O ka Holwa ke Kgwerano e Mpsha

1. Ke ditaelo dife tše pedi tšeo Jeremia a ilego a di phethagatša?

JEHOFA o ile a nea Jeremia ditaelo tše pedi. Ya pele e be e le gore ‘a tumole, a phušole, a senye a be a rutle.’ E nngwe e be e le gore ‘a age a be a bjale.’ Moporofeta yo o ile a phetha taelo ya pele ka gore a pepentšhe bokgopo bja Bajuda bao ba ikgantšhago, a bolela dikahlolo tša Jehofa tšeo di bego di tla tlela bona le Babilona. Lega go le bjalo, diporofeto tša Jeremia di be di na le kholofelo ka bokamoso. O ile a bolela e sa le pele ka go agwa ga seo Modimo a bego a rerile gore se tle se agwe le go bjalwa ga seo A bego a rerile gore se tle se bjalwe. Ka mohlala, Jeremia o be a phethagatša karolo ya bobedi ya kabelo ya gagwe ge a be a lebiša tlhokomelo go bušetšweng ga Bajuda nageng ya gabo bona.—Jer. 1:10; 30:17, 18.

2. Ke ka baka la’ng Jehofa a ile a ahlola batho ba gagwe, gona o dirile seo go fihla tekanyong efe?

² Taba ya gore Jeremia o ile a tsebatša gore Bajuda ba be ba tla bušetšwa nageng ya gabo bona e be e sa re gore Modimo o be a tlo lema batho ba gagwe pele ga moo goba go fetoša melao ya gagwe ya toka. Aowa, o be a tlo ahlola Bajuda bao ba go se kwe. (Bala Jeremia 16:17, 18.) Mehleng ya Jeremia, ke batho ba sego kae kua Jerusalema bao ba bego ba ‘bontšha toka’ goba ‘ba tsoma potego,’ gomme Jehofa o be a se sa kgotlelela. O ile a re: “Ke lapišitšwe ke go go kwela bohloko.” (Jer. 5:1; 15:6, 7) Bajuda bao ba be ba “boetše melatong ya borakgolokhukhu ba bona, e lego bona ba pele bao ba gannego go kwa” mantšu a Jehofa. Go feta moo, ba ile ba galefiša Modimo ka go otswa le medimo ya maaka. (Jer. 11:10; 34:18) Jehofa o be a tlo phošolla batho ba gagwe gaešita le go ba otla “go fihla tekanyong e swanetšego.” Ka go re’alo, ba bangwe ba be ba ka hlaphogelwa gomme ba boela go yena.—Jer. 30:11; 46:28.

3. Ke ka baka la’ng o swanetše go ela hloko boporofeta bja mabapi le kgwerano e mpsha?

³ Modimo o ile a diriša Jeremia gore a bolele e sa le pele selo seo se bego se tla hola batho ba bantši le go ba hola ka mo go sa felego—kgwerano e mpsha. Ka go ahlaahla dipuku tša Jeremia tša boporofeta, re na le lebaka le le kwagalago la go lebiša tlhokomelo sebopegong se seo se kgahlišago, e lego kgwerano e mpsha. E be e tla tšeela legato kgwerano yeo e bego e dirilwe le Baisiraele ka morago ga Khudugo ya bona, e lego kgwerano yeo mmoelanyi wa yona e lego Moshe. (Bala Jeremia 31:31, 32.) Ge Jesu Kriste a be a hloma Sejo sa Morena sa Mantšiboa o ile a bolela ka kgwerano ye e mpsha, ka gona e swanetše go re kgahla e le ka kgonthe. (Luka 22:20) Moapostola Paulo o ile a bolela ka kgwerano ye ge a be a ngwalela Baheberu. O ile a tsopola boporofeta bja Jeremia gomme a gatelela bohlokwa bja kgwerano e mpsha. (Baheb. 8:7-9) Eupša ge e le gabotse kgwerano e mpsha ke eng? Ke ka baka la’ng e ile ya nyakega? Ke bomang bao ba akaretšwago go yona, gona wena e ka go hola bjang? Anke re boneng.

KE KA BAKA LA’NG GO BE GO NYAKEGA KGWERANO E MPSHA?

