Modimo Ga A Diegiše Dikholofetšo tša Gagwe

“MORÊNA, xo tlo feletša neng ké fêla kè bitša Ó sa kwe?” Ao ke mantšu a moporofeta wa mo-Hebere Habakuku yo a phetšego lekgolong la bo-šupa la nywaga B.C.E. Eupša a kwagala a tlwaelegile, na ga go bjalo? Ke tlhago ya batho go nyaka go hwetša dilo tšeo re di ratago gatee-tee goba go nyaka go di hwetša kapejana ka mo go ka kgonegago ka gona. Le gona se e tloga e le sa therešo kudu mo mehleng ya rena ya go nyaka kgotsofalo ya ka pela.​—Habakuku 1:2.

Lekgolong la pele la nywaga go be go e-na le batho bao ka ntle le pelaelo ba bego ba nagana gore Modimo o be a swanetše go ba a phethagaditše dikholofetšo tša gagwe pele ga nako yeo a ilego a di phethagatša ka yona. Ba be ba thomile go fela pelo kudu mo ba ilego ba ba ba re Modimo o a nanya goba o diegile. Ka baka leo moapostola Petro o ile a swanelwa ke go ba gopotša gore pono ya Modimo ka nako e fapane le ya rena ka mo go feletšego. Petro o ngwala gore: “Fêla, Baratexi, taba ye nngwê ye e se kexo ya Le xaka šé: Xo Morêna nywaxa e sekete e ke ké letšatši le tee.”​—2 Petro 3:8.

Go ya ka tsela ye ya go bala nako, motho yo a nago le nywaga e 80 o phetše mo e ka bago diiri tše pedi feela, gomme histori ya batho ka moka e tšere feela matšatši a tshelelago. Ge re lebelela dilo go ya ka pono ye, go ba bonolo go rena gore re kwešiše tsela ya Modimo ya go dirišana le rena.

Lega go le bjalo, Modimo ga a hlokomologe nako. Ka mo go fapanego, o šetša nako kudu. (Ditiro 1:7) Ka gona, Petro o tšwela pele ka gore: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Modimo ka go fapana le batho ga a ikwe a gapeletšega go dira dilo ka tsela ye e kego nako e a mo šia. Ka ge e le “Kxoši Ra-mabaka-a-neng-le-neng,” o na le pono-kakaretšo e makatšago gomme a ka kgona go bona gore ke neng mosepelong wa nako mo ditiro tša gagwe di tlago go hola kudu batho bohle ba akaretšwago.​—1 Timotheo 1:17.

Ka morago ga go hlalosa lebaka la seo se bonalago eka ke go diega ga Modimo, Petro o nea temošo ye: “ ’Tšatši leo la Morêna le tlo tla bo-ka lehodu.” Ke gore, letšatši la go ikarabela le tla tla ka yona nako yeo batho ba tlago go ba ba sa le letela. Ke moka, ditemaneng tše di latelago Petro o bolela ka tebelelo e kgahlišago bakeng sa bao ba bontšhago “xo swara ka tsela e kxêthwa ya borapedi” e le gore ba tle ba phologele ‘magodimong a mafsa le lefaseng le lefsa mo go agilego toko,’ tšeo Modimo a di holofeditšego.​—2 Petro 3:​10-13.

Se se swanetše go re dira gore re leboge kudu ge kahlolo ya Modimo e se ya hlwa e fihla. Go se fele pelo ga gagwe go dirile gore re kgone go tseba morero wa gagwe le gore re lokiše maphelo a rena e le gore re tle re hwetše ditšhegofatšo tša gagwe tše a di holofeditšego. Na ga se ra swanela go lebelela ‘go se fele pelo ga Morena e le gona go re phološago’ bjalo ka ge Petro a bontšha? (2 Petro 3:​15) Lega go le bjalo, go sa na le lebaka le lengwe la go se fele pelo ga Modimo.

Tekanyo ya Molato Yeo e Swanetšego go Tlatšwa

Ge re lebelela ditirišano tša nakong e fetilego tša Modimo le batho, re hlokomela gore gantši o ile a tlogela go phetha kahlolo ya gagwe go fihlela ge go be go se sa na kholofelo ya gore go ka kaonefala. Ka mohlala, mabapi le kahlolo ya Modimo go ba-Kanana, o ile a bontšha Aborahama dibe tša bona lebaka le letelele e sa le pele. Eupša nako ya go phetha kahlolo ya gagwe e be e se ya hlwa e fihla. Ka baka la’ng? Beibele e re: “Ka xobane byale molato wa Ba-Amoro [ba-Kanana] xa o ešo wa tlala” goba go ya ka phetolelo ya Knox: “Bokgopo bja ba-Amoro [bo be] bo se bja fihlela lebaka la bjona le le tletšego.”​—Genesi 15:​16.a

