Kgonthišeletša Lapa la Gago Bokamoso bjo bo Swarelelago

1. Morero wa Jehofa e be e le ofe ka thulaganyo ya lapa?

GE Jehofa a be a nyadiša Adama le Efa, Adama o ile a bonagatša lethabo la gagwe ka go bolela sereto sa pele-pele sa Sehebere seo se ngwadilwego. (Genesi 2:22, 23) Lega go le bjalo, Mmopi o be a e-na le go gontši mo a bego a nagana ka gona go feta go fo tlišetša bana ba gagwe bao e lego batho lethabo. O be a nyaka gore banyalani le malapa ba dire thato ya gagwe. O ile a botša batho ba babedi ba pele gore: “Tswalang Le atê, tlalang lefase, Le le fenyê. Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.” (Genesi 1:28) Yeo e be e le kabelo e botse le e putsago gakaakang! Bona le bana ba bona ba ka moso ba be ba tla thaba gakaakang ge nkabe Adama le Efa ba ile ba dira thato ya Jehofa ka go kwa mo go tletšego!

2, 3. Malapa a ka hwetša bjang lethabo le legolo kudu lehono?

² Lehono le gona, malapa a thaba kudu ge a šomišana gotee bakeng sa go dira thato ya Modimo. Moapostola Paulo o ngwadile gore: “Se se holaxo xohle ké borapedi ka xe bo na le kholofedišô ya bophelô byono le ya byo bo tl’o xo tla.” (1 Timotheo 4:8) Lapa leo le phelago ka boineelo go Modimo e bile le latela tlhahlo ya Jehofa bjalo ka ge e hwetšwa ka Beibeleng le tla hwetša lethabo ‘bophelong bjono.’ (Psalme 1:1-3; 119:105; 2 Timotheo 3:16) Gaešita le ge setho se tee feela sa lapa se diriša melao ya motheo ya Beibele, dilo di kaone go feta ge go se na le o tee yo a e dirišago.

³ Puku ye e ahla-ahlile melao e mentši ya motheo ya Beibele yeo e tlaleletšago lethabong la lapa. Mo gongwe o lemogile gore e mengwe ya yona e tšwelela leboelela ka pukung ka moka. Ka baka la’ng? Ka gobane e emela ditherešo tše matla tšeo di šomago bakeng sa go hola bohle dibopegong tše di fapa-fapanego tša bophelo bja lapa. Lapa leo le katanelago go diriša melao ye ya motheo ya Beibele le hwetša gore boineelo go Modimo ruri “bo na le kholofedišô ya bophelô byono.” Anke re hlahlobeng gape e mene ya melao yeo e bohlokwa ya motheo.

MOHOLA WA BOITSHWARO

4. Ke ka baka la’ng boitshwaro bo le bohlokwa lenyalong?

⁴ Kgoši Salomo o itše: “Motho yo a sa tsebego go itshwara [“go laola moya wa gagwe,” NW] o bjalo ka motse o phušotšwego o se nago morako.” (Diema 25:28, PK; Die 29:11) ‘Go laola ga motho moya wa gagwe,’ e lego go bontšha boitshwaro, go bohlokwa bakeng sa bao ba nyakago lenyalo le le thabišago. Go ineela maikwelong a senyago, a bjalo ka bogale goba kganyogo e gobogilego, go tla baka tshenyo yeo e tšeago nywaga e mentši go e lokiša—ge e ba go lokišega gona e ka lokišega.

5. Motho yo a sa phethagalago a ka hlagolela bjang boitshwaro, gomme se sa tliša mehola efe?

⁵ Go ba gona, ga go na setlogolo sa Adama seo se ka laolago ka mo go tletšego nama ya sona ye e sa phethagalago. (Ba-Roma 7:21, 22) Lega go le bjalo, boitshwaro ke seenywa sa moya. (Ba-Galatia 5:22, 23) Ka gona, moya wa Modimo o tla tšweletša boitshwaro ka go rena ge e ba re rapelela seka se, ge e ba re diriša keletšo e swanetšego yeo e hwetšwago ka Mangwalong, le ge e ba re gwerana le ba bangwe bao ba bontšhago seka seo gomme re phema bao ba sa se bontšhego. (Psalme 119:100, 101, 130; Diema 13:20; 1 Petro 4:7) Tsela e bjalo e tla re thuša go ‘tšhaba bootswa’ gaešita le ge re lekwa. (1 Ba-Korinthe 6:18) Re tla gana bošoro gomme ra phema goba ra fenya go lemalela bjala. Le gona re tla swaragana ka go fola kudu le dikgopišo le maemo a thata. Eka ka moka—go akaretša le bana—re ka ithuta go hlagolela seenywa se se bohlokwa sa moya.—Psalme 119:1, 2.

