Topollo

Tlhaloso: Tefo e lefšago go rekolla goba go hunolla tlemong e itšego goba maemong a sa rategego. Theko e kgolo kudu ya topollo ke yeo ya madi a tšholotšwego a Jesu Kriste. Jesu ka go lefa mohola wa topollo yeo legodimong, ruri o buletše bana ba Adama tsela ya go hunollwa sebeng le lehung leo bohle re le abetšego ka baka la sebe sa rakgolokhukhu wa rena Adama.

Lehu la Jesu Kriste le be le fapane bjang le ao a batho ba bangwe bao ba ilego ba bolaelwa tumelo?

Jesu e be e le motho e a phethagetšego. O be a tswetšwe a se na bosodi lege e le bofe bja sebe, gomme o ile a kgomarela phethego yeo bophelong bja gagwe ka moka. “Yêna a sa kaxo a dira sebe.” O be a ‘se na bosodi gomme a sa etše badira-dibe.’—1 Pet. 2:22; Ba-Heb. 7:26.

E be e le Morwa wa kgonthe wa Modimo. Modimo ka noši o hlatsetše go rereša ga se ka go kwiwa a le magodimong. (Mat. 3:17; 17:5) Morwa yo o be a kile a phela legodimong; Modimo ka yena o dirile batho ba bangwe ka moka bao ba bopilwego le dilo tše dingwe legohleng lohle. Modimo gore a tle a phethe thato ya Gagwe, ruri O ile a fetišetša ka mohlolo bophelo bja Morwa yo ka popelong ya kgarebe e le gore a tle a belegwe e le motho. Jesu ge a be a gatelela gore o bile motho e le ka kgonthe, o ile a ipolela e le Morwa-motho.—Ba-Kol. 1:15-20; Joh. 1:14; Luka 5:24.

O be a sa hloke matla pele ga babolai ba gagwe. O itše: “Ke xafa bophelô bya-ka . . . Xa xo e a nkamoxaxo bophelô bya-ka; ké Nna mong ke bo xafaxo.” (Joh. 10:17, 18) O ile a gana go kgopela barongwa gore ba tle ba mo lwele. (Mat. 26:53, 54) Gaešita lege batho ba babe ba ile ba dumelelwa gore ba phethe maano a bona a go mmolaya, fela lehu la gagwe e be e le la sehlabelo e le ka kgonthe.

Madi a gagwe a tšholotšwego a na le mohola wa go neela phologo go ba bangwe. “Morwa-motho xa a ka a tlêla xo dirêlwa; ó tlile xo dirêla le xo neêla bophelô bya xaxwe xore e bê topollô ya ba bantši.” (Mar. 10:45) Ka gona, lehu la gagwe e be e le le bohlokwa kudu go feta go bolaelwa tumelo ka baka la go gana go kwanantšha tumelo ya gagwe.

Bona le matlakala 402, 403, tlase ga hlogo ya ditaba ya “Segopotšo.”

Ke ka baka la’ng go be go nyakega gore topollo e neelwe ka mokgwa woo e neetšwego ka wona, e le gore re tle re hwetše bophelo bjo bo sa felego?

Ba-Roma 5:12: “Sebe sè tsene lefaseng ka motho [Adama] o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.” (Go sa šetšwe kamoo re ka lekago go phela ka gona ka go loka, fela ka moka ga rena re badira-dibe ka tswalo. [Ps. 51:5] Ga go na tsela yeo re ka ikhweletšago tshwanelo ya go phela ka mo go sa felego.)

Ba-Roma 6:23: “Moputsô wa sebe ké lehu.”

Ps. 49:6-9: “Ké ba-bôta-mahumô, ba xo ikxanthša ka menônô e mexolo. Motho a ka se kê a bà a lopolla ngwana wabô, a nthša sa xo mmoêlanya le Modimo. Sa xo rêkolola moy’a-motho se a hlôkwa; a bá a di lesa moká, xo phela xo ya xo ile, le xo se bone lebitla.” (Ga go motho yo a ka kgonago go neela se sengwe go lopolla o mongwe sebeng le lehung. Tšhelete ya gagwe e ka se ke ya reka bophelo bjo bo sa felego, gomme moya wa gagwe ge o fela lehung, e lego moputso wo o swanetšego go mo tlela ka baka la sebe, ga o hole selo tabeng ya go phološa motho e mongwe.)

Ke ka baka la’ng Modimo a sa ka a bolela feela gore gaešita lege Adama le Efa ba be ba swanetše go hwa ka baka la borabele bja bona, fela bana ba bona ka moka bao ba bego ba tla kwa Modimo ba be ba ka phela ka mo go sa felego?

