June

Jehofa o ile a šegofatša Bakriste ba lekgolong la pele la mengwaga ge ba dutše ba tlwaelana le maemo ao a bego a fetoga. Ba be ba tlaišwa gantši, ka dinako tše dingwe ba sa letela. Nagana ka seo se ilego sa diragalela Baranaba le moapostola Paulo ge ba be ba bolela ditaba tše dibotse kua Lisitara. Mathomong bao ba bego ba ba theeditše ba ile ba ba amogela ka lerato. Ka morago, baganetši ba ile ba “hlohleletša mašaba” gomme ba kgatla Paulo ka maswika ke moka ba mo tlogela ba nagana gore o hwile. (Dit. 14:19) Eupša Paulo le Baranaba ba ile ba tšwela pele ka go bolela ditaba tše dibotse lefelong le lengwe. Go bile le mafelelo afe? Ba ile ba dira “barutiwa ba bantši,” gomme badumedigotee le bona ba ile ba tiišwa ke mantšu a bona gotee le mohlala wa bona. (Dit. 14:​21, 22) Batho ba bantši ba ile ba holega ka ge Paulo le Baranaba ba sa ka ba fela matla ge ba be ba tlaišwa. Ge e ba re sa fele matla mošomong wo Jehofa re neilego ona, o tlo re šegofatša. w23.04 16-17 ¶13-14

Kgoši Dafida o ile a ba le manaba a mantši bophelong bja gagwe, ka gona o be a kgodišegile gore ge a rapela, Jehofa o tla mo theetša gomme a mo thuša. Dafida o be a kgodišegile gore Jehofa o kwele dithapelo tša gagwe le go di araba. Le rena re ka ba le kgodišego yeo e swanago le ya gagwe. Beibele e re kgonthišetša gore Jehofa a ka re nea bohlale le matla ao re a hlokago gore re kgone go kgotlelela. A ka re thuša a diriša bana babo rena le dikgaetšedi goba batho bao ba sa mo hlankelego. Le ge Jehofa a ka no se arabe dithapelo tša rena ka tsela yeo re letetšego ka yona, eupša re a tseba gore o tlo di araba. O tlo re nea seo re se hlokago ka nako ya maleba. Ka gona tšwela pele o rapela o kgodišegile gore Jehofa o tlo araba thapelo ya gago e bile o tlo go hlokomela gona bjale. Le gona, o tla “kgotsofatša kganyogo ya sephedi se sengwe le se sengwe” lefaseng le lefsa nakong e tlago.—Ps. 145:16. w23.05 8 ¶4; 13 ¶17-18

Go bohlokwa gore re naganišiše ka ditšhegofatšo tšeo re bago le tšona ge re fihlelela dilo tšeo re nyakago go di dira. Ke ditšhegofatšo dife tšeo o swanetšego go nagana ka tšona? Ge e ba o ipeetše pakane ya go kaonefatša tsela yeo o ithutago Beibele ka yona goba yeo o rapelago ka yona, nagana kamoo seo se tlago go tiiša segwera sa gago le Jehofa ka gona. (Ps. 145:​18, 19) Ge e ba pakane ya gago e le go kaonefatša seka se itšego sa Bokriste, nagana kamoo seo se tlago go go thuša gore o kaonefatše segwera sa gago le ba bangwe. (Bakol. 3:14) Ngwala mabaka ao a dirago gore o nyake go fihlelela dilo tšeo o nyakago go di dira. Dula o lebelela dilo tšeo o di ngwadilego. Le gona, fetša nako le batho bao ba go kgothatšago. (Die. 13:20) Ke nnete gore ka dinako tše dingwe ka moka ga rena re ikwa re se na matla. Na seo se ra gore ga se ra swanela go šoma ka thata gore re fihlelele seo re nyakago go se dira? Re ka šoma ka thata go fihlelela selo seo re nyakago go se dira, le ge ka dinako tše dingwe re se na matla a go dira bjalo. Le ge go ka no se be bonolo go dira bjalo, eupša o tlo thaba ge o fihlelela pakane ya gago. w23.05 27-28 ¶5-8

Go tseba gore re ikarabelela ka diphetho tša rena go ka re dira gore re ipobole dibe tša rena, re lokiše diphošo tša rena e bile re pheme go di bušeletša. Go gata megato yeo go ka re thuša gore re dule re kitima lebelo le la bophelo. Ge e ba o ka se kgone go fetoša phetho e mpe yeo o e dirilego, amogela boemo bja gago. O se ke wa itshenyetša nako ka go bona ba bangwe molato goba go ipona molato. Go e na le moo amogela diphetho tšeo o di dirilego ke moka o tšwele pele ka bophelo. Ge e ba o lewa ke letswalo ka baka la phetho e mpe yeo o e dirilego, ikokobetše gomme o rapele Jehofa o amogele phošo ya gago le go mo kgopela gore a go lebalele. (Ps. 25:11; 51:​3, 4) Kgopela bao o ba fošeditšego tshwarelo, ge e ba go kgonega, kgopela le bagolo gore ba go thuše. (Jak. 5:​14, 15) Ithute diphošong tša gago gomme o leke go phema go di bušeletša. Ge o dira bjalo o ka kgodišega gore Jehofa o tlo go gaugela le go go nea thekgo yeo o tlogago o e hloka.—Ps. 103:​8-13. w23.08 28-29 ¶8-9