4. Ke’ng seo kgwerano ya Molao e ilego ya se phethagatša?

⁴ E le gore re kwešiše kgwerano e mpsha, sa pele re swanetše go kwešiša morero wa ya mathomo, e lego kgwerano ya Molao. Morero wa yona e be e le go phetha merero e mmalwa e kgahlišago kudu bakeng sa setšhaba seo se bego se letetše Peu e holofeditšwego, yeo e bego e tla dirišetšwa go šegofatša ba bantši. (Gen. 22:17, 18) Ge Baisiraele ba be ba amogela kgwerano ya Molao, ba ile ba ba “thoto e kgethegilego” ya Modimo. Ka tlase ga kgwerano yeo, moloko wa Lefi o be o tla tšweletša baperisita ba setšhaba. Ge Jehofa a be a dira kgwerano yeo ya setšhaba magareng ga gagwe le Isiraele kua Thabeng ya Sinai, o ile a bolela ka “mmušo wa baperisita le setšhaba se sekgethwa” eupša a se utolle gore seo se be se tla direga neng le tsela yeo se bego se tla direga ka yona. (Ek. 19:5-8) Go ba go fihla ge e diragetše, kgwerano yeo e ile ya bontšha gabotse gore Baisiraele ba be ba sa kgone go boloka Molao dilong ka moka. Ka gona e ile ya bonagatša dibe tša bona. Ka baka leo, ka tlase ga Molao Baisiraele ba be ba swanetše go neela dihlabelo ka mehla e le gore ba lebalelwe dibe tša bona. Lega go le bjalo, go molaleng gore go be go nyakega selo se se fetago seo, sehlabelo seo se phethagetšego seo go bego go ka se nyakege gore se boeletšwe. Ee, go be go tloga go nyakega tebalelo ya sa ruri ya sebe.—Bagal. 3:19-22.

5. Ke ka baka la’ng Jehofa a ile a bolela e sa le pele ka kgwerano e mpsha?

⁵ Ka go re’alo, re ka kgona go bona lebaka leo ka lona Modimo a ilego a laela Jeremia gore a bolele e sa le pele ka kgwerano e nngwe, e lego kgwerano e mpsha, gaešita le ge kgwerano ya Molao e be e sa šoma. Ka baka la lerato la gagwe le botho bja gagwe, Jehofa o be a nyaka go dira gore go be le thušo ya sa ruri yeo e bego e ka se hole setšhaba setee feela. A diriša Jeremia, Modimo o ile a bolela ka bao ba bego ba tla ba kgweranong ye yeo e bego e sa tla gore: “Ke tla ba lebalela molato wa bona gomme nka se sa gopola sebe sa bona.” (Jer. 31:34) Gaešita le ge kholofetšo yeo e ile ya newa mehleng ya Jeremia, e swaretše batho ka moka tebelelo e kgahlišago. Bjang?

6, 7. (a) Batho ba bangwe ba ikwa bjang ka go ba ga bona le sebe? (b) Ke ka baka la’ng go ahlaahla kgwerano e mpsha go ka go kgothatša?

⁶ Re sa dutše re se ra phethagala gomme re lemoga seo gantši. Seo se ile sa bontšhwa ke ngwanabo rena yo a bego a lwantšhana le bofokodi bjo bogolo. O re: “Ge ke be ke boela mekgweng ya ka ya kgale, ke be ke nyama kudu. Ke be ke nagana gore nka se kgone go lefa bakeng sa seo ke se dirilego. Ke be ke thatafalelwa ke go rapela. Ke be ke thoma ka gore: ‘Jehofa, ga ke tsebe ge e ba o tla kwa thapelo ye goba bjang, eupša . . . ’” Ba bangwe bao le bona ba kilego ba boela mekgweng ya bona ya kgale goba ba kilego ba dira sebe, ba ile ba kwa eka “leru” le be le thiba dithapelo tša bona gore di se fihle go Modimo. (Dillo 3:44) Ba bangwe ba tshwenywa ke go nagana ka diphošo tšeo ba di dirilego nakong e fetilego, di ba tshwenya gaešita le ka morago ga nywaga e mentši. Gaešita le Bakriste bao e lego mehlala e mebotse ba ka bolela dilo tšeo ka morago ba ka itsholago gore ba di boletše.—Jak. 3:5-10.

