July

Go kgaolwa ke tayo e tšwago go Jehofa e sego go bagolo. Tayo ye yeo e bontšhago gore Jehofa o a re rata, e tla hola motho yo a kgaotšwego ya ba ya hola le batho ba bangwe. Ba bangwe ka phuthegong ba ka bolela gore bagolo ga se ba ahlola gabotse. Eupša bona batho bao ga ba bolele ka dilo tše mpe tšeo motho yo a kgaotšwego a di dirilego. Ga re tsebe ditaba ka moka. Ka gona ke ga bohlale go tshepa gore bagolo bao ba ahlolago ba dira sohle seo ba ka se kgonago go latela melao ya motheo ya ka Beibeleng le go ‘ahlolela Jehofa.’ (2 Dikor. 19:6) Ge e ba re thekga phetho yeo bagolo ba e dirilego ya go kgaola motho, mafelelong seo se ka mo thuša gore a boele go Jehofa. Elizabeth o re: “Go be go le thata kudu gore re se ke ra boledišana goba ra dira dilo le morwa wa rena. Eupša ka morago ga gore a bušetšwe ka phuthegong, o ile a bolela gore o be a swanetše gore a kgaolwe. Ge nako e dutše e eya, o ile a bolela gore o ithutile dilo tše dintši kudu tše dibotse.” w21.09 28-29 ¶11-12

Nagana ka mohlologadi yoo. Ga go pelaelo gore o be a nyaka go neela Jehofa moneelo wa go feta woo a o ntšhitšego. Eupša o ile a dira seo a ka se kgonago ka go nea Jehofa sohle seo a nago le sona. Jesu o be a tseba gore moneelo wa mohlologadi yoo o bohlokwa kudu go Jehofa. Re ithuta thuto efe e bohlokwa tabeng ye? Re ithuta gore Jehofa o a thaba ge re mo nea sohle seo re se kgonago, e lego go mo hlankela ka pelo ka moka le ka moya ka moka. (Mat. 22:37; Bakol. 3:23) Le gona Jehofa o a thaba ge a bona re dira sohle seo re ka se kgonago go mo hlankela! Taba ye e akaretša matla le nako yeo re e fetšago re mo hlankela, go swana le ge re eya dibokeng le tšhemong. O ka diriša bjang seo o ithutilego sona ka mohlologadi wa modiidi? Leka go nagana ka batho bao ba ka kgothatšegago ge o ba gopotša gore Jehofa o thabela seo ba mo direlago sona. O ka kgothatša kgaetšedi yo a tšofetšego, yoo a babjago e bile a se sa na matla, mohlomongwe yo a ikwago a na le molato e bile a se sa na mohola ka ge a se sa kgona go hlankela Jehofa go swana le mathomong? w21.04 6 ¶17, 19-20

Jehofa o tseba nako ya maleba ya gore a tle a fediše lefase le le lebe. Ka baka la go se fele pelo ga Jehofa batho ba bantši ba hweditše sebaka sa go mo tseba, le gona ga bjale lešaba le legolo la batho ba dimilione le a mo hlankela. Ka moka ga bona ba thabela gore Jehofa o ile a kgotlelela go fihlela ba belegwa, ba ithuta go mo rata le go neela maphelo a bona go yena. Re tlo kgona go bona gore Jehofa o dirile phetho e botse ge batho ba dimilione bao ba kgonnego go kgotlelela le yena ba tla be ba phologa ge a fediša lefase le le lebe. Go sa šetšwe gore Sathane o ile a dira gore Jehofa a nyame le go mmakela mathata, Jehofa o ile a dula e le “Modimo yo a thabilego.” (1 Tim. 1:11) Le rena re ka dula re thabile re sa letile ka go se fele pelo gore Jehofa a tle a kgethagatše leina la gagwe, a bontšhe gore o na le tshwanelo ya go buša e bile a fediše bobe le mathata ka moka ao a re welago. Eka ka moka ga rena re ka ikemišetša go kgotlelela le go kgothatšwa ke go tseba gore Tatago rena wa legodimong le yena o kgotleletše. w21.07 13 ¶18-19

Batho ba bantši ba be ba tšea Jesu e le morwa wa mmetli yo a diilago. Le gona o be a etšwa Natsaretha, e lego motse woo batho ba bantši ba ka bego ba be ba nagana gore ga o bohlokwa. Gaešita le Nathaniele yoo ka morago a ilego a ba morutiwa wa Jesu, go ka direga gore o be a sa rate motse woo Jesu a bego a dula go wona. Goba go ka direga gore o ile a nagana ka boporofeta bjo bo lego go Mika 5:2, bjoo bo ilego bja bolela e sa le pele gore Mesia o be a tla belegelwa Betlelehema, e sego Natsaretha. Moporofeta Jesaya o ile a bolela e sa le pele gore manaba a Jesu a be a ka se itshwenye ka go nyaka go tseba “ditaba ka botlalo tša moloko wa [Mesia].” (Jes. 53:8) Boporofeta bo ile bja bolela e sa le pele ka tše dintši tša ditaba tšeo. Ge nkabe batho bao ba ile ba ipha nako ya go tseba ditaba ka botlalo, ba be ba tla tseba gore Jesu o belegetšwe Betlelehema le gore e be e le setlogolwana sa Kgoši Dafida. (Luka 2:4-7) Ka gona lefelo leo Jesu a belegetšwego go lona le dumelelana le leo go boletšwego ka lona boporofeteng bja Mika 5:2. Ke ka baka la’ng batho bao ba be ba na le bothata? Ka gobane ba ile ba no kitimela go dira phetho. Ba be ba sa tsebe ditaba ka botlalo. Ka baka leo, ba ile ba palelwa ke go latela Jesu. w21.05 2-3 ¶4-6