Kgoši Jehoyada o ile a thuša kgoši Jehoashe gore e be motho yo mokaone. Seo se ile sa thuša Jehoashe gore a nyake go thabiša Jehofa nakong ya ge e be e sa le mofsa. Eupša ka morago ga gore Jehoyada a hwe, Jehoashe o ile a thoma go theetša dikgošana tša bahlanogi. (2 Dikor. 24:​4, 17, 18) Ka ge Jehofa a be a kwele bohloko, o ile “a romela baporofeta mo gare ga bona gore ba ba bušetše go yena . . . , eupša ba se theetše.” Ga se ba ka ba theetša le Sakaria morwa wa Jehoyada, yoo e bego e le moporofeta le moperisita, e bile e le motswala wa Jehoashe. Kgoši Jehoashe o ile a laela gore Sakaria a bolawe. (2 Dikor. 22:11; 24:​19-22) Jehoashe ga se a ka a dula a boifa Jehofa. Jehofa o be a kile a bolela gore: “Bao ba nnyatšago ba tla nyatšega.” (1 Sam. 2:30) Ka morago, madira a manyenyane a Basiria a ile a fenya “madira a mantši kudu” a Jehoashe. (2 Dikor. 24:​24, 25) Bahlanka ba Jehoashe ba ile ba mmolaya ka ge a ile a bolaya Sakaria. w23.06 18-19 ¶16-17

Moapostola Paulo a ka ba a ile a fetša nakonyana a le Efeso a bolela le go ruta ditaba tše dibotse. (Dit. 19:​1, 8-10; 20:​20, 21) O be a rata bana babo kudu e bile a nyaka go ba thuša gore ba dule ba botegela Jehofa. Baefeso bao Paulo a ba ngwaletšego lengwalo pele e ka ba Bakriste, ba thomile ba le bodumeding bja maaka e bile ba dumela go maleatlana. Batho ba Efeso ba be ba tsebja ka boitshwaro bjo bobe e bile ba se na dihlong ka seo ba se dirago. Dipolelo tše di sa hlwekago di be di kwewa moo go kgobokanego batho, mafelong a boithabišo le menyanyeng ya bodumedi. (Baef. 5:3) Batho ba bantšhi ba Efeso ba be ba se “sa lešwa dihlong ke boitshwaro bja bona bjo bobe” e lego polelwana yeo e bolelago gore ba be ba retetše dipelong tša bona. (Baef. 4:​17-19) Pele Baefeso ba ka ithuta se se lokilego le se se fošagetšego, ba be ba sa tshwenywe ke matswalo a bona ge ba dira se se fošagetšego. Paulo o ba hlalositše gore “ba leswiswing e bile ba ka se hwetše bophelo bjo Modimo a re tshepišitšego bjona.” Baefeso ba bangwe ba ile ba tloga leswiswing. w24.03 20 ¶2, 4; 21 ¶5-6

Gideone o be a swanetše go šoma ka thata gore a hlankele e le moahlodi. Ge Bamidiane ba be ba tšhaba ntweng gare ga bošego, Gideone o ile a ba rakediša go tloga moeding wa Jeseriele go fihla nokeng ya Jorodane. (Baa. 7:22) Na Gideone o ile a ema nokeng ya Jorodane? Aowa! Le ge yena le banna ba 300 bao a bego a sepela le bona ba be ba lapile, ba ile ba tshela noka yeo gomme ba tšwela pele ka go kitimiša manaba a bona. Mafelelong ba ile ba swara Bamidiane gomme ba ba fenya. (Baa. 8:​4-12) Gideone o be a tshepa gore Jehofa o tlo mo fa matla le gona ga se a ka a mo nyamiša. (Baa. 6:​14, 34) Ka nako e nngwe, Gideone le banna bao a bego a sepela le bona, ba be ba rakediša dikgoši tše pedi tša Bamidiane ka maoto. Go ka direga gore dikgoši tšeo di be di nametše dikamela. (Baa. 8:​12, 21) Eupša Jehofa o ile a ba thuša gore ba fenye. Bagolo le bona ba ka ithekga ka Jehofa, yo a sa lapego goba go ‘felelwa ke matla.’ O tlo ba nea matla ge ba a hloka.—Jes. 40:​28, 29. w23.06 6 ¶14, 16