⁷ Ga go le o tee wa rena yo a swanetšego go nagana gore a ka se tsoge a itshwere ka tsela e sa swanelago. (1 Bakor. 10:12) Gaešita le moapostola Paulo o ile a lemoga gore o be a dira diphošo. (Bala Baroma 7:21-25.) Tabeng ye, re swanetše go nagana ka kgwerano e mpsha. Modimo o ile a holofetša gore sebopego sa bohlokwa sa kgwerano e mpsha e be e tla ba gore a ka se sa hlwa a gopola dibe. A mohola o sa bapišegego gakaakaang! Jeremia o swanetše go ba a ile a kgothatšwa kudu ke go bolela ka seo e sa le pele gomme le rena re ka kgothatšega ka mo go swanago ge re dutše re ithuta ka mo go oketšegilego ka kgwerano e mpsha le go bona kamoo e ka re holago ka gona.

KWERANO E MPSHA KE ENG?

8, 9. Jehofa o ile a swanelwa ke go dira boikgafo bofe e le gore go lebalela dibe go kgonege?

⁸ Ge o dutše o tseba Jehofa gakaone, o lemoga le go feta botho le kgaugelo tšeo a di bontšhago batho bao ba sa phethagalago. (Ps. 103:13, 14) Ge Jeremia a be a bolela e sa le pele ka kgwerano e mpsha, o ile a gatelela gore Jehofa o be a tla “ba lebalela molato wa bona” gomme a se sa gopola sebe sa bona. (Jer. 31:34) O ka nagana gore Jeremia a ka ba a ile a ipotšiša kamoo Modimo a bego a tla fihlelela go lebalela mo go bjalo. Bonyenyane o be a ka kwešiša gore ge Modimo a be a bolela ka kgwerano e mpsha, o be a bolela gore go be go tla ba le tumelelano goba kwano magareng ga Gagwe le batho. Go ka direga gore ka yona kgwerano yeo, Jehofa o be a tla phethagatša seo a bego a buduletše Jeremia gore a se ngwale, go akaretša go lebalela. Ditaba ka botlalo di be di tla swanelwa ke go leta go fihlela ge Modimo a utollotše ka mo go oketšegilego morero wa gagwe, go akaretša le seo Mesia a bego a tla se dira.

⁹ O ka ba o ile wa bona batswadi bao ba lemago bana ba bona, bao ba sa ba kgalemego. Na o be o ka letela gore Jehofa a be bjalo? Le gateetee! Se se bonagala gabotse tseleng yeo kgwerano e mpsha e ilego ya thoma go šoma ka yona. Go e na le gore Modimo a fo phumola dibe, o ile a phethagatša ka kelohloko molao wa gagwe wa toka ka gore a nee motheo wa semolao wa tebalelo ya dibe, a dira bjalo ka boikgafo bjo bogolo. O ka kwešiša se ka gore o ele hloko seo Paulo a se ngwadilego ge a be a ahlaahla kgwerano e mpsha. (Bala Baheberu 9:15, 22, 28.) Paulo o boletše ka ‘go lokollwa ka topollo’ gomme a re “ga go be le tebalelo ya dibe ka ntle le gore madi a tšhollwe.” Kgweranong e mpsha, se se be se sa bolele go dira dihlabelo ka madi a dipoo goba a dipudi go etša ge go be go dirwa bjalo ka tlase ga Molao. Go e na le moo, kgwerano e mpsha e ile ya dirwa gore e šome ka madi a Jesu. Motheong wa sehlabelo seo se se phethagetšego, Jehofa a ka ‘lebalela molato le sebe,’ a dira bjalo ka mo go sa felego. (Dit. 2:38; 3:19) Eupša ke bomang bao ba tlago go ba kgweranong ye e mpsha gomme ba hwetša tebalelo yeo? Ga se setšhaba sa Bajuda. Jesu o ile a re Modimo o be a tlo lahla Bajuda bao ba bego ba dira dihlabelo ka diphoofolo ka tlase ga Molao, gomme O be a tla retologela setšhabeng se sengwe. (Mat. 21:43; Dit. 3:13-15) Setšhaba seo e ile ya ba “Isiraele ya Modimo” yeo e bopšago ke Bakriste bao ba tloditšwego ka moya o mokgethwa. Ka tsela e bonolo, kgwerano ya Molao e be e le magareng ga Modimo le Isiraele ya nama, mola kgwerano e mpsha yona e le magareng ga Jehofa Modimo le Isiraele ya moya, yeo Jesu e lego Mmoelanyi wa yona.—Bagal. 6:16; Baroma 9:6.