Beibele e re botša ka mehlala ya batho bao ba ilego ba šegofatšwa ka ge ba amogetše keletšo. Nagana ka mohlala wa Jobo. Le ge a be a rata Modimo, o be a dira diphošo. Ka dinako tše dingwe ge a be a gateletšegile, o ile a bolela dilo tšeo di tšwilego tseleng. Ka gona, Jehofa le Elihu ba ile ba mo nea keletšo ka go lebanya. Jobo o ile a arabela bjang? O ile a re: “Ka gona ke boletše, eupša ke be ke sa kwešiše . . . Ke ka baka leo ke gomišago mantšu a ka, le gona ke itshola ke le leroleng le meloreng.” (Jobo 42:3-6, 12-17) O bontšhitše gore o a ikokobetša ka go amogela dikeletšo tšeo Elihu a mo filego tšona le ge Elihu e be e le yo monyenyane go yena. (Jobo 32:6, 7) Go ba le boikokobetšo go tlo re thuša go diriša dikeletšo le ge re ikwa eka re be re sa swanelwa go e newa goba re di filwe ke motho yo e lego yo monyenyane go rena. Ke mang mo go rena a sa nyakego go hlagolela dienywa tša moya le go kaonefatša tsela yeo a botšago batho ditaba tše dibotse le go ba ruta? w22.02 11 ¶8; 12 ¶12

Ka moka ga rena re na le boikarabelo bja go dira gore go be le khutšo ka phuthegong le go bontšha ba bangwe gore re a ba rata gore ba se ke ba ikwa ba le noši. Selo seo re se dirago goba re se bolelago se ka kgothatša ba bangwe kudu! O ka thuša bjang bao e lego Dihlatse tša Jehofa ba nnoši ka malapeng a bona goba a gabo bona go lemoga gore bana babo rena le dikgaetšedi ka phuthegong ba a ba rata? Leka go gwerana le batho bao ba sa tšwago go fihla ka phuthegong. Re ka thoma ka go ba amogela. (Baroma 15:7) Ga se ra swanela go no ba dumediša feela ka semaele. Re nyaka gore mafelelong e tle e be bagwera ba rena ba nnete. Re ka ba bontšha botho le gore re na le taba le bona. O se ke wa ba botšiša dipotšišo tše dintši kudu, eupša leka go kwešiša mathata ao ba nago le ona. Ba bangwe ga go bonolo gore ba go botše ka tsela yeo ba ikwago ka yona, ka gona o swanetše go hlokomela gore o se ke wa ba gapeletša gore ba go botše dilo ka moka. Go e na le moo, ba botšiše dipotšišo ka bohlale gomme o ba theetše ka go se fele pelo. Ka mohlala, o ka ba botšiša gore go tlile bjang gore ba tle ka phuthegong. w21.06 11 ¶13-14

Re thabela go hlankela Jehofa ka botee re na le bana babo rena le dikgaetšedi re le bjalo ka “mohlape o tee” woo o nago le “modiši o tee.” Puku ya Go Rulaganyetšwa go Dira Thato ya Jehofa go letlakala 165 e re: “Ka ge o thabela botee bjoo, o na le boikarabelo bja go thuša gore bo dule bo le gona.” Ka gona re swanetše go “itlwaetša go lebelela bana babo rena le dikgaetšedi ka tsela yeo Jehofa a ba lebelelago ka yona.” Jehofa o re tšea re le bohlokwa ka moka ga rena. Na le wena o tšea bana beno le dikgaetšedi ba le bohlokwa? Jehofa o bona dilo ka moka tšeo o di dirago go thuša bana beno le go ba bontšha gore o a ba rata. (Mat. 10:42) Ka ge re rata Bakristegotee le rena, re swanetše go ikemišetša gore re “se bee tšhitišo goba sekgopi pele ga” bona. (Baroma 14:13) Re tšea bana babo rena le dikgaetšedi ba re feta ka bogolo, ka baka leo re nyaka go ba lebalela go tšwa pelong. Anke re direng sohle seo re ka se kgonago gore re se ke ra kgopišwa ke ba bangwe. Le gona, anke re “phegeleleng dilo tše di išago khutšong le dilo tše e lego tša go agana.”—Baroma 14:19. w21.06 24 ¶16-17