Ka gobane Jehofa “ó rata tokô; ó rata molaô.” (Ps. 33:5; Doit. 32:4; Jer. 9:24) Ka gona, tsela yeo a dirišanego le boemo ka yona e bontšhitše go loka ga gagwe, e bile kahlolo yeo e nyakegago ya go loka e le ka kgonthe, gomme ka nako e swanago e bontšhitše lerato la gagwe le kgaugelo. Seo se bjalo bjang?

(1) Adama le Efa ba be ba sešo ba ba le bana pele ga ge ba dira sebe, ka gona ga go le o tee yo a tswetšwego a phethagetše. Bana ba Adama ka moka ba belegwe sebeng gomme sebe se iša lehung. Ge nkabe Jehofa a hlokomologe se, gona seo e be e tla ba go ganetšana le melao ya gagwe ya go loka. Modimo o be a ka se ke a dira seo gomme a ba le letsogo bobeng. Ga se a ka a široga tsela ya kahlolo ya go loka e le ka kgonthe; ka gona, ga go sebopiwa se se hlalefilego seo se bego se ka ba le tshwanelo ya go hwetša phošo tabeng ye.—Ba-Roma 3:21-26.

(2) Ka ntle le go hlokomologa melao ya kahlolo ya go loka, ruri tokišetšo e be e ka dirwa bjang ya gore go phološwe bana ba Adama bao ba bego ba tla bontšha go kwa Jehofa ka go rata? Ge e ba motho yo a phethagetšego a be a swanetšwe ke go hwa lehu la sehlabelo, gona kahlolo ya go loka e be e tla dumelela gore bophelo bjoo bjo bo phethagetšego bo neelwe go apeša dibe tša bao ka tumelo ba bego ba ka amogela tokišetšo. Ka ge sebe sa motho o tee (seo sa Adama) e be e le boikarabelo bja go bakela lapa lohle la motho gore e be badira-dibe, gona madi a tšholotšwego a motho o mongwe yo a phethagetšego (ge e le gabotse, Adama wa bobedi), ao e lego a mohola o swanetšego, a be a ka dira gore meelo ya kahlolo ya go loka e leka-lekane. Ka gobane Adama o bile modira-dibe wa ka boomo, gona o be a ka se ke a hola selo; eupja ka gobane tefo yeo batho ka moka ba bego ba swanetšwe ke go e lefa ka baka la sebe e be e tla lefša ka tsela yeo ke o mongwe, gona bana ba Adama ba be ba ka phološwa. Eupja go be go se na motho o bjalo yo a phethagetšego. Batho le ka mohla ba be ba ka se ke ba fihlelela kahlolo yeo e nyakegago ya go loka e le ka kgonthe. Ka gona, Jehofa ka go bontšha lerato la gagwe le le makatšago le ka go ikgafa ga gagwe mo gogolo, o ile a dira tokišetšo. (1 Ba-Kor. 15:45; 1 Tim. 2:5, 6; Joh. 3:16; Ba-Roma 5:8) Morwa yo a tswetšwego a nnoši wa Modimo o ile a rata go phetha karolo ya gagwe. Jesu ka go tlogela ka boikokobetšo letago la gagwe la legodimo gomme a ba motho yo a phethagetšego, ruri o hwetše batho.—Ba-Fil. 2:7, 8.

Seswantšho: Hlogo ya lapa mo gongwe e ka ba sekebekwa gomme a ahlolelwa lehu. Bana ba gagwe mo gongwe ba ka tlogelwa e le bao ba diilago le bao ba wetšego melatong e megolo. Mo gongwe rakgolo wa bona ka botho a ka ba kwela bohloko ka go dira gore morwa yo a dulago le yena a ba lefelele melato ya bona, le go ba dira gore ba kgone go hwetša bophelo bjo bofsa. Ee, bana gore ba tle ba holwe ke seo, ba swanetše go amogela thulaganyo gomme rakgolo wa bona mo gongwe a ka ba le tshwanelo ya go nyaka dilo tše itšego, e le go kgonthiša gore bana mo gongwe ba ka se ke ba ekiša tsela ya tatago bona.

Mohola wa sehlabelo sa Jesu o thomile ka go dirišetšwa go bomang pele, gomme ka morero ofe?

Ba-Roma 1:16: “Ebangedi [mabapi le Jesu Kriste le karolo ya gagwe morerong wa Jehofa] . . . hleng è le matla a Modimo a xo phološa mang le mang e a dumêlaxo, xo thôma ka Ba-Juda, xo iša pele ka Ba-Gerika.” (Taletšo ya go holwa ke tokišetšo ya phološo ka Kriste e išitšwe go ba-Juda pele, gomme ka morago ya išwa go bao e sego ba-Juda.)