Lega go le bjalo, mo e ka bago nywaga e 400 ka morago, kahlolo ya Modimo e ile ya fihla, gomme ditlogolo tša Aborahama e lego ba-Isiraele, di ile tša tšea naga. Ba-Kanana ba bangwe ba sego kae go etša Rahaba le ba-Gibeone ba ile ba phologa ka baka la boemo bja bona bja kgopolo le ditiro tša bona, eupša ba bantši ba bona ba be ba fihletše boemo bjo bo feteletšego kudu bja go se hlweke, bjalo ka ge se se utollwa ke dilo tše di epolotšwego ke baepi ba mehleng yeno ba marope. Ba be ba diriša borapedi bja ditho tša pelego, ba gweba ka mebele tempeleng le go dira bana dihlabelo. Halley’s Bible Handbook e bolela gore: “Baepi ba marope bao ba epago marope a metse ya Kanana ba makatšwa ke ge Modimo a sa ka a ba fediša kapejana go feta kamoo a dirilego ka gona.” Mafelelong, ‘tekanyo ya sebe sa ba-Kanana e be e tletše’; bokgopo bja bona bo be bo ‘fihletše lebaka la bjona le le tletšego.’ Ga go motho yo a bego a ka bea Modimo molato ka tshwanelo wa gore o be a se dira toka ge a be a tlogela naga e hlwekišwa mola a boloka bao ba bego ba bontšhitše boemo bjo bo lokilego bja kgopolo.

Re hwetša seswantšho se se swanago mehleng ya Noage. Go sa šetšwe taba ya gore batho ba pele ga Meetse-fula ba be ba le kgopo, Modimo ka kgaugelo o ile a phetha ka gore nako ya bona e be e tla tšwela pele ka nywaga e mengwe e 120. Karolong e nngwe ya nako yeo, Noage o be a dira e le “sexoeledi sa tokô.” (2 Petro 2:5) Go bonagala bokgopo bja bona bo ile bja golela ruri ge nako e be e dutše e feta. “Xe Modimo a lebêlêla lefase a bôna lè senyexile, nama ka moka è sentše tsela ya yôna lefaseng.” (Genesi 6:​3, 12) ‘Tekanyo ya sebe sa bona e be e tletše’; go feta ga nako go be go dirile gore ditshekamelo tša bona tše mpe di fihle seremong sa tšona. Ge Modimo a be a gata mogato, o be a e-na le tshwanelo ka mo go feletšego. Ke batho ba seswai feela bao ba ilego ba ipontšha e le ba lokilego mahlong a Modimo gomme o ile a ba phološa.

Mokgwa o swanago o bonagala tseleng yeo Modimo a swerego Isiraele ka gona. Modimo o ile a ba kgotlelela ka nywaga e makgolo go sa šetšwe gore ba ile ba itshwara ka go se botege le ka tsela e gobogilego. Pego e re: “Morêna Modimo . . . a fêla a iša Lentšu . . . ka batseta ba xaxwe, a fêla a boeletša, ka xobane à kwêla sethšaba sa xaxwe bohloko. Bôná xomme, ba dira bahlanka ba Modimo sekwêrô, ba nyatša se ba se boletšexo, ba fôtla baporofeta ba xaxwe; kxalefô ya Morêna ya ba ya xolêla sethšaba sa xaxwe, xwa hlôkwa moreku.” (2 Koronika 36:​15, 16) Batho ba be ba fihlile boemong bjo go bjona go kaonefatša go bego go ka se sa kgonega. Ke feela Jeremia le ba bangwe ba sego kae bao ba ilego ba phološwa. Go be go ka se thwe Modimo o be a se na toka ge a be a ahlola ba bangwe ka moka mafelelong.

Nako ya Modimo ya Kahlolo e Fihlile

Go tšwa mehlaleng ye re kgona go bona gore Modimo o tlogetše go phetha kahlolo malebana le tshepedišo ye ya gona bjale ya dilo go ba go fihla ge feela nako ya gona e tla ba e fihlile. Se se bontšhwa taelong yeo e newago mophethi wa seswantšhetšo wa kahlolo wa Modimo: “Tsenya lexwêtla le le boxale la xaxo, O sêxê thara tša morara wa lefase, xobane ditholwana tša wôna di budule. Morongwa eo a akxêla lexwêtla la xaxwe lefaseng, a buna morara wa lefase, ’nkxwa a di lahlêla bofôtlelong byo boxolo bya boxale bya Modimo.” Ela hloko gore bokgopo bja batho bo be ‘bo budule,’ ke gore bo be bo fihlile bokgoleng bjo go kaonefatša go bego go ka se kgonege. Ge Modimo a tliša kahlolo go tla be go se na pelaelo ya gore go tsena ga gagwe ditaba gare go tla be go swanela.​—Kutollo 14:​18, 19.

