“O ba Botše Lentšu le”

1. (a) Jesu le Jeremia ba be ba swana ka eng? (b) Ke ka baka la’ng re swanetše go ekiša Jeremia bodireding bja rena?

JESU KRISTE ke mohlala o mogolo wo re o latelago ge re bolela ditaba tše dibotse. Le gona, ke mo go kgahlišago gore ka dinako tše dingwe batho ba lekgolong la pele la nywaga bao ba bego ba bona Jesu ba be ba nagana ka moporofeta Jeremia. (Mat. 16:13, 14) Jeremia o neilwe ke Modimo taelo ya gore a bolele ditaba tše dibotse, go etša ge go be go le bjalo le ka Jesu. Ka mohlala, lebakeng le lengwe Modimo o ile a mmotša gore: “O ba botše lentšu le, o re: ‘Se ke seo Jehofa . . . a se boletšego.’” (Jer. 13:12, 13; Joh. 12:49) Le gona, Jeremia o ile a bonagatša dika tšeo di swanago le tša Jesu bodireding bja gagwe.

2. Dinyakwa tša batho ba mehleng yeno di swana bjang le tša Bajuda ba mehleng ya Jeremia?

² Lega go le bjalo, Dihlatse tše dingwe di ka bolela gore: ‘Bodiredi bja rena ga bo swane le bja Jeremia. Yena e be e le mmoleledi wa Modimo setšhabeng seo se bego se ineetše go Modimo, mola rena bontši bja batho bao re bolelago le bona ba sa tsebe Jehofa.’ Seo ke therešo. Eupša mehleng ya Jeremia, Bajuda ba bantši ba be ba fetogile ba “ba sa hlalefago” e bile ba lahlile Modimo wa therešo. (Bala Jeremia 5:20-22.) Go be go nyakega gore ba fetoge gomme ba rapele Jehofa ka tsela e amogelegago. Ka mo go swanago lehono—go sa šetšwe gore batho ba ipolela gore ke Bakriste goba go se bjalo—go nyakega gore ba ithute go boifa Jehofa le go phegelela borapedi bja therešo. Anke re boneng kamoo re ka hlankelago Modimo wa therešo ka gona gomme ra thuša batho ka go ekiša Jeremia.

‘JEHOFA O KGWATHILE MOLOMO WA KA’

3. Ke selo sefe sa bohlokwa seo Modimo a ilego a se dira Jeremia mathomong a modiro wa gagwe, gona moporofeta yo o ile a ikwa bjang ka seo?

³ Gopola gore mathomong a bodiredi bja gagwe e le moporofeta, Jeremia o ile a kwa mantšu a: “Go bohle bao ke tlago go go roma go bona; tšohle tšeo ke tlago go go laela tšona, o tla di bolela. O se ke wa boifa difahlego tša bona, gobane ‘ke na le wena gore ke go hlakodiše,’ o re’alo Jehofa.” (Jer. 1:7, 8) Ke moka Jehofa o ile a dira selo seo Jeremia a bego a sa se letela. Jeremia o re botša gore: “Jehofa a napa a ntšha seatla sa gagwe sa kgwatha molomo wa ka. Ke moka Jehofa a re go nna: ‘Šefa ke tsentše mantšu a ka molomong wa gago. Tseba gore lehono ke go beile.’” (Jer. 1:9, 10) Go tloga ka nako yeo go ya pele, Jeremia o ile a tseba gore o bolela legatong la Modimo Ramatlaohle.a Ka thekgo e feletšego ya Modimo, phišego ya Jeremia ya go fišegela tirelo kgethwa e ile ya gola.—Jes. 6:5-8.

