Kgaolo 13

Re Lemogwa ka Boitshwaro bja Rena

RE PHELA mehleng yeo go yona ditekanyetšo tša boitshwaro tšeo e lego kgale di hlompšha di lahlilwego ke dikarolo tše kgolo tša batho. Madumedi a mantši a Bojakane a dirile se se swanago, e ka ba ka baka la go kgotlelela goba ka go bolela gore dinako di a fapana gomme dilo tšeo di bego di ileditšwe melokong ya pele ga di sa šoma. Mabapi le mafelelo, Samuel Miller yo e lego hlogo ya Sekolo sa Divinity sa Harvard o itše: “Kereke ge e le gabotse ga e etelele batho pele. E tšere thuto ya mehla ya rena gomme ya e amogela.” Mafelelo maphelong a bao ba lebeletšego dikerekeng tše bjalo bakeng sa tlhahlo e bile a nyamišago kudu.

Ka mo go fapanego, ge e be e bolela ka Dihlatse tša Jehofa, L’Eglise de Montréal, e lego pego ya ditaba ya beke le beke ya lefelong la mopišopo-mogolo wa Katholika wa Montreal, Canada, e itše: “Di na le ditekanyetšo tše lemogegago tša boitshwaro.” Barutiši ba bantši, bathwadi le bahlankedi ba mmušo ba dumelelana le seo. Ke’ng seo se ikarabelago ka botumo bjo?

Go ba o mongwe wa Dihlatse tša Jehofa go akaretša se se fetago go kgomarela thulaganyo e itšego ya ditumelo tša dithuto tša motheo le go nea bohlatse go ba bangwe ka ditumelo tše. Bokriste bja pele bo be bo tsebja e le “Tsela,” gomme Dihlatse tša Jehofa di lemoga gore bodumedi bja therešo lehono e swanetše go ba tsela ya bophelo. (Dit. 9:2, NW) Lega go le bjalo, go etša ge go be go le bjalo dilong tše dingwe, Dihlatse tša mehleng yeno ga se tša fihlelela gatee-tee kwešišo e leka-lekanego ya seo se akaretšwago ke se.

“Semelo Goba Kgwerano—Ke Eng e Swanetšego?”

Gaešita lege ba ile ba thoma ka keletšo e kwalago ya Mangwalo mabapi le go nyakega ga go ba bjalo ka Kriste, go gatelela moo ba bangwe ba Barutwana ba pele ba Beibele ba ilego ba go dira go “go aga semelo” bjalo ka ge ba be ba go bitša bjalo, go ile gwa bonala go nyenyefatša dibopego tše dingwe tša Bokriste bja kgonthe. Ba bangwe ba bona ba be ba bonala ba e-na le kgopolo ya gore go ba bonolo—ka mehla ba bonala e le ba botho le ba ba lokilego, ba bolela ka boleta, ba phema go bontšha kgalefo, ba bala Mangwalo letšatši le letšatši—go be go tla kgonthišetša go tsena ga bona legodimong. Eupja ba ba ile ba lahlegelwa ke pono ya therešo ya gore Kriste o neile balatedi ba gagwe modiro wo ba swanetšego go o dira.

Bothata bjo bo ile bja ahla-ahlwa ka go tia sehlogong sa “Semelo Goba Kgwerano—Ke Eng e Swanetšego?” tokollong ya May 1, 1926 ya Morokami (wa Seisemane).a Se ile sa bontšha gore maiteko a go ba le “semelo se se phethagetšego” mola ba le nameng a ile a dira gore ba bangwe ba kgaotše ka baka la go nolega moko, eupja ka nako e swanago a ile a tšweletša kgopolo ya “go itokafatša ka mo go feteletšego” go ba bangwe gomme ya ba dira gore ba lahlegelwe ke pono ya mohola wa sehlabelo sa Kriste. Ka morago ga go gatelela go dumela mading a Kriste ao a tšholotšwego, sehlogo se ile sa gatelela bohlokwa bja ‘go dira dilo’ tirelong e mafolofolo ya Modimo bakeng sa go nea bohlatse bja gore motho o phegelela tsela yeo e kgahlišago Modimo. (2 Pet. 1:5-10) Ka nako yeo, ge karolo e kgolo ya Bojakane e be e sa dutše e itira eka e kgomaretše ditekanyetšo tša Beibele tša boitshwaro, go gatelelwa mo ga modiro go ile gwa tiiša phapano magareng ga Dihlatse tša Jehofa le Bojakane. Phapano e ile ya ba e bonalago le go feta ge bohle bao ba ipolelago gore ke Bakriste ba be ba swanetše go lebeletšana le dikgang tša boitshwaro tšeo di bego di thoma go ata.

“Le Ilê Bootswa”

Tekanyetšo ya Bokriste mabapi le boitshwaro bja botona le botshadi ke kgale e boletšwe ka tsela e kwalago ka Beibeleng. “Se Modimo a se rataxo ké kxêthêxô ya lena, xore Le ilê bootswa. . . . Xobane se Modimo a re bileditšexo sôna xa se dithšila, ké kxêthêxô. Ké xôna, mo-nyatša-motho ó nyatša Modimo.” (1 Ba-Thes. 4:3-8) “Xo tšeana a xo xodišwê mo xohle, ’me maláô a a se bê le dithšila. Diotswa le ba ba xobošaxo tšeanô, Modimo ó tla ba sekiša.” (Ba-Heb. 13:4) “A xa Le tsebe xobane ba ba sa lokaxo ba ka se bê le kabêlô mmušong wa Modimo? Lesang xo iphora: Ba diotswa, . . . dihlôtlôlô, le ba xo dira dithšila le banna ka bôná, . . . xa ba na kabêlô mmušong wa Modimo.”—1 Ba-Kor. 6:9, 10.

Ka go Morokami (wa Seisemane), tlhokomelo e ile ya lebišwa tekanyetšong ye bakeng sa Bakriste ba therešo pejana ka November ya 1879. Eupja e be e sa ahla-ahlwe gantši goba ka mo go nabilego bjalo ka ge eka se e be e le bothata bjo bogolo gare ga Barutwana ba pele ba Beibele. Lega go le bjalo, ge kgopolo ya lefase e thoma go ba yeo e tlogelelago dilo kudu, tlhokomelo e oketšegilego e ile ya lebišwa molaong wo, kudu-kudu nywageng yeo e dikologilego Ntwa ya II ya Lefase. Se se be se nyakega ka gobane ba bangwe gare ga Dihlatse tša Jehofa ba be ba amogela kgopolo ya gore ge feela ba be ba swaregile ka go nea bohlatse, go hlepha go se nene boitshwarong bja botona le botshadi e be e fo ba taba ya motho ka noši. Ke therešo gore Morokami (wa Seisemane) wa March 1, 1935 o ile wa bolela ka mo go kwalago gore go tšea karolo bodireding bja tšhemo go be go sa nee tumelelo ya boitshwaro bjo bo gobogilego. Eupja ga se bohle bao ba ilego ba diriša keletšo yeo go bona ka noši. Ka gona, tokollong ya wona ya May 15, 1941, Morokami (wa Seisemane) o ile wa ahla-ahla taba ye gape, le ka mo go nabilego kudu sehlogong se se rego “Mehla ya Noage.” O ile wa hlalosa gore go nwelela kgobogong ya tša botona le botshadi ga mehleng ya Noage e be e le lebaka le lengwe leo ka lona Modimo a ilego a fediša lefase la mehleng yeo, gomme wa bontšha gore seo Modimo a se dirilego nakong yeo se beile mohlala wa seo a tlago go se dira mehleng ya rena. Ka leleme le le kwalago o ile wa lemoša gore mohlanka yo a kgomarelago potego go Modimo o be a ka se ke a neela karolo ya letšatši la gagwe go direng thato ya Morena, gomme ka morago ga diiri tšeo a nwelela ‘medirong ya nama.’ (Ba-Gal. 5:17-21) Se se ile sa hlaloswa ka mo go tšwelago pele ka go Morokami (wa Seisemane) wa July 1, 1942 ka sehlogo se sengwe seo se ilego sa sola boitshwaro bjo bo bego bo sa dumelelane le ditekanyetšo tša Beibele tša boitshwaro bakeng sa batho bao ba sego lenyalong le bao ba lego lenyalong. Ga go motho yo a bego a swanetše go dira phetho ya gore go ba le karolo boboleding bja phatlalatša bja molaetša wa Mmušo e le o mongwe wa Dihlatse tša Jehofa go be go nea tumelelo ya bophelo bjo bo hlephilego. (1 Ba-Kor. 9:27) Ge nako e dutše e e-ya, gaešita le megato e tiilego kudu e be e tla gatwa bakeng sa go šireletša bohlweki bja phuthego bja boitshwaro.