Ge re dula re ithuta le go diriša keletšo yeo re e hwetšago ka Lentšung la Modimo le ka mokgatlong wa gagwe, ganyenyane-ganyenyane re tla ba le dika tšeo di swanago le tša Kriste le gona re tla tseba Modimo gakaone. Jesu o ile a bapiša molaetša wa ditaba tše dibotse le peu e nyenyane yeo e golago ganyenyane-ganyenyane ka dipelong tša batho bao ba nyakago go tseba nnete. O itše: “Dipeu tša hloga tša gola, gore bjang ga a tsebe. Mmu ka bowona o enywa dienywa ganyenyane-ganyenyane, go thoma lekgaba, ke moka gwa latela lenono, mafelelong dithoro tše di tletšego seakong.” (Mar. 4:27, 28) Jesu o be a e ra gore go no swana le ge sebjalo se gola ganyenyane-ganyenyane, le motho yo a amogelago ditaba tše dibotse o dira tšwelopele ganyenyane-ganyenyane. Ka mohlala, ge barutwana ba Beibele ba thoma go ba le segwera se sebotse le Jehofa, re bona diphetogo tše dintši tše dibotse tšeo ba di dirilego. (Baef. 4:22-24) Eupša re swanetše go gopola gore ke Jehofa yo a dirago gore peu yeo e nyenyane e gole. w21.08 8-9 ¶4-5

Motho yo a thabelago ‘seo a kgonago go se bona ka mahlo’ o kgotsofalela seo a nago le sona, go swana le maemo a gagwe. Eupša motho yo a kganyogago dilo tšeo a ka se kgonego go di hwetša, a ka se tsoge a kgotsofetše. Re ithuta’ng go se? E le gore re thabe, re swanetše go kgotsofalela ditokelo tšeo re nago le tšona gomme re se ke ra tshwenyega ka dipakane tšeo re ka se kgonego go di fihlelela. Na ruri go a kgonega gore motho a kgotsofalele seo a šetšego a na le sona? Batho ba bantši ba nagana gore ga go kgonege ka gobane ge nako e dutše e eya re nyaka go ithuta dilo tšeo re sa kago ra di dira. Eupša go a kgonega gore re kgotsofale. Re ka kgona go thabela ditokelo tšeo gona bjale re nago le tšona. Re ka dira seo bjang? A re boledišaneng ka papišo ya Jesu ya ditalente yeo e lego go Mateo 25:14-30. Re bone gore re ka dira eng gore re be le lethabo le gore re ka dira eng gore re le oketše. w21.08 21 ¶5-6

Jehofa o na le taba le bao ba “setlegilego” e lego bao ba kwelego bohloko. Bagolo le bagoeledi ka moka ka phuthegong ba ka kgothatša dikgaetšedi le bana babo rena ba ba rategago. Tsela e nngwe yeo re ka ba kgothatšago ka yona ke ka go ba bontšha gore re na le taba le bona. Jehofa o nyaka gore re ba bontšhe gore o ba rata kudu. (Die. 19:17) Le gona re ka thuša bana babo rena le dikgaetšedi ka gore re be le boikokobetšo le gore re se ke ra ikgantšha ka dilo tšeo re kgonago go di dira. Ga re nyake go ipiletša mahlo a batho ka gobane seo se ka dira gore ba bangwe ba re jele mona. Go e na le moo, re nyaka gore dilo tšeo re di dirago le go di bolela di kgothatše bana babo rena le dikgaetšedi. (1 Pet. 4:10, 11) Tsela yeo Jesu a bego a swara balatedi ba gagwe ka yona e ka re ruta dilo tše dintši mabapi le kamoo re ka swarago ba bangwe ka go gona. Jesu ke motho yo a tsebegago kudu yo a kilego a phela mo lefaseng. Eupša o be a le ‘boleta e bile a na le pelo e ikokobeditšego.’ (Mat. 11:28-30) Ge a be a ruta batho o be a diriša polelo e kwagalago le dipapišo tšeo di kgomago pelo. —Luka 10:21. w21.07 23 ¶11-12

Dira maiteko a gore o boledišane le batšofadi. Ke nnete gore ba ka ba ba se sa kgona go bona gabotse, ba se sa sepela ka mafolofolo e bile ba bolelela fase, eupša dipelo tša bona di duma go dira dilo go swana le mathomong. E bile ba itiretše “leina le lebotse” go Jehofa. (Mmo. 7:1) O se ke wa lebala gore ke ka baka la eng Jehofa a ba lebelela e le ba bohlokwa. Tšwela pele o ba hlompha. Swana le Elisha yoo a ilego a gana go arogana le Eliya ge a be a le kgauswi le go mo tlogela. Elisha o ile a botša Eliya ka makga a mararo gore: “Nka se go tlogele.” (2 Dikg. 2:2, 4, 6) Bontšha batšofadi ka phuthegong gore o na le taba le bona le go ba botšiša dipotšišo ka botho. (Die. 1:5; 20:5; 1 Tim. 5:1, 2) O ka ba botšiša dipotšišo tša go swana le tše di rego: “Ge o be o sa le mofsa, ke’ng seo se ilego sa go kgodiša gore o hweditše therešo?” “Dilo tšeo di ilego tša go diragalela di go thušitše bjang gore o be le segwera se sebotse le Jehofa?” “Ke eng seo se go thušitšego gore o dule o thabile ge o hlankela Jehofa?” (1 Tim. 6:6-8) Theetša gabotse ge ba go araba. w21.09 5 ¶14; 7 ¶15