4. Ke mehlala efe ya phišego e kgahlišago bodireding yeo o ka e anegago?

⁴ Jehofa ga a kgwathe le ge e le ofe wa bahlanka ba gagwe ka tsela ya kgonthe lehono. Lega go le bjalo, o ba nea kganyogo e matla ya go bolela ditaba tše dibotse a diriša moya wa gagwe. Bontši bja bona ba fišega kudu. Ela hloko mohlala wa Maruja wa kua Sepania. O na le nywaga e fetago e 40 a golofetše matsogo le maoto. O thatafalelwa ke go tšama a ruta ka ntlo le ntlo, ka gona o diriša ditsela tše dingwe tša go tšea karolo bodireding. Tsela e nngwe yeo a e dirišago ke ya go ngwala mangwalo. Maruja o botša morwedi wa gagwe ditaba ke moka morwedi yoo a di ngwale. Nakong ya lesolo leo le tšerego kgwedi, Maruja le morwedi wa gagwe ba ile ba aba mangwalo a fetago a 150, ao ka gare ga dienfelopo tša ona ba bego ba tsentšha pampišana. Ka baka la maiteko a bona, ditaba tše dibotse di ile tša fihla magaeng a mantši motsaneng wa kgauswi. Maruja o ile a botša morwedi wa gagwe gore: “Ge e ba le lengwe la mangwalo a rena le ka fihla diatleng tša motho wa pelo e botse, Jehofa o tla re šegofatša ka thuto ya Beibele.” Mogolo wa lefelong leo o ngwadile gore: “Ke leboga Jehofa ka dikgaetšedi tša go swana le Maruja, tšeo di rutago ba bangwe go tšeela godimo dilo tšeo e tlogago e le tša bohlokwa.”

5. (a) Ke bjang Jeremia a ilego a dula a fišega le ge a be a bolela le batho bao ba sa ratego molaetša wa gagwe? (b) Ke bjang o ka dulago o na le phišego ya go bolela ditaba tše dibotse?

⁵ Mehleng ya Jeremia, badudi ba bantši ba Jerusalema ba ile ‘ba se thabele’ therešo ya lentšu la Modimo. Na moporofeta yo o ile a kgaotša go bolela feela ka gobane ba bantši ba be ba sa rate molaetša wa gagwe? Le gatee! Jeremia o itše: “Ke tletše pefelo yeo Jehofa a ba befeletšego ka yona. Ke lapišitšwe ke go homola.” (Jer. 6:10, 11) O ka dula o na le phišego e bjalo bjang? Tsela e nngwe ke ka go naganišiša ka tokelo e sa bapišegego yeo o nago le yona ya go emela Modimo wa therešo. O a tseba gore batho ba maemo a godimo lefaseng le, ba gobošitše leina la Modimo wa therešo. Nagana gape le kamoo baetapele ba bodumedi ba forilego batho ba moo o dulago gona, go fo swana le ge baperisita ba mehleng ya Jeremia ba ile ba dira bjalo. (Bala Jeremia 2:8, 26, 27.) Go fapana le seo, ditaba tše dibotse tša Mmušo wa Modimo tšeo o di tsebatšago e tloga e le pontšho ya gore Modimo o gaugela batho. (Dillo 3:31, 32) Ee, go naganišiša ka therešo yeo go ka go thuša go dula o na le phišego ya go bolela ditaba tše dibotse le go thuša bao ba swanago le dinku.

6. Ke ditlhohlo dife tše di boifišago tšeo Jeremia a ilego a kopana le tšona?

⁶ Ruri o tla dumela gore go dula o fišega bodireding bja Bokriste ga se ka mehla go lego bonolo. Jeremia le yena o ile a kopana le ditlhohlo tše dikgolo ge a dutše a hlankela Jehofa, tšeo di akaretšago le baporofeta ba maaka. O ka bala ka tiragalo e nngwe go Jeremia kgaolo 28. Batho ba bantši ba be ba sa theetše molaetša wa gagwe gomme ka dinako tše dingwe o be a lewa ke bodutu. (Jer. 6:16, 17; 15:17) Go feta moo, lebakeng le lengwe o ile a swanelwa ke go lebeletšana le manaba ao a bego a nyaka go mmolaya.—Jer. 26:11.

“O NTAHLEDITŠE, WENA JEHOFA”

7, 8. Modimo o ile a ‘lahletša’ Jeremia bjang ka tsela e holago?

⁷ Nakong e nngwe ge Jeremia a be a kwerwa le go rogwa letšatši le letšatši, o ile a botša Modimo kamoo a ikwago ka gona. O nagana gore ke ka kgopolo efe o ka rego Jehofa ‘o lahleditše’ moporofeta wa gagwe yo a botegago, bjalo ka ge go boletšwe go Jeremia 20:7, 8?—Bala lengwalo le.