Ba bangwe bao ba bego ba bontšha kganyogo ya go ba Dihlatse tša Jehofa ka nako yeo ba be ba goletše mafelong ao go ona lenyalo la boitekelo le bego le amogelwa, moo dikopano tša botona le botshadi magareng ga batho bao ba beeletšanego di bego di dumelelwa, goba moo ditswalano tša tumelelano tša go dula gotee magareng ga batho bao ba bego ba sa nyalana ka molao di bego di lebelelwa e le tša tlhago. Banyalani ba sego kae ba be ba katanela go phema dikopano tša botona le botshadi. Batho ba bangwe, gaešita lege ba be ba sa hlala ba be ba arogane ka mo e sego ga bohlale le balekane ba bona. Go nea tlhahlo e nyakegago, nywageng ya bo-1950 Morokami o ile wa ahla-ahla maemo a ka moka, wa hlalosa boikarabelo bja lenyalo, wa gatelela go iletša ga Beibele bootswa gomme wa hlalosa seo bootswa bo lego sona, e le gore go se be le go se kwešiše lege e le gofe.b—Dit. 15:19, 20; 1 Ba-Kor. 6:18.

Mafelong ao go ona batho bao ba bego ba thoma go kopanela le mokgatlo wa Jehofa ba bego ba sa lebelele ditekanyetšo tša Beibele tša boitshwaro e le tšeo di tlamago, se se ile sa newa tlhokomelo e kgethegilego. Ka gona ka 1945 ge N. H. Knorr, e lego mopresidente wa boraro wa Mokgatlo wa Watch Tower a be a le Costa Rica, o ile a neela polelo yeo e lego mabapi le boitshwaro bja Bokriste yeo go yona a itšego: “Ka moka ga lena bao le lego mo bošegong bja lehono bao le dulago le mosadi eupja lenyalo la lena le sa rulaganywa ka molao, ke le nea keletšo. E-yang Kerekeng ya Katholika gomme le ngwadiše maina a lena bjalo ka ditho, ka gobane moo ke mo le kago go dira dilo tše. Eupja wo ke mokgatlo wa Modimo, gomme le ka se kgone go dira dilo tše mo.”

Go tloga nywageng ya bo-1960 ge basodoma ba thoma go se sa fihla ditiro tša bona, dikereke tše dintši di ile tša ngangišana ka taba gomme ka morago tša ba amogela e le ditho tša tšona. Dikereke tše dingwe mo nakong ye di bile di kgetha basodoma go ba baruti. Go thuša batho bao ba botegago bao ba bego ba e-na le dipotšišo ka ditaba tše, dipuku tša Dihlatse tša Jehofa gape di ile tša ahla-ahla ditaba tše. Eupja gare ga Dihlatse ga se gwa ba le pelaelo mabapi le kamoo bosodoma bo swanetšego go lebelelwa ka gona. Ka baka la’ng go sa ba bjalo? Ka gobane ga di lebelele melao ya Beibele bjalo ka ge eka ke dikgopolo tša batho ba mehleng e mengwe. (1 Ba-Thes. 2:13) Ka lethabo di ithuta Beibele le basodoma e le gore ba ka ithuta melao ya Jehofa, gomme batho ba bjalo ba ka ya dibokeng tša Dihlatse gore ba theetše, eupja ga go le o tee yo a tšwelago pele a dira bosodoma yo e ka bago o mongwe wa Dihlatse tša Jehofa.—1 Ba-Kor. 6:9-11; Juda 7.

Nywageng ya morago bjale go ba le dikopano tša botona le botshadi ga bafsa bao ba sa nyalanago go fetogile selo se se tlwaetšwego lefaseng. Bafsa bao ba lego ka malapeng a Dihlatse tša Jehofa ba ile ba ikwa ba gateletšegile, gomme ba bangwe ba thoma go amogela ditsela tša lefase leo le ba dikologilego. Mokgatlo o ile wa lokiša boemo bjo bjang? Dihlogo tšeo di reretšwego go thuša batswadi le bafsa go lebelela dilo go ya ka Mangwalo di ile tša gatišwa ka go Morokami le Phafoga! Dipapadi tšeo di bontšhago ditiragalo tša kgonthe bophelong di ile tša bapalwa dikopanong bakeng sa go thuša bohle go lemoga seenywa sa go gana ditekanyetšo tša Beibele tša boitshwaro le sa mehola ya go kwa melao ya Modimo. E nngwe ya tša pele tša tše yeo e ilego ya bapalwa sethaleng ka 1969 e be e e-na le sehlogo se se rego “Meetlwa le Melaba di Tseleng ya yo a Ipušago.” Go ile gwa lokišeletšwa dipuku tše di kgethegilego bakeng sa go thuša bafsa go lemoga bohlale bja keletšo ya Beibele. Tše di be di akaretša Bofsa bja Gago—Go Holwa Kudu ke Bjona (yeo e gatišitšwego ka 1976 [ka Seisemane]) le Dipotšišo tša Bafsa le Dikarabo tše Šomago (yeo e gatišitšwego ka 1989). Bagolo ba lefelong leo ba ile ba nea thušo ya motho ka noši ya moya go batho le go malapa. Diphuthego tša Dihlatse tša Jehofa gape di šireletšwa ka go leleka bafoši bao ba sa sokologego.

Go senyega ga boitshwaro bja lefase ga se gwa lebiša kgopolong ya go tlogelela dilo gare ga Dihlatse tša Jehofa. Ka mo go fapanego, Sehlopha se Bušago sa Dihlatse tša Jehofa se gateletše ka mo go oketšegilego go nyakega ga go phema e sego feela ditiro tše di gobogilego tša kopano ya botona le botshadi eupja le ditutuetšo le maemo ao a senyago melao e mebotse ya boitshwaro. Nywageng e masome a mararo e fetilego, se ile sa nea taelo bakeng sa go tiiša batho malebana le “dibe tša ka sephiring” tše bjalo ka go tsoša ditho tša pelego le go ba phafošetša kotsi ya dipuku tšeo di kgothaletšago bootswa, dipaesekopo tšeo di gobogilego le mmino wo o nago le mafelelo a gobošago. Ka gona lege boitshwaro bja lefase bo ile bja senyega, bja Dihlatse tša Jehofa bo ile bja phagama.

Bophelo bja Lapa bjo bo Laolwago ke Ditekanyetšo tša Modimo

Go kgomarela ka go tia ditekanyetšo tša Beibele tša boitshwaro bja botona le botshadi e bile mo go holago kudu bophelo bja lapa bja Dihlatse tša Jehofa. Eupja go ba o mongwe wa Dihlatse tša Jehofa ga se kgonthišetšo ya gore motho a ka se ke a ba le mathata a lapa. Lega go le bjalo, Dihlatse di kgodišegile gore Lentšu la Modimo le nea keletšo e kaone-kaone mabapi le kamoo go ka lebeletšanwago ka gona ka katlego le mathata a bjalo. Di hwetša ditokišetšo tše dintši tšeo di lokišetšwago ke mokgatlo bakeng sa go di thuša go diriša keletšo yeo; le gona ge di e latela, ruri mafelelo e ba a holago.

Pejana ka 1904, volume ya botshelela ya Studies in the Scriptures e ile ya nea tlhaloso e nabilego ya boikarabelo bja lenyalo le ditlamo tša botswadi. Ga e sa le go tloga nakong yeo, dihlogo tše makgolo di ile tša gatišwa gomme gwa neelwa dipolelo tše dintši phuthegong e nngwe le e nngwe ya Dihlatse tša Jehofa bakeng sa go thuša setho se sengwe le se sengwe sa lapa go lemoga karolo ya sona yeo se e neilwego ke Modimo. Thuto ye ya bophelo bjo bo thabilego bja lapa ga se feela ya banyalani ba bafsa eupja ke lenaneo leo le tšwelago pele leo le akaretšago phuthego ka moka.—Ba-Ef. 5:22–6:4; Ba-Kol. 3:18-21.

Na Segadikane se be se tla Amogelwa?

Gaešita lege meetlo yeo e kgomago lenyalo le bophelo bja lapa e fapana go ya ka dinaga, Dihlatse tša Jehofa di lemoga gore ditekanyetšo tšeo di hlalositšwego ka Beibeleng di šoma gohle. Ge modiro wa tšona o be o thoma Afrika lekgolong le la bo-20 la nywaga, Dihlatse di ile tša ruta moo go etša ge di ruta gohle gore lenyalo la Bokriste le dumelela molekane o tee feela wa lenyalo. (Mat. 19:4, 5; 1 Ba-Kor. 7:2; 1 Tim. 3:2) Le gona, go be go e-na le ba makgolo bao ba ilego ba amogela go pepentšha ga Beibele borapedi bja diswantšho gomme ba amogela ka lethabo seo Dihlatse tša Jehofa di bego di se ruta mabapi le Mmušo wa Modimo eupja e le bao ba ilego ba kolobetšwa ka ntle le go tlogela segadikane. Go lokiša boemo bjo, Morokami (wa Seisemane) wa January 15, 1947 o ile wa gatelela gore Bokriste ga bo dumelele segadikane, go sa šetšwe seo moetlo wa lefelong leo o lego sona. Lengwalo leo le ilego la romelwa diphuthegong ka moka le ile la lemoša bohle bao ba ipolelago gore ke Dihlatse tša Jehofa eupja ba le lenyalong la segadikane gore ba be ba dumeletšwe dikgwedi tše tshelelago bakeng sa go dumelelanya ditaba tša bona tša lenyalo le tekanyetšo ya Beibele. Se se ile sa tiišwa ke polelo yeo e ilego ya newa ke Ngwanabo rena Knorr nakong ya ge a etetše Afrika ngwageng wona woo.

