May

Bakriste ba lekgolong la pele la mengwaga ba ile ba welwa ke tlala e kgolo yeo e ilego ya “wela lefase ka moka.” Ga go pelaelo gore dihlogo tša malapa di ile tša tshwenyega ka gore di tlo fepa bjang malapa a tšona. Go thwe’ng ka baswa bao ba bego ba ikemišeditše go oketša tirelo ya bona? Na ba ile ba swanelwa ke go emanyana go fihlela tlala e fela? Go sa šetšwe maemo a ka moka, Bakriste bao ba ile ba kgona go lebeletšana la mathata ao. Ba ile ba tšwela pele ba bolela ditaba tše dibotse kamoo ba bego ba kgona ka gona e bile ba thabela go abelana le bana babo bona le dikgaetšedi ba kua Judea dilo tšeo ba bego ba na le tšona. (Dit. 11:​29, 30) Bao ba ilego ba amogela dijo ba ile ba bona gore Jehofa o a ba thuša. (Mat. 6:​31-33) Ba swanetše go ba ba ile ba gwerana kudu le bana babo bona bao ba bego ba ba thuša. Le gona, bao ba ilego ba neela ba ile ba hwetša lethabo leo le tlišwago ke go nea.—Dit. 20:35. w23.04 16 ¶12-13

Ka dinako tše dingwe Jehofa o diriša le batho bao ba sa mo hlankelego go araba dithapelo tša bahlanka ba gagwe. Ka mohlala, o ile a diriša Kgoši Arithasasitha gore a dumelele Nehemia gore a boele Jerusalema gore a kgone go yo thuša go tsošološa motse woo. (Neh. 2:​3-6) Le lehono Jehofa a ka diriša batho bao ba sa mo hlankelego go thuša bahlanka ba gagwe ge ba hloka thušo. Gantši Jehofa ga a arabe dithapelo tša rena ka tsela yeo re letetšego ka yona. Eupša dikarabo tšeo a re neago tšona di re thuša gore re dule re mmotegela. Ka gona dula o ntšhitše mahlo dinameng go bona kamoo Jehofa a arabago dithapelo tša gago ka gona. O swanetše go dula o nagana kamoo Jehofa a arabago dithapelo tša gago ka gona. (Ps. 66:​19, 20) Ga se ra swanela go no bontšha tumelo ya rena feela ka go rapela Jehofa eupša re swanetše go e bontšha le ka go amogela tsela yeo a arabago dithapelo tša rena ka yona.—Baheb. 11:6. w23.05 11 ¶13; 12 ¶15-16

Ge re be re ineela go Jehofa, re ile ra mo tshepiša gore re tlo mo hlankela le go dira seo a se nyakago. Re swanetše go phethagatša seo re se tshepišitšego. Go dula re dira seo re se tshepišitšego ge re be re ineela go Jehofa ga go boima. Re kgona go dira se ka gobane Jehofa o re bopile re na le kganyogo ya go dira seo a se nyakago. (Kut. 4:11) O re bopile ka seswantšho sa gagwe, e bile re na le kganyogo ya go nyaka go mo hlankela. Ka baka leo re kgona go gwerana le yena le go thabela go dira dilo tšeo a di nyakago. Ge re dira dilo tšeo Modimo a di nyakago e bile re latela Morwa wa gagwe, re “hweletša meoya ya [rena] tapologo.” (Mat. 11:​28-30) Ka gona, tšwela pele o rata Jehofa. Naganišiša ka dilo tše dibotse tšeo a go diretšego tšona le ditšhegofatšo tšeo o tlago go di hwetša nakong e tlago. Ge o tšwela pele o rata Jehofa, go tlo ba bonolo gore o mo kwe. (1 Joh. 5:3) Jesu o ile a kgona go dira dilo tšeo Modimo a di nyakago ka gobane o be a dula a rapela Jehofa a mo kgopela gore a mo thuše, e bile a naganišiša ka moputso woo a tlago go o hwetša. (Baheb. 5:7; 12:2) Go swana le Jesu, rapela Jehofa o mo kgopele gore a go nee matla e bile o dule o naganišiša ka kholofelo yeo o nago le yona ya bophelo bjo bo sa felego. w23.08 27-28 ¶4-5

Ka moka ga rena re rata batho ba go se fele pelo. Ka baka la’ng? Re hlompha batho bao ba kgonago go letela selo se itšego ka go se fele pelo. Re thaba kudu ge batho ba sa re felele pelo ge re dira diphošo. Le gona, re leboga gore motho yo a bego a re ruta Beibele o be a sa re felele pelo ge re be re thatafalelwa ke go ithuta, go amogela le go diriša seo Beibele e se rutago. Godimo ga tšohle, re tloga re leboga gore Jehofa Modimo ga a re felele pelo! Le ge re rata batho ba go se re felele pelo, rena re ka hwetša ka dinako tše dingwe re thatafalelwa ke go bontšha seka sa go se fele pelo. Ka mohlala, re ka thatafalelwa ke go bontšha seka sa go se fele pelo ge re eme ka gare ga sephethephethe, kudukudu ge e ba re šiilwe ke nako. Re ka galefa ge batho ba bangwe ba re tshwenya. Le gona ka dinako tše dingwe re ka thatafalelwa ke go letela lefase le leswa leo Jehofa a le tshepišitšego. Maemong a ka moka re hloka go ba le seka sa go se fele pelo. w23.08 20 ¶1-2

