August

Go ka direga gore Jesu o be a bolela ka mašole a Baroma ao a ilego a kokotela diatla tša gagwe le maoto a gagwe koteng ya tlhokofatšo. Le ge Jesu a ile a bolawa a be a se na molato, ga se a ka a galefa gomme a gana go lebalela batho bao ba ilego ba mo tlaiša. (1 Pet. 2:23) Go swana le Jesu, le rena re swanetše go ikemišetša go lebalela ba bangwe. (Bakol. 3:13) Batho ba bangwe, go akaretša le ba gabo rena, ba ka no re ganetša go hlankela Jehofa ka ge ba sa kwešiše ditumelo tša rena le tsela yeo re phelago ka yona. Ba ka bolela maaka ka rena, ba re goboša pele ga batho ba bangwe, ba senya dikgatišo tša rena goba ba re tšhošetša ka gore ba tla re gobatša. Go e na le gore re gane go ba lebalele, re swanetše go kgopela Jehofa gore a ba thuše gore le bona ka letšatši le lengwe ba amogele therešo. (Mat. 5:44, 45) Ka dinako tše dingwe re ka thatafalelwa ke go lebalela batho ba bangwe, kudukudu ge e ba ba ile ba re swara gampe. Eupša ge e ba re dula re galefile gomme re sa nyake go lebalela ba bangwe, re tla ikgobatša. (Ps. 37:8) Ge re kgetha go lebalela ba bangwe, seo se re thuša gore re se ke ra dula re kwešitšwe bohloko ke dilo tše mpe tšeo di re diragaletšego.—Baef. 4:31, 32. w21.04 8-9 ¶3-4

Na go na le motho wa geno yoo a kgaotšwego ka phuthegong? Seo se kweša bohloko! Nagana kamoo Jehofa a ilego a kwa bohloko ka gona ge barongwa bao e bego e le karolo ya lapa la gagwe ba be ba tlogela go mo hlankela! (Juda 6) Le gona nagana kamoo a ilego a ikwa ka gona ge setšhaba sa gagwe seo a bego a se rata sa Baisiraele se be se mo hlanogela gantši le gantši. (Ps. 78:41) Kgodišega gore Tatago rena wa legodimong yoo a re ratago, o kwa bohloko kudu ge yo mongwe ka lapeng la gago goba la geno a tlogela go mo hlankela. O kwešiša bohloko bjoo o bo kwago e bile o tla bontšha gore o go kwela bohloko ka go go kgothatša le go go thekga. Ge ngwana a tlogela go hlankela Jehofa, gantši batswadi ba ipotšiša gore ba be ba swanetše go ba ba dirile eng gore ba mo thuše go dula a mo hlankela. ngwanabo rena yo mongweo itše: “Ke be ke ipona molato e bile ke lora le ditoro tša go tšhoša ka taba ye. Ka dinako tše dingwe ke be ke lla le pelo ya ka e le bohloko kudu.” Kgaetšedi yo mongwe yoo le yena morwa wa gagwe a ilego a kgaolwa o be a dula a nagana gore: “Ke paletšwe kae bjalo ka motswadi? Ke ile ka ikwa eka ga se ka ruta morwa wa ka ka mo go lekanego gore a rate Jehofa.” w21.09 26 ¶1-2, 4

Batho ba bangwe ba nagana gore Dihlatse tša Jehofa di ka se kgone go ba ruta Beibele ka gobane ga se tša ya dikolong tša bodumedi tšeo bona ba bonago e le tša bohlokwa. Eupša ba swanetše go nyaka go tseba ditaba ka botlalo. Se ke seo mongwadi wa Ebangedi e lego Luka a ilego a ikemišetša go se dira. O ile a dira sohle seo a ka se kgonago gore a tsebe “dilo ka moka go tloga mathomong ka mo go nepagetšego.” O be a nyaka gore batho bao ba tlago go bala Ebangedi ya gagwe ba “tsebe ka botlalo therešo ya dilo” tšeo ba bego ba di kwele ka Jesu. (Luka 1:1-4) Bajuda ba kgale ba kua Berea ba be ba swana le Luka. Ge ba be ba thoma go kwa ditaba tše dibotse ka Jesu, ba ile ba bala Mangwalo a Seheberu go kgonthišetša gore seo ba bego ba se kwa ka Jesu ke therešo. (Dit. 17:11) Le batho lehono ba swanetše go kgonthišetša ge e ba ditaba tšeo ba di kwago ke nnete. Ba swanetše go bapetša seo Dihlatse tša Jehofa di se rutago le seo Beibele e se rutago. Le gona ba swanetše go ithuta ka histori ya Dihlatse tša Jehofa ya mehleng yeno. Ge e ba ba ka tseba ditaba ka botlalo, ba ka se dumelele mabarebare a ba šitiša go latela Jesu. w21.05 3 ¶7-8