Re ka ba le pelo e tiilego go sa šetšwe mathata ao re kopanago le ona. Ka gona, tshepa Jehofa. Nagana kamoo Baraka a ilego a atlega ka gona ka baka la go tshepa tlhahlo ya Jehofa. Le ge Baisiraele ba be ba sa itokišetša ntwa e bile ba se na dibetša, Jehofa o ile a laela Baraka gore a ye go lwa le moetapele wa madira a Bakanana e lego Sisera yo a bego a itlhamile kudu e bile a na le dibetša tše dintši. (Baa. 5:8) Moporofeta wa mosadi e lego Debora o ile a botša Baraka gore a theogele kua tlase go yo lwa le Sisera le madira a gagwe ao a bego a sepela ka dikoloi tše 900 tša ntwa. Le ge madira a Sisera a be a sepela ka dikoloi tša ntwa tšeo di bego di ka dira gore a fenye gabonolo, eupša Baraka o ile a no theetša tlhahlo. Ge madira a dutše a theoga thabeng ya Thabora, Jehofa o ile a neša pula e matla. Dikoloi tša Sisera tša ntwa di ile tša tanywa lerageng gomme Jehofa a dira gore Baraka a fenye ntwa yeo. (Baa. 4:​1-7, 10, 13-16) Ka mo go swanago, Jehofa o tlo dira gore re fenye ge eba re ka mo tshepa gomme ra diriša tlhahlo yeo a re neago yona a diriša mokgatlo wa gagwe. w23.07 19 ¶17-18

Re swanetše go ba le seka sa go se fele pelo gore re tle re kgone go phologa. Go swana le bahlanka ba botegago ba Jehofa ba nakong e fetilego, re swanetše go leta ka go se fele pelo go bona ditshepišo tša Modimo di phethagala. (Baheb. 6:​11, 12) Beibele e re swantšha le molemi. (Jak. 5:​7, 8) Molemi o šoma ka thata go bjala le go nošetša dibjalo tša gagwe le ge a sa tsebe gore di tlo gola neng. Gomme ka morago molemi o leta ka go se fele pelo a tseba gore ka letšatši le lengwe o tlo buna. Ka mo go swanago, le rena re swarega ka go dira dilo tša Modimo le ge “re sa tsebe gore Morena [wa rena] o tla neng.” (Mat. 24:42) Re leta ka go se fele pelo re tseba gore Jehofa o tlo phethagatša dilo tšeo a di tshepišitšego ka nako ya maleba. Ge e ba re fela pelo, re ka lapa go leta gomme ra tlogela go hlankela Jehofa. Re ka thoma le go kitimiša le dilo tšeo di ka re thabišago gona bjale feela. Eupša ge e ba re ka se fele pelo, re ka kgona go leta go fihla bofelong gomme ra phološwa.—Mika. 7:7. w23.08 22 ¶7

Ge re bapetša boporofeta bjo bo lego go Daniele 2:​41-43 le boporofeta bjo bongwe bjo bo lego ka Pukung ya Kutollo, re ka phetha ka gore maoto ao a emela mmušo wa Maisemane le Maamerika wo o bušago lefase ka moka lehono. Ge Daniele a bolela ka mmušo woo o re: “Karolo e nngwe ya mmušo woo e tla ba e tiilego gomme e nngwe ya ba e fokolago.” Ke ka baka la’ng karolo e nngwe e le e fokolago? Ka gobane batho ba tlwaelegilego bao ba swantšhetšwago ke letsopa, ba fokodiša bokgoni bja wona bja go buša ka matla a swanago le a tšhipi. Re ithuta ditherešo tše bohlokwa go seswantšho seo Daniele a se hlalositšego. Sa pele, mmušo wa Maisemane le Maamerika o bontšhitše gore o na le matla ka tsela e itšego. Ka mohlala, o ile wa fenya Ntwa ya Pele le ya Bobedi ya Lefase. Eupša mmušo woo o fetšwa matla ke dilo tšeo di diregago dinageng tša gabo wona, e lego dintwa tšeo di lego magareng ga badudi le mmušo. Sa bobedi, mmušo wa Maisemane le Maamerika e tlo ba wa mafelelo wa go buša lefase pele Mmušo wa Modimo o fediša mebušo ka moka ya batho. w23.08 10-11 ¶12-13

Dafida o be a fela a ikwa a gateletšegile ka baka la mathata ao a bego a mo wela. (Ps. 18:​4, 5) Eupša o be a lapološwa ke tsela yeo Jehofa a bego a mo hlokomela le go mo rata ka yona. Jehofa o be a iša mogwera wa gagwe yo a lapilego “mafulong a matala” le “mafelong a go ikhutša ao a nago le meetse a mantšhi.” Ka baka la seo, Dafida o ile a ba le matla gomme a kgona go tšwela pele a hlankela Jehofa ka lethabo. (Ps. 18:​28-32; 23:2) Ka mo go swanago, “ke ka baka la ditiro tša botho bja Jehofa ge re sa fedišwa” lehono, e bile re kgona go lebeletšana le mathata ao re kopanago le ona. (Dillo 3:22; Bakol. 1:11) Bophelo bja Dafida bo be bo fela bo e ba kotsing, le gona o be a na le manaba a mantšhi a matla. Eupša tsela yeo Jehofa a bego a mo rata ka yona e be e dira gore a ikwe a šireletšegile. Dafida o be a tseba gore Jehofa o dula a na le yena gomme seo se be se dira gore a ikwe a bolokegile. Ke ka fao a ilego a opela ka gore: “[Jehofa o] nntšha dilong ka moka tšeo di mpoifišago.” (Ps. 34:4) Dafida o be a boifa e le ka kgonthe, eupša lerato la Jehofa le be le feta dipoifo tša gagwe. w24.01 30 ¶15-17

