THUTO 11
O ka Dira Eng Gore o Ipshine ka go Bala Beibele?
Na o kile wa ikwa o nyaka go dira mošomo o mogolo, eupša wa bona okare go thata go o dira? E le gore go be bonolo go dira mošomo woo, o be o ka swanelwa ke gore o o dire ganyenyaneganyenyane go fihlela o o fetša. Le go bala Beibele go no ba bjalo. O ka ipotšiša gore, ‘Nka thoma kae go e bala?’ Mo thutong ye, re tlo bolela ka dilo tše dingwe tše bonolo tšeo di tlago go go thuša gore o ipshine ka go bala Beibele le go ithuta yona.
1. Ke ka baka la eng re swanetše go bala Beibele ka mehla?
Motho yo a dulago a bala Beibele, goba “molao wa Jehofa,” o tla thaba e bile a atlega. (Bala Psalme 1:1-3.) O ka thoma go bala Beibele metsotso e sego kae letšatši le lengwe le le lengwe. Ge o dutše o tlwaelana le Lentšu la Modimo, o tlo ipshina ka go le bala.
2. O ka thušwa ke eng gore o holwe ke go bala Beibele?
Gore re holwe ke go bala Beibele, re swanetše go fela re emanyana, gomme re nagane ka seo re se balago. Se se ra gore re swanetše go e bala ka “lentšu la tlasana,” le go naganišiša ka seo re se balago. (Joshua 1:8) Ge o dutše o bala, ipotšiše gore: ‘Seo ke se balago se nthuta’ng ka Jehofa Modimo? Nka se diriša bjang bophelong bja ka? Nka diriša bjang ditemana tše go thuša ba bangwe?’
3. O ka dira eng gore o hwetše nako ya go bala Beibele?
Na o thatafalelwa ke go hwetša nako ya go bala Beibele? Ge e ba go le bjalo, ga se wena o nnoši. Leka go ‘diriša nako ya gago ka bohlale.’ (Baefeso 5:16) O ka dira seo ka gore o ipeele nako ya go bala Beibele letšatši le lengwe le le lengwe. Batho ba bangwe ba ipeetše nako ya gore ba bale Beibele e sa le mesong. Ba bangwe ba kgetha go e bala mosegare, nakong ya dijo tša bona tša matena. Mola ba bangwe ba e bala bošego pele ba ka robala. Wena o ka thabela go e bala neng?
ITHUTE KA MO GO TSENELETŠEGO
Ekwa gore o ka dira eng gore o ipshine ka go bala Beibele. Bona kamoo o ka lokišetšago gabotse ka gona gore o tle o holwe ke thuto ya gago ya Beibele.
Go no swana le ge motho a ithuta go rata dijo tša go fapafapana, le rena re ka ithuta go rata go bala Beibele
4. Ithute go thabela Beibele ge o e bala
Go thoma go bala Beibele go ka no se be bonolo. Eupša re ka ithuta go rata go e bala, go no swana le ge motho a ithuta go rata dijo tšeo a sa di tlwaelago. Balang 1 Petro 2:2, gomme le boledišaneng ka potšišo e latelago:
Na o nagana gore go bala Beibele letšatši le letšatši go ka go thuša gore o ipshine ka go e bala?
Bapalang BIDIO ye gomme le bone gore go tlile bjang gore batho ba bangwe ba thome go thabela go bala Beibele. Ke moka le boledišaneng ka dipotšišo tše di latelago:
Mo bidiong ye, ke mathata afe ao bafsa ba ilego ba a fenya gore ba kgone go bala Beibele?
Ba ile ba thušwa ke’ng gore ba tšwele pele ba bala Beibele ka mehla?
Ke’ng seo ba ilego ba se dira gore ba ipshine ka go bala Beibele?
Dilo tšeo di ka go thušago gore o thome go bala Beibele:
Kgetha go bala Beibele yeo e fetoletšwego ka tsela e nepagetšego, yeo e kwešišegago gabonolo. Leka go bala Beibele ya Phetolelo ya Lefase le Lefsa.