⁸ Ga se gore Jehofa o ile a lahletša goba a fora Jeremia e le ka kgonthe ka go diriša mekgwa e itšego ya bohwirihwiri. Go e na le moo, Modimo o ile a ‘lahletša’ moporofeta wa gagwe ka kgopolo e nepagetšego le ka tsela e holago. Jeremia o ile a kwa eka o be a ganetšwa kudu, moo a ilego a nagana gore a nnoši a ka se sa kgona go phetha kabelo yeo Modimo a mo neilego yona. Eupša ka thekgo le thušo ya Ramatlaohle, o ile a e phetha. Ka gona, o ka bolela gore Jehofa o ile a mo fenya, a iponagatša a le matla kudu go feta Jeremia le tshekamelo ya gagwe. Ge monna yo wa Modimo a be a nagana gore o dirile sohle seo a ka se kgonago gomme a ka se tšwele pele, Jehofa o ile a diriša matla a go phegelela moo go ilego gwa ba bjalo ka ge eka Jeremia o lahleditšwe. Modimo o ile a iponagatša a le matla go feta mafokodi a moporofeta yo. Jeremia o ile a kgona go tšwela pele a bolela gaešita le ge a be a lebeletšane le lehloyo, kganetšo le bošoro.

9. Ke ka baka la’ng o ka matlafatšwa ke mantšu ao a lego go Jeremia 20:11?

⁹ Jehofa o ile a ipontšha a le bjalo ka “mogale yo a šiišago” kgauswi le Jeremia, a mo thekga. (Jer. 20:11) Le wena Modimo a ka go matlafatša e le gore o dule o fišegela borapedi bja therešo le go tšwela pele go sa šetšwe mathata a magolo. O ka nagana ka se go etša ge se boletšwe phetolelong e nngwe gore Jehofa e tla ba “lešole le matla” leo le emego kgauswi le wena.—Contemporary English Version.

10. O ikemišeditše go dira eng ge o lebeletšane le kganetšo?

¹⁰ Moapostola Paulo o ile a gatelela ntlha yeo ge a be a kgothatša Bakriste bao ba bego ba lebeletšane le kganetšo. O ngwadile gore: “Itshwareng ka mokgwa o swanelago ditaba tše dibotse ka Kriste, e le gore . . . ke kwe . . . gore le eme le tiile ka moya o tee, gore ka moya o tee le katana le bapelane bakeng sa tumelo ya ditaba tše dibotse, gomme le sa tšhošwe ka tsela le ge e le efe ke baganetši ba lena.” (Bafil. 1:27, 28) Le wena o ka ithekga ka Modimo Ramatlaohle e bile o swanetše go dira bjalo ge o dutše o dira bodiredi bja gago, go etša ge Jeremia le Bakriste ba lekgolong la pele la nywaga ba dirile bjalo. Ge e ba batho ba bangwe ba go kwera goba ba go hlasela, gopola gore Jehofa o na le wena gomme o tla go matlafatša. O ile a matlafatša Jeremia le bana beno ba bangwe ba bantši; ka go re’alo le wena a ka go matlafatša. Mo lope gore a go thuše gomme o holofele gore o tla araba thapelo ya gago. Le wena o ka ikwa o ‘lahletšwa’ ge Modimo a go nea matla a gore o lebeletšane ka katlego le mapheko, o lebeletšane le ona ka sebete go e na le go boifa. Ee, o ka dira mo gontši go feta kamoo o bego o nagana ka gona.—Bala Ditiro 4:29-31.

11, 12. (a) Ke diphetogo dife tšeo o ka di dirago e le gore o bolele le batho ba bantši bodireding bja gago? (b) Seswantšho seo se lego go letlakala 39 se šišinya gore lefelong la geno ke kae moo o ka dirago modiro wa boboledi?

¹¹ Seo re se balago ka tirelo ya Jeremia se ka re thuša ka ditsela tše di fapafapanego gore re be badiredi bao ba atlegago ba ditaba tše dibotse. Ka morago ga gore a hlankele e le moporofeta wa Jehofa ka nywaga e fetago e 20, o ile a re: “[Ke ile] ka tšwela pele ke bolela le lena, ke tsoga e sa le ka masa gomme ke bolela, eupša ga se la ka la theetša.” (Jer. 25:3) Ee, o ile a thoma e sa le ka pela go e na le go diega. Na go na le seo re ka ithutago sona mohlaleng wa gagwe seo se ka re holago? Diphuthegong tše dintši, go na le bagoeledi bao ba tsogago ka masa go yo bolela le batho moo go emago dipese le ditimela. Dihlatse tše dintši tša magaeng di diriša dinako tša mesong go etela boradipolasa le ba bangwe bao ba šetšego ba tsogile ka nako yeo. Na o ka nagana ka ditsela tše dingwe tšeo o ka dirišago thuto ye yeo re ithutago yona bodireding bja Jeremia bjo a bo dirilego ka go botega? Go thwe’ng ka go tsoga e sa le ka pela e le gore o be gona ge lenaneo la seboka sa tirelo ya tšhemo le thoma?