Ithute go diphetho tše mpe tšeo Jehoashe a di dirilego. Ka morago ga gore Moperisita yo a Phagamego Jehoyada a hlokofale, Jehoashe o ile a kgetha bagwera ba babe. (2 Dikor. 24:​17, 18) O ile a kgetha go theetša dikgošana tša Juda tšeo di bego di sa rate Jehofa. Le wena o ka dumela gore Jehoashe nkabe a ile a phema go gwerana le batho bao ba babe. Eupša o ile a kgetha go theetša dikeletšo tšeo ba bego ba mo nea tšona. Ge e le gabotse, ge motswala wa gagwe e lego Sakaria a be a mo eletša, Jehoashe o ile a dira gore a bolawe. (2 Dikor. 24:​20, 21; Mat. 23:35) Yeo e tloga e bile phetho e mpe le ya bošilo! Jehoashe o thomile a dira dilo gabotse, eupša sa go nyamiša ke gore ka morago o ile a fetoga mohlanogi le mmolai. Mafelelong bahlanka ba gagwe ba ile ba mmolaya. (2 Dikor. 24:​22-25) Dilo nkabe di ile tša mo sepelela gabotse ge nkabe a ile a tšwela pele a theetša Jehofa le go theetša bao ba mo ratago! w23.09 9 ¶6

Jesu o be a tseba gore moapostola Petro a ka kgona go dula a botega. Ka botho, Jesu o ile a botša Petro gore a ‘tlogele go boifa.’ Petro o ile a holega kudu ka gobane Jesu o be a mo tshepa. Ka morago Petro le ngwanabo e lego Andrea ba ile ba tlogela kgwebo ya bona ya go rea dihlapi gomme ba ba balatedi ba Mesia e lego phetho yeo e ilego ya dira gore ba be le ditšhegofatšo tše di kgahlišago. (Mar. 1:​16-18) Ge Petro e be e le molatedi wa Jesu, o ile a bona dilo tše dintši tše di kgahlišago. O bone ge Jesu a be a fodiša balwetši, a leleka batemona, le ge a be a tsoša le bahu. (Mat. 8:​14-17; Mar. 5:​37, 41, 42) Le gona Petro o ile a bona pono ya ge Jesu e le Kgoši ya Mmušo wa Modimo, e lego selo seo a bego a ka se tsoge a se lebetše. (Mar. 9:​1-8; 2 Pet. 1:​16-18) Ge nkabe Petro e be e se molatedi wa Jesu, o be a ka se bone dilo tšeo a di bonego. O swanetše goba a ile a thabišwa ke gore ga se a dumelela mafokodi a gagwe a dira gore a se ke a thabela ditšhegofatšo tšeo! w23.09 21 ¶4-5

Lengwalong la mathomo leo moapostola Petro a ilego a le ngwala, o dirišitše polelwana, “lerato le le tseneletšego.” Lerato leo le bipa “dibe tše dintši,” e sego dibe tše sego kae feela. (1 Pet. 4:8) Mohlomongwe Petro o ile a gopola thuto yeo Jesu a mo rutilego yona mengwageng yeo e bego e sa tšwa go feta ka taba ya go lebalela. Go ka direga gore ka nako yeo, Petro o be a ipona a lokile ge a be a re o tlo lebalela ngwanabo “gašupa.” Eupša Jesu o ile a mo ruta thuto yeo le rena e re holago, ya go lebalela “go fihla ga masomešupa-šupa,” e lego seo se bolelago gore re dule re lebalela. (Mat. 18:21) Ge e ba o kile wa palelwa ke go diriša keletšo ye, o se ke wa nyama! Ka ge bahlanka ka moka ba Jehofa ba se ba phethagala, le bona ka dinako tše dingwe, ba ile ba hwetša go le thata go lebalela ba bangwe. Selo se bohlokwa seo o ka se dirago gona bjale ke gore o dire sohle seo o ka se kgonago go lebalela bana beno le dikgaetšedi le go phela le bona ka khutšo. w23.09 29 ¶12

Nakong ya ge Jona a be a le ka mpeng ya hlapi, o be a kgodišegile gore Jehofa o tla theetša thapelo yeo ya gagwe ya boitsholo le gore o tla mo thuša. Ka morago Jehofa o ile a phološa Jona, ke moka a ikemišetša go phetha kabelo ya gagwe. (Jona 2:10–3:4) Ge o le ka tlase ga mathata goba o gateletšegile, na o ikwa o palelwa ke go rapela Jehofa le go mmotša ka moo o ikwago ka gona? Goba na o ikwa o se na matla a go ithuta? Gopola gore Jehofa o kwešiša boemo bja gago ka mo go feletšego. Le ge o ka rapela ka mantšu a bonolo, o ka kgodišega gore Jehofa o tlo go nea se o se hlokago. (Baef. 3:20) Ge e ba bohloko bjo o bo kwago bo dira gore go be thata go bala le go ithuta, o ka theetša Beibele yeo e rekhotilwego goba wa theetša dikgatišo tšeo di theilwego Beibeleng tšeo di rekhotilwego. O ka thušwa gape le ke go theetša dikoša tša rena goba wa bogela dibidio tšeo di lego go jw.org/nso. Jehofa o nyaka go go nea matla, le gona o tlo dira bjalo ge e ba o ka mo rapela, gomme wa nyaka karabo ya thapelo ya gago ka Beibeleng le go dilo tše dingwe tšeo a re neago tšona. w23.10 13 ¶6; 14 ¶9