Ba-Ef. 1:11-14: “Yêna Yo [Kriste] re [ba-Juda go akaretša moapostola Paulo] lexo ba-hlaolêlwa-xo-ja-bohwa [Baji ba bohwa bjang? Bja Mmušo wa legodimong] ka Yêna . . . Xore ka Yêna xo tumišwê letaxô la xaxwe, ka rena re bexo re holofetše xo tla xa Kriste, Yo le lena [Bakriste ba ba tšerwego ditšhabeng tša Ba-ntle, go etša ge go be go e-na le ba bantši Efeso] Le mo dumetšexo Lè kwile Lentšu la therešô, yôna Ebangedi ya xo phološwa xa lena, la swaiwa ka Môya o mokxêthwa, wo le bexo Le o holofedišitšwe. Wo e lexo yôna peeletšô ya bohwa ya xo re rena sethšaba sa xaxwe re tlo lopollwa, xwa tlo rêtwa letaxô la xaxwe.” (Bohwa bjoo go etša ge go bontšhwa go 1 Petro 1:4, bo bolokilwe magodimong. Kutollo 14:1-4 e bontšha gore bao ba nago le karolo go bjona ke ba 144 000. Ba gotee le Kriste ba tla dira e le dikgoši le baperisita godimo ga batho ka nywaga e 1 000, e lego nakong yeo ka yona morero wa Modimo wa gore lefase e be paradeise e dulwago ke bana ba phethagetšego ba batho ba pele ba babedi o tlago go phethwa.)

Ke bomang gape mehleng ya rena bao ba hwetšago mehola ya sehlabelo sa Jesu?

1 Joh. 2:2: “Ké [Jesu Kriste] Yêna seloba sa dibe tša rena [tšeo tša moapostola Johane le Bakriste ba bangwe bao ba tloditšwego ka moya]; xomme xa se sa tša rena fêla; ké Yêna seloba sa dibe tša lefase ka moka [ba bangwe ba batho bao go bona kholofelo ya bophelo bjo bo sa felego lefaseng e dirilwego gore e kgonege].”

Joh. 10:16: “Ke sa na le dinku tše dingwê tše e sexo tša lešaka lé. Le tšôna ke swanetše xo di xapa; ’me di tlo kwa lentšu la-ka, ya tlo ba mohlape o tee le modiši o tee.” (‘Dinku tše tše dingwe’ di hlokomelwa ka lerato ke Jesu Kriste nakong ya ge mašaledi a “mohlatswana o monyenyane” a baji ba bohwa ba Mmušo a sa dutše a le lefaseng; ka gona “dinku tše dingwê” di ka ba gotee le baji ba bohwa ba Mmušo e le karolo ya “mohlape o tee.” Ka moka ga bona ba thabela e mentši ya mehola e swanago e tšwago sehlabelong sa Jesu, eupja e sego yona ka moka ka gobane ba na le mafelelo a sa swanego.)

Kut. 7:9, 14: “Ka buša ka ba le pônô, ka bôna lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka; . . . Ké bôná ba ba tšwaxo tlaišexong e kxolo; ba hlatswitše mašela a bôná ba a taxafatša mading a Kwana.” (Ka gona, ditho tša lešaba le le legolo di phela nakong ya ge masetla-pelo a magolo a thoma gomme ba na le boemo bjo bo sekilego pele ga Modimo ka baka la go dumela ga bona topollong. Go loka mo ba go balelwago ka baka la se, ke mo go lekanego go ba dira gore ba bolokwe ba phela lefaseng go feta masetla-pelong a magolo.)

Ke ditšhegofatšo dife tša nako e tlago tšeo di tlago go thabelwa ka baka la topollo?

Kut. 5:9, 10: “Ba ôpêla sefela se sefsa, ba re: Di Xo [Kwana, Jesu Kriste] swanetše, xe O tšea lengwalô wa kxaola mahutô a lôna; xobane O hlabilwe ’me xo ba meloko yohle le maleme ohle le dithšaba tšohle le xo Ba-ntlê bohle, O na le ba O ba reketšexo Modimo ka madi a xaxo, wa ba dira maxoši le baperisita ba Modimo wa rena; ’me ba tlo buša mo lefaseng.” (Topollo e be e le lebaka le bohlokwa tabeng ya go bula tsela e išago bophelong bja legodimo go bao ba tlago go buša gotee le Kriste. Babuši ka moka ba mmušo o mofsa wa lefase ba tla tloga ba dula didulong tša bona tša bogoši tša legodimo.)