Ge o dira seo o ka se kgonago gore o kwe taelo ya gore re botše batho ditaba tše dibotse le go dira barutiwa, o bontšha gore o rata Modimo. (1 Joh. 5:3) Ka mohlala, o bontšha gore o rata Jehofa ka gobane o šetše o thomile go botša batho ditaba tše dibotse ka ntlo le ntlo. Na go be go le bonolo gore o kwe taelo ye ya gore o botše batho ditaba tše dibotse? Go ka direga gore go be go se bonolo. O ile wa ikwa bjang ge o be o yo bolela ditaba tše dibotse la mathomo? Ke nnete gore o be o tšhogile! Eupša o be o tseba gore Jesu o nyaka o botša batho ditaba tše dibotse. Ka gona o ile wa kwa taelo ya gagwe. Le gona go ka direga gore ge nako e dutše e eya, go ile gwa ba bonolo gore o botše batho ditaba tše dibotse. Bjale o ikwa bjang ka go swara dithuto tša Beibele? Na le gona go a go tšhoša? Mohlomongwe. Eupša ge o ka rapela Jehofa gore a go thuše go ba le sebete sa go swara dithuto tša Beibele, o tla go thuša. w21.07 3 ¶7

Mehleng ya kgale makgoba a be a swaiwa go bontšha gore ke makgoba a bomang. Le lehono batho ba letetše gore go bonagale gore motho yo mongwe le yo mongwe o thekga mang. Le gona ba nyaka gore motho yo mongwe le yo mongwe a bontšhe ka tsela yeo a naganago ka yona le ka ditiro tša gagwe gore o thekga dipolitiki. Na re tla amogela leswao le gomme ra thekga dipolitiki? Bao ba ganago go amogela leswao ba tlo tlaišwa le go tsena mathateng. Puku ya Kutollo e re: ‘Go ka se be le motho yo a rekago goba yo a rekišago ka ntle le motho yo a nago le leswao.’ (Kut. 13:17) Eupša batho ba Modimo ba a tseba gore Modimo o tlo dira eng ka batho bao ba nago le leswao bao go bolelwago ka bona go Kutollo 14: 9, 10. Ge ba gana go amogela leswao leo go tlo swana le ge eka seatleng sa yo mongwe le yo mongwe wa bona go ngwadilwe gore, “Ke wa Jehofa.” (Jes. 44:5) Gona bjale ke nako ya go kgonthišetša gore re tiiša tsela yeo re botegelago Jehofa ka yona. Ge re ka dira bjalo, Jehofa o tlo thabela go re bitša batho ba gagwe! w21.09 18 ¶15-16

E le gore re kgone go phetha bodiredi bja rena gabotse, re ka holwa ke thušo e tšwago go ba bangwe. Paulo o rutile Timotheo go bolela ditaba tše dibotse le go ruta, a ba a mo kgothaletša gore le yena a rute ba bangwe. (1 Bakor. 4:17) Go swana le Timotheo, re ka ithuta go bao ba nago le phihlelo ka phuthegong. Le gona re swanetše go rapela Jehofa gore a re thuše. Mo kgopele gore a go thuše nako e nngwe le e nngwe ge o bolela ditaba tše dibotse. Ge nkabe Jehofa a be a sa re thuše ka moya wa gagwe o mokgethwa, ga go le o tee wa rena yo a bego a ka kgona go bolela ditaba tše dibotse. (Ps. 127:1; Luka 11:13) Bolela ka go lebanya gore ke eng seo o se kgopelago ge o rapela Jehofa gore a go thuše. Ka mohlala, mo kgopele gore a go thuše go hwetša batho bao ba nyakago go re theetša le go ithuta ka yena. Le gona re swanetše go ipha nako ya go ithuta Beibele. Beibele e re: “Le itlhatselele thato e botse le e amogelegago le e phethegilego ya Modimo.” (Baroma 12:2) Ge re ithuta Beibele, re tlo tseba Modimo gakaone gomme ge re bolela le ba bangwe ka yena ba tlo bona gore re kgodišegile ka seo re ba botšago sona. w21.05 18 ¶14-16 

Mohlomongwe o ka ba o leka ka thata gore o rute motho yo a itšego Beibele e bile o mo rapelela eupša motho yoo a sa dire tšwelopele, ke moka wa phetha ka gore o tlogele go ithuta Beibele le yena. Goba mohlomongwe ga se wa ka wa ruta motho yo a itšego Beibele go fihla a kolobetšwa. Na o swanetše go ipona molato gomme wa bona eka Jehofa ga a tšee modiro wa gago wa go bolela ditaba tše dibotse e se selo? Jehofa o a bona gore re šoma ka thata le gore re a kgotlelela. Jehofa o a thaba ge a bona gore re dira modiro wa rena wa go bolela ditaba tše dibotse ka mafolofolo le ka gobane re mo rata, go sa šetšwe gore batho ba bangwe ba a re theetša goba ga ba re theetše. Paulo o ngwadile gore: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe, ka ge le hlanketše bakgethwa e bile le tšwela pele le ba hlankela.” (Baheb. 6:10) Jehofa a ka se tsoge a lebetše tsela yeo re mo hlankelago ka yona le yeo re mo ratago ka yona gaešita le ge go se na batho bao re ba thušitšego gore ba kolobetšwe. Ge re šoma ka thata eupša dilo di sa direge ka tsela yeo re nyakago ka yona, re ka diriša keletšo yeo Paulo a ilego a e boletšego. w21.10 25 ¶4-6

