Bagoeledi Ba Mmušo Ba A Bega
“Xo Modimo ké mo xo Kxônêxaxo Tšohle”
MANTŠU a lego ka mo godimo, a hwetšwago go Mateo 19:26, a ile a ipontšha e le a therešo go kgarebe ya kua Venezuela. E ile ya kgona go fenya bothata bjo bogolo ka morago ga go ithuta go bota Jehofa ka mo go feletšego. E a laodiša:
“Makgolo o be a le botho e bile a e-na le lerato kudu. Ka manyami, o ile a hlokofala ge ke be ke e-na le nywaga e 16 feela. Lehu la gagwe le ile la nkweša bohloko kudu. Ke ile ka thoma go ba yo a sa leka-lekanago, ke bile ke sa nyake le go tšwela ka ntle jarateng. Ke ile ka feleletša ke le tšhika-noši.
“Ke be ke sa tsene sekolo e bile ke se na mošomo. Ke be ke fo dula ka phapošing ya-ka. Ka ge ke be ke lewa ke bodutu e bile ke se na bagwera, ke ile ka hlaselwa ke kgateletšego e šoro. Ke ile ka ikwa ke se na mohola le o monyenyane gomme ke be ke nyaka go hwa gore go fele ka bophelo bja-ka. Ke be ke dula ke ipotšiša gore, ‘Ke ka baka la’ng ke le gona?’
“Mma o be a amogela dimakasine tša Morokami le Phafoga! go Hlatse e nyenyane yeo e bego e bitšwa Gisela. Ka letšatši le lengwe mma o ile a bona Gisela ge a be a feta gae gomme a mmotšiša ge e ba a be a ka kgona go nthuša. Gisela o ile a dumela go leka, eupša ke ile ka gana go mmona. Se ga se sa ka sa šitiša Gisela. O ile a nngwalela lengwalo a mpotša gore o nyaka go ba mogwera wa-ka le gore motho yo mongwe yo a lego bohlokwa kudu go mo feta le yena o be a nyaka go ba mogwera wa-ka. O itše motho yoo ke Jehofa Modimo.
“Se se ile sa nkgoma gomme ke ile ka araba lengwalo la gagwe. Re ile ra tšwela pele re ngwalelana ka dikgwedi tše tharo. Ke feela ka morago ga go otelelwa le go hlohleletšwa ke Gisela moo mafelelong ke ilego ka ba le sebete sa go kopana le yena. Ge re kopana la mathomo, Gisela o ile a ithuta Beibele le nna re šomiša puku ya O ka Phela ka mo go sa Felego Paradeiseng mo Lefaseng. Ka morago ga thuto o ile a ntaletša go ba gona dibokeng Holong ya Mmušo ya lefelong leo. Ke ile ka makala. Ke be ke se ka ka ka tšwa ka ntlong ka nywaga e mene, gomme ge ke nagana go tšwela setarateng ke be ke boifa.
“Gisela o be a sa mphelele pelo kudu. O ile a nkgonthišetša gore ga go na selo seo ke bego ke swanetše go se boifa le gore o be a tla sepela le nna go ya dibokeng. Mafelelong ke ile ka dumela. Ge re fihla Holong ya Mmušo, ke ile ka thoma go thothomela le go tšwa kudumela. Ga se nke ke kgone go dumediša batho. Lega go le bjalo ke ile ka dumela go tšwela pele ke e-ya dibokeng, gomme Gisela o ile a tšwela pele a mpitša beke e nngwe le e nngwe ka potego.
“Gisela o ile a ya le nna dibokeng e sa le nako kudu gore a nthuše go fenya letšhogo la-ka. Re be re ema kgaufsi le mojako gomme re dumediša bohle ge ba fihla. Ka mokgwa woo ke be ke lebeletšana le batho ba babedi goba o tee ka nako, go e na le sehlopha ka moka ka nako e tee. Ge ke be ke ikwa gore nka se sa kgotlelela, Gisela o ile a ntsopolela Mateo 19:26: ‘Mo xo batho seo xa se kxônexe; xo Modimo ké mo xo kxônêxaxo tšohle.’
“Gaešita le ge go be go se bonolo, mafelelong ke be ke kgona go ba gona moo kopanong ya tikologo. Seo e be e le mogato o mogolo gakaakang go nna! Ka September 1995, ke ile ka rapa sebete sa go bolela le bagolo ka go tšea karolo bodireding bja ntlo le ntlo. Dikgwedi tše tshela ka morago, ka April 1996 ke ile ka bontšha boineelo bja-ka go Jehofa ka kolobetšo ya meetseng.
“Ge motho yo mongwe morago bjale a mpotšiša gore ke hweditše kae sebete sa go dira se, ke ile ka araba ka gore: ‘Kganyogo ya-ka ya go kgahliša Jehofa e feta poifo ya-ka.’ Le ge ke sa dutše ke e-na le ditlhaselo tša sebakanyana tša kgateletšego, lethabo la-ka le godišwa ke go hlankela ga-ka bjalo ka mmulamadibogo wa ka mehla. Ge ke lebelela morago, ke bona gore ke swanetše go dumelelana le Gisela. Ga bjale ke na le Mogwera yo a nago le kgahlego ka nna le yo a ‘mphago matla.’ ”—Ba-Filipi 4:13.
[Seswantšho go letlakala 8]
“Kganyogo ya-ka ya go kgahliša Jehofa e feta poifo ya-ka”