Kut. 7:9, 10: “Ka bôna lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka; ka bôna bà eme pele xa sedulô sa boxoši sa Kwana [Jesu Kriste yo a ilego a hwa go swana le kwana ya sehlabelo], bà apere ’kobô tše dithšweu, bà swere mahlare a molala ka diatla tša bôná; Ba hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši, ké xa Kwana.” (Go dumela sehlabelong sa Kriste ke lebaka le legolo tabeng ya go phološwa ga lešaba le le legolo masetla-pelong a magolo.)

Kut. 22:1, 2: “A nthšupetša noka ye e sekilexo ya meetse a bophelô, e phadimaxo bo-ka lexakabyê le le bônatšaxo, e tšwaxo sedulong sa boxoši sa Modimo le sa Kwana. Mo mekxotheng ya xôna, ka mošono le mošola wa noka, xo’ sehlare sa bophelô sa xo enywa dienywa tše lesome la metšô e mebedi; se enywa dienywa ka kxwedi e nngwê le e nngwê. ’Me matlakala a sehlare seo ké a xo fodiša dithšaba.” (Ka gona, go dirišwa ga mohola wa sehlabelo sa Kwana ya Modimo, yena Jesu Kriste, ke karolo e bohlokwa ya tokišetšo e dirilwego ke Modimo ya go fodiša batho mefokolong ka moka ya sebe le go ba dira gore ba thabele bophelo bjo bo sa felego.)

Ba-Roma 8:21: “Le tšôna dibopya [batho] di tlo hunollwa bohlankeng bya thsenyêxô, di bê le tokoloxô ya xe bana ba Modimo bà e-ya letaxong.”

Go nyakega’ng go rena e le gore re tle re holwe ka mo go sa felego ke sehlabelo se se phethagetšego sa Jesu?

Joh. 3:36: “E a dumêlaxo Morwa, ó na le bophelô byo bo sa felexo. E a sa mo dumelexo, a ka se kê a bo bôna; se se tl’o xo dula sè mo okametše ké boxale bya Modimo.”

Ba-Heb. 5:9: “Xe a [Jesu Kriste] fihletše bolo-ka-tlalô ka mokxwa woo, a ba thwadi ya xo iša bohle ba ba mo kwaxo phološong ye e sa felexo.”

Tokišetšo ya topollo e utolla’ng ge e le kamoo Modimo a ikwago ka gona ka batho?

1 Joh. 4:9, 10: “Leratô la Modimo le a re ratilexo ka lôna, le bônaxetše ka xe a roma Morwa wa xaxwe Mo-tswalwa-esi, a tla lefaseng xore re phelê ka yêna. Leratô xe le le xôna, xa se ka xore ké rena re ratilexo Modimo; ké ka xe Yêna a re ratile a roma Morwa wa xaxwe, a ba seloba sa dibe tša rena.”

Ba-Roma 5:7, 8: “Xo hwêla moloki, e šetše e le taba ye e nyakaxo xo se bê xôna; xe e le yo botho, mohlomong motho a ka tlêma pelo a mo hwêla. Xomme Modimo, leratô le a re ratilexo ka lôna, ó le bônaxatša ka xe Kriste a re hwêla rè sa le ba-dira-dibe.”

Ke matla afe ao tokišetšo ye e swanetšego go ba le wona, ge e le mabapi le kamoo re dirišago ka gona maphelo a rena?

1 Pet. 2:24: “A ipeleša dibe tša rena, a di nametša kwateng ka mmele wa xaxwe, xore re tloxêlanê le tšôna, re phelêlê xo loka.” (Ka baka la dilo ka moka tšeo Jehofa le Morwa wa gagwe ba di dirilego go re sekiša sebeng, ruri re swanetše go katana e le ka kgonthe go fenya mekgwa yeo ya sebe. E tla ba go hloka tlhaologanyo gakaakang go rena go dira ka boithatelo dilo tšeo re tsebago gore ke tše dibe!)

Tito 2:13, 14: “Jesu Kriste . . . Ké Yêna a ikxafilexo ka ’baka la rena, xore a re lopollê bokxopong ka moka, a ithuêlê sethšaba sa dirôtô medirong e botse.” (Go leboga tokišetšo ye ye makatšago go swanetše go re dira gore re be le karolo e mafolofolo medirong yeo Kriste a e abetšego balatedi ba gagwe ba therešo.)

2 Ba-Kor. 5:14, 15: “Re xapeletšwa ke leratô la Kriste, xomme re re: Xe Yêna a hwetše bohle è le o tee, xôna xo hwile bohle. Ó hwile ’bakeng sa bohle, xore ba ba phelaxo ba se kê ba hlwa ba iphelêla, ba phelêlê Yêna e a hwilexo ’bakeng sa bôná ’me a tsoxa bahung ’bakeng sa bôná.”