10. (a) “Lehlogedi” la Dafida ke mang? (b) Batho ba ka holwa bjang ke “lehlogedi” leo?

¹⁰ Jeremia o ile a bolela ka tsela ya seswantšhetšo ka Yo a tlago, e lego Mesia, a le bjalo ka “lehlogedi” la Dafida. Seo se a swanelega. Gaešita le nakong ya ge Jeremia a be a hlankela e le moporofeta, sehlare sa bogoši sa lapa la Dafida se be se ripilwe. Lega go le bjalo, kutu ya sona e be e se ya hwa. Ge nako e dutše e eya, Jesu o ile a belegwa lešikeng la Kgoši Dafida. O be a ka bitšwa ka gore, “Jehofa ke Toko ya Rena,” e le go gatelela kamoo Modimo a tshwenyegago kudu ka gona ka seka seo. (Bala Jeremia 23:5, 6.) Jehofa o ile a dumelela gore Morwa wa gagwe yo a tswetšwego a nnoši a tlaišege mo lefaseng le gore a hwe. Ka go dumelelana le toka ya gagwe, Jehofa o be a ka diriša mohola wa sehlabelo sa topollo sa “lehlogedi” la Dafida e le motheo wa go lebalela. (Jer. 33:15) Se se ile sa bula tsela ya gore batho ba bangwe ba bolelwe “gore ba lokile gore ba hwetše bophelo” gomme ba tlotšwe ka moya o mokgethwa ke moka e be karolo ya kgwerano e mpsha. E le bohlatse bjo bo oketšegilego bja gore Modimo o tshwenyegile ka toka, batho ba bangwe bao ba sego kgweranong yeo ka go lebanya ba ka holega go yona e bile ba holwa ke yona, go etša ge re tla bona.—Baroma 5:18.

11. (a) Molao wa kgwerano e mpsha o ngwadilwe kae? (b) Ke ka baka la’ng ba “dinku tše dingwe” ba kgahlegela molao wa kgwerano e mpsha?

¹¹ Na o ka rata go tseba tše dingwe tša dibopego tša moswananoši tša kgwerano ye e mpsha? Phapano e nngwe e kgolo magareng ga yona le kgwerano ya Molao wa Moshe ke moo di bego di ngwadilwe gona. (Bala Jeremia 31:33.) Melao e Lesome ya kgwerano ya Molao e be e ngwadilwe diphaphathing tša maswika, tšeo mafelelong di ilego tša timelela. Ka mo go fapanego, Jeremia o ile a porofeta gore molao wa kgwerano e mpsha o be o tla ngwalwa dipelong tša batho gomme wa dulela sa ruri. Bao e lego karolo ya kgwerano e mpsha, e lego Bakriste ba tloditšwego, ba tšeela molao wo godimo e le ka kgonthe. Go thwe’ng ka bao ba sa akaretšwego ka go lebanya kgweranong e mpsha, e lego ba “dinku tše dingwe,” bao ba holofelago go tlo phela ka mo go sa felego mo lefaseng? (Joh. 10:16) Le bona ba thabela molao wa Modimo. Ka mantšu a mangwe, ba swana le badiiledi ba kua Isiraeleng bao ba ilego ba amogela Molao wa Moshe le go holwa ke wona.—Lef. 24:22; Num. 15:15.

12, 13. (a) Molao wa kgwerano e mpsha ke eng? (b) Ke ka baka la’ng ka tlase ga “Molao wa Kriste” o ka se ikwe o gapeletšwa go hlankela Modimo?