¹² Lega go le bjalo, gantši go bolela ka ntlo le ntlo thapama le mantšiboa go ba le mafelelo a mabotse kudu mafelong a mantši. E bile bagoeledi ba bangwe ba dira modiro wa boboledi le bošego, ba etela bašomi ba mafelong a go tšhela peterole, mabenkeleng a go jela le dikgwebong tše dingwe tšeo di bulago diiri tše 24 ka letšatši. Na o ka beakanya maemo a gago e le gore o dire boboledi nakong yeo o ka hwetšago batho ba le ka gae goba le ge e le kae?

13, 14. (a) Mohlala wa Jeremia o amana bjang le go dira maeto a go boela? (b) Ke’ng seo se bontšhago bohlokwa bja gore o botege tabeng ya go dira maeto a go boela?

¹³ Lebakeng le lengwe, Jehofa o ile a laela Jeremia gore a tsebatše melaetša ya boporofeta a eme dikgorong tša tempele goba tša Jerusalema. (Jer. 7:2; 17:19, 20) Ka go bolela melaetša e bjalo a le dikgorong tšeo, Jeremia o ile a bolela le batho ba bantši ka lentšu la Jehofa. Ka ge batho ba bantši, go akaretša le banna ba motse ba maemo a godimo, barekiši le borakgwebo, ba be ba diriša kgoro e tee ka mehla, go ka direga gore o ile a bolela le batho ba bangwe leboelela ka maiteko a go ba thuša go kwešiša dilo tšeo ba bego ba di kwele pejana. Re ka ithuta eng go se mabapi le go dira maeto a go boela go bao ba bontšhitšego kgahlego?

¹⁴ Jeremia o be a tseba gore maphelo a batho a be a ithekgile ka modiro wa gagwe e le moporofeta wa Modimo. Nakong e nngwe ge a be a sa kgone go phetha ditaelo tšeo a di neilwego ke Modimo tša go yo bolela le batho, o ile a roma mogwera wa gagwe e lego Baruke gore a ye. (Bala Jeremia 36:5-8.) Re ka ekiša Jeremia bjang tabeng ye? Ge re botša mong wa ntlo gore re tla boa, na re a boela? Ge e ba re ka se kgone go dira leeto la go boela goba go yo swara thuto ya legae ya Beibele, na re rulaganya gore yo mongwe a ye? Jesu o itše: “Anke ‘ee’ ya lena e be ee.” (Mat. 5:37) Go phetha seo re se boletšego go bohlokwa, ka gobane re emela Modimo wa therešo le wa thulaganyo.—1 Bakor. 14:33, 40.

15, 16. (a) Ba bantši ba latetše mohlala wa Jeremia bjang ka go katološa bodiredi bja bona? (b) O ithuta eng phihlelong ya kua Chile, go etša ge go bontšhitšwe seswantšhong seo se lego go letlakala 40?

¹⁵ Jeremia o ile a kgothatša Bajuda bao ba lego Babilona ka go ba ngwalela lengwalo ka “lentšu le lebotse” la Jehofa la mabapi le tsošološo. (Jer. 29:1-4, 10) Lehono, “lentšu le lebotse” la seo Jehofa a tlago go se dira kgauswinyane le ka phatlalatšwa ka katlego ka go ngwala mangwalo le ka mogala. Na o ka diriša mekgwa yeo go thuša ba leloko goba batho ba bangwe bao ba dulago kgole goba bao go lego thata go ikgokaganya le bona?