Ge re ela hloko se se lego ka mo godimo, go molaleng gore kahlolo ya Modimo malebana le lefase e swanetše go ba e le kgaufsi, ka gobane lefase le na le mekgwa e ilego ya nyaka kahlolo ya Modimo nakong e fetilego. Kae le kae mo re lebelelago gona lefase le tletše ka bošoro go fo swana le ge le be le tletše ka bjona pele ga Meetse-fula a mehleng ya Noage. Boemo bja kgopolo bja batho bo swana kudu le kamoo go hlaloswago go Genesi 6:5: “Tirô ka moka tša diakanyô tša dipelô tša [batho e be] è le bobe fêla ka mehla.” Gaešita le dibe tše kgolo tšeo di ilego tša dira gore Modimo a ahlole ba-Kanana di tlwaelegile lehono.

Batho ba bone diphetogo tše boifišago, kudu-kudu ga e sa le go tloga ka Ntwa ya I ya Lefase. Ba bone lefase le falala madi a ba dimilione. Dintwa, go bolayana ka molokwana-rite, botšhošetši, bosenyi le go hloka molao di tšweletše lefaseng ka bophara. Tlala, bolwetši le boitshwaro bjo bo gobogilego di tlaiša lefase la rena. Bohlatse ka moka bo bontšha gore bjale re phela gare ga moloko o kgopo wo Jesu a boletšego ka wona gore: “Ruri, ke a Le botša, di tlo tšwêlêla moloko wó ò sešo wa fêla.” (Mateo 24:​34) Bjale lefase le tlatša ‘tekanyo ya lona ya sebe.’ “Thara tša morara wa lefase” di butšwetša go bunwa.

Ke Nako ya Gore o Gate Mogato

Moapostola Johane o ile a botšwa gore ge nako ya kahlolo e batamela, go be go tla ba le mehuta e mebedi ya go butšwa. Ka lehlakoreng le lengwe, “e a senyaxo, a a išê pele a senyê, wa dithšila a a išê pele xo ithšilafatša.” Eupša ka lehlakoreng le lengwe “moloki a išê pele xo loka; mokxêthwa a išê pele xo kxêthêxa.” ( Kutollo 22:​10, 11) Tiragalo ye ya mafelelo e direga mabapi le modiro wa go ruta Beibele wa lefase ka bophara wo o dirwago ke Dihlatse tša Jehofa. Morero wa modiro woo ke go ruta batho seo Modimo a se nyakago go bona e le gore ba ka balwa e le bao ba swanelegelago go hwetša bophelo bjo bo sa felego. Modiro wo bjale o fihla dinageng tše 233 ka diphuthego tše ka bago 87 000.

Modimo ga a diege. Ka go se fele pelo o dumeletše batho gore ba apare ‘motho e mofsa’ e le gore ba kgone go swanelegela dikholofetšo tša gagwe. (Ba-Efeso 4:​24) Lehono Modimo o sa letile go sa šetšwe maemo ao a mpefalago a e-ya pele lefaseng. Dihlatse tša Jehofa lefaseng ka moka di dira sohle seo di ka se kgonago gore di abelane le baagišani ba tšona tsebo e išago bophelong bjo bo sa felego. (Johane 17:​3, 17) Ka mo go thabišago, ngwageng o mongwe le o mongwe, batho ba 300 000 ba a arabela gomme ba a kolobetšwa.

Bjale ke nako ya go gata mogato re holofetše bophelo bjo bo sa felego, e sego ya go leta. Go se go ye kae, re tla bona phethagalo ya kholofetšo ya Jesu e rego: “E a phelaxo à ntumêla, a ka se kê a bá a hwa xo iša xo sa felexo.”​—Johane 11:26.

[Mengwalo ya tlase]

[Caption on page 6]

Mophethi wa kahlolo wa Modimo o boditšwe gore a tsenye legwetla la gagwe ge morara wa lefase o budule

[Caption on page 7]

Dihlatse tša Jehofa lefaseng ka bophara di thuša batho gore ba swanelegele ditšhegofatšo tša Modimo tša ka mo go sa felego