¹² O be o tla araba bjang ge o be o ka botšišwa gore: ‘Molao wo wo o ngwadilwego ka dipelong tša Bakriste ba tloditšwego ke eng?’ Go ba gona, molao wo o bitšwa gape gore ke “molao wa Kriste.” O ile wa newa Baisiraele ba moya pele, e lego bao ba lego kgweranong e mpsha. (Bagal. 6:2; Baroma 2:28, 29) O ka akaretša “molao wa Kriste” ka lentšu letee: lerato. (Mat. 22:36-39) Bakriste bao ba tloditšwego ba ngwalwa bjang molao wo ka dipelong tša bona? Ditsela tše pedi tša bohlokwa tšeo se se dirwago ka gona ke ka go ithuta ga bona Lentšu la Modimo le go batamela Jehofa ka thapelo. Ka gona, dibopego tšeo tša borapedi bja therešo e swanetše go ba dilo tšeo di dirwago ka mehla maphelong a Bakriste ka moka ba therešo, gaešita le bao ba sego kgweranong e mpsha eupša e le bao ba nyakago go holwa ke yona.

¹³ Go bolelwa ka “molao wa Kriste” e le “[molao] o phethagetšego wo e lego wa tokologo” le “molao wa batho ba ba lokologilego.” (Jak. 1:25; 2:12) Batho ba bantši ba be ba belegelwa ka tlase ga Molao wa Moshe, eupša ga go na motho yo a belegelwago kgweranong e mpsha goba ka tlase ga molao wa Kriste. Ga go le o tee wa bao ba kwago molao wa Kriste yoo a gapeletšwago go hlankela Modimo. Go e na le moo, ba thabela go tseba gore molao wa Modimo o ka ngwalwa ka dipelong le gore mehola ya ka mo go sa felego ya kgwerano yeo Jeremia a boletšego ka yona e sa le pele e ka hwetšwa ke batho lehono.

BAO BA HOLWAGO KE KGWERANO E MPSHA

14. Ke bomang bao go lego molaleng gore ba holwa ke kgwerano e mpsha?

¹⁴ Ka morago ga go tseba gore ke batho ba 144 000 bao ba lego kgweranong e mpsha, ba bangwe ba ka ba ba ile ba nagana gore ke bona bao feela ba tlago go holwa ke yona. Mohlomongwe ba ile ba nagana bjalo ka ge e le batlotšwa feela bao ba jago diswantšhetšo Segopotšong sa ngwaga le ngwaga sa lehu la Kriste, moo beine e swantšhetšago “madi a kgwerano e mpsha.” (Mar. 14:24) Lega go le bjalo, gopola gore bao ba lego kgweranong e mpsha ba tla ba gotee le Jesu e le “peu” ya Aborahama yeo ditšhaba ka moka di tlago go šegofatšwa ka yona. (Bagal. 3:8, 9, 29; Gen. 12:3) Ka tsela e itšego, Jehofa a diriša kgwerano e mpsha o tla phethagatša kholofetšo ya gagwe ya go šegofatša batho ka moka ka “peu” ya Aborahama.

15. Ke tema efe yeo go boletšwego ka yona e sa le pele gore batlotšwa ba tla e kgatha?

¹⁵ Jesu Kriste, yena karolo ya motheo ya peu ya Aborahama, o hlankela e le Moperisita yo a Phagamego gomme o fane ka sehlabelo se se phethagetšego seo se dirago gore go lebalelwa melato le dibe go kgonege. (Bala Baheberu 2:17, 18.) Lega go le bjalo, kgale Modimo o ile a bolela e sa le pele gore go be go tla ba le “mmušo wa baperisita le setšhaba se sekgethwa.” (Ek. 19:6) Isiraeleng ya nama, baperisita ba be ba etšwa molokong o mongwe gomme dikgoši le tšona di etšwa molokong o mongwe. Ka gona, setšhaba se seo se bego se holofeditšwe sa dikgoši le baperisita se be se tla ba gona bjang? Moapostola Petro o ile a lebiša lengwalo la gagwe la pele go bao ba bego ba kgethagaditšwe ka moya. (1 Pet. 1:1, 2) O ile a bolela ka ba bjalo gore ke “boperisita bja bogoši, setšhaba se sekgethwa, batho ba e lego leruo le le kgethegilego.” (1 Pet. 2:9) Ka go re’alo, Bakriste bao ba tloditšwego kgweranong e mpsha ba tla hlankela e le baperisita ka tlase ga Kriste. Anke o nagane seo se bolelwago ke se! Letšatši le letšatši re lwantšhana le tutuetšo ya sebe seo se sa ‘bušago e le kgoši.’ Bao ba tlago go hlankela e le baperisita ka tlase ga Kriste ba tla ba ba bile le phihlelo e swanago. (Baroma 5:21) Ba tla ba ba tseba kamoo go lego ka gona gore motho a dire diphošo ke moka a lwantšhane le maikwelo a go ikwa a le molato. Ka gona, bona gotee le Kriste ba tla kgona go re kwela bohloko ge re dutše re fenya ditshekamelo tša go dira sebe.