Jesu o ile a bontšha gore o na le botho le lerato, ka tsela yeo a ilego a swara barutiwa ba gagwe ka yona. O be a tseba gore ba be ba se na bokgoni bja go swana, le gore maemo a bona a be a sa swane. Ka baka leo, ba be ba ka se kgone go dira dilo go swana, e bile ba be ba ka se kgone go fetša nako e lekanago ge ba botša batho ditaba tše dibotse. Eupša o be a thabišwa ke gore ba be ba dira sohle seo ba ka se kgonago. Jesu o ile a bontšha gore o a thaba ge batho ba dira sohle seo ba ka se kgonago papišong ya mabapi le ditalente. Papišong yeo, mong wa bahlanka o ile a nea mohlanka yo mongwe le yo mongwe mošomo “go ya ka bokgoni bja gagwe.” Yo mongwe wa bahlanka ba babedi bao ba bego ba šoma ka thata o ile a hwetša ditalente tše dintši go feta yo mongwe. Eupša mong wa bona o ile a ba reta go swana. O itše: “O dirile gabotse mohlanka yo botse le yo a botegago!” (Mat. 25:14-23) Jesu o dula a re swara ka botho le ka lerato. O a tseba gore bokgoni bja rena le maemo a rena ga a swane, e bile o thabišwa ke gore re dira sohle seo re ka se kgonago go hlankela Jehofa. Re dira gabotse ge re ekiša tsela yeo Jesu a swarago ba bangwe ka yona. w21.07 23 ¶12-14

Ga se ka mehla moo Kgoši Dafida a bego a bontšha gore o na le kgaugelo. Ka mohlala, ge Nabala yoo e lego monna wa go se re selo ka tlhago a be a bolela le Dafida ka lenyatšo e bile a gana go fa yena le banna ba gagwe dijo, Dafida o ile a phetha ka gore o nyaka go bolaya Nabala le banna ka moka ba ntlong ya gagwe. Eupša Abigaile yoo e bego e le mosadi wa Nabala o be a na le botho e bile a sa fele pelo. Ka gona o ile a išetša Dafida dijo kapelapela gomme seo sa dira gore Dafida a se sa nyaka go bolaya Nabala le batho ba ntlong ya gagwe.(1 Sam. 25:9-22, 32-35) Gopola gore ge Dafida a be a kwatile kudu o ile a nyaka go bolaya Nabala le banna ba gagwe ka moka. Le gona, ka morago Dafida o ile a bolela gore monna yoo Nathane a boletšego ka yena papišong ya gagwe o swanelwa ke go bolawa ka baka la seo a se dirilego. Dafida e be e le monna yo a lokilego. Bjale re ka ipotšiša gore, ke ka baka la’ng a ile a ahlola monna yoo wa lehodu ka tsela ye e sehlogo? Nagana ka seo se bego se sa tšwa go diragalela Dafida. Ka nako yeo Dafida o be a na le letswalo le molato. Motho yoo a ahlolago yo mongwe ka tsela e sehlogo o bontšha gore ga a na segwera se sebotse le Jehofa. w21.10 12 ¶17-18; 13 ¶20

Mantšu a temana ya lehono a re ruta gore re ka ekiša Jehofa ka gobane ke yo mokgethwa kudu. Re ka kgona go ba ba bakgethwa e bile re swanetše go ba ba bakgethwa boitshwarong bja rena ka moka. Moapostola Petro o ile a dira diphošo tše dintšinyana, eupša mohlala wa gagwe o re bontšha gore re ka kgona go ba ba bakgethwa.Batho ba bantši ba nagana gore motho yo mokgethwa ke yoo a phelago a apere diaparo tša bodumedi, yoo a sa semaelego e bile a bonagala e ka o rata Modimo kudu. Eupša seo ga se nnete. Jehofa yo e lego yo mokgethwa, o hlaloswa e le “Modimo yo a thabilego.” (1 Tim. 1:11) Le gona bao ba mo hlankelago ba dula ba ‘thabile.’ (Ps. 144:15) Jesu o ile a re lemoša ka batho bao ba aparago diaparo tše ditelele tša bodumedi ebile ba dira dilo tše dibotse gore ba bonwe ke batho. (Mat. 6:1; Mar. 12:38) Bakriste ba nnete ba tseba gore go ba yo mokgethwa go bolela eng ka baka la seo ba ithutilego sona ka Beibeleng. Re kgodišegile gore Modimo wa rena yo a re ratago a ka se re nee molao woo a tsebago gore re tlo palelwa ke go o latela. w21.12 2 ¶1, 3

Modimo o re file dilo tše dintši kudu. E nngwe ya dilo tše dikgolo tšeo a re filego tšona ke tokelo ya go mo hlankela. Re bontšha Jehofa gore re a mo rata ka go ‘boloka ditaelo tša gagwe.’ (1 Joh. 5:3) Taelo e nngwe yeo Jehofa a nyakago re e latela ke yeo Jesu a re neilego yona ya gore re dire batho barutiwa le go ba kolobetša. (Mat. 28:19) O re laetše le gore re ratane. (Joh. 13:35) Jehofa o amogela bao ba latelago melao ya gagwe gore e be karolo ya lapa la gagwe le legolo (Ps. 15:1, 2) Rata ba bangwe. Seka se segolo kudu sa Jehofa ke lerato. (1 Joh. 4:8) Jehofa o bontšhitše gore o a re rata le pele re ka mo tseba. (1 Joh. 4:9, 10) Ge re bontšha ba bangwe gore re a ba rata, re tla ba re bontšha gore re a mo ekiša. (Baef. 5:1) Tsela e nngwe e kaone yeo re ka bontšhago gore re rata batho ba bangwe ke ka go ba thuša go ithuta ka Jehofa go sa na le nako. (Mateo 9:36-38.) Ge re ba ruta, ba tla kgona go bona gore ba swanetše go dira eng gore ba be karolo ya lapa la Modimo. w21.08 5-6 ¶13-14