Gopola gore Jehofa o ile a botša Gideone gore a gomiše mo e ka bago mašole ka moka ao a bego a sepela le wona. Mohlomongwe o be a ka ipotšiša gore: ‘Na se se a hlokagala? Na se se tla šoma?’ Eupša Gideone o ile a theetša. Le lehono bagolo ba ekiša Gideone ka go theetša ge mokgatlo o ba laela gore ba dire diphethogo. (Baheb. 13:17) Gideone o ile a kwa Jehofa le ge a be a tšhogile e bile kabelo ya gagwe e le kotsi. (Baa. 9:17) Ka morago ga gore Jehofa a kgonthišetše Gideone gore o tlo mo thekga, Gideone o ile a bona gore Modimo o tlo mo thuša go šireletša batho ba gagwe. Bagolo bao ba dulago mafelong ao modiro wa rena o thibetšwego ba ekiša Gideone. Ba bontšha sebete ka go etelela pele dibokeng le tšhemong go sa šetšwe gore ba tšhošetšwa ka gore ba tlo swarwa, ba sekišwa, ba lahlegelwa ke mošomo, goba ba tlaišwa. Nakong ya masetlapelo a magolo, bagolo ba tlo swanelwa ke go bontšha sebete gore ba kwe ditaelo tšeo ba tlago go di hwetša le ge di ka bea maphelo a bona kotsing. w23.06 5-6 ¶12-13

Jehofa o ile a dira gore mediro e mebotse yeo e dirilwego ke Moperisita yoo yo a Phagamego Jehoyada e ngwalwe ka Beibeleng gore re tle re ithute go yona. (Baroma 15:4) Le gona ge Jehoyada a ehwa, o ile a hlomphiwa ka gore a bolokwe “Motseng wa Dafida gotee le dikgoši, ka gobane o be a dirile gabotse Isiraeleng, kudukudu go Modimo wa therešo le ntlong ya gagwe [Modimo].” (Dikor. 24:​15, 16) Pego ya Jehoyada e ka re thuša ka moka gore re boife Modimo. Bagolo ba ka ekiša Jehoyada ka go dula ba nyaka ditsela tša go šireletša dinku tša Modimo. (Dit. 20:28) Bao ba godilego ba ka ithuta go Jehoyada gore ge ba ka dula ba boifa Jehofa le go mmotegela, a ka ba diriša go phethagatša merero ya gagwe. Bafsa ba ka ithuta kamoo Jehofa a ilego a swara Jehoyada ka gona, ka go swara batšofadi bao ba botegago ka seriti le ka tlhompho, kudukudu bao ba nago le nako e telele ba hlankela Jehofa. (Die. 16:31) Anke ka moka ga rena re dule re thekga “bao ba etelelago pele” ka go ba theetša.—Baheb. 13:17. w23.06 17 ¶14-15

Ge o le dibokeng, diriša temogo ge o kgetha gore o tlo emiša letsogo gakae. Ge e ba re emiša letsogo gantši, re ka dira gore moswari wa thuto a ikwe a gapeletšega go re kgetha le ge batho ba bangwe ba se ba hlwa ba hwetša sebaka sa go araba. Se se ka dira gore ba bangwe ba se ke ba emiša matsogo. (Mmo. 3:7) Ge bagoeledi ba bantši ba emiša matsogo nakong ya thuto, re ka no se hwetše sebaka sa go araba gantši kamoo re nyakago ka gona. Ka dinako tše dingwe moswari wa thuto a ka no se re kgethe. Se se ka re nyamiša eupša ga se ra swanela go kgopišega. (Mmo. 7:9) Ge e ba o palelwa ke go araba gantši ka mo o dumago ka gona, o ka theetša ke moka ka morago ga diboka wa reta ba bangwe ka dikarabo tša bona. Seo se ka kgothatša bana beno le dikgaetšedi go no swana le ge eka o be o araba ka dibokeng. w23.04 23-24 ¶14-16

Bala Lentšu la Modimo o be o naganišiše ka lona. Go swana le ge mohlare o tia ge medu ya ona tsemile fase, le rena tumelo ya rena e tlo tia ge e ba re ithekga ka lentšu la Modimo. Ge mohlare o dutše o gola, le medu ya ona e a gola gomme ya phatlalala. Ge re bala le go naganišiša, re tiiša tumelo ya rena e bile re tloga re kgodišega gore ditsela tša Jehofa ke tše kaonekaone. (Bakol. 2:​6, 7) Naganišiša kamoo ditaelo, tlhahlo le tšhireletšo ya Jehofa di thušitšego bahlanka ba gagwe ka gona nakong e fetilego. Ka mohlala, Hesekiele o ile a lebeledišiša ka kelohloko ponong ge morongwa a be a ela tempele. Pono yeo e ile ya tiiša Hesekiele, le gona e ka re thuša go tšeela godimo dithuto tše bohlokwa tša melao ya Jehofa ya borapedi bjo bo hlwekilego. (Hesek. 40:​1-4; 43:​10-12) Le gona, re a holega ge re ithuta le go naganišiša ka dilo tše di tseneletšego tša Lentšu la Modimo. Re ka ba le pelo e tiilego le go bota Jehofa ka mo go feletšego.—Ps. 112:7. w23.07 18 ¶15-16