Na go na le yo mongwe ka phuthegong yoo o nyakago go mo mema? Go na le dinako tšeo Bakristegotee le rena ba ka thabelago go di fetša ba na le rena. Ka mohlala, go ka ba thata go Bakriste ba bangwe go fetša nako le ba gabo bona bao e sego Dihlatse tša Jehofa nakong ya matšatši a maikhutšo. Ba bangwe ba ka ikwa ba nyama kudu ge letšatši leo batho ba gabo bona ba hlokofetšego ka lona le fihla. Ge e ba re fetša nako le bana babo rena le dikgaetšedi bao ba nago le mathata a go swana le a, re tla be re bontšha gore re tloga re ba rata. (Bafil. 2:20) Go na le mabaka a mantši ao a ka dirago gore Mokriste a ikwe a le noši. Le gona re swanetše go dula re gopola gore Jehofa o tseba kamoo re ikwago ka gona. Gantši o diriša bana babo rena le dikgaetšedi go re thuša. (Mat. 12:48-50) Re ka bontšha gore re leboga seo Jehofa a re direlago sona ka go thekga Bakristegotee le rena. Go sa šetšwe tsela yeo re felago re ikwa ka yona, re swanetše go gopola gore Jehofa o tlo dula a na le rena e bile a ka se re tlogele. w21.06 13 ¶18-20

Jesu ga se a ka a fela matla a go bolela ditaba tše dibotse le ge ba bangwe ba be ba sa nyake go theetša molaetša wa gagwe. Ka baka la’ng? Ka gobane o be a tseba gore go na le batho ba bantši bao ba nyakago go ithuta therešo gomme o be a nyaka go thuša ba bantši kamoo go ka kgonegago. E bile o be a tseba gore go be go na le batho bao ba bego ba ka se mo theetše mathomong, eupša ka morago ba be ba tla mo theetša. Nagana ka seo se ilego sa direga ka lapeng la gabo. Mengwageng e meraro le seripa yeo Jesu a ilego a e fetša a bolela ditaba tše dibotse, ga go le o tee wa bana babo yoo e ilego ya morutiwa wa gagwe. (Joh. 7:5) Eupša ka morago ga gore a tsošwe bahung, bana babo e ile ya ba Bakriste. (Dit. 1:14) Ga re tsebe gore ke bomang bao mafelelong ba tlago go amogela seo re ba rutago sona. Batho ba bangwe ba tšea nako e telele gore ba amogele therešo. Ge batho bao ba sa nyakego go theetša molaetša wa rena ba bona tsela e botse yeo re itshwerego ka yona, seo se ka dira gore mafelelong ‘ba tagafatše Modimo.’ w21.05 18 ¶17-18

Ge Jesu a be a le mo lefaseng o ile a laela balatedi ba gagwe gore ba dire dilo tše pedi. O ile a ba laela gore ba botše batho ditaba tše dibotse tša Mmušo wa Modimo e bile a ba bontšha gore ba dire seo bjang. (Luka 8:1) Ka mohlala, Jesu o ile a botša barutiwa ba gagwe gore ba dire eng ge batho ba amogela molaetša wa bona le ge ba sa nyake go go amogela. (Luka 9:2-5) Le gona, o ile a ba botša le gore balatedi ba gagwe ba be ba tlo nea “bohlatse go ditšhaba tšohle.” (Mat. 24:14; Dit. 1:8) Go oketša moo, Jesu o ile a laela balatedi ba gagwe gore ba rute batho bao ba nyakago go ba barutiwa ba gagwe go boloka dilo ka moka tšeo a di laetšego. Jesu o boletše gore modiro wo o bohlokwa o be o tlo tšwela pele go fihla “bofelong bja tshepedišo ya dilo.” (Mat. 28:18-20) Ka morago ponong yeo Jesu a ilego a e bontšha Johane, o ile a mo hlalosetša gore barutiwa ba gagwe ka moka ba swanetše go thuša batho go ithuta ka Jehofa.—Kut. 22:17. w21.07 2-3 ¶3-4

Batho ba bantši lehono ba rata phadišano e bile ga ba na taba le gore ba gobatša batho ba bangwe. Ka mohlala, ge rakgwebo a nyaka gore kgwebo ya gagwe e atlege a ka dira dilo tšeo di feleletšago di gobatša borakgwebo ba bangwe. Motho yo a tsenetšego phadišano ya dipapadi a ka gobatša batho ba bangwe bao a phadišanago le bona gore a wine. Ngwana wa sekolo a ka kopiša ge a ngwala ditlhahlobo gore a tle a swanelege go ya yunibesithing ya maemo a godimo. Ka ge re le Bakriste re a tseba gore go dira dilo tša go swana le tše ke phošo ka ge e le “mediro ya nama.” (Bagal. 5:19-21) Eupša na go a kgonega gore bana babo rena le dikgaetšedi ba phadišane le ba bangwe ka phuthegong ba sa lemoge? Go bohlokwa gore re ipotšiše potšišo ye ka gobane go rata phadišano go ka dira gore ka phuthegong go se sa ba le botee. Re swanetše go nagana ka mehlala ya banna le basadi ba botegago ba ka Beibeleng bao ba sa kago ba phadišana le ba bangwe. w21.07 14 ¶1-2