PONO E SWANETŠEGO KA BOHLOGO

6. (a) Thulaganyo e theilwego ke Modimo ya bohlogo ke efe? (b) Ke’ng seo monna a swanetšego go se gopola ge e ba bohlogo bja gagwe bo tla tlišetša lapa la gagwe lethabo?

⁶ Molao wa motheo wa bobedi o bohlokwa ke go hlompha bohlogo. Paulo o ile a hlalosa thulaganyo e swanetšego ya dilo ge a be a re: “Ke rata xe Le tseba xore hlôxô ya monna mang le mang ké Kriste; ’me hlôxô ya mosadi ké monna; hlôxô ya Kriste ké Modimo.” (1 Ba-Korinthe 11:3) Se se bolela gore monna o etelela pele ka lapeng, mosadi wa gagwe ke yo a neago thekgo ka potego, gomme bana ke bao ba kwago batswadi ba bona. (Ba-Efeso 5:22-25, 28-33; 6:1-4) Lega go le bjalo, ela hloko gore bohlogo bo lebiša lethabong feela ge e ba bo dirišwa ka tsela e swanetšego. Banna bao ba phelago ka boineelo go Modimo ba tseba gore bohlogo ga se bonkgwete. Ba ekiša Jesu, Hlogo ya bona. Gaešita le ge Jesu e be e swanetše go ba ‘hlogo dilong tšohle,’ e bile yo “a sa kaxo a tlêla xo dirêlwa, à tlile xo dirêla.” (Ba-Efeso 1:22; Mateo 20:28) Ka tsela e swanago, monna wa Mokriste o diriša bohlogo, e sego bakeng sa go ikhola, eupša bakeng sa go hlokomela dikgahlego tša mosadi wa gagwe le tša bana ba gagwe.—1 Ba-Korinthe 13:4, 5.

7. Ke melao efe ya motheo ya Mangwalo yeo e tlago go thuša mosadi go phethagatša karolo ya gagwe yeo a e kgethetšwego ke Modimo ka lapeng?

⁷ Ka lehlakoreng la gagwe, mosadi yo a phelago ka boineelo go Modimo ga a phenkgišane le monna wa gagwe goba a tsoma go mo laola. O thabela go ba yo a mo thekgago le go šomišana le yena. Beibele ka dinako tše dingwe e bolela ka mosadi e le ‘yo mong wa gagwe’ e lego monna wa gagwe, e lego seo se sa tlogelego pelaelo ya gore monna ke hlogo ya mosadi. (Genesi 20:3) Ka lenyalo mosadi o ba ka tlase ga ‘molao wa monna.’ (Ba-Roma 7:2) Ka nako e swanago, Beibele e mmitša “mothuši” le “motlatši.” (Genesi 2:20, NW) O nea dika le bokgoni tše monna wa gagwe a di hlokago, gomme o nea monna thekgo e nyakegago. (Diema 31:10-31) Beibele gape e bolela gore mosadi ke “molekane,” e lego motho yo a šomago a bapile le molekane wa gagwe. (Maleaki 2:14, NW) Melao ye ya motheo ya Mangwalo e thuša monna le mosadi go kwešiša boemo bja yo mongwe le yo mongwe wa bona le go swarana ka tlhompho e swanetšego le seriti.

‘LE AKGOFIŠE GO KWA’

8, 9. Hlalosa e mengwe ya melao ya motheo yeo e tlago go thuša bohle ka lapeng go kaonefatša bokgoni bja bona bja poledišano.