Jesu o bontšhitše gore o rata Jehofa kudu ka gobane o ile a dira dilo ka moka tšeo a mo kgopetšego gore a di dire e bile a di direla le rena batho. (Joh. 14:31) Jesu o bontšhitše gore o rata batho ka tsela yeo a bego a phela ka yona mo lefaseng. Ka mehla o bontšhitše gore o rata batho le go tshwenyega ka bona le ge a be a ganetšwa. Selo se segolo seo se bontšhitšego gore o rata batho kudu ke ka go ba ruta ka Mmušo wa Modimo. (Luka 4:43, 44) Jesu o bontšhitše gore o rata Modimo le batho ka go dumelela badiradibe ba mmolaya. Ka go dira seo o dirile gore re kgone go hwetša bophelo bjo bo sa felego. Re ineela go Jehofa le go kolobetšwa ka gobane re rata Tatago rena wa legodimong. Go swana le Jesu re swanetše go bontšha gore re rata Jehofa ka tsela yeo re swarago ba bangwe ka yona. Moapostola Johane o ngwadile gore: “Yo a sa ratego ngwanabo yo a mmonago, a ka se rate Modimo yo a sa kago a mmona .”—1 Johane 4:20. w22.03 10 ¶8-9

Le ge re rata go rapela le go ithuta Beibele, ka dinako tše dingwe ga go bonolo. Re dula re swaregile kudu moo re ka thatafalelwago ke go ipha nako ya go ithuta ka Jehofa. Mešomo ya rena, malapa a rena le dilo tšeo re swanetšego go di dira di ka tšea nako ya rena e ntši moo re ka ikwago eka re ka se kgone go rapela, go ithuta le go naganišiša. Go na le selo se sengwe gape seo se ka re tšeelago nako. Ge e ba re sa šetše re ka dumelela dilo tšeo e sego phošo go di dira di re tšeela nako yeo re swanetšego go e fetša re tiiša segwera sa rena le Modimo. Ka mohlala, go bohlokwa gore re ithabiše. Eupša ge e ba re ka se hlokomele, boithabišo bo ka re tšeela nako yeo re swanetšego go e fetša re hlankela Jehofa. Re swanetše go gopola gore boithabišo ga bo tle pele maphelong a rena.—Die. 25:27; 1 Tim. 4:8. w22.01 26 ¶2-3

Ge Jehofa a be a laela Baisiraele gore ba swanetše go rata batho ba bangwe, o be a sa bolele gore ba swanetše go rata Baisiraele ba bangwe feela. Eupša ba be ba swanetše go rata le batho bao e bego e se Baisiraele e bile ba dula le bona. Se ke seo se bolelwago ke Lefitiko 19:33, 34. Jehofa o be a nyaka gore Baisiraele ba sware batho bao ba tšwago dinageng tše dingwe go swana le batho bao ba tšwago nageng ya gabo bona, le gore ba ba rate ka mokgwa wo ba ithatago ka ona. Ka mohlala Baisiraele ba be ba swanetše go dumelela batho bao e se go Baisiraele le badiidi gore ba budutše mašemong a bona. (Lef. 19:9, 10) Molao wa motheo wo o bontšhago gore re rate batho ba bangwe o sa šoma le go Bakriste le lehono. (Luka 10:30-37) Bjang? Go na le batho ba bantši kudu lefaseng ka moka bao ba hudugetšego dinageng tše dingwe, mohlomongwe ba bangwe ba dula kgauswi le mo o dulago gona. Go bohlokwa gore re sware banna, basadi le bana bao ba tšwago dinageng tše dingwe ka seriti e bile re ba hlomphe. w21.12 12 ¶16

Ge re ka ithekga ka Jehofa re tlo tshepa gore le nakong e tlago o tlo re phološa. Go nyakega gore re be le tumelo le go ithekga ka Jehofa gore re kgone go kgopela nako mošomong gore re ye dikopanong, dibokeng le go tšea karolo tšhemong. Re ka dira’ng ge ba ka re ganetša goba ra lahlegelwa ke mošomo? Re swanetše go ba le tumelo ya gore Jehofa a ka se tsoge a re lahlile e bile o tlo re fa dilo tšeo re di hlokago? (Heb. 13:5) Batho ba bantši bao ba lego tirelong ya nako e tletšego ba ka bontšha kamoo a ilego a ba thuša ka gona ge ba be ba mo hloka. Jehofa o a botega. Ga re tšhoge gore go tlo direga eng nakong e tlago ka gore Jehofa o na le rena. Modimo wa rena o tlo dula a re thuša ge feela mmušo wa gagwe o etla pele maphelong a rena. w22.01 7 ¶16-17