Taberenakele le ditempele tšeo di bego di agilwe Jerusalema di be di swana ka gare, go be go na le diphapoši tše pedi, e lego “sekgethwa” le “sekgethwakgethwa” tšeo di bego di arogantšwe ka seširo. (Baheb. 9:​2-5; Ek. 26:​31-33) Ka sekgethweng go be go na le sehlomapone sa gauta, aletare ya go fišetša dibego le tafola ya senkgwa sa pontšho. Go be go dumeletšwe “baperisita ba tloditšwego” feela gore ba tsene ka sekgethweng gomme ba dire mediro e mekgethwa. (Num. 3:​3, 7, 10) Ka Sekgethwakgethweng go be go na le areka ya kgwerano ya gauta yeo e bego e swantšhetša go ba gona ga Jehofa. (Ek. 25:​21, 22) Ke moperisita yo a phagamego feela yo a bego a dumeletšwe go feta seširo gomme a tsene ka Sekgethwakgethweng gatee ka ngwaga letšatšing la poelano. (Lef. 16:​2, 17) O be a tsena ka madi a diphoofolo gore a dire poelano bakeng sa dibe tša gagwe le tša setšhaba ka moka. Mafelelong Jehofa o ile a bontšha gore ge e le gabotse dilo tšeo di bego di le ka taberenakeleng di be di emela eng.—Baheb. 9:​6, 7. w23.10 27 ¶12

Gantšhi ge re bala Lentšu la Modimo re hwetša taelo e rego, “le ratane.” (Joh. 15:12; Baroma 13:8; 1 Bathes. 4:9; 1 Pet. 1:22; 1 Joh. 4:11) Eupša lerato ke seka seo se lego ka pelong goba motho wa ka gare, le gona batho ba ka se kgone go bona dipelo tša rena. Re ka bontšha bjang bana babo rena le dikgaetšedi gore re a ba rata? Re ka ba bontšha ka dilo tšeo re di bolelago le tšeo re di dirago. Go na le ditsela tše dintšhi tšeo ka tšona re ka bontšhago bana babo rena le dikgaetšedi gore re a ba rata. Mehlala e mengwe ke ye: “Botšanang therešo.” (Sak. 8:16) “Le boloke khutšo gare ga lena.” (Mar. 9:50) Etelelang pele “go bontšhaneng kgodišo.” (Baroma 12:10) “Amogelanang.” (Baroma 15:7) “Tšwelang pele . . . le lebalelana.” (Bakol. 3:13) “Tšwelang pele le rwalelana maima.” (Bagal. 6:2) “Tšwelang pele le homotšana.” (1 Bathes. 4:18) “Tšwelang pele . . . le agana.” (1 Bathes. 5:11) “Le rapelelaneng.”—Jak. 5:16. w23.11 9 ¶7-8

Letšatši le lengwe le le lengwe re dira diphetho tšeo di hlokago gore re be le tumelo e tiilego. Ka mohlala, re dira diphetho ge go etla tabeng ya go kgetha bagwera, go ithabiša, thuto, go nyala, go ba le bana le mošomo. Re swanetše go ipotšiša gore, ‘na diphetho tšeo ke di dirago di bontšha gore ke dumela gore tshepedišo ye ke ya nakwana gomme e se kgale e tla tšeelwa legato ke lefase le lefsa la Modimo? Goba na diphetho tšeo ke di dirago di swana le tša batho bao ba phelago tše e kego lehu ke mafelelo a dilo ka moka?’ (Mat. 6:​19, 20; Luka 12:​16-21) Re tlo dira diphetho tše bohlokwa ge e ba re tiiša tumelo ya rena ya gore lefase le lefsa le kgauswi. Re swanetše go ba le tumelo e tiilego e le gore re kgone go kgotlelela mathata. Re ka tlaišwa, ra ba le bolwetši bjo šoro goba dilo tše dingwe tšeo di ka re nyamišago. Mathomong re ka bona eka re ka kgona go kgotlelela mathata a rena. Eupša ge mathata ao a tšea nako e telele, go ka nyakega gore re be le tumelo e tiilego gore re kgone go a kgotlelela le gore re kgone go hlankela Jehofa re thabile.—1 Pet. 1:​6, 7. w23.04 27 ¶4-5