Ge e ba re na le botho bjo bogolo seo se tla re dira gore re leke go thuša bao ba nyamilego. Go no swana le ge Ruthe a ile a dula a thekga Naomi, bana babo rena le dikgaetšedi bao ba nago le botho le bona ba thekga Bakristegotee le bona bao ba nyamilego. Ka ge ba ba rata, ba nyaka go dira sohle seo ba ka se kgonago gore ba ba thuše. (Die. 12:25; 24:10) Le gona seo ba se dirago se sepedišana le mantšu a Paulo yoo a re kgothaletšago gore re ‘bolele ka mo go homotšago le bao ba nyamilego, re thekge ba fokolago, le go se felele motho pelo.’(1 Bathes. 5:14) Gantši o ka thuša ngwanabo rena goba kgaetšedi yoo a nyamilego ka go mo theetša le go mmotša gore o a mo rata. Jehofa o tšeela godimo kudu botho bjo o bo bontšhago bahlanka ba gagwe. Diema 19:17 e re: “Yo a šetšago mmotlana o adima Jehofa gomme Modimo o tla mmušetša.” w21.11 10 ¶11-12

Re swanetše go dira’ng gore re itokiše? Sa pele ga se ra swanela go nagana gore dilo tšeo re nago le tšona di bohlokwa kudu ka gore ka letšatši le lengwe re ka swanela ke go kgaogana le tšona. Re swanetše go kgotsofalela seo re nago le sona le go thabišwa kudu ke segwera seo re nago le sona le Jehofa. Ge re ka ithuta ka Modimo ka mo go tseneletšego re tlo kgona go tshepa gore o tlo re šireletša ge Gogo wa Magogo a hlasela. Temana ya rena ya lehono e bontšha gore ke ka baka la’ng Dafida a ile a ithekga ka Jehofa. Dafida o be a dula a ithekga ka Jehofa, le gona Jehofa ga se a ka a mo tlogela. Ge Dafida e be e sa le yo monyenyane, o ile a lwa le Goliata e lego monna wa senatla yoo a bego a tseba ntwa. O ile a re go yena: “Lehono Jehofa o tla go gafela seatleng sa ka.” (1 Sam. 17:46) Ka morago, Saulo o ile a leka ka makga a mantši go bolaya Dafida ge a be a mo hlankela. Eupša “Jehofa o be a” na le Dafida. (1 Sam. 18:12) Dafida o be a tseba gore Jehofa o tlo mo thuša mathateng ao a nago le ona ka ge a ile a mo thuša nakong e fetilego. w22.01 6 ¶14-15

Ka ge Jehofa a sa fele pelo o dira modiro wa gagwe ka moka go fihla a o fetša. O dira seo ka gobane a nyaka gore leina la gagwe le retwe le go hola batho ba bangwe. Ka mohlala, nagana kamoo a ilego a bopela batho lefase ganyenyane-ganyenyane. Beibele e re ge Jehofa a be a bopa lefase o ile a bea “meelo ya lona,” a tsema “mekoti,” a ba a bea le “leswika la lona la sekhutlo.” (Jobo 38:5, 6) Le gona o ile a hlahlobišiša dilo ka moka tšeo a di dirilego. (Gen. 1:10, 12) O nagana gore barongwa ba ka ba ba ile ba ikwa bjang ge ba bona dilo ka moka tšeo Jehofa a di dirilego? Ba swanetše go ba ba ile ba thaba kudu! Ke ka baka leo Beibele e rego ba ile ba “gobela ka go hlalala.” Re ithuta’ng go se? Re ithuta gore Jehofa o feditše mengwaga e dikete a bopa dilo ka moka go fihlela a di fetša, eupša ge a lebelela dilo ka moka tšeo a di bopilego o ile a bona e le ‘tše dibotse kudu.’—Gen. 1:31. w21.08 9 ¶6-7

Papišong ya Jesu, monna yo mongwe o be a le kgauswi le go tšea leeto. Pele monna yoo a sepela, o ile a bitša bahlanka ba gagwe gomme a fa yo mongwe le yo mongwe wa bona ditalente gore ba dire kgwebo ka tšona. Ka ge a be a tseba gore bahlanka bao ba be ba se na bokgoni bja go swana, o ile a fa mohlanka yo mongwe ditalente tše hlano, yo mongwe a mo fa tše pedi gomme yo mongwe a mo fa e tee. Bahlanka ba babedi ba mathomo ba ile ba šoma ka thata gore ba oketše tšhelete ya mong wa bona. Eupša mohlanka wa boraro ga se a oketša tšhelete yeo mong wa gagwe a bego a mo file yona gomme mong wa gagwe o ile a mo raka. Mohlanka wa mathomo le wa bobedi ba ile ba tšeela godimo boikarabelo bjo mong wa bona a ba neilego bjona gomme ba šoma ka thata. Ka gona ba ile ba oketša ditalente tša mong wa bona gabedi. Go ikgafa ga bona le bokgoni bja bona go dirile gore ba hwetše moputso. Mong wa bona o ile a thaba kudu gomme a ba nea le maikarabelo a mangwe a magolo! w21.08 21 ¶7; 22 ¶9-10