Tsela yeo re tshepago bagolo ka yona e ka lekwa bjang? A re re motho yo a kgaotšwego ke mogwera wa gago. Re ka tshwenyega ka gore bagolo ga se ba lebelela dilo ka moka, goba gore Jehofa o be a ka se ahlole ka tsela yeo bagolo ba ahlotšego ka yona. Ke’ng seo se ka re thušago gore re be le tekatekano tabeng ye? Re swanetše go gopola gore go kgaolwa ke tokišetšo yeo e tšwago go Jehofa le gore go thuša phuthego le motho yo a dirilego sebe. Ge e ba motho yo a sa itsholego yo a dirilego sebe a ka dumelelwa go dula ka phuthegong a ka dira gore batho ba bangwe le bona ba dire sebe. (Bagal. 5:9) Motho yoo a ka no se bone gore o dirile sebe se segolo, e bile a ka palelwa ke go fetoša tsela yeo a dirago dilo le yeo a naganago ka yona gore a tle a be le segwera se sebotse le Jehofa. (Mmo. 8:11) Bagolo ba tšeela boikarabelo bja bona godimo ge ba dira phetho ya ge e ba motho a swanetše go kgaolwa. w22.02 5-6 ¶13-14

O swanetše go bontšha botho le go se fele pelo ge motho yo o mo neago keletšo a sa e diriše. Mogolo ga se a swanela go kwata ge ngwanabo rena a sa amogele keletšo ka nako yeo. Ka gona ge mogolo a rapela a nnoši, a ka kgopela Jehofa gore a thuše ngwanabo rena yoo gore a kwešiše le go diriša keletšo yeo a e newago. Ngwanabo rena yo a newago keletšo a ka tšea nako a nagana ka seo se boletšwego. Ge mogolo a sa fele pelo e bile a le botho, o tlo thuša motho yo a newago keletšo gore a theetše. Go bohlokwa gore ge mogolo a nea keletšo a diriše Beibele. Re nyaka gore batho bao ba newago keletšo ba e amogele e be ‘e ba thabiše.—Die. 27:9 w22.02 18 ¶17; 19 ¶19

Ge re rapela Jehofa gore a re fe matla a gore re kgone go kgotlelela bothata bjo itšego le go tlogela selo seo a sa se ratego, re ka bona eka o tšea nako go araba dithapelo tša rena. Ke ka baka la’ng Jehofa a sa arabe dithapelo tša rena ka moka ka nako yeo re mo rapelago ka yona? O lebelela dithapelo tša rena tše di tšwago pelong e le bohlatse bja gore re na le tumelo go yena. (Baheb. 11:6) Le gona Jehofa o nyaka go bona ge e ba re ikemišeditše go phela ka go dumelelana le seo re se rapelelago le go dira thato ya gagwe. (1 Joh. 3:22) Ge re kgopela Jehofa gore a re thuše go tlogela mokgwa o itšego o mobe, ga se ra swanela go fela pelo eupša re swanetše go dira sohle seo re ka se kgonago gore re fetoge. Jesu o re thušitše go kwešiša gore Modimo a ka no se arabe tše dingwe tša dithapelo tša rena kapelapela. O itše: “Tšwelang pele le kgopela, le tla newa; tšwelang pele le tsoma, le tla hwetša; tšwelang pele le kokota, le tla bulelwa. Gobane yo mongwe le yo mongwe yo a kgopelago o a amogela, gomme yo mongwe le yo mongwe yo a tsomago o a hwetša, le yo mongwe le yo mongwe yo a kokotago o tla bulelwa.”—Mat. 7:7, 8. w21.08 8 ¶1; 10 ¶9-10

O swanetše go tšwela pele o ithuta Beibele e le gore o kgone go tiiša tumelo ya gago ya gore Mmopi o gona. (Josh. 1:8) Le gona nagana ka diporofeto tše dintši tša ka Beibeleng tšeo di ilego tša phethagala le kamoo dilo tšeo bangwadi ba Beibele ba di ngwadilego di dumelelanago ka gona. Go dira seo go tla matlafatša tumelo ya gago ya gore Mmopi yo bohlale le yo a re ratago ke yena a go bopilego le gore ke yena a dirilego gore Beibele e ngwalwe. (2 Tim. 3:14; 2 Pet. 1:21) Ge o ithuta Beibele, bona kamoo e nago le dikeletšo tše dibotse ka gona. Ka mohlala, ke kgale Beibele e boletše gore go rata tšhelete go kotsi le gore go baka “mahloko a mantši.” (1 Tim. 6:9, 10; Die. 28:20; Mat. 6:24) Ruri Beibele e re neile keletšo e botse ya gore re se ke ra rata tšhelete! Na o ka nagana ka melao ya motheo e mengwe ya ka Beibeleng yeo e kilego ya go thuša? Ge re dula re leboga keletšo yeo e lego ka Beibeleng, re tlo bona gore Mmopi wa rena o a re rata e bile re tlo ithekga ka yena le go feta. (Jak. 1:5) Mafelelong bophelo bja rena bo tlo re thabiša kudu.—Jes. 48:17, 18. w21.08 17-18 ¶12-13