⁸ Ka pukung ye go nyakega ga poledišano go gatelelwa leboelela. Ka baka la’ng? Ka gobane dilo di šoma gakaone ge batho ba boledišana e bile ba theetšana e le ka kgonthe. Go ile gwa gatelelwa leboelela gore poledišano ke tsela yeo e akaretšago batho ba babedi. Morutiwa Jakobo o boletše se ka tsela ye: “Motho a a akxofišê xo kwa, a diêxê xo bolêla.”—Jakobo 1:19.

⁹ Gape go bohlokwa go ba ba elago hloko mabapi le kamoo re bolelago ka gona. Mantšu ao a sa kgethwago gabotse, a bakago kgohlano goba a a ntšhago diphošo kudu ga a bope poledišano e atlegago. (Diema 15:1; 21:9; 29:11, 20) Gaešita le ge seo re se bolelago se nepagetše, ge e ba se bolelwa ka mokgwa wa bošoro, boikgogomošo goba wa go se naganele, go bonala se tla dira tshenyo e kgolo go feta botse. Polelo ya rena e swanetše go ba e kgahlišago, “e nokilwexo letswai.” (Ba-Kolose 4:6) Mantšu a rena a swanetše go ba bjalo ka “diapole tša gauta mogopšaneng wa silifera.” (Diema 25:11, PK) Malapa ao a ithutago go boledišana gabotse a gatile mogato o mogolo o išago go fihleleleng lethabo.

KAROLO E BOHLOKWA YA LERATO

10. Ke mohuta ofe wa lerato wo o lego bohlokwa lenyalong?

¹⁰ Lentšu “lerato” le tšwelela leboelela ka pukung ye ka moka. Na o gopola mohuta wa lerato leo go bolelwago ka lona kudu-kudu? Ke therešo gore lerato la monna le mosadi (Segerika, eʹros) le kgatha tema e bohlokwa lenyalong, gomme manyalong a atlegago, maikwelo a borutho a tseneletšego le bogwera (Segerika, phi·liʹa) di a gola magareng ga monna le mosadi. Eupša sa bohlokwa kudu le go feta ke lerato leo le emelwago ke lentšu la Segerika a·gaʹpe. Le ke lerato leo re le hlagolelago bakeng sa Jehofa, bakeng sa Jesu le bakeng sa mogagabo rena. (Mateo 22:37-39) Ke lerato leo Jehofa a le bontšhago go batho. (Johane 3:16) Ke mo go kgahlišago gakaakang gore re ka bontšha mohuta o swanago wa lerato go molekane wa rena wa lenyalo le bana!—1 Johane 4:19.

11. Lerato le hola bjang lenyalong?

¹¹ Lenyalong, lerato le le le phagamego ruri ke “tlêmô ya botlalô.” (Ba-Kolose 3:14) Le tlemaganya banyalani gomme la ba dira gore ba nyake go dira se sekaone kudu bakeng sa yo mongwe le yo mongwe wa bona le bakeng sa bana ba bona. Ge malapa a lebana le maemo a thata, lerato le ba thuša go swaragana le dilo ba kopane. Ge banyalani ba dutše ba tšofala, lerato le ba thuša go thekgana le go tšwela pele ba kgahlegelana. “Leratô . . . xa le tsome xo ikhola; . . . le bipa tšohle; le dumêla tšohle; le holofêla tšohle; le kxôtlêlêla tšohle. Leratô xa le fele neng le neng.”—1 Ba-Korinthe 13:4-8.