Jehofa o bontšhitše gore ga a fele pelo mehleng ye ya bofelo. Ga a nyake gore motho le ge e le ofe a fedišwe. (2 Pet. 3:9) Ka baka leo o file batho ka moka sebaka sa gore ba itshole. Eupša go se fele pelo ga gagwe go tlo fela. Bao ba sa nyakego go thekga Mmušo wa Modimo ba tlo diragalelwa ke seo se ilego sa diragalela Farao mehleng ya Moshe. Jehofa o ile a botša Farao gore: “Ga bjale nkabe ke šetše ke otlolotše seatla sa ka gore ke otle wena le setšhaba sa gago ka leuba la bolwetši gore le fedišwe mo lefaseng. Eupša ge e le gabotse ke go tlogeletše lona lebaka le, gore ke go bontšhe matla a ka e le gore leina la ka le bolelwe lefaseng lohle.” (Ek. 9:15, 16) Mafelelong Ditšhaba ka moka di tla tseba gore Jehofa ke Modimo a nnoši wa therešo. (Hesek. 38:23) Go šišinywa mo go boletšwego temaneng ya rena ya lehono, go bolela go fedišwa ga batho ka moka bao ba swanago le Farao bao ba ganago go dumela gore Jehofa ke yena feela yo a nago le tshwanelo ya go buša. w21.09 18-19 ¶17-18

Na o kwele bohloko ka ge yo mongwe ka lapeng a kgaotšwe? O tla dira’ng ge e ba ba bangwe ka phuthegong ba ka thoma go bolela dilo tšeo di ka go dirago gore o kwe bohloko le go feta? O se ke wa felela bana beno le dikgaetšedi pelo. Ke nnete gore ga se batho ka moka bao ba tlago go re kgothatša. (Jak. 3:2) Ka ge ka moka ga rena re se ra phethagala, ga se ra swanela go makala ge motho yo mongwe a sa tsebe seo a tlago go se bolela goba a bolela selo seo se tlago go re kweša bohloko a se a ikemišetša. Gopola keletšo ya moapostola Paulo yeo e rego: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo.” (Bakol. 3:13) Dulang le kgothatša le go thuša ba malapa ao a nago le motho yo a kgaotšwego. Ba hloka gore le ba bontšhe gore le a ba rata le go ba kgothatša, kudukudu gona bjale. (Baheb. 10:24, 25) Ka dinako tše dingwe, batho ba malapa ao a nago le motho yo a kgaotšwego ba lemogile gore ba bangwe ka phuthegong ga ba sa ba bolediša, le gore ba ba swara bjalo ka ge eka le bona ba kgaotšwe. Ga se ra swanela go ba dira gore ba ikwe ka tsela yeo! Go ena le moo, re swanetše go reta le go kgothatša bafsa bao batswadi ba bona ba tlogetšego go hlankela Jehofa. w21.09 29 ¶13-14; 30 ¶16

Ge batšofadi le bafsa ba boledišana, ka moka ga bona ba tlo holega. (Baroma 1:12) Bafsa ba tlo kgodišega gore Jehofa o hlokomela bahlanka ba gagwe bao ba mmotegelago, mola motšofadi yena a tla ikwa a le bohlokwa e bile o tlo thabela go bolela kamoo Jehofa a ilego a mo šegofatša ka gona. Gantši ge batho ba tšofala bobotse bja bona bo a hwelela, eupša bao ba hlankelago Jehofa ka go botega, ba botsefala le go feta ge ba dutše ba tšofala. (1 Bathes. 1:2, 3) Ke ka baka la’ng se e le nnete? Ka gobane ba na le mengwaga e mentši ba dumelela Jehofa gore a ba tlwaetše le go ba thuša gore ba be le dika tše dibotse. Ge e ba re lebelela batšofadi ba ka phuthegong ba le bohlokwa, re ba hlompha e bile re ithuta go bona, seo se tla re thuša go bona gore ba na le mohola kudu! Phuthego e a matlafala ge bafsa ba hlompha batšofadi e bile e a matlafala ge batšofadi le bona ba hlompha bafsa. w21.09 7 ¶15-18

Re swanetše go dula re dira sohle seo re ka se kgonago gore re se ke ra swara ba bangwe ga sehlogo le gore re ba ‘bontšhe kgaugelo’ go swana le Modimo wa rena. (Baef. 2:4) Motho yo a gaugelago ba bangwe ga a no bolela ka molomo feela gore o na le kgaugelo. Eupša o bontšha seo ka go ba direla selo se itšego. Ka moka ga rena re ka lebelela gore re ka thuša mang ka magaeng a gabo rena, ka phuthegong goba moo re tšwago gona. Seo se tla re thuša go bona gore ke dilo tše dintši tšeo re ka di dirago go bontšha gore re gaugela ba bangwe! Na go na le motho yo o mo tsebago yoo a hlokago go homotšwa? Na re ka mo thuša ka mešomo e mengwe, mohlomongwe ra mo išetša dijo goba ra mo thuša ka dilo tše itšego? Na o ka kgothatša Mokriste yoo a sa tšwago go bušetšwa ka phuthegong? Na re ka kgothatša batho ba bangwe ka go ba botša ditaba tše dibotse? Ye ke e nngwe ya dilo tše bohlokwa tšeo re ka di dirago go bontšha gore re gaugela batho ka moka bao re kopanago le bona. (Jobo 29:12, 13; Baroma 10:14, 15; Jak. 1:27) Ge e ba re lemoga gore go na le batho ba bangwe bao ba hlokago go thušwa ka dilo tšeo re sa tšwago go bolela ka tšona, re tlo kgona go ba bontšha kgaugelo. Le gona ge e ba re gaugela batho ba bangwe, re tlo thabiša Tatago rena wa magodimong, yena Modimo wa rena yoo a “tletšego ka dikgaugelo”! w21.10 13 ¶20-22