16. Ke kgothatšo efe yeo “lešaba le legolo” le ka e hwetšago go Kutollo 7:9, 14?

¹⁶ Go Kutollo 7:9, 14, “lešaba le legolo” le bonwa “le apere diaparo tše telele tše tšhweu” tšeo di swantšhetšago boemo bjo bo hlwekilego pele ga Modimo. Ga bjale lešaba leo le legolo le a kgoboketšwa e le gore le tle le phologe “masetlapelong a magolo.” Gaešita le gona bjale, ka tsela e itšego lešaba le le lebelelwa le lokile pele ga Modimo. Le bolelwa le lokile e le bagwera ba Jehofa. (Baroma 4:2, 3; Jak. 2:23) A mohola o mogolo gakaakaang! Ge e ba o le karolo ya lešaba le legolo, o ka kgodišega gore Modimo o ikemišeditše go go thuša ge o dutše o katanela go dula o hlwekile mahlong a gagwe.

17. Ke ka kgopolo efe Jehofa a se sa hlwago a “gopola” dibe?

¹⁷ Go direga eng ka dibe tša bao Modimo a ba gaugelago? Go etša ge go boletšwe pejana, Jehofa o boletše ka Jeremia gore: “Ke tla ba lebalela molato wa bona gomme nka se sa gopola sebe sa bona.” (Jer. 31:34) Modimo o dira se go batlotšwa motheong wa sehlabelo sa Jesu. Ka mo go swanago, Modimo a ka lebalela lešaba le legolo dibe tša lona motheong o swanago wa “madi a kgwerano.” Ge Jeremia a be a re Modimo a ka se sa “gopola” dibe, o be a sa re gore Modimo o tla lahlegelwa ke monagano ke moka a se sa hlwa a kgona go gopola dibe tšeo. Go e na le moo, seo se bontšha gore ge Jehofa a šetše a neile tayo le ge e le efe yeo e bego e nyakega gomme a lebaletše modiradibe yo a itsholago, Modimo o lahlela sebe seo ka morago ga Gagwe. Nagana ka dibe tšeo Kgoši Dafida a ilego a di dira tšeo di akaretšago Batseba le Uria. Dafida o ile a amogela tayo gomme a lebeletšana le ditlamorago tša dibe tša gagwe. (2 Sam. 11:4, 15, 27; 12:9-14; Jes. 38:17) Lega go le bjalo, Modimo ga se a ka a dulela go bona Dafida molato ka dibe tšeo. (Bala 2 Dikoronika 7:17, 18.) Go etša ge go bontšhitšwe kgweranong e mpsha, ge Jehofa a lebaletše motho dibe motheong wa sehlabelo sa Jesu, ga A sa di gopola le gatee.—Hesek. 18:21, 22.

18, 19. Kgwerano e mpsha e na le thuto efe mabapi le go lebalela?

¹⁸ Ka gona, kgwerano e mpsha e bontšha sebopego se se kgahlišago sa kamoo Jehofa a dirišanago ka gona le batho bao ba nago le sebe, e lego batlotšwa bao ba lego kgweranong e mpsha gotee le batho bao ba nago le kholofelo ya go phela mo lefaseng. O ka kgodišega gore ge Jehofa a šetše a go lebaletše dibe, a ka se sa di gopola. Ka go re’alo, kholofetšo ya Modimo ya mabapi le kgwerano e mpsha e ruta yo mongwe le yo mongwe wa rena thuto. Ipotšiše gore: ‘Na ke leka go ekiša Jehofa ka go phema go bolela ka melato ya ba bangwe, e lego diphošo tšeo ke šetšego ke boletše gore ke ba lebaletše tšona?’ (Mat. 6:14, 15) Se se šoma go diphošo tše dinyenyane le tše dikgolo kudu, tše bjalo ka sebe sa ge molekane wa Mokriste a dirile bohlotlolo. Ge e ba molekane yo a se nago molato a dumela go lebalela molekane yo a dirilego bohlotlolo yoo a itsholago, na ga se mo go swanetšego go ‘se sa gopola sebe seo’? Ke therešo gore go lahlela diphošo ka morago ga rena go ka fo se be bonolo, eupša ke tsela e nngwe yeo ka yona re ka ekišago Jehofa.a