Jehofa o letetše gore re dire dilo ka go dumelelana le dithapelo tša rena. Ka mohlala, ngwanabo rena a ka kgopela Jehofa gore a mo thuše gore a kgone go ya kopanong go e na le go ya mošomong. Jehofa a ka araba bjang thapelo yeo? A ka nea ngwanabo rena sebete sa gore a ye go kgopela mongmošomo wa gagwe gore a se ke a šoma ka letšatši la go ya kopanong. Eupša ngwanabo rena o swanetše go ya go mongmošomo gomme boledišane le yena. A ka swanelwa ke go mo kgopela gantšhintšhi. A ka ba a kgopela gore a šomele motho yo mongwe ka letšatši le lengwe leo le fapanego goba a kgopela gore a se ke a patelwa letšatši leo a sego a šoma ka lona. Jehofa o letetše gore re dule re mo rapela. Re kgona go bona mantšung a Jesu gore dilo tše dingwe tšeo re di rapelelago di ka se phethagale le semeetseng. (Luka 11:9) Ka gona o se ke wa fela matla! Rapela Jehofa ka mehla go tšwa pelong. (Luka 18:​1-7) Ge re dira bjalo, re mmontšha gore selo seo re se rapelelago se tloga se le bohlokwa go rena. E bile re mmontšha gore re na le tumelo le gore re tshepa gore o tla re thuša. w23.11 21 ¶5; 23 ¶12

Jehofa o tshepišitše mogwera wa gagwe Aborahama gore ditšhaba ka moka di tla šegofatšwa ka morwa wa gagwe. (Gen. 15:5; 22:18) Ka ge Aborahama a be a na le tumelo go Modimo, o be a kgodišegile gore o tlo phethagatša dilo tšeo Modimo a mo tshepišitšego tšona. Le ga go le bjalo, ge Aborahama a be a na le mengwaga e 100, gomme mosadi wa gagwe a na le e 90, banyalani bao ba botegago ba be ba se ba tšwa ba eba le morwa. (Gen. 21:​1-7) Beibele e re: “Motheong wa kholofelo [Aborahama] o ile a ba le tumelo, gore e tla ba tatago ditšhaba tše dintši ka go dumelelana le seo se bego se boletšwe.” (Baroma 4:18) O a tseba gore dilo tšeo Modimo a bego a di tshepišitše Aborahama di ile tša phethagala. O ile a ba tatago morwa yo a bego a mo letetše e lego Isaka. Ke ka baka la’ng Aborahama a be a kgodišegile gore Jehofa o tlo phethagatša dikholofetšo tša gagwe? Ka ge Aborahama a be a na le segwera se sebotse le Jehofa, o be a “kgodišegile ka botlalo gore seo [Modimo] a bego a se holofeditše” se be se tlo direga. (Baroma 4:21) Jehofa o ile a amogela Aborahama a ba a bolela gore o lokile ka baka la tumelo ya gagwe.—Jak. 2:23. w23.12 8 ¶1-2

Ngwanabo rena wa moswa yo a botegago, o šoma ka thata gore a phethe dikabelo tša gagwe. Nagana ka mohlala wa Jesu. O be a sa tšeele dilo fase. Go e na le moo, o dirile dikabelo ka moka tšeo Jehofa a mo neilego tšona le ge ka dinako tše dingwe go be go se bonolo go dira bjalo. O be a rata batho, kudukudu barutiwa ba gagwe, moo a ilego a feleletša a ba hwetše. (Joh. 13:1) O ka ekiša Jesu ka go šoma ka thata dikabelong ka moka tšeo ba go filego tšona. Ge e ba o sa kgone go dira selo se itšego, ikokobetše gomme o kgopele bana babo rena bao ba godilego gore ba go thuše. O se ke wa ithola kgwara ge o dira dilo. (Baroma 12:11) Go e na le moo, šoma ka thata gore o phethe dikabelo tša gago ka moka, ka gobane o di “direla Jehofa, e sego batho.” (Bakol. 3:23) Ka ge o se wa phethagala, ikokobetše gomme o amogele diphošo tšeo o felago o di dira.—Die. 11:2. w23.12 26 ¶8

Re thaba kudu ge re kolobetšwa gomme re eba karolo ya lapa la Jehofa. E tloga e le tokelo e kgolo kudu go ba le segwera sa kgauswi le Jehofa. Re dumelelana le mopsalme Dafida yo a itšego: “Go thaba motho yo o mo kgethago gomme wa mmatametša kgauswi le wena gore a dule ntlong ya gago.” (Ps. 65:4) Jehofa ga a tliše motho yo mongwe le yo mongwe ka lapeng la gagwe. O gogela feela bao ba tlogago ba nyaka go ba le segwera sa kgauswi le yena. (Jak. 4:8) Ge o ineela go Jehofa e bile o kolobetšwa, o ka kgodišega gore ka morago ga ge o kolobeditšwe, Jehofa o tlo go “šegofatša kudu.”(Mal. 3:10; Jer. 17:8) Kolobetšo e fo ba mathomomayo. O swanetše go dira sohle se o ka se kgonago gore o phelele keno ya gago le ge o ka kopana le diteko goba mathata. (Mmo. 5:​4, 5) Bjalo ka molatedi wa Jesu, o tlo ekiša mohlala wa gagwe le go latela ditaelo tša gagwe ka mo o ka kgonago ka gona.—Mat. 28:​19, 20; 1 Pet. 2:21. w24.03 8 ¶1-3