Kua Nigeria, go be go e-na le batho ba bantši ba lefase bao ba ilego ba bolelela pele gore maiteko a go tlogela segadikane gare ga Dihlatse tša Jehofa a be a tla bolela go tlogela ga batho mokgatlo woo. Ke therešo gore ga se bohle bao ba lego lenyalong la segadikane bao ba bego ba kolobeditšwe pejana e le Dihlatse, bao ba ilego ba dira diphetogo tše di nyakegago gaešita le ka 1947. Ka mohlala Asuquo Akpabio, e lego molebeledi wa mosepedi o anega gore Hlatse yeo a bego a dula le yona kua Ifiayong e ile ya mo tsoša bošego-gare gomme ya mo kgopela gore a fetoše seo se bego se tsebišitšwe mabapi le go nyakega ga go ba le molekane o tee wa lenyalo. Ka ge a ile a gana go dira bjalo, mong wa lapa o ile a mo gapeletša go tloga bošegong bjoo go e-na pula ya matloro-tloro.

Eupja go rata Jehofa go ile gwa nea ba bangwe matla ao a nyakegago a go kwa melao ya gagwe. Ba sego kae feela ba bona ke ba. Kua Zaire monna yo e bego e le Mokatholika e bile a nyetše segadikane o ile a leleka ba babedi ba basadi ba gagwe e le gore a be o mongwe wa Dihlatse tša Jehofa, gaešita lege go leleka mmamoratwa ka gobane e be e se ‘mosadi wa bofsa bja gagwe’ e be e le teko e thata kudu ya tumelo ya gagwe. (Die. 5:18) Kua Dahomey (yeo bjale e lego Benin), yo e bego e le mo-Methodist yo a bego a sa dutše a e-na le basadi ba bahlano o ile a fenya mapheko a thata kudu a tša molao e le gore a hwetše ditlhalo tše di nyakegago gore a swanelegele kolobetšo. Lega go le bjalo, o ile a tšwela pele a fepa bao e bego e le basadi ba gagwe le bana ba bona, go etša ge ba bangwe bao ba lelekilego basadi ba bobedi ba dirile. Warigbani Whittington wa mo-Nigeria e be e le wa bobedi wa basadi ba babedi ba monna wa gagwe. Ge a be a dirile phetho ya gore go kgahliša Jehofa Modimo wa therešo e be e le selo sa bohlokwa kudu go yena, o ile a itebanya le bogale bja monna wa gagwe gomme ka morago le bja lapa la gabo. Monna wa gagwe o ile a mo dumelela gore a tloge gotee le bana ba gagwe ba babedi, eupja a se mo nee thušo ya tša ditšhelete—gaešita le ya dinamelwa. Lega go le bjalo o itše: ‘Ga go le o tee wa mehola ya dilo tše di bonagalago yeo ke e tlogetšego wo o ka bapišwago le go kgahliša Jehofa.’

Go Thwe’ng ka Tlhalo?

Dinageng tša ka Bodikela segadikane ga se dirwe ka bophara, eupja dikgopolo tše dingwe tšeo di ganetšanago le Mangwalo ke tšeo di atilego. E nngwe ya tše ke kgopolo ya gore go kaone go hlala go e na le go ba le lenyalo le le sa thabago. Nywageng ya morago bjale ba bangwe ba Dihlatse tša Jehofa ba ile ba thoma go ekiša moya wo, ba kgopela tlhalo metheong e swanago le “go se dumelelane.” Dihlatse di ile tša swaragana bjang le se? Ka mehla mokgatlo o dira lesolo le matla la thuto mabapi le pono ya Jehofa ka tlhalo bakeng sa go hola Dihlatse tša kgale gotee le ba dikete tše makgolo bao ba okeletšwago palong ya tšona ngwaga le ngwaga.

Morokami o ile wa lebiša tlhokomelo tlhahlong efe ya Beibele? Gare ga tše dingwe o lebišitše go e latelago: Pegong ya Beibele ya lenyalo la pele la batho go gatelelwa botee bja monna le mosadi; e re: ‘Monna o gomarela mosadi wa gagwe, gomme ba ba nama e tee.’ (Gen. 2:24) Ka morago kua Isiraeleng, Molao o ile wa iletša bohlotlolo gomme wa ahlolela lehu go motho lege e le mang yo a bo dirago. (Doit. 22:22-24) Go be go dumelelwa tlhalo metheong e mengwe ka ntle le bohlotlolo, eupja e le feela ‘ka baka la bothata bja dipelo tša bona,’ bjalo ka ge Jesu a hlalositše. (Mat. 19:7, 8) Jehofa o ile a lebelela bjang tiro ya go lahla molekane wa motho wa lenyalo bakeng sa go nyala o mongwe? Maleaki 2:16 e re: “Thlalô ke e hloile.” Lega go le bjalo, o ile a dumelela bao ba hladilego go dula ka phuthegong ya Isiraele. Moo, ge e ba ba be ba amogela go laya ga Jehofa batho ba gagwe, pelo ya bona e thata wa lefsika e be e ka tšeelwa sebaka ke pelo e boleta ge nako e dutše e e-ya, yeo e bego e ka bontšha lerato la kgonthe la go rata ditsela tša gagwe.—Bapiša le Hesekiele 11:19, 20.

Morokami o boletše leboelela gore ge Jesu a be a bolela ka tlhalo go etša ge e be e dirwa Isiraeleng ya kgale, o ile a bontšha gore go be go swanetše go hlongwa tekanyetšo e phagamego kudu gare ga balatedi ba gagwe. O boletše gore ge e ba motho lege e le ofe a hladile mosadi wa gagwe e se ka lebaka la bootswa (por·neiʹa, “kopano yeo e sego ya molao”) gomme a nyala o mongwe, o be a tla ba a dira bohlotlolo; le ge e ba a se a nyala gape, o be a tla ba a dira mosadi wa gagwe mohlaselwa wa bohlotlolo. (Mat. 5:32; 19:9) Ka gona, Morokami o hlalositše gore go Bakriste, tlhalo lege e le efe ke taba e kgolo kudu go feta kamoo e bego e le ka gona Isiraeleng. Lege Mangwalo a sa laele gore motho lege e le ofe yo a hlalago a lelekwe phuthegong, bao ba dirago bohlotlolo gomme ba sa sokologe ba kgaolwa ke diphuthego tša Dihlatse tša Jehofa.—1 Ba-Kor. 6:9, 10.

Go bile le diphetogo nywageng ya morago bjale kgopolong ya lefase mabapi le lenyalo le bophelo bja lapa. Go sa šetšwe se, Dihlatse tša Jehofa di tšwetše pele go kgomarela ditekanyetšo tšeo di neilwego ke Modimo, e lego Mothomi wa lenyalo bjalo ka ge di hlalositšwe ka Beibeleng. Ka go diriša tlhahlo yeo, di katanetše go thuša batho ba dipelo tše di botegago go lebeletšana ka katlego le maemo a thata ao ba bantši gakaakaa ba ikhwetšago ba le go ona.

Ka baka leo, go dirilwe diphetogo tše kgolo kudu maphelong a ba bantši bao ba amogetšego tlhahlo ya Beibele go Dihlatse tša Jehofa. Banna bao pele ba bego ba betha basadi, banna bao ba bego ba sa rwale boikarabelo bja bona, banna bao ba bego ba nea dilo tše di bonagalago eupja ba sa nee tša maikwelo le tša moya—ba dikete ba ba bjalo ba fetogile banna le bo-tate ba ba nago le lerato bao ba hlokomelago malapa a bona gabotse. Basadi bao ba bego ba ipuša ka manganga, basadi bao ba bego ba hlokomologile bana ba bona gomme ba sa itlhokomele gaešita le magae a bona—ba bantši ba ba ba fetogile basadi bao ba hlomphago bohlogo le go phegelela tsela yeo e ba dirago gore e be bao ba ratwago kudu ke banna le bana ba bona. Bafsa bao ka ntle le dihlong ba bego ba sa kwe batswadi ba bona le bao e bego e le marabele malebana le setšhaba ka kakaretšo, bafsa bao ba bego ba senya maphelo a bona ka noši ka dilo tšeo ba bego ba di dira gomme ba kweša dipelo tša batswadi ba bona bohloko—ba bantši ba ba ba phela maphelo ao a nago le morero a go boifa Modimo, gomme se se thušitše go fetoša semelo sa bona.