Thoma ka go bala karolo yeo o bonago e go kgahla kudu. Gore o kgone go bona gore o ka dira seo bjang, diriša tšhate yeo e rego “Bala Beibele Letšatši le Letšatši.”
Swaya moo o šetšego o badile gona. Diriša tšhate yeo e lego ka pukung ye yeo e rego, “Lebelela Moo o Tlago Gona Mmalong wa Gago wa Beibele.”
Diriša JW Library® go bala le go theetša Beibele ka maleme a mantši, go sa šetšwe gore o mo kae. O ka dira seo founong ya gago, goba sedirišweng le ge e le sefe sa elektroniki.
Diriša Pukwana ya Tlhahlo ya go Ithuta Lentšu la Modimo. E na le mebapa le ditšhate tšeo di tlago go go thuša gore o thabele go bala Beibele.
5. Lokišetša Thuto ya gago ya Beibele
Balang Psalme 119:34, gomme le boledišaneng ka potšišo e latelago:
Ke ka baka la’ng go le bohlokwa gore o rapele pele o ka bala Beibele, goba pele o ka lokišetša thuto ya gago ya Beibele?
O ka dira’ng gore o holwe ke thuto e nngwe le e nngwe ya Beibele? Ka mehla ge o lokišetša, leka go diriša ditšhišinyo tše di latelago:
Bala dirapa tšeo di lego mathomong, tšeo di tlago pele ga karolo yeo e rego, “Ithute ka mo go Tseneletšego.”
Lebelela mangwalo ao a lego ka pukung ya gago gomme o a bale go tšwa ka Beibeleng. Ke moka o leke go bona gore a sepedišana bjang le seo o se balago.
Thalela mantšu a bohlokwa ao a arabago potšišo e nngwe le e nngwe. Se se tla go thuša gore o kgone go boledišana le morutiši wa gago ka thuto yeo.
Na o be o tseba?
Dihlatse tša Jehofa di be di dutše di diriša diphetolelo tša go fapafapana tša Beibele. Eupša re thabela go diriša Beibele ya Phetolelo ya Lefase le Lefsa ya Mangwalo a Makgethwa ka gore e nepagetše, e kwešišega gabonolo, e bile e diriša leina la Modimo.—Bala sehlogo seo se lego wepesaeteng seo se rego “Na Dihlatse tša Jehofa di na le Beibele ya Tšona?”
BATHO BA BANGWE BA RE: “Go bala Beibele go boima. Ga ke na nako ya go e bala e bile e a tšwafiša!”
Wena o re’ng?
O ITHUTILE ENG?
Gore o ipshine ka go bala Beibele, ipeele nako ya go e bala, rapela Modimo gore a go thuše go e kwešiša, ke moka o lokišetše thuto e nngwe le e nngwe ya Beibele.
Dipotšišo
Ke’ng seo se ka go thušago gore o ipshine ka go bala Beibele?
O ka ipeela neng nako ya go bala le go ithuta Beibele?
Ke ka baka la’ng go le bohlokwa gore o lokišetše thuto e nngwe le e nngwe ya Beibele?
ITHUTE KA MO GO OKETŠEGILEGO
Ekwa tše dingwe tša ditšhišinyo tšeo di ka go thušago gore o thabele mmalo wa gago wa Beibele.
“Kamoo o ka Holwago ke go Bala Beibele” (Morokami wa No. 1 2017.)
Ekwa ditsela tše tharo tšeo di ka go thušago gore o kgone go bala Beibele.
“Beibele e ka Nthuša Bjang?—Karolo 1: Tseba Beibele ya Gago” (Sehlogo seo se lego wepesaeteng)
Bona kamoo o ka thabelago go bala Beibele.
Ekwa gore batho bao e lego kgale ba bala Beibele ba ile ba diriša ditšhišinyo dife.