Ge e ba o thomile go tšofala, kgonthišega gore Jehofa a ka se lebale mediro yeo o e dirilego go mo hlankela. O be o dutše o thekga modiro wa go bolela ditaba tše dibotse ka mafolofolo. O kgotleletše mathata a magolo le ao a kwešago bohloko kudu, wa dula o phela ka go dumelelana le melao ya Modimo. E bile o be o na le maikarabelo a mantši ka phuthegong le go tlwaetša ba bangwe. O dirile sohle seo o ka se kgonago go sepedišana le mokgatlo wa Jehofa woo o sepelago ka lebelo kudu. O ile wa thekga ba bangwe le go ba kgothaletša gore ba tsenele tirelo ya nako e tletšego. Jehofa Modimo o go rata kudu ka ge o ile wa dula o mmotegela gomme o tshepiša gore “a ka se tlogele bao ba mmotegelago”! (Ps. 37:28) Jehofa o tshepiša batho bao ba mmotegelago gore ‘o tla dula a ba rwele le botšofading bja bona.’ (Jes. 46:4) Eupša o se ke wa nagana gore ka ge bjale o tšofetše, ga o sa le bohlokwa ka mokgatlong wa Jehofa. O sa le bohlokwa kudu! w21.09 3 ¶4

Jehofa o re bontšha kgaugelo ka gobane ke yo bohlale kudu. Jehofa o dula a dira diphetho tšeo di tlago go hola batho ba gagwe. Le gona Beibele e re “bohlale bjo bo tšwago godimo” bo “tletše kgaugelo le dienywa tše botse.” (Jak. 3:17) Go no swana le motswadi yo a nago le lerato, Jehofa o a tseba gore ge a bontšha bahlanka ba gagwe kgaugelo ba tlo holega. (Jes. 49:15) Le gona seo se tlo ba thuša go bona gore le ge ba sa phethagala, nakong e tlago ba tlo ipshina ka bophelo. Ka ge Jehofa e le yo bohlale kudu, seo se mo dira gore a dule a re bontšha kgaugelo ge e ba a bona go hlokagala gore a dire bjalo. Eupša o a tseba gore ke neng moo a sa swanelago go re bontšha kgaugelo. Le gona a ka se re bontšhe kgaugelo ge a bona gore seo se ka re dira gore re dire sebe.A re re ngwanabo rena ka phuthegong o dira sebe ka boomo. Re swanetše go dira’ng? Paulo o ngwadile gore: “Le lese go gwerana” le yena. (1 Bakor. 5:11) Batho bao ba dirilego sebe e bile ba sa itsholego ba a kgaolwa ka phuthegong. Go dira bjalo go bohlokwa ka gobane go tlo šireletša bana babo rena le dikgaetšedi bao ba botegago le go bontšha gore re thekga melao ya Jehofa. w21.10 9-10 ¶7-8

Tsela e nngwe ya go hlankela Jehofa ke ka go ntšha meneelo. Baisiraele ba be ba sa swanela go tla pele ga Jehofa ba lekeleditše diatla. (Doit. 16:16) Ba be ba swanetše go tla le dimpho go ya le ka maemo a bona. Ge ba dira bjalo ba be ba bontšha gore ba leboga dilo ka moka tšeo Jehofa a ba direlago tšona. Re ka bontšha bjang gore re leboga dilo ka moka tšeo Jehofa a re direlago tšona? Tsela engwe ke ka go ntšha moneelo wo o tlago go thuša phuthego ya gabo rena le modiro wa lefase ka moka. Moapostola Paulo o itše: “Ge e ba motho a ikemišeditše go nea, gona mpho e amogelega ka mo go kgethegilego go ya ka seo a nago le sona, e sego go ya ka seo a se nago sona.” (2 Bakor. 8:4, 12) Jehofa o a thaba ge re ntšha moneelo ka go rata le ge e ka ba o monyenyane.—Mar. 12:42-44. w22.03 24 ¶13

Bagolo ba ka se tloše mathata ka moka ao bahlanka ba Modimo ba kopanago le ona. Eupša Jehofa o nyaka gore bagolo ba dire sohle seo ba ka se kgonago go kgothatša le go šireletša batho ba gagwe. Bagolo bao ba šetšego ba na le mošomo o montši ba ka hwetša kae nako ya go thuša bana babo bona le dikgaetšedi? Latela mohlala wa moapostola Paulo. O be a ikemišeditše go reta le go kgothatša bana babo le dikgaetšedi. Ke mo gobotse gore bagolo ba ekiše mohlala wa Paulo ka go swara bana babo bona le dikgaetšedi ka botho le ka lerato. (1 Bathes. 2:7) Paulo o ile a botša bana babo le dikgaetšedi gore o a ba rata le gore Jehofa o a ba rata. (2 Bakor. 2:4; Baef. 2:4, 5) Paulo o be a fetša nako e ntši a na le bana babo le dikgaetšedi e bile a ba swara bjalo ka bagwera ba gagwe. O bontšhitše gore o a ba tshepa ka go bolela dilo tšeo di bego di mo tshwenya le mafokodi a gagwe. (2 Bakor. 7:5; 1 Tim. 1:15) Paulo o be a sa lebelela mathata a gagwe a nnoši eupša o be a nyaka go thuša bana babo le dikgaetšedi. w22.03 28 ¶9-10