Beibele e na le mehlala e mebotse yeo bana babo rena ba baswa ba ka e ekišago. Banna bao ba ka Beibeleng ba be ba rata Modimo e bile ba na le maikarabelo a mantšhi a go hlokomela batho ba gagwe. O ka hwetša gape le mehlala e mebotse ka lapeng la geno goba ka phuthegong. (Baheb. 13:7) Le gona o na le mohlala o mobotse go e feta ka moka, e lego wa Jesu Kriste. (1 Pet. 2:21) Ge o dutše o ithuta ka mehlala ye, nagana ka dika tše o di ratago ka banna bao. (Baheb. 12:​1, 2) Bona kamoo o ka ekišago mehlala ya bona ka gona. Monna yo a nago le tlhaologanyo o naganišiša pele a dira diphetho. Ka gona šoma ka thata gore o be le tlhaologanyo. O ka thoma ka go ithuta ka melao ya motheo ya ka Beibeleng le go bona kamoo e ka go holago ka gona. Ke moka wa diriša melao yeo ya motheo go dira diphetho tšeo di tlago go thabiša Jehofa. (Ps 119:9.) Ge o ka ithuta go nagana ka tsela ye, o tlo kgona go ba ngwanabo rena yo a godilego moyeng.—Die. 2:​11, 12; Baheb. 5:14 w23.12 24-25 ¶4-5

Batswadi ba ka ruta bana ba bona gore ba arabe bjang ka boleta ge batho ba bangwe ba hlasela ditumelo tša bona. (Jak. 3:13) Batswadi ba bangwe ba tlwaetša bana ba bona nakong ya borapedi bja lapa. Ba nagana ka dipotšišo tšeo bana ba bona ba ka di botšišwago sekolong. Ke moka ba boledišana le go dira pontšho ya gore ngwana a ka araba bjang, ba ba ba ruta le bana ba bona gore ba ka bolela bjang ka tsela e boleta le yeo e sa kgopišego. Go ipha nako ya go itlwaetša go ka thuša baswa ba Bakriste gore ba ikgodiše le go kgona go hlalosetša ba bangwe seo ba se dumelago. Dihlogo tšeo di lego ka tlase ga sehlogo seo se rego “Bafsa ba a Botšiša” go jw.org/nso, di na le matlakala a go itekola a baswa. Matlakala ao a diretšwe go thuša baswa gore ba tiiše ditumelo tša bona le go itokišeletša go araba ba bangwe ka mantšu a bona. Ge re ka ithuta dihlogo tše re le lapa, yo mongwe le yo mongwe wa rena a ka kgona go emela tumelo ya gagwe ka tsela e boleta le yeo e sa kgopišego. w23.09 17 ¶10; 18 ¶15-16

Na o kile wa ipeela pakane ya go dira selo se itšego ka mokgatlong wa Jehofa eupša wa palelwa ke go e fihlelela? Ge e ba go le bjalo, ga o tee. Ka mohlala, Philip o be a nyaka go rapela letšatši le lengwe le le lengwe eupša a sa hwetše nako ya go dira bjalo. Erika yena o be a nyaka go dula a swara nako ya go ba gona dibokeng le tšhemong eupša o be a no dula a latelwa. Ge e ba go na le selo se o nyakago go se fihlelela ka mokgatlong wa Jehofa, eupša o se wa hlwa o se fihlelela o se ke wa nyama. Le selo se senyenyane seo o nyakago go se fihlelela, gantši se hloka nako ya gore o šome ka thata. Taba ya gore o nyaka go fihlelela selo seo o nyakago go se dira e bontšha gore o tšeela godimo segwera sa gago le Jehofa le gore o nyaka go mo direla sohle seo o ka se kgonago. Jehofa o tšeela godimo maiteko a gago. Ke nnete gore Jehofa ga se a letela gore o dire dilo tšeo o ka se kgonego go di dira. (Ps. 103:14; Mika 6:8) Ge e ba o nyaka go fihlelela selo se itšego, lebelela ge e ba maemo a gago a go dumelela. w23.05 26 ¶1-2

Batho bao nago le sebete ba fela ba boifa, eupša ga ba dumelele poifo ya bona e ba thibela go dira dilo tšeo di lokilego. Daniele e be e le moswa yo a nago le sebete. O be a bala mangwalo a baporofeta ba Modimo, go akaretša le boporofeta bja Jeremia. Ka morago ga go ithuta, Daniele o ile a lemoga gore Bajuda ba be ba tlo lokollwa bokgobeng bja Babilona e se kgale. (Dan. 9:2) Ga go pelaelo gore Daniele o ile a tšwela pele a tshepa Jehofa ge a bona boporofeta bja Beibele bo phethagala, le gona bao ba botago Modimo ba ka kgona go ba le sebete. (Bapiša le Baroma 8:​31, 32, 37-39.) Sa bohlokwa le go feta, Daniele o be a rapela Tatagwe wa legodimong gantši. (Dan. 6:10) O be a ipobola dibe tša gagwe go Jehofa le go mmotša kamoo a ikwago ka gona. E bile a kgopela gore a mo thuše. (Dan. 9:​4, 5, 19) Daniele o be a swana le rena, ga se a belegwa a na le sebete. O ile a hlagolela seka seo ka go ithuta, ka go rapela le ka go bota Jehofa. w23.08 3 ¶4; 4 ¶7