Go Psalme 23, Dafida o bolela ka dilo tšeo di tlogago di le bohlokwa, go swana le dilo tše dibotse tšeo Jehofa a mo diretšego tšona bjale ka modiši wa gagwe. Jehofa o be a mo iša “mafelong a boikhutšo,” le gona Jehofa o be a dula a thekga Dafida ka dinako tšohle. Dafida o ile a bontšha gore le ge Jehofa a mo utamiša “mafulong a ma tala” ga se gore o be a ka se be le mathata. Ka dinako tše dingwe, o be a ka nyama go swana le ge eka o sepela “moeding wa kgampi ya leswiswi,” le gona o be a tlo ba le manaba. Le gona ka ge Jehofa e be e le Modiši wa gagwe o be a ka se “boife selo” se sebe. Dafida o ile a se “hloke selo” bjang? Dafida o be a na le dilo ka moka tšeo a di hlokago gore e be mogwera wa Jehofa. Le gona o be a se a ithekga ka dilo tšeo di bonagalago gore a thabe. Dafida o be a kgotsofalela dilo tšeo Jehofa a bego a mo nea tšona. Sa bohlokwa kudu go yena e be e le gore Jehofa a mo šegofatše le go mo šireletša. Mantšu a Dafida a re ruta gore re se ke ra lebelela dilo tšeo re nago le tšona di le bohlokwa kudu go rena. w22.01 3-4 ¶5-7

Bahlanka ba Jehofa ba nakong e fetilego le bona ba ile ba botša batho ka molaetša wa Modimo le ge ba be ba sa nyake go ba theetša. Ka mohlala, Noa o bile “mmoledi wa toko,” ka mengwaga e ka bago e 40 goba e 50. (2 Pet. 2:5) Mohlomongwe o be a nagana gore batho ba bangwe ba be ba tla mo theetša, eupša Jehofa ga se a mmotša gore ba be ba tla mo theetša. Go e na le moo, ge Jehofa a be a botša Noa gore a age areka, o ile a re: “[Tsena] ka arekeng, wena le barwa ba gago le mosadi wa gago gotee le basadi ba barwa ba gago.” (Gen. 6:18) Ka gona ge Jehofa a be a laela Noa gore a age areka e kaakang, mohlomongwe Noa a ka ba a ile a nagana gore batho ba bantši ba ka se mo theetše ka ge a be a ka nagana gore ba ka se kgone go felela ka arekeng. (Gen. 6:15) Ka ge re tseba, ga go na motho yoo a ilego a theetša Noa. (Gen. 7:7) Na Jehofa o ile a nagana gore Noa ga se a botša batho ka moka ditaba tše dibotse? Aowa! Jehofa o ile a thabišwa kudu ke gore Noa o ile a dira dilo tšeo a mo kgopetšego tšona.—Gen. 6:22. w21.10 26 ¶10-11

E no nagana gore Ruthe a ka ba a ile a ikwa bjang ge a be a ekwa tsela yeo Naomi a bego a bolela ka yona! Ruthe o ile a dira sohle seo a se kgonago gore a thuše Naomi. Le gona Ruthe o ile a homotša Naomi, a mo kgothatša le go sepela le yena ka matšatši a mantši. Le ge Ruthe a ile a dira dilo tše ka moka, Naomi o ile a re: “Jehofa o dirile gore ke boe ke lekeletša diatla.” Mantšu a Naomi a be a bontšha gore o be a sa leboge gore Ruthe o be a dutše a mo thekga ka dinako ka moka. Ruri seo se ka ba be ile sa dira gore Ruthe a kwe bohloko, eupša o ile a dula a na le Naomi ka dinako ka moka. (Ruthe 1:3-18) Ka dinako tše dingwe ge re leka go thuša kgaetšedi yo a nyamilego a ka bolela dilo tše di re kwešago bohloko. Eupša ga se ra swanela go kgopišega. Go e na le moo re swanetše go dula re thekga kgaetšedi yo a nyamilego le go kgopela Jehofa gore a re thuše go bona gore re ka mo homotša bjang. (Die. 17:17) Ka mohlala, mathomong kgaetšedi yo a hlokago thušo a ka gana ge re mo thuša. Eupša seo ga se sa swanela go re fetša matla. Go e na le moo, re tlo mmontšha botho bjo bogolo gomme ra dira sohle seo re ka se kgonago gore re mo thuše.—Bagal. 6:2. w21.11 11 ¶17-19

Ka Beibeleng, lentšu “bokgethwa” le šupa go tsela yeo batho ba itshwarago ka yona le kamoo madumedi a dirago dilo ka tsela e kgethwa. Le gona lentšu le le ka bolela go hlankela Modimo. Seo se bolela gore ge e ba re ka hlankela Modimo ka tsela yeo a e amogelago, ra ba le segwera se sebotse le yena e bile re itshwara gabotse, re ba bakgethwa. Se se thabišago ke gore le ge re na le sebe, eupša Modimo wa rena yo e lego yo mokgethwa ka mo go feletšego o sa nyaka go ba bagwera ba rena.Jehofa ke yo mokgethwa dilong ka moka. Re ithuta se mantšung ao barongwabatuki bao ba lego kgauswi le sedulo sa Jehofa ba ilego ba a bolela. Ba bangwe ba bona ba ile ba re: “Mokgethwa, mokgethwa, mokgethwa ke Jehofa wa madira!” (Jes. 6:3) Ke nnete gore barongwa ba be ba swanetše go ba ba bakgethwa gore ba be le segwera se sebotse le Modimo wa bona yo mokgethwa. w21.12 3 ¶4-5