Ee, lebaka le bohlokwa la katlego ka lapeng ke go botegelana. Gape potego ke ya bohlokwa ditswalanong tše dingwe.

Potego e Nyakega go Fihla Bokgoleng Bofe?

Dihlatse tša Jehofa di lemoga gore potego e nyakega selong se sengwe le se sengwe seo di se dirago. Di šupa mangwalong a swanago le a latelago e le motheo wa kgopolo ya tšona: Jehofa ka boyena ke “Modimo wa therešo.” (Ps. 31:5, NW) Ka lehlakoreng le lengwe, Jesu o itše Diabolo ke “tatago maaka.” (Joh. 8:44, NW) Ka gona ke mo go kwalago gore gare ga dilo tšeo Jehofa a di hloilego ke “’leme la maaká.” (Die. 6:16, 17) Lentšu la gagwe le re botša gore: “Bjalo ka ge le lahlile maaka, bolelang therešo.” (Ba-Ef. 4:25, NW) Ga se feela gore Bakriste ba swanetše o bolela therešo, eupja bjalo ka moapostola Paulo ba swanetše go ‘itshwara ka go botega dilong tšohle.’ (Ba-Heb. 13:18) Ga go na dikarolo tša bophelo moo Dihlatse tša Jehofa di ka dirišago ka tshwanelo thulaganyo e nngwe ya ditekanyetšo.

Ge Jesu a be a etetše legaeng la molekgetho Sakeo, monna yoo o ile a lemoga gore mekgwa ya gagwe ya kgwebo e be e le e sa swanelago, gomme o ile a gata megato ya go dira dipušetšo bakeng sa ditiro tša nakong e fetilego tša bohwirihwiri. (Luka 19:8) Nywageng ya morago bjale, batho ba bangwe bao ba ilego ba thoma go kopanela le Dihlatse tša Jehofa ba ile ba gata mogato o swanago e le gore ba be le letswalo le le hlwekilego pele ga Modimo. Ka mohlala, kua Sepania lehodu le le retetšego le ile la thoma go ithuta Beibele le Dihlatse tša Jehofa. Go se go ye kae letswalo la lona le ile la thoma go le ja; ka gona le ile la bušetša dithoto tšeo di utswitšwego go yo e bego e le mothwadi wa lona le go baagišani ba lona, gomme la iša dilo tše dingwe maphodiseng. Le ile la laelwa gore le lefe tšhelete ya kotlo le go šoma kgolegong ka nako e kopana, eupja bjale le na le letswalo le le hlwekilego. Kua Engelane, ka morago ga dikgwedi tše pedi feela tša go ithuta Beibele le o mongwe wa Dihlatse tša Jehofa, yo e bego e le lehodu la taamane o ile a ikiša maphodiseng ao a bego a tlabegile; a be a mo nyaka ka dikgwedi tše tshelelago. Nywaga e mebedi le seripa yeo a ilego a e fetša kgolegong, o ile a ithuta Beibele ka mafolofolo gomme a ithuta go abelana le ba bangwe therešo ya Beibele. Ka morago ga ge a lokolotšwe o ile a itšweletša gore a kolobetšwe e le o mongwe wa Dihlatse tša Jehofa.—Ba-Ef. 4:28.

Botumo bja Dihlatse tša Jehofa bja potego bo tsebja kudu. Bathwadi ba lemogile gore ga se feela gore Dihlatse di ka se ba utswetše eupja di ka se ke tša bolela maaka goba tša ngwala pego ya maaka go ya ka taelo ya bathwadi ba tšona—aowa, gaešita lege di tšhošetšwa ka go lahlegelwa ke mošomo wa tšona. Go Dihlatse tša Jehofa tswalano e botse le Modimo ke ya bohlokwa kudu go feta go amogelwa ke motho lege e le ofe. Di lemoga gore go sa šetšwe moo di lego gona goba seo di se dirago, “tšohle ó di bôna di hlobotše di khurumolotšwe. Xomme ké Yêna-eo re naxo le taba le Yêna.”—Ba-Heb. 4:13; Die. 15:3.

Kua Italy kuranta ya La Stampa e boletše mabapi le Dihlatse tša Jehofa gore: “Di dira seo di se rutago . . . Ditekanyetšo tše phethagetšego tša boitshwaro tša go rata moagišani, go gana matla a go buša, go se be ba šoro le potego ya motho ka noši (tšeo go Bakriste ba bantši e lego ‘melao ya Sontaga’ yeo e lokilego feela ge e bolelwa phuliphiting) di tsena bophelong bja tšona bja ‘letšatši le letšatši.’” Kua United States, Louis Cassels, e lego mongwadi wa tša bodumedi wa United Press International, Washington, D.C., o ngwadile gore: “Dihlatse di kgomarela ditumelo tša tšona ka potego e kgolo, gaešita lege go dira bjalo e le mo go nyakago mo gontši kudu.”

Lebaka Leo ka Lona go Petšha e sa Kago ya ba Kgang Gare ga Tšona

Dinakong tše di fetilego, potego e be e tswalanywa ka kakaretšo le go ikemišetša go šoma ka thata. Go petšha, ke gore go lekela hlogong ka tekanyo e itšego ya tšhelete ka go petšhetša mafelelo a papadi goba tiragalo e nngwe go be go nyatšwa ke setšhaba ka kakaretšo. Eupja ge moya wa boithati wa go nyaka lehumo o dutše o ata lekgolong la bo-20 la nywaga, go petšha—ga molao goba mo e sego ga molao—go ile gwa aparela. Go thekgwa e sego feela ke lefase la bosenyi eupja gape le ke dikereke le mebušo ya lefase bakeng sa go oketša tšhelete. Dihlatse tša Jehofa di ile tša lebeletšana bjang le phetogo ye ya kgopolo ya setšhaba? Motheong wa melao ya motheo ya Beibele.

Go etša ge go ile gwa hlaloswa ka dipukung tša tšona, ga go na molao o lebanyago ka Beibeleng wo o rego, O se ke wa petšha. Eupja moputso wa go petšha ke o mobe ka mehla, gomme moputso wo wa go bola o be o dutše o pepentšhwa ke Morokami le Phafoga! ka seripa-gare sa ngwaga-kgolo. Go oketša moo, dimakasine tše di bontšhitše gore go petšha ka sebopego lege e le sefe go akaretša dikgopolo tšeo Beibele e lemošago malebana le tšona. Ka mohlala, go rata tšhelete: “Go rata tšhelete ke modu wa mehuta ka moka ya dilo tše di gobatšago.” (1 Tim. 6:10, NW) Le boithati: “O se ke wa duma ka boithati . . . selo lege e le sefe seo e lego sa wa geno.” (Doit. 5:21, NW; bapiša le 1 Ba-Korinthe 10:24.) Gape le megabaru: “Le se kê la hlakana le motho yo Le rexo ké ngwana weno, . . . a ba wa mexabaru.” (1 Ba-Kor. 5:11) Go oketša moo, Beibele e lemoša malebana le go ipiletša go “Mahlatse” bjalo ka ge eka e be e le mohuta o itšego wa matla ao a phagametšego motho ao a tlago go bontšha lerato le le kgethegilego. (Jes. 65:11) Ka ge di tsenya ditemošo tše tša Mangwalo pelong, Dihlatse tša Jehofa di phema go petšha ka go tia. Ga e sa le go tloga ka 1976 di ile tša dira maiteko a kgethegilego a go phema go ba le batho lege e le bafe gare ga tšona bao mediro ya bona ya boiphedišo e bego e tla ba hlaola gabotse e le karolo ya mokgatlo wa tša go petšha.

Le ka mohla go petšha ga se ya ka ya ba kgang ya kgonthe gare ga Dihlatse tša Jehofa. Di a tseba gore go e na le go thekga moya wa go boelwa ka go amoga ba bangwe, Beibele e di kgothaletša go šoma ka diatla tša tšona, go botega tabeng ya go hlokomela seo di se neilwego, go ba tšeo di fago kudu, go abelana le badiidi. (Ba-Ef. 4:28; Luka 16:10; Ba-Roma 12:13; 1 Tim. 6:18) Na se se lemogwa gatee-tee ke ba bangwe bao ba dirišanago le tšona? Ee, kudu-kudu se lemogwa ke bao ba nago le ditirišano tša kgwebo le tšona. E be e se mo go sa tlwaelegago go bathwadi ba mediro ya boiphedišo go tsoma Dihlatse tša Jehofa e le bathwalwa ka baka la go šoma ga tšona ka šedi le go ba tšeo di ka botwago. Ba lemoga gore ke bodumedi bja Dihlatse bjo bo di dirago mohuta wa batho bao di lego bona.

Go Thwe’ng ka Motšoko le go Dirišwa Gampe ga Dihlare-tagi?