Ge re ekwa balaodi ba bagolo re tlo holega ra ba ra hola le ba bangwe. Bjang? Ge re ekwa melao ya mmušo yeo e sa thulanego le ya Modimo, mmušo o ka se re otle. (Baroma 13:​1, 4) Ge e ba re ekwa balaodi ba bagolo, ba tlo bona gore Dihlatse tša Jehofa ke batho ba go loka. Ka mohlala, mengwaga e mentši e fetilego kua nageng ya Nigeria, mašole a ile a tsena ka Holong ya Mmušo ka nako ya diboka, ba nyaka batho bao ba bego ba gwantela gore go se ke gwa ntšhwa motšhelo. Moetapele wa bona o ile a ba botša gore ba sepele a re: “Dihlatse tša Jehofa di lefa motšhelo.” Ge e ba re dula re ekwa melao ya mmušo, re dira gore batho ba bone gore Dihlatse tša Jehofa ke batho ba go loka e bile seo se ka tla sa šireletša bana ba borena le dikgaetšedi ka letšatši le lengwe. w23.10 9 ¶13

Ke kgale bahlanka ba bangwe ba Jehofa ba letetše gore tshepedišo ye ya dilo e fele. Batho ba bangwe ba nagana gore go tšea nako gore dilo tšeo Jehofa a di tshepišitšego di direge. Eupša Jehofa o a tseba gore bahlanka ba gagwe ba ikwa bjang. Ge e le gabotse, o ile a kgonthišetša moporofeta Habakuku gore: “Pono e letetše lebaka la yona, e akgofetše bofelong gomme e ka se aketše. Gaešita le ge e ka diega, e letele; gobane e tla phethega e le ka kgonthe. E ka se diege!” (Habak. 2:3) Na seo Modimo a se boletšego se be se hola Habakuku feela? Goba na mantšu ao a a re hola lehono? Jehofa o ile a budulela moapostola Paulo gore a diriše mantšu a ge a be a kgothaletša Bakriste bao ba bego ba fela pelo ya gore lefase le lefsa le tle. (Baheb. 10:37) Le ge go ka bonagala eka dilo tšeo Modimo a re tshepišitšego tšona di a diega, re ka kgodišega gore di ‘tlo phethega e le ka kgonthe, di ka se diege!’ w23.04 30 ¶16

Baisiraele ba bantšhi ba ile ba gana bohlatse bjo bo lego molaleng bja gore Jehofa o diriša Moshe bjalo ka moemedi wa gagwe. (Num. 14:​10, 11) Ba ile ba gana ka makga mantšhi go dumela gore Jehofa o diriša Moshe go ba hlahla. Ka baka la seo, moloko woo wa Baisiraele o ile wa palelwa ke go tsena Nageng ya Kholofetšo. (Num. 14:30) Baisiraele ba bangwe ba ile ba latela tlhahlo ya Jehofa. Ka mohlala, Jehofa o ile a bolela gore: “Kalebe . . . o ntatetše ka botlalo.” (Num. 14:24) Modimo o ile a putsa Kalebe a ba a mo dumelela gore a kgethe naga yeo a e ratago kua Kanana. (Josh. 14:​12-14) Moloko wo o latelago wa Baisiraele o ile wa bea mohlala o mobotse wa go latela tlhahlo ya Jehofa. Ge Joshua a be a hlatlama Moshe bjalo ka moetapele wa Baisiraele, ba ile “ba mmoifa mehleng yohle ya bophelo bja gagwe.” (Josh. 4:14) Ka baka la se, Jehofa o ile a ba šegofatša ka go ba tsentšha nageng yeo a bego a ba holofeditše yona.—Josh. 21:​43, 44. w24.02 21 ¶6-7

Ge ngaka e re hlahloba gomme e bona ka tsela yeo madi a rena a sepelago ka yona, e ka tseba gore pelo ya rena e phetše bjang. Ka mo go swanago, re ka kgona go tseba gore re rata Modimo gakaakang ka go hlahloba tsela yeo re ratago batho ba bangwe ka yona. Ge e ba re ka lemoga gore tsela yeo re ratago badumedigotee le rena ka yona e a fokola, seo se ka bolela gore le tsela yeo re ratago Modimo ka yona e a fokola. Eupša ge e ba re bontšha badumedigotee le rena gore re a ba rata, seo se tla bontšha gore re tloga re rata Modimo go tšwa pelong. Ke ka baka la’ng re swanetše go tshwenyega ge e ba re ikwa re se sa rata bana babo rena le dikgaetšedi kudu? Ka lebaka la gore seo se tla bontšha gore segwera sa rena le Jehofa se a fokola. Moapostola Johane o hlalositše se gabotse ge a be a re: “Ge motho a palelwa ke go rata ngwanabo yo a mmonago, na a ka kgona go rata Modimo yo a sa kago a mmona?” (1 Joh. 4: 20) Re ithuta’ng go se? Jehofa o a thaba ge a bona re “ratana.”—1 Joh. 4:​7-9, 11. w23.11 8 ¶3; 9 ¶5-6