¹⁹ Re ka diriša thuto ye ya mabapi le kgwerano e mpsha gaešita le mothong yo a bego a kgaotšwe eupša a itshola gomme a bušetšwa ka phuthegong. Go thwe’ng ge e ba motho yoo a ile a go senyetša goba a go senya leina ka tsela e itšego? Ga bjale motho yoo o amogetšwe gape ka phuthegong. Seo re se badilego go Jeremia 31:34 se tla tutuetša bjang tsela yeo re naganago ka yona le kamoo re arabelago ka gona? Na re tla lebalela mofoši yoo gomme ra se dulele go bolela ka phošo yeo a e dirilego? (2 Bakor. 2:6-8) Ruri se ke seo bohle bao ba tšeelago godimo kgwerano e mpsha ba swanetšego go leka go se diriša maphelong a bona a letšatši le letšatši.

DITŠHEGOFATŠO TŠA GONA BJALE LE TŠA NAKONG E TLAGO TŠA KGWERANO E MPSHA

20. Boemo bja gago bja kgopolo bo fapana bjang le bja batho ba bantši ba mehleng ya Jeremia?

²⁰ Mehleng ya Jeremia, Bajuda ba bantši ge e le gabotse ba be ba re: “Jehofa a ka se dire botse e bile a ka se dire bobe.” (Tsef. 1:12) Gaešita le ge ba be ba tseba gore Jehofa ke mang le gore o bjang, ba be ba nagana gore a ka se gate mogato; le gore o be a sa letela gore ba phele ka melao le ge e le efe. Lega go le bjalo, wena o a tseba gore ga go na selo seo Modimo a sa se elego hloko. O boifa Modimo ka tlhompho e bile o nyaka go phema e le ka kgonthe go dira dilo tše mpe. (Jer. 16:17) Ka nako e swanago, o a tseba gore Jehofa ke Tate yo botho. O ela hloko ditiro tša rena tše dibotse, go sa šetšwe gore ba bangwe ba a di bona goba go se bjalo.—2 Dikor. 16:9.

21, 22. Ke ka baka la’ng go sa hlwe go nyakega gore o botšwe gore: ‘Tseba Jehofa’?

²¹ Sebopego sa bohlokwa kudu sa kgwerano e mpsha ke se: “Ke tla tsenya molao wa ka ka go bona gomme ka o ngwala pelong ya bona. Ke tla ba Modimo wa bona, . . . Motho a ka se hlwe a ruta mogagabo gomme yo mongwe le yo mongwe a ka se hlwe a ruta ngwanabo, a re: ‘Tsebang Jehofa!’ Ka ge ka moka ga bona ba tla be ba ntseba.” (Jer. 31:33, 34) Lehono batlotšwa bao ba lego mo lefaseng ba bontšhitše gore ba na le molao wa Modimo ka gare ga bona. Ba rata ditherešo tšeo di hwetšagalago go wona go e na le go ithekga ka dithuto tša motho le ge e le ofe. Le gona ka lethabo ba rutile bao ba bopago lešaba le legolo tsebo ya Beibele. Ka go re’alo, ba bao ba nago le kholofelo ya go phela mo lefaseng le bona bjale ba tseba Jehofa le go mo rata. Ba ikokobeletša tlhahlo ya gagwe ka go rata gomme ba bota dikholofetšo tša gagwe. Ga go pelaelo gore mantšu ao a šoma le go wena. O mo tseba gabotse e bile o na le tswalano ya kgauswi le yena. A mohola o mogolo gakaakaang!

²² O kgonne bjang go matlafatša tswalano ya gago le Jehofa? Ga go pelaelo gore o gopola dinako tšeo ka tšona o ilego wa kwa gore o arabile dithapelo tša gago. Ka diphihlelo tše bjalo, o ile wa godiša tebogo ya gago ya go leboga tsela yeo Modimo a lego ka yona. O ka ba o ile wa bona gore o a go thuša ge o be o gopola lengwalo leo le go thušitšego go lebeletšana ka katlego le mathata. Tšeela diphihlelo tše bjalo godimo. Ge o dutše o ithuta Lentšu la gagwe, tsebo ya gago ka yena e tla tšwela pele e oketšega, e lego mohola o sa felego.