Le swanetše go dira eng ge e ba wena le molekane wa gago le sa thabele go fetša nako le le mmogo? Nagana ka mollo. Ga o no thoma le go lauma le semeetseng. O swanetše go bešeletšwa e le gore o kgone go dula o tuka. Ka mo go swanago, le ka fetša nako e nyenyane le dira dilo tše itšego le le mmogo letšatši le letšatši. Kgonthišetšang gore le dira selo seo ka moka ga lena le ka se thabelago. (Jak. 3:18) Le ka tsošološa lerato la lena ganyenyane-ganyenyane. Tlhompho e bohlokwa lenyalong. E swana le moya wo o dirago gore mollo o tuke. Mollo o ka tima ka pela ge go se na moya. Ka mo go swanago, ge banyalani ba sa hlomphane, lerato la bona le tlo fola. Eupša ge monna le mosadi ba leka ka thata gore ba hlomphane, ba tlo dula ba ratana. Sa bohlokwa le go feta ke ge molekane wa gago a bona gore o a mo hlompha e sego ge wena o bona eka o a mo hlompha. w23.05 22 ¶9; 24 ¶14-15

Beibele e bolela ka bahlanka ba botegago ba Jehofa ba nakong e fetilego bao ka dinako tše dingwe ba bego ba tšhoga goba ba boifa ka baka la mathata goba manaba a bona. (Ps. 18:4; 55:​1, 5) Ka mo go swanago, le rena re ka ganetšwa ge re le sekolong, re le ka gae, mošomong goba ra ganetšwa ke ba mmušo. Ka dinako tše dingwe re ka ba re boifa gore re tlo hlokofala ka ge re babja. Ka dinako tšeo re ka ikwa re se na matla go swana le ngwana yo monyenyane. Jehofa o re thuša bjang dinakong tše bjalo? O a re kgothatša le go dira gore re thabe. Ka gona, fetša nako o na le Jehofa ka go dula o rapela le go bala Lentšu la gagwe. (Ps. 77:​1, 12-14) Ge o ka dira bjalo o tlo kgona go ya go Tatago wa legodimong ge o ikwa o gateletšegile. Botša Jehofa ka dilo tšeo di go tšhošago le tšeo di go tshwenyago. Mo dumelele gore a bolele le wena le go go kgothatša a diriša Mangwalo.—Ps. 119:28. w24.01 24-25 ¶14-16

Go kganyoga go fihlelela dilo tšeo o nyakago go di dira go tla go thuša gore o di fihlelele. Ge o kganyoga go dira selo se itšego, o tlo šoma ka thata gore o se fihlelele. Le gona, ge e ba re kganyoga go dira dilo tše itšego, re ka kgona go di fihlelela. O ka dira eng gore o fihlelele selo seo o nyakago go se dira? Rapelela kganyogo ya go fihlelela seo o nyakago go se dira. Jehofa a ka diriša moya wa gagwe o mokgethwa go go thuša go fihlelela seo o nyakago go se dira. Ka dinako tše dingwe re ipeela dilo tšeo re nyakago go di fihlelela ka gobane re a tseba gore re tlo kgona go di fihlelela, le gona ke mo go botse go dira bjalo. Eupša re ka no se be le kganyogo ya go dira bjalo. Naganišiša ka seo Jehofa a go diretšego sona. (Ps. 143:5) Moapostola Paulo o ile a naganišiša ka botho bjo bogolo bjoo Jehofa a mmontšhitšego bjona, gomme seo sa mo thuša gore a nyake go mo hlankela ka matla a gagwe ka moka. (1 Bakor. 15:​9, 10; 1 Tim. 1:​12-14) Ka mo go swanago, ge e ba o naganišiša ka dilo tšeo Jehofa a šetšego a go diretše tšona, o tlo ikwa o nyaka go fihlelela dilo tšeo o nyakago go di dira.—Ps. 116:12. w23.05 27 ¶3-5

Re thabiša Tatago rena wa legodimong ge re tumiša leina la gagwe. (Ps. 119:108) Na re ka re Jehofa o swana le batho bao ba sa phethagalago bao ba ratago go tumišwa goba go amogelwa? Aowa. Ge re tumiša Tatago rena wa legodimong, re bontšha gore seo Sathane a se boletšego ka rena ke maaka a matala. Sathane o bolela gore ga go na motho yo a ka emelago leina la Modimo ka go botega. O re ga go na motho yo a ka dulago a botegela Modimo ge a lekwa. O bolela gore ka moka ga rena re ka hlanogela Jehofa ge e ba re nagana gore go mo hlankela ga go re hole ka selo. (Jobo 1:​9-11; 2:4) Jobo yo a botegago o ile a bontšha gore Sathane o na le maaka. Go thweng ka wena? Yo mongwe le yo mongwe wa rena o na le tokelo ya go emela leina la Tatago rena le go mo kgahliša ka go mo hlankela ka go botega. (Die. 27:11) Yeo e tloga e le tokelo e kgolo kudu. w24.02 8-9 ¶3-5