Ge Kgoši Jehoashe e be e sa le yo monyenyane, o ile a dira diphetho tše bohlale. Ka ge a be a se na tatagwe, o ile a gwerana le Moperisita yo a Phagamego e lego Jehoyada. Moperisita yoo o ile a hlahla Jehoashe ka ge eka ke morwa wa gagwe. Ka ge Jehoashe a be a theetša Jehoyada, o ile a hlankela Jehofa, a ba a thuša le batho ba bangwe gore ba mo hlankele. Jehoashe o ile a ba a rulaganya gore tempele ya Jehofa e lokišwe. (2 Dikor. 24:​1, 2, 4, 13, 14) Ge e ba batswadi ba gago ba go ruta go rata Jehofa le go phela ka ditekanyetšo tša gagwe, gona ba go nea mpho e botse kudu. (Die. 2:​1, 10-12) Batswadi ba gago ba ka go tlwaetša ka ditsela tše dintši. Ge o diriša melao ya Beibele o tlo thabiša batswadi ba gago. Sa bohlokwa le go feta, o tlo thabiša Jehofa le go ba le segwera se sebotse le yena. (Die. 22:6; 23:​15, 24) A ke mabaka a mabotse a gore o ekiše Jehoashe ge e be e sa le yo monyenyane. w23.09 8-9 ¶3-5

Jehofa o re holofetša gore o tlo theetša dithapelo tša rena. Modimo wa rena o a re rata ka gobane re mo hlankela ka go botega, le gona o tlo dula a theetša dithapelo tša rena. (Ps. 10:17; 37:28) Eupša seo ga se bolele gore o tla re nea dilo ka moka tšeo re di kgopelago. Re ka swanelwa ke go letela lefase le leswa pele re ka hwetša tše dingwe tša dilo tšeo re di rapeletšego. Jehofa o nagana ka morero wa gagwe ge a theetša dithapelo tša rena. (Jes. 55:​8, 9) O mongwe wa merero ya gagwe ke go tlatša lefase ka banna le basadi bao ba thabelago go bušwa ke yena. Eupša Sathane o bolela gore batho ba ka kgona go ipuša. (Gen. 3:​1-5) Jehofa o dumeletše batho gore ba ipuše e le go hlatsela gore seo Diabolo a se boletšego ke maaka a matala. Pušo ya batho ke yona e bakilego mathata a mantšhi ao re a bonago lehono. (Mmo. 8:9) Re a kwešiša gore Jehofa a ka se tloše mathata a ka moka gona bjale. w23.11 21 ¶4-5

Jehofa o ile a tshepiša Aborahama gore “ditšhaba tše dintši” di be di tla šegofatšwa ka yena. Eupša ge Aborahama a be a na le mengwaga e 100 gomme Sara a na le e 90, ba be ba se ba tšwa ba e ba le morwa. Go ya le ka pono ya batho, go be go sa kgonege gore Aborahama le Sara ba be le morwa. Aborahama o be a swanetše go ba le tumelo e tiilego kudu. Eupša “motheong wa kholofelo o ile a ba le tumelo, gore e tla ba tatago ditšhaba tše dintši.” (Baroma 4:​18, 19) Mafelelong, seo Aborahama a bego a se holofeditšwe, se ile sa phethagala. O ile a ba tatago Isaka, e lego morwa yo e bego e le kgale a mo letetše. (Baroma 4:​20-22). Re ka amogelwa ke Modimo, ra lebelelwa re le ba lokilego, ra ba ra ba bagwera ba gagwe, go swana le Aborahama. Ge e le gabotse, Paulo o ile a gatelela seo ge a be a ngwala gore: “Mantšu a gore ‘o ile a balelwa seo, a be a se a ngwalelwa yena feela [Aborahama], eupša a be a ngwaletšwe le rena bao re reretšwego go balelwa seo, gobane re dumela go yena yo a tsošitšego Jesu.” (Baroma 4:​23, 24) Go swana le Aborahama, re swanetše go ba le tumelo go Jehofa, re dire dilo tšeo di lokilego e bile re be le kholofelo. w23.12 7 ¶16-17

Ge o ka kopana le bothata bjo bo dirago gore o tšhoge, gopola gore Jehofa o kwešiša gabotse bothata bjoo le gore bothata bjoo bo dira gore o ikwe bjang. Ka mohlala, Jehofa o be a sa bone feela gore Baisiraele ba a tlaišega kua Egepeta eupša o be a “tseba mahloko a bona gabotse”.(Ek. 3:7) O ka ipotšiša kamoo Jehofa a go thekgago ka gona ge o lebeletšane le boemo bjo bo tšhošago. Ka gona mo kgopele gore a go bontšhe tsela yeo a go thušago ka yona. (2 Dikg. 6:​15-17) Ke moka o ipotšiše ge e ba o ile a wa tiišwa ke polelo goba karabo yeo o e kwelego dibokeng. Na dikgatišo goba dibidio le dikoša di ile tša go kgothatša? Na go na le motho yo a ilego a go botša ka temana ya Beibele yeo e go kgodišago? Re ka tšeela fase lerato la rena la borwarre le dijo tša moya tšeo re di hwetšago mola e le gore ke dimpho tše dibotse tšeo re di hwetšago go Jehofa. (Jes. 65:13; Mar. 10:​29, 30) Di bontšha gore Jehofa o tloga a na le taba le wena. (Jes. 49:​14-16) Le gore o swanelwa ke gore o mo tshepe. w24.01 4-5 ¶9-10

