Go Neelwa ga Lefelo la Thuto la Watchtower—Monyanya wa Jehofa

GA E sa le go tloga mehleng ya bogologolo, menyanya ya lethabo e be e dutše e le karolo ya borapedi bja therešo. E mengwe ya menyanya yeo e bego e binwa Isiraeleng ya bogologolo e be e tšea lebaka la matšatši gomme barapedi ba Jehofa ba dikete-kete ba be ba e-ba gona. Kgakolo ya tempele ya Salomo e ile ya tšea lebaka la matšatši a šupago gomme e ile ya latelwa ke Monyanya wa Mešaša wo o tšeago lebaka la botelele bja beke. Se se ile sa nea ba-Isiraele sebaka sa go lebiša tlhokomelo ya bona tseleng e kgahlišago yeo Jehofa a ilego a dirišana le bona ka yona. Ba ile ba boela gae ba “thabile, bà kwile bose ka tše botse ka moka tše Morêna a di [dirilego].”​—1 Dikxoši 8:​66.

Seo se ilego sa direga Lefelong la Thuto la Watchtower kua Patterson, New York, U.S.A., ka May 17-22, 1999 se ile sa gopotša baeng ka menyanya yeo ya lethabo ya bogologolo. Ye e be e le beke ya mediro e kgethegilego yeo e theilwego go kgakolweng ga meago e 28 yeo e reretšwego go phatlalatša thuto ya Beibele ya lefase ka bophara. Go be go dirilwe ditokišetšo bakeng sa ditho ka moka tše 5 400 tša bašomi ba ntlong-kgolo kua Brooklyn, Wallkill le Patterson bakeng sa go boga meago ya Patterson ka mo go feletšego bekeng yeo e sa lebalegego. Gare ga baeng go be go e-na le ba ka godimo ga 500 bao ba ilego ba ba le karolo modirong nakong ya ge go be go agwa lefelo la thuto, baemedi go tšwa makaleng a 23 a Mokgatlo wa Watch Tower le ba bangwe bao ba tšwago diphuthegong tša kgaufsi​—palo-moka ya bao e ka bago ba 8 100.

Diswantšho tša Leetong la go Boga di Nea Thuto

Diswantšho tše kgethegilego, dipontšho tša dibidio tše rutago le go boga lefelo ka ntle le go hlahlwa di ile tša rulaganywa bakeng sa go tlwaelanya baeng le lefelo la thuto. Bogorogelong bjo bogolo, baeng kapejana ba be ba gogelwa seswantšhong se swanago le sa tempele yeo e bego e le gona Jerusalema nakong ya bodiredi bja Jesu bja lefaseng. Diswantšho tše dingwe di be di bontšha histori ya pele ya Sekolo sa Beibele sa Watchtower sa Gilead, dikopano tše dikgolo, diboka tša phuthego, kgolo ya mehleng yeno ya dithuto tša magae tša Beibele​—tšeo tše dimilione tša tšona di swarwago bekeng e nngwe le e nngwe​—le modiro woo o dirwago ke Lefapha la tša Molao bakeng sa go dula ba butše tsela bakeng sa modiro o bjalo ka baka la go kwa taelo ya Jesu.​—Mateo 28:​19, 20.

Holong yeo e lego kgaufsi, yeo e dudišago batho ba 1 700 ka go iketla, bao ba bego ba etetše nakong ya monyanya wa kgakolo ba ile ba bontšhwa bidio ya metsotso e 33 e nago le sehlogo se se rego, “E Sego ka Matla​—Ka Moya Wa-ka!” Bidio ye e be e bontšha kamoo go tlilego ka gona gore Lefelo la Thuto la Watchtower le be gona. Dipoledišano di ile tša utolla ditiragalo tše di bontšhago gabotse tlhahlo ya Jehofa ditabeng le ditšhegofatšo tša gagwe maitekong a go phetha mošomo wo wa nywaga e 15 ka katlego. Ba dikete ba ile ba ba le karolo modirong wa kgonthe wa go aga. Nakong e nngwe ka 1994, go be go na le bašomi ba 526 lefelong la moago, go akaretša le baithapi ba nako e tletšego ba 350, bašomi ba nakwana ba 113 le ba 63 bao ba bego ba e-tla letšatši le lengwe le le lengwe bakeng sa go thuša. Ba bangwe ba bantši ba ile ba thekga modiro ka meneelo. Ka moka ga bona ba lemoga gore se se be se ka se ke sa kgonega ka ntle le moya wa Jehofa.​—Sakaria 4:6.