12. Ke ka baka la’ng lerato la go rata Modimo ka lehlakoreng la banyalani le tiiša lenyalo la bona?

¹² Tlemo ya lenyalo e ba e tiilego kudu ge e tiišitšwe, e sego feela ke lerato magareng ga balekane ba lenyalo, eupša ge kudu-kudu e tiišitšwe ke lerato la go rata Jehofa. (Mmoledi 4:9-12) Ka baka la’ng? Ee, moapostola Johane o ngwadile gore: “Leratô la xo rata Modimo ké xe re e-ya ka melaô ya xaxwe.” (1 Johane 5:3) Ka gona, banyalani ba swanetše go tlwaetša bana ba bona ka boineelo go Modimo e sego feela ka baka la gore ba rata bana ba bona ka mo go tseneletšego eupša ka gobane ye e le taelo ya Jehofa. (Doiteronomio 6:6, 7) Ba swanetše go efoga boitshwaro bjo bo gobogilego e sego feela ka gobane ba ratana eupša kudu-kudu ka gobane ba rata Jehofa, yo ‘diotswa le ba ba gobošago tšeano, a tlogo ba ahlola.’ (Ba-Hebere 13:4, PK) Gaešita le ge molekane o tee a baka mathata a šoro lenyalong, lerato la go rata Jehofa le tla tutueletša molekane yo mongwe gore a tšwele pele a latela melao ya motheo ya Beibele. Ruri go thaba malapa ao go ona lerato la go ratana le tiišwago ke lerato la go rata Jehofa!

LAPA LEO LE DIRAGO THATO YA MODIMO

13. Boikemišetšo bja go dira thato ya Modimo bo tla thuša bjang batho ka o tee ka o tee go tsepamišetša mahlo a bona dilong tše bohlokwa e le ka kgonthe?

¹³ Bophelo ka moka bja Mokriste bo dikologile go direng thato ya Modimo. (Psalme 143:10) Se ke sona seo boineelo go Modimo bo tlogago bo se bolela. Go dira thato ya Modimo go thuša malapa go tsepamišetša mahlo a bona dilong tša bohlokwa e le ka kgonthe. (Ba-Filipi 1:9, 10) Ka mohlala, Jesu o ile a lemoša ka gore: “Ke tlile xo šitanya motho le tat’axwe, ngwanenyana le mm’axwe, ngwetši le matswal’axwe. ’Me ba-bô-motho e tlo ba manaba ’axwe.” (Mateo 10:35, 36) Ka go dumelelana le temošo ya Jesu, bontši bja balatedi ba gagwe ba ile ba tlaišwa ke ditho tša lapa. A boemo bjo bo nyamišago le bjo bo kwešago bohloko gakaakang! Lega go le bjalo, ditlemo tša lapa ga se tša swanela go feta lerato la rena la go rata Jehofa Modimo le la go rata Jesu Kriste. (Mateo 10:37-39) Ge e ba motho a kgotlelela go sa šetšwe kganetšo ya lapa, baganetši mo gongwe ba ka fetoga ge ba bona dipheletšo tše dibotse tša boineelo go Modimo. (1 Ba-Korinthe 7:12-16; 1 Petro 3:1, 2) Gaešita le ge seo se sa direge, ga go na botse bjo bo swarelelago bjo bo hwetšwago ka go kgaotša go hlankela Modimo ka baka la kganetšo.

14. Kganyogo ya go dira thato ya Modimo e tla thuša bjang batswadi go dira seo e lego se sekaone kudu bakeng sa bana ba bona?

¹⁴ Go dira thato ya Modimo go thuša batswadi go dira diphetho tše di nepagetšego. Ka mohlala, ditšhabeng tše dingwe batswadi ba na le tshekamelo ya go lebelela bana e le peeletšo ya tšhelete, gomme ba ithekga ka bana ba bona gore ba ba hlokomele botšofading bja bona. Gaešita le ge e le mo go nepagetšego le mo go swanetšego gore bana ba ba godilego ba hlokomele batswadi ba bona bao ba tšofalago, kgopolo e bjalo ga se ya swanela go dira batswadi gore ba lebiše bana ba bona mokgweng wa bophelo wa go phegelela dilo tše di bonagalago. Batswadi ga ba hole bana ba bona ge e ba ba ba godišetša gore ba lebelele mahumo a dilo tše di bonagalago e le a bohlokwa kudu go feta dilo tša moya.—1 Timotheo 6:9.