Pele ga ge Jesu a eya legodimong o ile a gopotša barutiwa ba gagwe kabelo ya bona ya go nea bohlatse ka leina la gagwe “Jerusalema, Judea ka moka le Samaria le go fihla karolong ya kgole ya lefase.” (Dit. 1:8; Luka 24:​46-48) Ka moragonyana baetapele ba Bajuda ba ile ba golega moapostola Petro le Johane ke moka ba ba tliša pele ga kgoro ya tsheko ya Sanhedrine, ba nyaka gore banna bao ba botegago ba tlogele go nea bohlatse e bile ba ba tšhošetša. (Dit. 4:​18, 21) Petro le Johane ba ile ba arabela ka go re: “Ge e ba go lokile mahlong a Modimo go theetša lena go e na le Modimo, ikahloleleng. Eupša ge e le rena re ka se ke ra tlogela go bolela ka dilo tše re di bonego le tše re di kwelego.” (Dit. 4:​19, 20) Ge Petro le Johane ba be ba lokollwa, barutiwa ba bangwe ba ile ba rapela Jehofa gore a ba fe matla a go dira thato ya gagwe. Jehofa o ile a araba thapelo yeo e tšwago pelong.—Dit. 4:31. w23.05 5 ¶11-12

Jehofa le Jesu ba na le mengwaga e diketekete ba ratana. Ga go na tswalano le ge e le efe legodimong goba mo lefaseng yeo e fetago ya bona. Ge re bala temana ya lehono, re bona kamoo Jehofa a ilego a bontšha ka gona gore o rata Jesu. Jehofa nkabe a ile a no re, ‘yo ke yena ke kgahlwago ke yena.’ Eupša Jehofa o be a nyaka re tseba gore o rata Jesu gakaakang, ka gona o itše, “Yo ke Morwa wa ka yo a rategago.” Jehofa o be a ikgantšha ka Jesu e bile a leboga seo Jesu a bego a tla se dira. (Baef. 1:7) Jesu le yena o be a tloga a kgodišegile gore Tatagwe o tloga a mo rata. Ruri ga se a ka a belaela ka seo. O ile a bolela ka makga a mantšhi a kgodišegile kamoo Jehofa a mo ratago ka gona.—Joh. 3:35; 10:17; 17:24. w24.01 28 ¶8

A re re motho yo o mo ratago o bolela gampe ka wena. O a tseba gore dilo tšeo a di bolelago ga se nnete, eupša batho ba bangwe ba a mo tshepa. Sa go nyamiša kudu ke gore batho bao le bona ba botša ba bangwe maaka ao gomme le bona ba a a tshepa. O tlo ikwa bjang? Maaka ao ba tlago go a bolela ka wena a tlo go nyamiša kudu. Boemo bjo bo ka re thuša go kwešiša kamoo Jehofa a ilego a ikwa ka gona ge leina la gagwe le lebotse le be le senywa. Yo mongwe wa barwa ba gagwe ba moya o ile a bolela maaka ka yena go mosadi wa mathomo e lego Efa. Efa o ile a tshepa maaka ao. Maaka ao ile a dira gore batswadi ba rena ba mathomo ba rabele kgahlanong le Jehofa. Ka baka la se, batho ba ile ba thoma go dira dibe le go hwa. (Gen. 3:​1-6; Baroma 5:12) Mathata ka moka ao a lego gona mo lefaseng, e lego mahu, dintwa le go tlaišega, a bile gona ka baka la maaka ao Sathane a a phatlaladitšego. Na Jehofa o kwa bohloko ka baka la maaka ao le mafelelo a ona? Ga go pelaelo gore a mo kweša bohloko. Le ga go le bjalo, Jehofa ga se a galefa goba go boloka sekgopi. Go ena le moo, ke “Modimo yo a thabilego.”—1 Tim. 1:11. w24.02 8 ¶1-2

O ka ekiša bjang Josefa? O ka kgetha gona bjale gore o tlo dira eng ge teko e tšwelela. Ithute go gana ka pela dilo tšeo Jehofa a di hloilego e bile o se ke wa nagana le ka tšona. (Ps. 97:10; 119:165) Ge o ka dira bjalo, le ge o ka lekega go dira sebe, o ka se se dire. Go ka direga gore o a tseba gore o hweditše therešo le gore o nyaka go hlankela Jehofa ka pelo ya gago ka moka, eupša go na le selo seo se dirago gore o dikadike go ineela le go kolobetšwa. O ka ekiša mohlala wa Kgoši Dafida gomme wa kgopela Jehofa ka gore: “Mphetleke o tsebe pelo ya ka, hle Modimo. Ntlhahlobe gomme o tsebe dikgopolo tša ka tšeo di ntshwenyago. Bona ge e ba go na le selo le ge e le sefe se sebe go nna, gomme o ntlhahle tseleng yeo e se nago mo e gomago gona.” (Ps. 139:​23, 24) Jehofa o šegofatša “bao ba mo tsomago ka phišego.” Ge o dutše o šomela pakane ya gago ya go ineela go yena le go kolobetšwa, o mmontšha gore o dira sona seo.—Baheb. 11:6. w24.03 6 ¶13-15

