Na Beibele e ka re Thuša Lehono?

“GE RE tšea Beibele e feletše, karolo ya yona yeo e swanetšego go balwa ke mo e ka bago tee-lekgolong, eupša ge e le e nngwe ka moka ke yeo e sa šomego le yeo e šiilwego ke nako.” Se ke seo se ilego sa bolelwa ke lesogana le lengwe. Ba bantši ba be ba tla dumelelana le lona. Gaešita le ge Beibele e tšwela pele e le puku yeo e rekwago go feta tšohle lefaseng ka bophara, ba dimilione ba lebiša tlhokomelo e nyenyane go yona e bile ga se ba tlwaelana le dithuto tša yona.

Tokollong ya yona ya Keresemose ya 1996, kuranta ya Jeremane, e lego Süddeutsche Zeitung, e ile ya hlalosa gore Beibele “e na le babadi ba mmalwa kudu. Mehleng ya thutamahlale ya tša tlhago le go oketšega ga go fetolwa selefase, go ba bantši dipego tša Beibele di bonagala e le tše sa tlwaelegago le tše go lego thata go ka di kwešiša.” Dinyakišišo di kgonthišetša pego ye. Dithuto tše dingwe di utolla gore palo e kgolo ya bana ga e tsebe gore gabotse Jesu ke mang. Nyakišišong e nngwe, palo ya ka tlase ga seripa-gare sa batho bao go ilego gwa boledišanwa le bona ba be ba kgona go anega dikanegelo tša Beibele tša morwa wa lehlaswa le mo-Samaria wa kgaugelo.

Puku ya Kereke ya Evangelical ya Switzerland e lego Reformiertes Forum e bega gore go nyaka ga batho Beibele kua Switzerland ga se selo seo se bego se tlwaelegile pele. Gaešita le go bao ba nago le kopi ya Beibele, gantši e fo tlala lerole e le šelofong. Boemo ga se bjo bo fapanego kua Brithania. Go ya ka nyakišišo e nngwe, gaešita le ge batho ba bantši ba na le Beibele, bontši bja bona ga se ba ka ba e bala le ka mohla.

Ka lehlakoreng le lengwe, ba dimilione lefaseng ka moka ba ikwa ka tsela e fapanego mabapi le Beibele. Ba e lebelela e le Lentšu la Modimo gomme ba e lebelela e le ya bohlokwa le yeo e nago le mohola. Le gona, ba e bala ka mehla. Kgarebe e nngwe e ngwadile gore: “Ke leka go bala kgaolo e tee goba tše pedi tša Beibele letšatši le lengwe le le lengwe. Ke go thabela kudu.” Batho ba bjalo ba ela hloko seo Beibele e se rutago, gomme ba leka go diriša keletšo ya yona maphelong a bona. Ba dumela gore Beibele e ka ba thuša lefaseng la lehono le le nago le mathata.

Kgopolo ya gago ke efe? Na Beibele ke yeo e sa šomego mehleng ya rena? Goba na ke e bohlokwa le yeo e nago le mohola? Na Beibele e ka re thuša lehono?