23. Go tseba Jehofa go ka go thuša bjang gore o se sa tshwenyega maikwelong go sa hlokagale?

²³ Eupša go na le tšhegofatšo e nngwe yeo e sepedišanago le kgwerano e mpsha yeo re ka e thabelago gona bjale. Go tseba gore Jehofa ke yena yo a lebalelago ka go dumelelana le kgwerano yeo, go ka re thuša go re lokolla maikwelong a sa kgaotšego a go ikwa re le molato. Ka mohlala, ba bangwe bao ba kilego ba ntšha dimpa pele ba tseba ditekanyetšo tša Modimo, ba ka ikwa ba le molato e bile ba nyamile ka gobane ba ile ba fediša ka boomo bophelo bja motho yo a bego a sa dutše a bopega. Ba bangwe ba ikwa ka tsela yeo ka gobane ba ile ba bolaya batho ge ba be ba sa lwa dintweng. Sehlabelo sa Jesu sa topollo—wona motheo wa kgwerano e mpsha—se dira gore bao ba itsholago e le ka kgonthe ba lebalelwe. Ka ge go le bjalo, na ga se ra swanela go kgodišega gore ge Jehofa a re lebaletše dibe, o lebelela seo e le mafelelo a ditaba? Ga se ra swanela go hlwa re nagana ka dibe tšeo Jehofa a re lebaletšego tšona ka mo go feletšego.

24. O ka hwetša kgothatšo efe pegong yeo e lego go Jeremia 31:20?

²⁴ Re hwetša bohlatse bjo bo bonagalago gabotse bja tebalelo ya Jehofa go Jeremia 31:20. (Bala lengwalo le.) Nywagasome pele ga mehla ya Jeremia, Jehofa o ile a otla meloko e lesome ya Isiraele ya mmušo wa ka leboa (yeo e bego e emelwa ke Efuraime, e lego moloko wo o tumilego) ka baka la go rapela ga yona medimo ya diswantšho. E ile ya išwa bothopša. Lega go le bjalo, Modimo o be a rata batho ba setšhaba seo kudu gomme o ile a ba bontšha lerato. O be a sa dutše a ba rata go swana le ‘ngwana yo a swerwego ka lerato.’ Ge a be a nagana ka bona, mala a gagwe a be a ‘huduega,’ e lego seo se bolelago gore maikwelo a gagwe a ka garegare a be a kgomega. Pego ye yeo e hwetšagalago tabeng e dikologilego ya mabapi le kgwerano e mpsha, e bontšha kamoo Jehofa a lebalelago ka bolokologi batho bao ba itsholago boitshwarong bja bona bjo bobe bja nakong e fetilego.

25. Ke ka baka la’ng o ka leboga Jehofa bakeng sa kgwerano e mpsha?

²⁵ Kholofetšo ya Jehofa ya go lebalela dibe a diriša kgwerano e mpsha e tla phethagala ka botlalo mafelelong a Pušo ya Kriste ya Nywaga e Sekete. Jesu Kriste gotee le baperisita ba 144 000 bao ba hlankelago ka tlase ga gagwe, ba tla be ba dirile gore batho bao ba botegago ba boele e be bao ba phethagetšego. Ka morago ga teko ya mafelelo, ke gona moo batho e tlago go ba ditho tša lapa la Jehofa la legohleng ka kgopolo e feletšego. (Bala Baroma 8:19-22.) Ka nywaga e makgolo, bohle ba be ba dutše ba tsetsela ba imelwa ke sebe. Lega go le bjalo ka nako yeo, batho bao e lego tlholo ya Jehofa ba tla ba le “tokologo ya letago ya bana ba Modimo,” e lego go lokologa sebeng le lehung. Ka gona, kgonthišega gore o ka hwetša mehola e mentši yeo e tlišwago ke tokišetšo e lerato ya kgwerano e mpsha. O ka holwa gona bjale le ka mo go sa felego ke “lehlogedi” la Dafida gomme wa thabela “toko nageng.”—Jer. 33:15.