Beibele ga e bolele ka motšoko gaešita le go bolela dihlare-tagi tše dingwe tše dintši tšeo di dirišwago gampe lehono ka maina. Eupja e nea tlhahlo yeo e thušitšego Dihlatse tša Jehofa go hlaola tsela ya boitshwaro yeo e tlago go kgahliša Modimo. Ka gona, go tloga morago kua ka 1895 ge Morokami (wa Seisemane) o be o hlalosa ka go dirišwa ga motšoko, o ile wa lebiša tlhokomelo go 2 Ba-Korinthe 7:1 yeo e rego: “Lena Baratwa! Xe re holofedišitšwe dilô tšeo, xôna a re hlapeng re tšwê thšila tšohle tša nama le tša môya, re phêthê kxêthêxô ya rena rè boifa Modimo.”

Keletšo yeo e ile ya bonala e le e lekanego ka nywaga e mentši. Eupja ge dikhamphani tša motšoko di dutše di diriša phatlalatšo ya papatšo bakeng sa go lokafatša go kgoga, gomme ka morago go dirišwa gampe ga dihlare-tagi “tšeo e sego tša molao” go aparela, go ile gwa nyakega mo go oketšegilego. Go ile gwa gatelelwa melao e mengwe ya motheo ya Beibele: go hlompha Jehofa, Monei wa bophelo (Dit. 17:24, 25); go rata moagišani (Jak. 2:8), le therešo ya gore motho yo a sa ratego wa gabo ga a rate Modimo e le ka kgonthe (1 Joh. 4:20); gape le go kwa babuši ba lefase (Tito 3:1). Go ile gwa hlaloswa gore lentšu la Segerika phar·ma·kiʹa, leo ge e le gabotse le bolelago “go diriša dihlare-tagi” le ile la dirišwa ke bangwadi ba Beibele bakeng sa go šupa “go diriša bonoge” ka baka la go dirišwa ga dihlare-tagi medirong ya bonoge.—Ba-Gal. 5:20.

Morago kua ka 1946, makasine wa Consolation o ile wa pepentšha sebopego seo gantši e lego sa boradia sa dipolelo tša kgonthišetšo tšeo di lefelelwago tšeo di dirišwago diphatlalatšong tša papatšo tša disekerete. Eitše ge go hwetšagala bohlatse bja tša thutamahlale, mohlatlami wa Consolation e lego Phafoga! le yona e ile ya phatlalatša bohlatse bja gore go diriša motšoko go baka kankere, bolwetši bja pelo, go gobatšwa ga ngwana yo a sa hlwago a belegwa wa mosadi yo a imilego le kgobalo go batho ba ba sa kgogego bao ba gapeletšwago go hema moya wo o tletšego muši, gotee le bohlatse bja gore motšoko o a lemalelwa. Tlhokomelo e ile ya lebišwa go mafelelo a tagago a patše le bohlatseng bja gore go dirišwa ga yona go ka baka kgobalo ya bjoko. Ka mo go swanago dikotsi tšeo di išago lehung tša dihlare-tagi tše dingwe tšeo di lemalelwago di ile tša ahla-ahlwa leboelela bakeng sa go hola babadi ba dipuku tša Watch Tower.

Nako e telele pele ga ge makgotla a mmušo a dumela tekanyo yeo ka yona a swanetšego go lemoša batho ka kotsi ya go diriša motšoko, Morokami (wa Seisemane) o ile wa hlalosa tokollong ya wona ya March 1, 1935 gore ga go motho yo a bego a diriša motšoko yo a ka bago setho sa bašomi ba ntlong-kgolo ya Watch Tower Bible and Tract Society goba go ba o mongwe wa baemedi ba yona bao ba kgethilwego. Ka morago ga ge bahlanka ka moka ka diphuthegong tša Dihlatse tša Jehofa ba kgethilwe ke Mokgatlo (e lego thulaganyo yeo e thomilego ka 1938), Morokami (wa Seisemane) wa July 1, 1942 o ile wa hlalosa gore kiletšo e lego mabapi le go dirišwa ga motšoko e be e dira le go bahlanka ba ka moka bao ba kgethilwego. Mafelong a mangwe go ile gwa feta nywaga e mentši pele ga ge e ka dirišwa ka mo go feletšego. Lega go le bjalo, bontši bja Dihlatse tša Jehofa di ile tša arabela gabotse keletšong ya Mangwalo le mohlaleng o mobotse wa bao ba etelelago pele gare ga tšona.

E le mogato o tšwelago pele wa go dirišwa mo go tsepamego ga keletšo yeo ya Beibele, ga go na motho lege e le ofe yo a bego a sa dutše a kgoga yo a bego a amogelwa gore a kolobetšwe go tloga ka 1973 go ya pele. Dikgweding tše di latetšego, bao ba bego ba akaretšwa ka mafolofolo go tšweletšeng motšoko goba go godišeng go rekišwa ga motšoko ba ile ba thušwa go lemoga gore ba be ba ka se tšwele pele ba dira seo gomme ba amogelwa e le Dihlatse tša Jehofa. Keletšo ya Lentšu la Modimo e swanetše go dirišwa ka mo go tsepamego sebopegong se sengwe le se sengwe sa bophelo. Go dirišwa mo go bjalo ga melao ya motheo ya Beibele tirišong ya motšoko, patše le tšeo di bitšwago dihlare-tagi tše thata go ile gwa šireletša Dihlatse. Ka go dirišwa ga Mangwalo, gape ba ile ba kgona go thuša batho ba dikete tše dintši bao maphelo a bona a bego a sentšwe ke go dirišwa gampe ga dihlare-tagi.

Na Dino tše di Tagago ke tše di Fapanego?

Dipuku tša Watch Tower ga se tša amogela pono ya gore go dirišwa ga dino tše di tagago go swana le go dirišwa gampe ga dihlare-tagi. Ka baka la’ng di sa dira bjalo? Di hlalosa gore: Mmopi o tseba kamoo re bopilwego ka gona, gomme Lentšu la gagwe le dumelela go dirišwa ga dino tše di tagago ka go lekanetša. (Ps. 104:15; 1 Tim. 5:23) Eupja gape Beibele e lemoša malebana le ‘go nwa kudu,’ gomme e sola botagwa ka go tia.—Die. 23:20, 21, 29, 30; 1 Ba-Kor. 6:9, 10; Ba-Ef. 5:18.

Ka ge go nwa dino tše di tagago ka go fetišiša go be go senya maphelo a batho ba bantši, Charles Taze Russell ka boyena o ile a kgetha go di phema ka mo go feletšego. Lega go le bjalo, o ile a dumela gore Jesu o ile a diriša beine. Lekgolong la bo-19 la nywaga le karolong ya pele ya lekgolo la bo-20 la nywaga, batho ka kakaretšo ba be ba galefile o šoro ka baka la go iletšwa ka molao ga bjala kua United States. Morokami o ile wa bontšha kwelobohloko go bao ba bego ba leka go lwantšha kotsi ya bjala, eupja ga se wa ka wa tlatša lesolo la bona la go dira gore go ntšhwe melao ya kiletšo. Lega go le bjalo, makasine o ile wa hlalosa ka go tsepama tshenyo yeo e bakwago ke go nwa ka mo go feteletšego gomme wa bolela gantši gore go be go tla ba kaone go phema beine le bjala ka mo go feletšego. Bao ba bego ba ikwa gore ba ka diriša bjala ka mo go lekaneditšwego ba ile ba kgothaletšwa go ela hloko Ba-Roma 14:21 yeo e rego: “Ké mo xo botse xe O sa je nama, Ò sa nwe sedila, Ò lesa se se kxopišaxo ngwana weno.”

Lega go le bjalo, ka 1930 ge mookamedi wa Lekgotla-kganetšo la Thekišo le Tirišo ya Bjala kua United States a be a e-ya bokgoleng bja go bolela phatlalatša gore mokgatlo wa gagwe o be o “hlomilwe ke Modimo,” J. F. Rutherford yo e bego e le mopresidente wa Mokgatlo wa Watch Tower ka nako yeo o ile a diriša sebaka seo go nea dipolelo radiong a bontšha gore polelo e bjalo e be e lekana le go senya Modimo leina. Ka baka la’ng? Ka gobane Lentšu la Modimo ga le thibele go dirišwa gohle ga beine; ka gobane melao ya kiletšo e be e sa thibele botagwa, e lego seo Modimo a se solago; le ka gobane melao ya kiletšo go e na le moo e bakile go tšweletšwa le go abja mo e sego ga molao ga bjala le go senyega ga pušo.