Moperisita yo a phagamego o be a emela batho pele ga Modimo. Jehofa o ile a kgetha Arone gore e be moperisita wa mathomo yo a phagamego ge taberenakele e be e neelwa. Eupša moapostola Paulo o ile a hlalosa gore, “ba bantši ba ile ba swanelwa ke go ba baperisita ka go hlatlamana ka baka la ge lehu le ile la ba thibela gore ba tšwele pele ba le bjalo.” (Baheb. 7:​23-26) Ka ge baperisita bao ba phagamego ba be ba sa phethagala, ba ile ba swanelwa ke go neela dihlabelo bakeng sa dibe tša bona. Se se bontšha phapano e kgolo magareng ga baperisita ba phagamego ba Isiraele le moperisita yo mogolo yo a phagamego e lego Jesu Kriste. Ka ge e le moperisita wa rena yo a phagamego, Jesu Kriste “ke mohlanka. . . wa tenteng ya therešo yeo Jehofa a e hlomilego, e sego batho.” (Baheb. 8:​1, 2) Paulo o hlalositše gore “[Jesu] ka baka la go tšwela pele a phela ka mo go sa felego, boperisita bja gagwe ga bo na bahlatlami.” Paulo o tšwela pele ka gore, ka ge Jesu e le “yo a sa šilafalago, yo a sa swanego le badiradibe” e bile a fapana le baperisita ba phagamego ba Isiraele, “ga go nyakege gore letšatši le letšatši a dire dihlabelo” bakeng sa dibe tša gagwe. w23.10 26 ¶8-9

“Legodimo la pele” le šupa go mebušo ya dipolotiki yeo e tutuetšwago ke Sathane le batemona ba gagwe. (Mat. 4:​8, 9; 1 Joh. 5:19) Lentšu “lefase” ge le dirišwa ka Beibeleng, le ka šupa go batho bao ba dulago mo lefaseng. (Gen. 11:1; Ps. 96:1) Ka gona polelwana “lefase la pele” e šupa go batho ba kgopo bao ba phelago mo lefaseng lehono. Jehofa a ka se no kaonefatša legodimo le lefase, go e na le moo o tlo di tloša ka mo go feletšego. Ke moka o tlo tliša legodimo le leswa le lefase le leswa e lego Mmušo wa gagwe wo o tla bego o buša batho bao ba lokilego. Jehofa o tlo dira gore lefase e be le leswa, a ba a dira gore batho ba phethagale. Jehofa o tlo dira gore lefase ka moka e be lefelo le lebotse go swana le serapa sa Edene. Le rena Jehofa o tlo re dira batho ba baswa ka go re fodiša ka mo go feletšego. Batho bao ba golofetšego, bao ba sa bonego le bao ba sa kwego ba tlo fodišwa gomme bahu ba tsošwa.—Jes. 25:8; 35:​1-7. w23.11 4 ¶9-10

“Masetlapelo a magolo” a tlo thoma ka ponyo ya leihlo. (Mat. 24:21) Eupša masetlapelo a magolo a fapana le dikotsi tše dingwe ka gobane re a tseba gore a etla. Mengwaga e ka bago e 2 000 e fetilego, Jesu o ile a lemoša balatedi ba gagwe gore ba itokišeletše letšatši leo. Ge e ba re itokišitše, go tlo ba bonolo gore re kgone go kgotlelela dinako tšeo tše thata, le go thuša batho ba bangwe gore le bona ba kgone go kgotlelela. (Luka 21:36) Re tlo swanelwa ke go ba le kgotlelelo gore re kwe Jehofa, re tshepa gore o tla re šireletša. Re tlo dira’ng ge e ba bana babo rena le dikgaetšedi ba lahlegelwa ke dilo tša bona? (Habak. 3:​17, 18) Re tlo hloka go ba le kwelobohloko e le gore re kgone go ba thuša ka dilo tšeo ba di hlokago. Re tlo arabela bjang ge e ba re hlaselwa ke ditšhaba tšeo di ipopilego ngatana e tee, ke moka ra swanelwa ke go dula le bana babo rena le dikgaetšedi lefelong le tee ka nakwana? (Hesek. 38:​10-12) Re tlo hloka go ba le lerato leo le tseneletšego gore re kgone go thušana go kgotlelela nakong yeo e thata. w23.07 2 ¶2-3