Ka morago ga mehla ya Moshe le Joshua, Jehofa o ile a kgetha baahlodi gore ba hlahle batho ba gagwe. Ke moka mehleng ya dikgoši, Jehofa o ile a kgetha baporofeta gore ba hlahle batho ba gagwe. Dikgoši tše di botegago di ile tša kwa keletšo ya baporofeta. Ka mohlala, Kgoši Dafida o ile a amogela ka boikokobetšo ge moporofeta Nathane a be a mo phošolla. (2 Sam. 12:​7, 13; 1 Dikor. 17:​3, 4) Kgoši Jehoshafate o ile a ithekga ka moporofeta Jahasiele gore a mo hlahle a ba a kgothatša batho ba Juda ka gore: “E bang le tumelo go baporofeta [ba Modimo].” (2 Dikor. 20:​14, 15) Ge Kgoši Hesekia a be a le ka tlase ga kgatelelo o ile a kgopela moporofeta Jesaya gore a mo thuše. (Jes. 37:​1-6) Ka mehla ge dikgoši di be di ekwa tlhahlo ya Jehofa, di be di hwetša ditšhegofatšo e bile setšhaba se hwetša tšhireletšo ya Jehofa. (2 Dikor. 20:​29, 30; 32:22) Go be go le molaleng gore Jehofa o be a diriša baporofeta go hlahla batho ba gagwe. w24.02 21 ¶8

Sathane o nyaka gore re fetše nako e ntšhi re phela le batho bao ba ka dirago gore go be boima gore re kwe melao ya Jehofa. Re swanetše go ba šedi kudu ka gobane ga re fetše nako e ntšhi re phela le batho bao re ba bonago ka go lebanya feela, eupša re e fetša re boledišana le ba bangwe ka inthanete. Re swanetše go ganetša tsela yeo lefase le naganago ka yona ya gore boitshwaro bjo bo gobogilego bo a amogelega. Re a tseba gore dilo tšeo di fošagetše. (Baef. 4:​19, 20) Ke mo go botse go ipotšiša gore: ‘Na ke fetša nako e ntšhi go sa hlokagale ke na le batho bao ke tsenago le bona sekolo, bao ke šomago le bona le ba bangwe bao ba sa hlomphego melao ya Modimo ya boitshwaro? Na ke bontšha sebete ka go latela melao ya Jehofa le ge ba bangwe ba ka mpolela gampe?’ Ka ge lengwalo la 2 Timotheo 2:​20-22 le bolela, re swanetše go hlokomela gabotse le bagwera bao re ba kgethago le ka phuthegong. Re dula re gopola gore ba bangwe ba ka no se re thuše gore re dule re botegela Jehofa. w24.03 22-23 ¶11-12

Na o kile wa ipotšiša gore Jehofa o bjang? Le ge Jehofa a sa bonagale, Beibele e mo hlalosa ka ditsela tše di fapafapanego. E re “o swana le letšatši e bile o swana le kotse” le gona o bitšwa gore ke “mollo o jago.” (Ps. 84:11; Baheb. 12:29) Ponagalo ya gagwe e swantšhwa le leswika le bohlokwa leo le bitšwago safire, selo seo se phadimago bjalo ka gauta le molalatladi o bago marung ge pula e ena. (Hesek. 1:​26-28) Ka dinako tše dingwe go ka ba thata go dumela gore Jehofa o a re rata ka ge re sa kgone go mmona. Batho ba bangwe ba nagana gore Jehofa a ka se tsoge a ba ratile ka baka la dilo tšeo di ba diragaletšego bophelong. Jehofa o kwešiša maikwelo ao le kamoo a re amago ka gona. O diriša Beibele go re utollela semelo sa gagwe e le gore a kgone go re thuša. Lentšu leo le hlalosago Jehofa gabotse ke lerato. (1 Joh. 4:8) Modimo ke lerato. Lerato leo ke lona le šušumetšago selo se sengwe le se sengwe seo a se dirago. Lerato la Modimo ke le botho kudu mo e lego gore o kgona go le bontšha le batho bao ba sa mo ratego.—Mat. 5:​44, 45. w24.01 26 ¶1-3

Jehofa o ile a kgetha Moshe gore a ntšhe setšhaba sa Baisiraele Egepeta. O ile a ba bontšha le gore ke yena a ba hlahlago ka go diriša thololo ya leru gore e ba hlahle mosegare gomme a ba nea thololo ya mollo gore e ba hlahle bošego. (Ek. 13:21) Moshe o ile a šala thololo yeo morago ke moka ya dira gore yena le Baisiraele ba fihle Lewatleng le Lehwibidu. Batho ba ile ba tšhoga ge ba be ba nagana gore ba tlo palelwa ke go tshela lewatle nakong ya ge Baegepeta ba ba rakediša. Eupša e be e se phošo. Jehofa o be a dirile gore Moshe a iše batho ba gagwe moo. (Ek. 14:2) Modimo o ile a ba phološa ka tsela e makatšago. (Ek. 14:​26-28) Moshe o be a dutše a ithekgile ka thololo ya leru ge a be a etelela setšhaba sa Modimo pele ka mengwaga e masomenne kua lešokeng. (Ek. 33:​7, 9, 10) Jehofa o ile a bolela le Moshe a le thololong ya leru gomme yena a nea setšhaba ditaelo tša Jehofa. Baisiraele ba be ba tloga ba bona gore Jehofa o diriša Moshe gore a ba hlahle. w24.02 21 ¶4-5