Go dirišwa ga dino tše di tagago goba go di phema go lebelelwa e le taba ya motho ka noši gare ga Dihlatse tša Jehofa. Eupja di kgomarela molao wa Mangwalo wa gore balebeledi e swanetše go ba ba “mekxwa e botse.” Polelo yeo e fetoletšwe go tšwa lentšung la Segerika ne·phaʹli·on leo ge e le gabotse le bolelago ‘go hlaphogelwa; go phema beine, e ka ba ka mo go feletšego goba bonyenyane go phema go dirišwa ga yona ka go se lekanetše.’ Bahlanka ba bodiredi le bona e swanetše go ba banna ba ba sa ‘ineelago go nwa sedila.’ (1 Tim. 3:2, 3, 8) Ka gona bao ba nwago kudu ga ba swanelegele ditokelo tša tirelo e kgethegilego. Therešo ya gore bao ba etelelago pele gare ga Dihlatse tša Jehofa ba bea mohlala o mobotse e ba dira gore ba bolele ka bolokologi ge ba thuša ba bangwe bao ba ka bago ba e-na le tshekamelo ya go ithekga ka dino tše di tagago bakeng sa go lebeletšana le kgateletšo, goba ge e le gabotse ba swanelwa ke go bo phema ka mo go feletšego gore ba dule ba hlaphogetšwe. Mafelelo ke afe?

E le mohlala feela, pego ya ditaba e tšwago Afrika borwa-bogare e re: “Go tšwa dipegong ka moka, mafelong ao go ona Dihlatse tša Jehofa e lego tše dintši gare ga ma-Afrika bjale ke mafelo ao a se nago mathata go feta a mangwe ka moka. Ruri e bile tšeo di ganetšanago ka matla le bahlohleletši ba mpherefere, boloi, botagwa le bošoro bja mohuta lege e le ofe.”—The Northern News (Zambia).

Tsela e nngwe e bohlokwa yeo boitshwaro bja Dihlatse tša Jehofa bo fapanago ka yona le bja lefase e mabapi le—

Go Hlompha Bophelo

Tlhompho e bjalo e theilwe go lemogeng therešo ya gore bophelo ke mpho e tšwago go Modimo. (Ps. 36:9; Dit. 17:24, 25) E akaretša go lemoga gore gaešita le bophelo bja ngwana yo a sa hlwago a belegwa ke bja bohlokwa mahlong a Modimo. (Ek. 21:22-25; Ps. 139:1, 16) E ela hloko gore “motho mang le mang wa rena ó tlo iphetolêla pele xa Modimo.”—Ba-Roma 14:12.

Ka go dumelelana le melao ye ya motheo ya Beibele, Dihlatse tša Jehofa di tšwela pele go gana mokgwa wa go ntšha mpa. Go nea tlhahlo e kwalago go babadi ba ona, makasine wa Phafoga! o ile wa ba thuša go lemoga gore bohlweki bja boitshwaro ke molao o tšwago go Modimo; o ahla-ahlile ka mo go nabilego dimakatšo tša mogato wa go belega bana gotee le mabaka a tša monagano le a tša mmele ao a akaretšwago pelegong ya ngwana. Mehleng ya ka morago ga Ntwa ya II ya Lefase ge go ntšhwa ga dimpa go be go thoma go aparela, Morokami o ile wa bontšha ka mo go kwalago gore mokgwa wo ke wo o lwantšhanago le Lentšu la Modimo. Ge e bolela ka go lebanya, tokollo ya December 15, 1969 (ka Seisemane) e itše: “Go ntšha mpa feela bakeng sa go tloša ngwana yo a sa nyakegego go fo swana le go fediša bophelo bja motho ka boomo.”

Lebaka Leo ka Lona Ditšhelo tša Madi di Ganwago

Go hlompha bophelo mo go bontšhwago ke Dihlatse tša Jehofa gape go kgomile kgopolo ya tšona ka ditšhelo tša madi. Ge di be di lebeletšane le kgang ya ditšhelo tša madi, Morokami (wa Seisemane) wa July 1, 1945 o ile wa hlalosa ka mo go nabilego pono ya Bokriste mabapi le go kgethega ga madi.c O bontšhitše gore bobedi madi a diphoofolo le a batho a be a akaretšwa kiletšong ya Modimo yeo e bego e dirilwe e tlamago go Noage le ditlogolo tša gagwe ka moka. (Gen. 9:3-6) O hlalositše gore molao wo o ile wa gatelelwa gape lekgolong la pele la nywaga molaong wa gore Bakriste ‘ba ile madi.’ (Dit. 15:28, 29) Sehlogo sona seo se hlalositše ka mo go kwalago go tšwa Mangwalong gore ke feela go dirišwa ga madi ka tsela ya sehlabelo mo go bego go dutše go amogelwa ke Modimo, le gore ka ge dihlabelo tša diphoofolo tšeo di bego di neelwa ka tlase ga Molao wa Moše di be di swantšhetša sehlabelo sa Kriste, go hlokomologa molao wa gore Bakriste ‘ba ile madi’ e be e tla ba bohlatse bja go se hlomphe o šoro sehlabelo sa Jesu Kriste sa topollo. (Lef. 17:11, 12; Ba-Heb. 9:11-14, 22) Ka go dumelelana le kwešišo yeo ya ditaba, go tloga ka 1961 batho lege e le bafe bao ba bego ba hlokomologa molao wa Modimo, ba amogela ditšhelo tša madi le go bo- ntšha kgopolo ya go se sokologe ba be ba kgaolwa diphuthegong tša Dihlatse tša Jehofa.

Mathomong, mafelelo a mabe a ditšhelo tša madi mmeleng a be a sa bolelwe ka dipukung tša Watch Tower. Ka morago, ge tsebišo e bjalo e hwetšagala, le yona e ile ya gatišwa—e sego e le lebaka leo ka lona Dihlatse tša Jehofa di ganago ditšhelo tša madi eupja e le bakeng sa go tiiša go leboga ga tšona kiletšo yeo Modimo ka boyena a e dirilego go dirišweng ga madi. (Jes. 48:17) Gore go phethwe morero woo, ka 1961 go ile gwa gatišwa pukwana yeo e ngwadilwego ka kelohloko ya Blood, Medicine and the Law of God. Ka 1977 go ile gwa gatišwa pukwana e nngwe gape. Ye, yeo e nago le sehlogo se se rego Jehovah’s Witnesses and the Question of Blood e ile ya gatelela gape therešo ya gore boemo bjo bo tšewago ke Dihlatse tša Jehofa ke bja bodumedi, bo theilwe go seo Beibele e se bolelago gomme ga se bja ithekga ka mabaka a dikotsi tša tša kalafo. Go lokišwa mo go tšwelago pele ga taba go ile gwa tšweletšwa ka 1990 ka pukwaneng ya Madi a ka Phološa Bjang Bophelo bja Gago? Di diriša dipuku tše, Dihlatse tša Jehofa di dirile boiteko bjo bogolo bja go hwetša tirišano e botse le dingaka le go di thuša go kwešiša boemo bja Dihlatse. Lega go le bjalo, ka nywaga e mentši go dirišwa ga ditšhelo tša madi go be go lebelelwa ke ditsebi tša tša kalafo e le gabohlokwa kudu.

Gaešita lege Dihlatse tša Jehofa di boditše dingaka gore ga di na thibelo ya bodumedi ya go thibela ditsela tše dingwe tša kalafo, go gana ditšhelo tša madi go be go se bonolo. Gantši, Dihlatse le malapa a tšona di be di gatelelwa kudu gore di dumele seo ka nako yeo e bego e le mokgwa o tlwaetšwego wa kalafo. Kua Puerto Rico ka November ya 1976, Ana Paz de Rosario wa nywaga e 45 o ile a dumela gore a buiwe le go dumela dihlare tšeo di nyakegago tša kalafo eupja a kgopela gore ka baka la ditumelo tša gagwe tša bodumedi, go se ke gwa dirišwa madi. Lega go le bjalo, maphodisa a mahlano le baoki ba bararo bao ba hlamilwego ka taelo ya kgoro ya tsheko ba ile ba ya phapošing ya gagwe ya bookelong ka morago ga bošego-gare, ba mo kgokelela bolaong gomme ba mo gapeletša tšhelo ya madi ka go fapana le dikganyogo tša gagwe le tša monna wa gagwe le bana. O ile a ba le kgateletšo e šoro ditshepedišong tša bohlokwa tša mmele gomme a hwa. Le gatee ye e be e se taba e sa tlwaelegago, le gona e be e se Puerto Rico feela moo ditlhaselo tše bjalo di diregilego.

Kua Denmark, batswadi ba Dihlatse ba ile ba swarwa ke maphodisa ka 1975 ka ge ba ganne go dumela gore morwa wa bona o monyenyane a gapeletšwe tšhelo ya madi, eupja go e na le moo ba ile ba tsoma kalafo e nngwe. Kua Italy ka 1982, banyalani bao ba ilego ba tsoma thušo ya tša kalafo ka lerato dinageng tše nne bakeng sa morwedi wa bona yo a bego a babjetša go hwa ba ile ba ahlolelwa nywaga e 14 kgolegong ka molato wa polao ka morago ga ge ngwanenyana a hwile mola a be a tšhelwa madi ka taelo ya kgoro ya tsheko.