Banyalani ba ka ithuta mohlaleng wa Aquila le Priscilla, e lego banyalani bao ba bego ba ratwa ke Bakriste ba lekgolong la pele la mengwaga. (Baroma 16:​3, 4) Ba be ba šoma, ba bolela ditaba tše dibotse e bile ba thuša batho ba bangwe ba le mmogo. (Dit. 18:​2, 3, 24-26) Ge e le gabotse, nako le nako ge Beibele e bolela ka Aquila le Priscilla, e bolela ka bona ba le mmogo. Banyalani ba ka ba ekiša bjang? Nagana ka dilo tše dintši tšeo wena le molekane wa gago le swanetšego go di dira. Na le ka leka go dira e mengwe ya mešomo e itšego mmogo go e na le go e dira le le noši? Ka mohlala, Aquila le Priscilla ba be ba bolela ditaba tše dibotse ba le mmogo. Na le lena le ka rulaganya go dira seo se swanago? Le gona Aquila le Priscilla ba be ba šoma gotee. Le ge wena le molekane wa gago le sa šome mošomo o swanago wa boiphedišo, le ka dira mešomo ya ka gae le le mmogo. (Mmo. 4:9) Ge wena le molekane wa gago le šoma gotee, le tlo kgona go ba ngatana e tee gomme la hwetša le sebaka sa go boledišana. w23.05 22-23 ¶10-12

Motho yo mongwe le yo mongwe o fela a ikwa a boifa. Ka mohlala, ge Kgoši Saulo a be a mo rakediša e bile a nyaka go mmolaya, Dafida o ile a tšhabela nageng ya Bafilisita kua Gathe. Ka moragonyana, Akishe kgoši ya Gathe o ile a kwa gore Dafida e be e le lešole le matla leo le ilego la binelwa ka gobane o be a bolaile Bafilisita ba “dikete tše masome.” Dafida o ile “a boifa kudu.” (1 Sam. 21:​10-12) O be a tshwenyegile ka seo Akishe a bego a ka mo dira sona. Dafida o ile a fenya bjang letšhogo leo a bego a na le lona? Go Psalme 56, Dafida o bolela kamoo a bego a ikwa ka gona ge a be a le Gathe. Psalme yeo e bolela kamoo Dafida a bego a tšhogile ka gona e bile e bolela le gore Dafida o ile a kgona bjang go fenya letšhogo leo. Ge Dafida a be a ikwa a tšhogile o ile a tshepa Jehofa. (Ps 56:​1-3, 11.) Dafida o be a na le mabaka a mabotse a go tshepa Jehofa. Jehofa o ile a thuša Dafida go hwetša tsela yeo e sa tlwaelegago eupša yeo e ilego ya mo thuša gore a phologe: O ile a itira segaswi! Akishe o ile a thoma go tenwa ke Dafida gomme a se sa hlwa a mo lebelela e le motho yo kotsi gomme seo se ile sa thuša Dafida gore a kgone go phologa.—1 Sam. 21:13–22:1. w24.01 2 ¶1-3

Ke bomang bao go bolelwago ka bona temaneng ya lehono? Ke batlotšwa bao ba tsošitšwego! Ge batlotšwa ba mafelelo ba išwa legodimong pele masetlapelo a magolo a fela, e nngwe ya dikabelo tša bona tša mathomo e tlo ba go lwa. Ka morago ga gore ba tsošetšwe legodimong, ba tla thekga Kriste le barongwa ba gagwe ba bakgethwa gomme ba lwa ntwa ya mafelelo kgahlanong le manaba a Modimo. Nagana ka se, gona bjale batlotšwa ba bangwe bao ba lego mo lefaseng ba tšofetše e bile ba a fokola. Eupša ka morago ga gore ba tsošetšwe legodimong ba tlo ba le matla e bile e le dibopiwa tša moya, gomme ba thuša Kgoši ya Mohlabani e lego Jesu Kriste ntweng. Ka morago ga ntwa ya Haramagedone ba tlo šoma gotee le Jesu Kriste ge a tla be a thuša batho gore ba phethagale. Re kgodišegile gore ge ba tla be ba le legodimong, ba tlo direla bana babo bona le dikgaetšedi dilo tše dibotse go feta tšeo ba ba diretšego tšona ge e be e le batho bao ba sa phethagalago! w24.02 6-7 ¶15-16

Batho ba bangwe bao ba itokišeditšego go ineela le go kolobetšwa, ba a dikadika. Ba ka ba ba ipotšiša gore, ‘Go tlo direga’ng ge ka morago nka dira sebe se segolo gomme ka kgaolwa?’ Ge e ba o tšhoga, kgodišega gore Jehofa o tlo go nea dilo ka moka tše o di hlokago ‘gore o sepele ka mo go swanetšego le gore o mo kgahliše ka mo go tletšego.’ (Bakol. 1:10) O tlo boela a go nea le matla a go dira seo se lokilego. O bontšhitše gore o tlo go thuša ka gobane o šetše a thušitše batho ba bantšhi go dira se se lokilego. (1 Bakor. 10:13) Ke ka baka leo go bago le batho ba mmalwa bao ba kgaolwago ka phuthegong. Jehofa o thuša batho ba gagwe gore ba dule ba botega. Motho yo mongwe le yo mongwe yo a sa phethagalago, o lekega go dira dilo tše mpe. (Jak. 1:14) Le ga go le bjalo, ke wena o tla kgethago ge e ba o tla dira dilo tšeo tše mpe goba o ka se di dire. Ge e le gabotse, ke wena o laolago tsela yeo o tlago go phela ka yona. Batho ba bangwe ba bolela maaka a gore re ka se kgone go laola tsela yeo re phelago ka yona le dilo tšeo re di dirago. w24.03 5 ¶11-12