¹⁶ Ka go latela mohlala wa Jeremia wa go phetha bodiredi bja gagwe ka botlalo, bagoeledi ba Mmušo lehono gantši ba ba le mafelelo a mabotse. Hlatse e nngwe kua Chile e ile ya batamela mosadi yo a bego a etšwa seteišeneng sa ditimela sa ka tlase. Mosadi yoo o ile a thabišwa kudu ke go kwa molaetša wa Beibele gomme a dumela gore ba tle ba boledišane ka Beibele legaeng la gagwe. Lega go le bjalo, Hlatse e ile ya se ngwale aterese ya mosadi yoo. Ka moragonyana, ge e lemogile gore go bohlokwa gore e hlagolele go kgahlegela therešo ga mosadi yoo, kgaetšedi ya rena o ile a rapela Jehofa gore a mo thuše. Letšatšing le le latelago, o ile a boela seteišeneng seo ka iri e swanago. O ile a gahlana le mosadi yola gape. Mo nakong ye, o ile a kgonthišetša gore o ngwala aterese ya gagwe gomme ka morago a etela mosadi yoo legaeng la gagwe go mo thuša go kwešiša Mangwalo. Kgauswinyane dikahlolo tša Modimo di tla tlela lefase la Sathane. Eupša go na le kholofelo bakeng sa bao ba itsholago gomme ba ba le tumelo ditabeng tše dibotse. (Bala Dillo tša Jeremia 3:31-33.) Ka gona, anke re bontšheng seo ka go šoma tšhemo ya gabo rena ka mafolofolo.

‘MOHLOMONGWE BA TLA THEETŠA GOMME YO MONGWE LE YO MONGWE A GOMA’

17. O ka ekiša Jeremia bjang ge o boledišana le batho ba tšhemong ya geno?

¹⁷ Jehofa o be a sa nyake gore batho ba hwe. Nywaga e lesome pele Jerusalema e ka senywa, o ile a diriša Jeremia go hlalosa kholofelo ya bao ba lego bothopša Babilona. Re bala gore: “Leihlo la ka le tla a lebelela gabotse, gomme ke tla a bušetša nageng ye. Ke tla a aga, gomme nka se a phušole; ke tla a bjala gomme nka se a tumole.” Jeremia o be a ka botša batho ba bjalo gore: “Go na le kholofelo ka bokamoso bja gago.” (Jer. 24:6; 26:3; 31:17) Jeremia o ile a lebelela batho ka tsela yeo Modimo a ba lebelelago ka yona. O ile a dira bodiredi bja gagwe a tshwenyegile e le ruri, a ba botša mantšu a Jehofa a go lopa, a rego: “Sokologang, hle, yo mongwe le yo mongwe a sokologe tseleng ya gagwe e mpe, le lokiše ditiro tša lena.” (Jer. 35:15) Na o ka nagana ka ditsela tše dingwe tšeo o ka bontšhago gore o tloga o kgahlegela batho ba tšhemong ya geno?

18, 19. (a) Ke pono efe yeo re swanetšego go e phema ge re dutše re bolela ditaba tše dibotse? (b) Ke boemo bofe bja kgopolo bjo Jeremia a bego a na le bjona bjo re swanetšego go ba le bjona?

¹⁸ Lerato le legolo leo Jeremia a bego a rata batho ka lona ga se la ka la fola. Ge Jerusalema e be e senywa, o ile a tšwela pele a ba kwela bohloko. (Bala Dillo tša Jeremia 2:11.) Bajuda ba be ba swanetše go ipona molato ka kotsi yeo e ba wetšego. Lega go le bjalo, Jeremia ga se a ka a re: ‘Ke le boditše.’ Go e na le moo, o ile a nyamišwa kudu ke seo se ba wetšego. Ka mo go swanago, bodiredi bja rena ga se bja swanela go ba bja go ithola kgwara goba go fo phetha molao. Maiteko a rena a go nea bohlatse a swanetše go bontšha gore re rata Modimo wa rena yo a kgahlišago gotee le batho bao ba bopilwego ka seswantšho sa gagwe.

¹⁹ Ga go na tokelo goba maemo lefaseng le ao a ka phalago go nea bohlatse legatong la Modimo wa therešo. Jeremia o ile a ikwa bjalo gomme a ngwala gore: “Ge ke hwetša mantšu a gago ke ile ka a dira dijo tša ka; lentšu la gago le ntlišetša tlhalalo le lethabo pelong ya ka; gobane ke bitšwa ka leina la gago, wena Jehofa.” (Jer. 15:16) Ge re dutše re bolela ditaba tše dibotse, batho ba bantši ba ka tseba le go rata Yo ba mo kolotago maphelo a bona. Go etša ge Jeremia a bontšhitše, ka go hlankela ka phišego le ka lerato, re tla tsenya letsogo go thušeng batho go dira bjalo.