Bafsa gantši ba tshwenyega ka go nyaka go phela bophelo bjo bobotse. Barutiši ba bona goba batswadi ba bona bao e sego Dihlatse tša Jehofa ba ka ba kgothaletša gore ba phegelele dithuto tše di phagamego tšeo di tlago go dira gore ba gole tšhelete e ntši. Eupša batswadi bao e lego Dihlatse tša Jehofa le bagwera ba bona ba ka phuthegong ba ka ba kgothaletša gore ba hlankele Jehofa. Motho yo a ratago Jehofa a ka thuša ke eng gore a dire diphetho gabotse? A ka holwa ke go bala lengwalo la Baefeso 5:15-17 le go naganišiša ka lona. Ka morago ga go bala ditemana tša lengwalo le mofsa yoo a ka ipotšiša gore: “Jehofa o nyaka ke dira’ng”? Modimo o rata’ng? Nka dira’ng gore ke mo thabiše? Ke phetho efe yeo e ka nthušago gore ke kgone go diriša nako ya ka gabotse? Gopola gore “mehla ke e mebe,” Le gona lefase le leo le bušago ke Sathane le kgauswi le go fela. w22.01 27 ¶5

Jakobo o thomile neng go ba molatedi wa Jesu? Ka morago ga gore Jesu a tsošwe bahung, “o ile a iponagatša go Jakobo, ke moka a tla a iponagatša go baapostola ka moka.” (1 Bakor. 15:7) Ka morago ga go kopana le Jesu yo a tsošitšwego, bophelo bja Jakobo bo ile bja fetoga. O be a le gare ga baapostola bao ba bego ba emetše go amogela moya o mokgethwa phapošing ya ka godimo kua Jerusalema. (Dit 1:13, 14) Ka morago Jakobo o ile a thabela go hlankela e le yo mongwe wa Sehlopha se Bušago. (Dit. 15:6, 13-22; Bagal. 2:9) Le gona, pele ga ngwaga wa 62 C.E. o ile a ngwalela Bakriste ba tloditšwego lengwalo. Lengwalo leo le a re thuša lehono go sa šetšwe gore re na le kholofelo ya go yo phela legodimong goba mo lefaseng. (Jak. 1:1) Radihistori yo a bitšwago Josephus o ngwadile gore: “Jakobo o ile a bolawa e le ka taelo ya moperisita yo a phagamego wa Bajuda e lego Ananiase yo monyenyane.” Jakobo o ile a ba le tumelo go Jehofa go fihlela a fetša bophelo bja gagwe bja mo lefaseng. w22.01 8 ¶3; 9 ¶5

Temana ya lehono e re ruta gore ga se ra swanela go letela gore Jehofa o swanetše go re šireletša ge tumelo ya rena e lekwa. Go no swana le ge Jesu a ile a lekwa go fihlela a ehwa, le rena re swanetše go ikemišetša go dula re botega go fihlela re ehwa ge e ba go hlokagala. (Mat. 16:24, 25) Eupša re ka kgodišega gore Modimo a ka se dumele gore re lekwe go feta kamoo re ka kgonago go kgotlelela. (1 Bakor. 10:13) Selo se sengwe seo re ithutago sona ke gore le rena re ka no swarwa ka go hloka toka go swana le Jesu. (1 Pet. 2:19, 20) Batho ga ba re ganetše go hlankela Jehofa ka ge re dirile selo se itšego se sebe, eupša ba re ganetša ka ge re se karolo ya lefase e bile re nea bohlatse ka therešo. (Joh. 17:14; 1 Pet. 4:15, 16) Jesu o be a kwešiša gore ke ka baka la eng Jehofa a ile a dumelela gore a tlaišege. Eupša bahlanka ba bangwe ba botegago ba Jehofa bao le bona ba ilego ba tlaišega, ka dinako tše dingwe ba ile ba ipotšiša gore ke ka baka la eng Jehofa a dumelela dilo tše itšego gore di direge. (Habak. 1:3) Modimo wa rena yo a sa felego pelo le yo a nago le kgaugelo o a kwešiša gore batho ba mohuta woo ga se gore ga ba na tumelo, ba no ba ba hloka gore yena a ba kgothatše.—2 Bakor. 1:3, 4. w21.04 11 ¶9-10

Jehofa o tlo amogela borapedi bja ren age feela re dira dilo go dumelelana le thato ya gagwe e bile re mo hlankela ka lerato le ka tlhompho. Re a tseba gore Jehofa o swanelwa ke go hlankelwa, e bile re nyaka gore mpho ya rena ya go mo hlankela e be e kaonekaone. Tsela e nngwe ke ka go mo rapela. Beibele e swantšha dithapelo tša rena le diorelo tšeo di lokišeleditšwego gabotse tšeo di bego di neelwa taberenakeleng gomme ka morago tša neelwa tempeleng. Diorelo tšeo di be di amogelega go Modimo. Ka mo go swanago dithapelo tša rena tšeo di tšwago pelong di “a mo kgahla,” le ge re ka ba re diriša mantšu a bonolo. (Die. 15:8; Doit. 33:10) Jehofa o a thaba ge a e kwa re mmotša ka tsela yeo re mo ratago ka yona le kamoo re mo lebogago ka gona. O nyaka gore re mmotše mathata a rena le dilo tšeo re di nyakago. Re swanetše go nagana ka seo re nyakago go se botša Jehofa pele re mo rapela. Ge re dira bjalo re tla be re nea Jehofa diorelo tše di kaonekaone. w22.03 20 ¶2; 21 ¶7