Gantši phatlalatšo ya ditaba e be e tsoša lehloyo le legolo la batho ka kakaretšo mabapi le maiteko a go gapeletša bana ba Dihlatse tša Jehofa ditšhelo tša madi. Mabakeng a mangwe, baahlodi ba ile ba laela gore bana ba tšhelwe madi gaešita le ka ntle ga tsheko yeo go yona batswadi ba ka bolelago. Lega go le bjalo, ditiragalong tše di fetago 40 kua Canada bana bao ba tšhetšwego madi ba ile ba bušetšwa go batswadi ba bona ba hwile.

Ga se dingaka le baahlodi ka moka bao ba dumelelanago le mekgwa ye ya go gatelela ya bonkgwete. Ba sego kae ba thomile go kgothaletša kgopolo e holago. Dingaka tše dingwe di dirišitše bokgoni bja tšona bakeng sa go alafa ka ntle le madi. Ge di dutše di dira bjalo, di ile tša hwetša phihlelo e oketšegilego mehuteng ka moka ya go bua ka ntle le madi. Go ile gwa bontšhwa ganyenyane-ganyenyane gore mehuta ka moka ya go bua e ka dirwa ka katlego, bobedi go batho ba bagolo le bana ka ntle le ditšhelo tša madi.d

E le go thibela kgohlano e sa nyakegego maemong a go nyaka thušo ya tšhoganetšo, nywageng ya pele ya bo-1960, Dihlatse tša Jehofa di ile tša thoma go dira diketelo tše kgethegilego go dingaka tša tšona bakeng sa go boledišana le tšona ka boemo bja tšona le go di nea dipuku tše di swanetšego. Ka morago di ile tša kgopela gore polelo yeo e gatišitšwego e bewe difaeleng tša tšona tša tša kalafo, e bolela gore ga go ditšhelo tša madi tšeo di swanetšego go dirwa go tšona. Nywageng ya bo-1970 di ile tša dira gore e be mokgwa wa kakaretšo go sepela le karata bakeng sa go lemoša bašomi ba tša kalafo ntlha ya gore ga se gwa swanela go dirišwa madi go tšona ka tlase ga maemo lege e le afe. Ka morago ga go ikopanya le dingaka le bo-ramolao, karata e ile ya beakanywa e le gore e dirwe lengwalo la molao.

Go thekga Dihlatse tša Jehofa boikemišetšong bjo bja go thibela go tšhelwa madi, go tloša go se kwešiše ga dingaka le dipetlele le go bjala moya wa tirišano magareng ga mekgatlo ya tša kalafo le balwetši ba Dihlatse, Dikomiti tša Poledišano ya go Nyaka Kwano le Dipetlele di ile tša hlongwa ka tlhahlo ya Sehlopha se Bušago sa Dihlatse tša Jehofa. Go tloga go tše sego kae tša dikomiti tše bjalo ka 1979, palo ya tšona e oketšegile go feta 800 dinageng tše di fihlago go 70. Bagolo bao ba kgethilwego ba ile ba tlwaetšwa gomme ba nea tirelo e bjalo kua Amerika Leboa, Bohlabela bja Kgole, dinageng tše kgolo tša Pacific Borwa, Yuropa le Latin America. Go oketša go go hlalosa boemo bja Dihlatse tša Jehofa, bagolo ba ba lemoša bašomi ba sepetlele ka taba ya gore go na le ditsela tše dingwe tše bohlokwa tšeo di ka dirišwago go e na le ditšhelo tša madi. Maemong a tšhoganetšo ba thuša go rulaganya kgokagano ya dingaka tšeo molwetši a kilego a kopana le tšona pele le babui bao ba ilego ba swaragana le maemo a swanago go Dihlatse ka ntle le madi. Mo go nyakegago, dikomiti tše di ile tša etela e sego bašomi ba dipetlele feela eupja gape le baahlodi bao ba ilego ba akaretšwa maemong ao go ona dipetlele di ilego tša kgopela taelo ya kgoro ya tsheko bakeng sa ditšhelo tša madi.

Ka dinako tše dingwe ge e ba go hlompha ditumelo tša tšona mabapi le go kgethega ga madi go sa kgonthišetšwe ka tsela e nngwe, Dihlatse tša Jehofa ka dinako tše dingwe di ile tša iša dingaka le dipetlele kgorong ya tsheko. Gantši di be di fo nyaka taelo ya thibelo goba kiletšo. Lega go le bjalo, nywageng ya morago bjale di ile tša ba tša tsoša melato ya tefišo malebana le dingaka le dipetlele tšeo di ilego tša gata mogato ka go diriša matla ka bonkgwete. Ka 1990 Kgoro ya Boipiletšo ya Ontario, Canada e ile ya swaragana le molato o bjalo wa tefišo ka ge ngaka e ile ya hlokomologa karata yeo e lego ka sekhwameng sa molwetši, yeo e bego e bolela ka mo go kwalago gore Hlatse e be e ka se ke ya amogela ditšhelo tša madi ka tlase ga maemo lege e le afe. Kua United States, ga e sa le go tloga ka 1985, bonyenyane go ile gwa tsošwa melato e bjalo e lesome ya tefišo dikarolong tše di fapa-fapanego tša naga, gomme bao ba bego ba bewa molato ba ile ba kgetha go o lokiša ka kgoro ya tsheko ka tekanyo ya tšhelete yeo go dumelelanwago ka yona, go e na le go lebeletšana le kgonagalo ya gore e ahlolele tefišo e ntši kudu. Dihlatse tša Jehofa di ikemišeditše ka mo go feletšego go kwa kiletšo ya Modimo mabapi le go dirišwa ga madi. Ga di rate go iša dingaka tshekong, eupja di tla dira seo ge e ba go nyakega bakeng sa go di thibela go gapeletša Dihlatse kalafo yeo e lego e hlaswegago go ya ka tekanyetšo ya boitshwaro go tšona.

Setšhaba e ba seo se lemogago ka mo go oketšegago dikotsi tšeo di hwetšwago ditšhelong tša madi. Ka boripana, se ke ka baka la go boifa AIDS. Lega go le bjalo, Dihlatse di tutuetšwa ke kganyogo e tšwago pelong ya go kgahliša Modimo. Ka 1987, Le Quotidien du Médecin ya letšatši le letšatši ya tša kalafo ya Fora e boletše gore: “Mohlomongwe Dihlatse tša Jehofa di nepile ka go gana go dirišwa ga ditšweletšwa tša madi, ka gobane ke therešo gore dibaki tše dintši tša malwetši di ka fetišwa ka madi ao a tšhelwago.”

Boemo bjo bo tšerwego ke Dihlatse tša Jehofa ga se bja thewa tsebong e phagamego ya tša kalafo yeo e tšwago go tšona. Di upja di kgodišegile gore tsela ya Jehofa e nepagetše le gore ‘a ka se ke a hlokiša [bahlanka ba gagwe bao ba botegago] tše dibotse.’ (Ps. 19:7, 11; 84:11) Gaešita lege Hlatse e ka hwa ka baka la go lahlegelwa ke madi—gomme se se diregile mabakeng a mangwe—Dihlatse tša Jehofa di na le kholofelo e tletšego ya gore Modimo a ka se ke a lebala babotegi ba gagwe eupja o tla ba bušetša bophelong ka tsogo.—Dit. 24:15.

Ge Batho ba Kgetha go Hlokomologa Ditekanyetšo tša Beibele

Batho ba dimilione ba ile ba ithuta Beibele le Dihlatse tša Jehofa, eupja ga se bona ka moka bao ba bilego Dihlatse. Ge batho ba bangwe ba lemoga ditekanyetšo tše di phagamego tše di šomago, ba dira phetho ya gore wo ga se mohuta wa bophelo bjo ba bo nyakago. Bohle bao ba kolobetšwago ba thoma ka go newa thuto e tletšego ka dithuto tša motheo tša Beibele, ke moka ka morago ga moo (kudu-kudu ga e sa le go tloga ka 1967) bagolo ka phuthegong ba boeletša dithuto tše bjalo le motho o mongwe le o mongwe yo a yago kolobetšong. Go dirwa boiteko bjohle go kgonthiša gore bao ba kolobetšwago ba kwešiša gabotse e sego feela dithuto tša motheo eupja gape le seo boitshwaro bja Bokriste bo se akaretšago. Lega go le bjalo, go thwe’ng ge e ba ba bangwe ba ba ka morago ba dumelela lerato la go rata lefase le ba gokeletša phošong e kgolo?