15. Oinika mmago Timotheo e bile bjang mohlala o mobotse kudu wa motswadi yo a ilego a dira thato ya Modimo?

¹⁵ Mohlala o mobotse tabeng ye ke Oinika, mmago mogwera yo e lego mofsa wa Paulo, e lego Timotheo. (2 Timotheo 1:5) Gaešita le ge a be a nyetšwe ke motho yo a sa dumelego, Oinika gotee le Loisa makgolo wa Timotheo ba ile ba godiša Timotheo ka katlego gore a phegelele boineelo go Modimo. (2 Timotheo 3:14, 15) Ge Timotheo a be a gotše ka mo go lekanego, Oinika o ile a mo dumelela gore a tloge gae gomme a tšee modiro wa go bolela ka Mmušo e le modirišani wa moromiwa wa Paulo. (Ditiro 16:1-5) O swanetše go ba a ile a thaba gakaakang ge morwa wa gagwe a be a e-ba moromiwa yo a tšweleletšego! Boineelo bja gagwe go Modimo e le motho yo mogolo bo ile bja bonagatša gabotse tlwaetšo yeo a e hweditšego bjaneng. Ka kgonthe, Oinika o ile a hwetša kgotsofalo le lethabo ge a e-kwa dipego tša bodiredi bja potego bja Timotheo, gaešita le ge mo gongwe a be a hlologelwa go ba le yena.—Ba-Filipi 2:19, 20.

LAPA LE BOKAMOSO BJA GAGO

16. E le morwa, ke go kgomega gofe mo go swanetšego mo Jesu a ilego a go bontšha, eupša boikemišetšo bja gagwe bjo bogolo e be e le bofe?

¹⁶ Jesu o godišeditšwe lapeng le le boifago Modimo, gomme ge e le motho yo mogolo, o ile a bontšha go kgomega mo go swanetšego ga morwa ka mmagwe. (Luka 2:51, 52; Johane 19:26) Lega go le bjalo, maikemišetšo a magolo a Jesu e be e le go phethagatša thato ya Modimo, gomme go yena se se be se akaretša go bulela batho tsela gore ba thabele bophelo bjo bo sa felego. Se o se dirile ge a be a gafa bophelo bja gagwe bjo bo phethagetšego bja motho e le topollo bakeng sa batho ba ba nago le sebe.—Mareka 10:45; Johane 5:28, 29.

17. Ke ditebelelo dife tša letago tšeo tsela ya Jesu ya potego e ilego ya di bulela bao ba dirago thato ya Modimo?

¹⁷ Ka morago ga lehu la Jesu, Jehofa o ile a mo tsošetša bophelong bja legodimong gomme a mo nea matla a magolo a taolo, mafelelong a mmea e le Kgoši Mmušong wa legodimo. (Mateo 28:18; Ba-Roma 14:9; Kutollo 11:15) Sehlabelo sa Jesu se dirile gore go kgonege gore batho ba bangwe ba kgethelwe go buša le yena Mmušong woo. Gape se butše tsela bakeng sa gore batho ka moka ba dipelo tše di lokilego ba thabele bophelo bjo bo phethagetšego lefaseng le le tsošološeditšwego maemong a paradeise. (Kutollo 5:9, 10; 14:1, 4; 21:3-5; 22:1-4) E nngwe ya ditokelo tše dikgolo kudu tšeo re nago le tšona lehono ke go botša magagabo rena ditaba tše tše di lokilego tša letago.—Mateo 24:14.

18. Ke kgopotšo efe le kgothatšo efe tšeo di newago bobedi malapa gotee le batho ka o tee ka o tee?

¹⁸ Bjalo ka ge moapostola Paulo a bontšhitše, go phela bophelo bja boineelo go Modimo go na le kholofetšo ya gore batho ba ka hwetša ditšhegofatšo tšeo e le bohwa bophelong ‘bjo bo tlogo tla.’ Ka kgonthe ye ke yona tsela e phalago tšohle ya go hwetša lethabo! Gopola, “lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:17) Ka gona, go sa šetšwe gore o ngwana goba o motswadi, monna goba mosadi goba motho yo mogolo yo a se nago molekane yo a nago le bana goba yo a se nago bana, katanela go dira thato ya Modimo. Gaešita le ge o le ka tlase ga kgateletšo goba o lebeletšane le mathata a feteletšego, le ka mohla o se ke wa lebala gore o mohlanka wa Modimo yo a phelago. Ka gona, eka ditiro tša gago di ka tlišetša Jehofa lethabo. (Diema 27:11) Le gona, eka boitshwaro bja gago bo ka feleletša ka lethabo bakeng sa gago gona bjale le bophelo bjo bo sa felego lefaseng le lefsa leo le tlago!