Ka Haramagedone, ga se rena re tlago go kgetha gore ke mang Jehofa a tlago go mo phološa goba a ka se mo phološego. (Mat. 25:34, 41, 46) Na re tlo kgona go thekga diphetho tša Jehofa goba na re ka se di thekge? Re swanetše go tshepa Jehofa gona bjale gore re tle re kgone go mo tshepa ka mo go feletšego nakong e tlago. Nagana gore re tlo ikwa bjang lefaseng le lefsa. Bodumedi bja maaka, mebušo le dikgwebo tšeo di inyakelago tšhelete tšeo di ilego tša tlaiša batho ka nako e telele di tla be di fedišitšwe. Malwetši, botšofadi le lehu di tla be di se sa le gona. Sathane le batemona ba gagwe ba tlo golegwa ka mengwaga e sekete. Dilo tše mpe tšeo di diregilego ka baka la Sathane di tla be di se sa le gona. (Kut. 20:2, 3) Re tlo leboga kudu gore re ile ra tshepa tsela ya Jehofa ya go dira dilo! w22.02 6-7 ¶16-17

Jesu o be a e ba wa mathomo go thuša batho gore ba be le khutšo le go lokiša mathata a bona. O ile a ba ruta gore ba swanetše go dira khutšo le ba bangwe ge ba nyaka gore Jehofa a amogele borapedi bja bona. (Mat. 5:23, 24) Le gona o ile a thuša le baapostola ba gagwe ge ba be ba ngangišana ka gore ke mang yo mogolo go bona. (Luka 9:46-48; 22:24-27) Gore re be le khutšo le ba bangwe re swanetše go phema go hlola dingangišano. Re swanetše go ba ba mathomo ba go dira khutšo le go ba thuša gore ba rarolle mathata a bona. (Bafil. 4:2, 3; Jak. 3:17, 18) Re ka ipotšiša: ‘Na ke ikemišeditše go dira’ng gore ke be le khutšo le ba bangwe? Ge ngwanabo rena goba kgaetšedi a nkgopiša na ke mo swarela sekgopi? Na ke emela motho yo mongwe a etla go tlo dira khutšo le nna goba na ke ba wa mathomo wa go yo dira khutšo le yena le ge e le yena a nago le phošo? w22.03 10 ¶10-11

Nakong e fetilego Beibele e ile ya bolela e sa le pele gore batho ba Modimo ba be ‘ba tla ithaopela’ go hlankela Jehofa ba hlahla ke Jesu. (Ps. 110:3) Boporofeta bjo bo a phethagala lehono. Ngwaga o mongwe le o mongwe bahlanka ba Jehofa ba fetša diiri tše dimilione ba ruta batho ba bangwe ka Beibele. Ba dira seo ka go rata le ge ba sa patelwe. Ba kgothatša bana babo bona ba bangwe, ba tiiša tumelo ya bona e bile ba ba thuša ka dilo tšeo ba di hlokago. Bagolo le bahlanka ba bodiredi ba fetša nako e ntši ba lokišeletša diboka le go etela bana babo bona le dikgaetšedi gore ba ba kgothatše. Ke ka baka la’ng bahlanka ba Jehofa ba dira mošomo o ka moka? Ke ka gobane ba rata Jehofa le batho ba bangwe. (Mat. 22:37-39) Jesu o re beetše mohlala o mobotse wa go etiša batho ba bangwe pele. Re leka go dira sohle seo re ka se kgonago gore re mo ekiše. (Baroma 15:1-3) Bao ba mo ekišago ba tlo hwetša dilo tše dibotse. w22.02 20 ¶1-2

Baisiraele ba bantši bao ba bego ba šoma dipolaseng ba be ba gola letšatši le lengwe le le lengwe. Ge Moisiraele a be a ka se gole, seo se bolela gore o be a ka se hwetše tšhelete ya go hlokomela lapa la gagwe letšatšing leo. Jehofa o itše: “[Motho yo a šomago] o bothateng e bile o tshwenyegile ka go hwetša moputso wa gagwe.” (Doit. 24:14, 15; Mat. 20:8) Lehono batho bao ba šomago ga ba sa patelwa letšatši le lengwe le le lengwe eupša ba patelwa gatee goba gabedi ka kgwedi. Eupša molao wa motheo wo o lego go Lefitiko 19:13 o sa šoma. Batho ba bangwe bao ba šomago go hira batho ba patela bašomi ba bona tšhelete e nyenyane kudu. Ba a tseba gore bašomi bao ba tla no tšwela pele ba šoma ka ge ba nyaka go hwetša tšhelete yeo ba tlago go iphediša ka yona. Ka tsela yeo batho bao ba tla be ba gana ka tšhelete ya batho bao ba ba hirilego. Mokriste yo a nago le kgwebo o swanetše go kgonthišetša gore o patela batho bao a ba hirilego tšhelete ya bona ka moka. w21.12 10 ¶9-10