Pejana ka 1904, pukung ya The New Creation go ile gwa lebišwa tlhokomelo go go nyakega ga go gata mogato o swanetšego e le gore go se ke gwa dumelelwa go senywa ga boitshwaro bja phuthego. Kwešišo yeo Barutwana ba Beibele ba bego ba e-na le yona ka nako yeo ya tsela ya go swaragana le bafoši bjalo ka ge e hlalositšwe go Mateo 18:15-17 e ile ya ahla-ahlwa. Ka go dumelelana le se, mabakeng a mangwe go be bo e-ba le ‘ditsheko tša kereke’ tšeo go tšona bohlatse bja phošo e kgolo bo bego bo hlalosetšwa phuthego ka moka. Nywaga e mentši ka morago, Morokami (wa Seisemane) tokollong ya wona ya May 15, 1944 o ile wa hlahloba taba go ya ka Beibele ka moka gomme wa bontšha gore ditaba tše bjalo tšeo di kgomago phuthego di swanetše go rarollwa ke banababo rena bao ba abetšwego bolebeledi bja phuthego. (1 Ba-Kor. 5:1-13; bapiša le Doiteronomio 21:18-21.) Se se ile sa hlaloswa ka dihlogo tše di lego ka go Morokami (wa Seisemane) wa March 1, 1952 tšeo di ilego tša gatelela e sego mogato o swanetšego feela eupja le go nyakega ga go gata mogato bakeng sa go boloka mokgatlo o hlwekile. Ga e sa le go tloga nakong yeo, taba ye e be e dutše e ahla-ahlwa leboelela. Eupja ka mehla maikemišetšo e be e dutše e le a swanago: (1) go boloka phuthego e hlwekile le (2) go gatelela go mofoši go nyakega ga go bontšha go itshola ga kgonthe ka kgopolo ya go mo rua.

Lekgolong la pele la nywaga, go be go e-na le ba bangwe bao ba ilego ba tlogela tumelo ka baka la bophelo bjo bo hlephilego. Ba bangwe ba ile ba fapošwa ka baka la dithuto tša bohlanogi. (1 Joh. 2:19) Selo se se swanago se tšwela pele go direga gare ga Dihlatse tša Jehofa lekgolong le la bo-20 la nywaga. Ka manyami, mehleng ya morago bjale go ile gwa nyakega gore go kgaolwe bafoši bao ba sa itsholego ba masome a dikete ngwageng o mongwe le o mongwe. Bagolo bao ba tumilego ba be ba akaretšwa gare ga bona. Ditekanyetšo tše di swanago tša Mangwalo di šoma go bohle. (Jak. 3:17) Dihlatse tša Jehofa di lemoga gore go boloka phuthego e hlwekile boitshwarong ke gabohlokwa bakeng sa go tšwela pele e amogelwa ke Jehofa.

Go Apara Motho o Mofsa

Jesu o kgothaleditše batho go ba bao ba hlwekilego e sego ka ntle feela eupja le ka gare. (Luka 11:38-41) O bontšhitše gore dilo tšeo re di bolelago le go di dira di bontšha seo se lego ka dipelong tša rena. (Mat. 15:18, 19) Go etša ge moapostola Paulo a hlalositše, ge e ba re rutwa e le ka kgonthe ke Kriste, re tla ‘mpshafatšwa ka matla ao a tutuetšago monagano wa rena’ gomme ra ‘apara motho o mofsa, yo a bopilwego go ya ka thato ya Modimo ka go loka ga kgonthe le ka potego.’ (Ba-Ef. 4:17-24, NW) Bao ba rutwago ke Kriste ba nyaka go ba le “kgopolo e swanago le yeo Kriste Jesu a bego a e-na le yona” e le gore ba ka nagana le go dira dilo bjalo ka ge a dirile. (Ba-Roma 15:5) Boitshwaro bja Dihlatse tša Jehofa e le batho ka o tee ka o tee ke pontšho ya tekanyo yeo ka yona di dirilego seo e le ka kgonthe.

Dihlatse tša Jehofa ga di bolele gore boitshwaro bja tšona ga bo na bosodi. Eupja ke tšeo di lego ka pelo ka moka maitekong a tšona a go ba baetši ba Kriste ge di dutše di itumelelanya le tekanyetšo e phagamego ya Beibele ya boitshwaro. Ga di gane gore go na le batho ba bangwe bao ba dirišago ditekanyetšo tše di phagamego tša boitshwaro maphelong a bona. Eupja boemong bja Dihlatse tša Jehofa, ga se feela e le batho ka o tee ka o tee, eupja gape e le mokgatlo wa ditšhaba-tšhaba moo di lemogwago gabonolo ka baka la boitshwaro bjo bo dumelelanago le ditekanyetšo tša Beibele. Di tutuetšwa ke keletšo e buduletšwego yeo e begilwego go 1 Petro 2:12 (NW) e rego: “Bolokang boitshwaro bja lena e le bjo bobotse gare ga ditšhaba, e le gore . . . di ka reta Modimo ka baka la mediro ya lena e mebotse yeo di e bonago.”

[Mengwalo ya tlase]

[Seswantšho go letlakala 172]

“Di na le ditekanyetšo tše lemogegago tša boitshwaro”

[Seswantšho go letlakala 174]

Na go kile gwa ba le pelaelo mabapi le kamoo bosodoma bo bego bo tla lebelelwa ka gona?

[Seswantšho go letlakala 175]

Go senyega ga boitshwaro bja lefase ga se gwa ka gwa dira Dihlatse gore e be tše di tlogelelago dilo kudu

[Seswantšho go letlakala 176]

Ba bangwe ba ile ba leka go ba Dihlatse ka ntle le go tlogela segadikane

[Seswantšho go letlakala 177]

Lenaneo le matla la go ruta kgopolo ya Jehofa ka tlhalo

[Seswantšho go letlakala 178]

Diphetogo tše kgolo maphelong a batho

[Seswantšho go letlakala 181]

Motšoko—ga o dumelelwe!

[Seswantšho go letlakala 182]

Dino tše di tagago—di lekanetšwe, ge e ba di dirišwa

[Seswantšho go letlakala 183]

Di ikemišeditše ka go tia go se amogele madi

[Seswantšho go letlakala 187]

Go kgaola bakeng sa go šireletša mokgatlo o hlwekilego boitshwarong

[Lepokisi go letlakala 173]

‘Go Aga Semelo’—Dipoelo e be e se tše Botse ka Mehla

Pego e tšwago Denmark e re: ‘Ba bantši, kudu-kudu gare ga bagwera ba kgale, maitekong a bona a potego a go apara semelo sa Bokriste ba be ba katanela go phema selo lege e le sefe seo se nago le sepatso se senyenyane sa go ba sa lefase, gomme ka tsela ye ba itira bao ba swanelegago kudu Mmušong wa legodimo. Gantši go be go lebelelwa e le mo go sa swanelago go nywanywa ge diboka di tšwela pele, gomme bontši bja banababo rena ba kgale ba be ba apara disutu tše diso, dieta tše diso le dithai tše diso. Gantši e be e le bao ba kgotsofetšego ka go phela maphelo a boiketlo le a khutšo Moreneng. Ba be ba dumela gore e be e le mo go lekanego go swara diboka le go tlogela babapatši ba dipuku tša bodumedi gore ba dire modiro wa boboledi.’

[Lepokisi go letlakala 179]

Seo ba Bangwe ba se Naganago ka Dihlatse

◆ Kuranta ya Jeremane, e lego “Münchner Merkur” e begile mabapi le Dihlatse tša Jehofa gore: “Ke balefeledi bao ba botegago kudu le bao ba lefago motšhelo ka nako ba kua Federal Republic. Go kwa ga tšona melao go ka bonwa tseleng yeo di otlelago ka yona gotee le dipalo-palong tša bosenyi. . . . Di kwa bao ba nago le matla a bolaodi (batswadi, barutiši, mmušo). . . . Di ithekga ka Beibele, e lego motheo wa ditiro tša tšona ka moka.”

◆ Ramotse wa Lens, Fora o boditše Dihlatse ka morago ga ge di dirišitše lepatlelo la lefelong leo la dipapadi bakeng sa e nngwe ya dikopano tša tšona gore: “Seo ke se ratago ke gore le boloka dikholofetšo tša lena le ditumelelano tša lena, godimo ga tšeo le ba ba hlwekilego, ba ba itshwerego gabotse le ba ba rulagantšwego. Ke rata mokgatlo wa lena. Ke hloile tlhakatlhakano, gomme ga ke rate batho bao ba tšamago ba šilafatša le go roba dilo.”

◆ Puku ya “Voices From the Holocaust” e na le dipego tšeo di tšwago go mophologi wa Mopoliši wa dikampeng tša tshwenyo tša Auschwitz le Ravensbrück yo a ngwadilego gore: “Ke bona batho bao ba bego ba lokile kudu le batho bao ba bego ba le magareng ka mo go feletšego. Sehlopha se se kgahlišago kudu e be e le Dihlatse tša Jehofa. Batho bao ke ba rolela kefa. . . . Ba be ba direla batho ba bangwe dilo tše dibotse. Ba be ba thuša bao ba babjago, ba abelana le ba bangwe dijo tša bona gomme ba nea o mongwe le o mongwe yo a lego kgaufsi le bona khomotšo ya moya. Majeremane a be a ba hloile e bile a ba hlompha ka nako e swanago. Ba be ba ba nea modiro o thata ka go fetišiša eupja ba o amogela ka diatla tše pedi.”