re go Aborahama: ‘Tloga Uri le go metswalo ya gago o ye nageng yeo ke tlago go go bontšha yona.’ Na Aborahama o ile a theetša Modimo gomme a tlogela dilo ka moka tše dibotse tša Uri? Ee. Le gona Aborahama o ile a tsebja e le mogwera wa Modimo ka ge ka mehla a be a ekwa Modimo.

Ba bangwe ba lapa la Aborahama ba ile ba tloga le yena Uri. Tatagwe e lego Thera o ile a tloga le yena. Lota e lego morwa wa ngwanabo le yena o ile a dira bjalo. Sara mosadi wa Aborahama le yena o ile a tloga. Mafelelong ka moka ga bona ba ile ba fihla nageng yeo e bitšwago Harane, moo Thera a ilego a hwela gona. Ba be ba le kgole kudu le Uri.

Ka morago ga nako e itšego, Aborahama le lapa la gagwe ba ile ba tloga Harane gomme ba tla nageng yeo e bitšwago Kanana. Ge a le moo, Jehofa o ile a re go yena: ‘Ye ke naga yeo ke tlago go e nea bana ba gago.’ Aborahama o ile a dula Kanana ka ditenteng.

Modimo o ile a thuša Aborahama moo a ilego a ba le mehlape e mentši ya dinku le ya diruiwa tše dingwe gotee le bahlanka ba bantši. Eupša Aborahama le Sara ba be ba se na bana.

Ge Aborahama a be a na le nywaga e 99, Jehofa o ile a re go yena: ‘Ke go holofetša gore o tla ba tatago ditšhaba tše dintši.’ Eupša se se be se tla kgonega bjang ka ge Aborahama le Sara ba be ba šetše ba tšofetše kudu gore ba ka ba le ngwana?