Ka morago ga gore Jesu a tlaišege le go kwa bohloko o šoro ge a be a le koteng ya tlhokofatšo, o swanetše go ba a be a nyorilwe kudu. O be a hloka thušo gore a hwetše seo a ka se nwago.Jesu o be a sa nagane gore ke phošo go bolela kamoo a ikwago ka gona. Le rena ga se ra swanela go tšhaba go bolela kamoo re ikwago ka gona. Ka tlhago re ka no ba re le batho bao ba sa ratego go botša ba bangwe dilo tšeo re di hlokago. Eupša ge re hloka thušo ga se ra swanela go tšhaba go kgopela batho ba bangwe gore ba re thuše. Ka mohlala, ge e ba re tšofetše goba re babja, re ka swanelwa ke go kgopela motho yo mongwe gore a re iše go yo reka dilo tšeo re di hlokago goba gore a re iše ngakeng. Ge e ba re kwele bohloko goba re nyamile, re ka swanelwa ke go kgopela mogolo goba Mokriste yo mongwe yo a godilego gore a re theetše goba a re kgothatše. (Die. 12:25) A re duleng re gopola gore bana babo rena le dikgaetšedi ba a re rata gomme ba nyaka go re thuša ge re le ‘tlalelong’ goba re wetšwe ke mathata. (Die. 17:17) Eupša ga ba kgone go bala menagano ya rena. Ba ka no se tsebe gore re hloka thušo ge e ba re sa ba botše. w21.04 11-12 ¶11-12

Ge maemo a fetoga, go ka ba thata go ba bantši ba rena gore re a amogele. Ba bangwe bao ba bego ba le tirelong e kgethegilego ya nako e tletšego ka nako e telele ba ile ba hwetša dikabelo tše difsa. Ba bangwe ka baka la botšofadi, ba ile ba swanelwa ke go tlogela dikabelo tša bona tšeo ba bego ba di rata. Go tlwaelegile gore re nyame ge maemo a rena a fetoga. Go ba bonolo gore re tlwaelane le maemo a rena a mafsa ge re leka go lebelela dilo ka tsela yeo Jehofa a di lebelelago ka yona. Jehofa o dira dilo tše dikgolo lehono, le gona re na le tokelo ya go ba bašomigotee le yena. (1 Bakor. 3:9) Tsela yeo Jehofa a re ratago ka yona e ka se fetoge. Ge o hwetša kabelo e mpsha o se ke wa fetša nako o nagana gore ke ka baka la’ng ba go file yona. Go e na le go nagana ka gore dilo di ka ba di dirwa go swana le “mehla ya pele,” kgopela Jehofa gore a go thuše go bona mehola ya kabelo e mpsha. (Mmo. 7:10) Lebelela dilo ka leihlo le lebotse. Ge re dira bjalo re tlo thaba le go hlankela Jehofa ka potego le ge maemo a rena a fetoga. w22.03 17 ¶11-12

Jehofa o bontšha bomang botho bja gagwe bjo bogolo? Beibele e bontšha gore re ka rata dilo tše dintši, tše bjalo ka go “lema,” “beine le makhura,” “kgalemelo,” “tsebo,” “bohlale,” le tše dingwe. (2 Dikor. 26:10; Die. 12:1; 21:17; 29:3) Jehofa o bontšha batho feela botho bja gagwe e sego dilo tše dingwe. Le gona Jehofa ga a no bontšha motho yo mongwe le yo mongwe botho bja gagwe bjo bogolo. Eupša o bo bontšha feela batho bao ba nago le segwera se sebotse le yena. O tshepiša gore o tlo ba direla dilo tše dibotse le gore o tlo dula a ba rata.Jehofa o bontšhitše gore o rata batho ka moka. Jesu o ile a botša monna yo a bitšwago Nikodemo gore: “Modimo o ratile lefase [e lego batho] kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Joh. 3:1, 16; Mat. 5:44, 45. w21.11 2 ¶3; 3 ¶6-7

Bophelo bo thata, eupša go ka direga gore nakong e tlago re tle re kopane le mathata a mangwe a magolo. (Mat. 24:21) Ruri re fela pelo ya gore ka letšatši le lengwe mathata a a fele, re a lebale le gore a se sa ba gona! (Jes. 65:16, 17) Ka gona re swanetše go tšwela pele re ithuta go kgotlelela. Ka baka la’ng? Ka gobane Jesu o itše: “Ka go kgotlelela ga lena, le tla rua meoya ya lena.” (Luka 21:19) Go nagana kamoo ba bangwe ba kgotleletšego mathata a go swana le a rena, go ka re thuša gore le rena re kgotlelele. Ke mang yo a re beelago mohlala o mobotse kudu wa go kgotlelela? Ke Jehofa Modimo. Na karabo ye e a go makatša? Mohlomongwe e ka go makatša, eupša ge o ka naganišiša ka yona o tlo kgona go e kwešiša. Lefase le le bušwa ke Diabolo e bile le tletše ka mathata. Jehofa a ka kgona go fediša mathata a ka moka gona bjale, eupša o letetše nako ya maleba gore a tle a dire bjalo. (Baroma 9:22) A sa letile, o dula a kgotleletše mathata ao ka moka. w21.07 8 ¶2-4