Bao ba ilego ba boga meago ba be ba kgona go bona gore modiro wo o bego o dirwa lefelong la thuto ke go phatlalatšwa ga thuto ya Modimo. Seswantšho se se lego bogorogelong bja Sekolo sa Gilead lebatong la pele la moago wa sekolo se be se bontšha ka bohwa bjo bo humilego bja moya le histori ya sekolo. Ga e sa le go tloga ka klase ya sona ya mathomo ka 1943 lefelong la sona la mathomo kua South Lansing, New York, Sekolo sa Gilead se tlwaeditše barutwana ba ka godimo ga 7 000 bakeng sa tirelo ya boromiwa. Diswantšho tše di lego lebatong la bobedi la moago wa sekolo di be di bontšha diswantšho tša Sekolo sa Ditho tša Dikomiti tša Makala le Sekolo sa Balebeledi ba Basepedi tšeo bobedi bja tšona di swarelago dithuto gona moo. Ga e sa le go tloga ge se thoma ka November 1995, sekolo sa makala se neile tlwaetšo e tšwelago pele bakeng sa ditho tša Dikomiti tša Makala tše 360 go tšwa dinageng tše 106.

Ge baeng ba dutše ba boga meago, ba ile ba lemoga kapejana gore mafelong a mantši ba be ba kgona go bona se se fetago diswantšho. Ba be ba kgona go ya ka go lebanya mafapheng a fapa-fapanego, ba etela diofisi le mafelo a mangwe a mošomo gomme ba hwetša pono e tseneletšego ya mošomo woo o dirwago moo. Selo seo se bego se kgahliša kudu go bogeng meago e be e le moago wa Tirelo ya tša Audio/Video. A didirišwa tše kgahlišago gakaakang tšeo di dirišetšwago go phatlalatša thuto ya Beibele! Ka tatelano ya diswantšho tšeo di rutago le dibidio tše kopana, baeng ba ile ba thušwa gore ba kwešiše kamoo kgatišo ya mantšu e dirwago ka gona le kamoo dibidio di lokišetšwago ka gona. Ba ile ba ithuta se sengwe ka nyakišišo e tseneletšego yeo e dirwago ge go dirwa tokišetšo ya didirišwa le diaparo. Ba ile ba bona kamoo dipeakanyo tša sethala di bego di kgoboketšwa ka gona ka tefo ya tlasana eupša e le ka kelohloko. Ba ile ba iponela kamoo mmino o dirišwago ka gona bakeng sa go dira gore batho ba ikwe ba le tiragalong yeo ba e bogetšego. Ga e sa le go tloga ka 1990 Mokgatlo o tšweleditše dibidio tše lesome ka maleme a 41, tšeo di bontšhago dihlogo tše di fapa-fapanego tša Beibele, go okeletša dibidiong tše dingwe tše di lego gona bakeng sa bao ba šomišago Polelo ya Diatla ya Amerika.

Ba bantši bao ba bego ba boga lefelo ba ile ba ya Laporatoring ya Diswantšho, Lefapheng la tša Bokgabo, Lefapheng la Ditirelo tša Boitsebišo leo le neago tlwaetšo ya computer le thekgo, Lefapha la Tirelo leo le hlokometšego mošomo wa diphuthego tše 11 242 le balebeledi ba basepedi ba 572 le Lefapha la tša go Ngwalelana moo go arabjago dipotšišo tše di lego mabapi le ditaba tše di fapa-fapanego tše ka bago 14 000 ngwaga o mongwe le o mongwe. Ba be ba kgahlilwe ke nyakišišo yeo e dirwago ye e lego ka mangwalong ao a romelwago ka ntle le go tshwenyega e le ka kgonthe mo go bontšhwago bakeng sa bao dinyakišišo tša bona di neago bohlatse bja gore ba katana le mathata a magolo.

Moloke-loke wo o sa kgaotšego wa bao ba tlilego go boga lefelo o ile wa etela lefapha la Ditirelo tša Bofetoledi. Ba ile ba makatšwa ke go kwa gore nywageng e mehlano e fetilego, maleme a 102 a oketšegilego a ile a tlaleletšwa palong ya ao Mokgatlo o abago dipuku tša Beibele ka ona. Lefaseng ka bophara, Dihlatse tša Jehofa tše ka bago 80 lekgolong di bala dikgatišo tša Mokgatlo ka maleme a mangwe ka ntle le Seisemane. Bakeng sa go kgotsofatša dinyakwa tša bona, go na le baithapi ba ka godimo ga 1 700 bao ba šomago lefapheng la bofetoledi dinageng tše 100. Go be go na le diswantšho tše di bontšhago Morokami ka maleme a dinaga tša Amerika, Yuropa, Asia le Afrika. Baeng ba ile ba kgona go bona Beibele ya New World Translation ka maleme a 31 ao e šetšego e gatišitšwe ka wona. Ba ile ba kwa gore dikgatišo tša Watch Tower ga bjale di hwetšagala ka maleme a 332 le gore poroutšha ya Ke Eng Seo Modimo a se Nyakago go Rena? e gatišitšwe ka maleme a 219 a wona.

Baeng Lefapheng la tša Molao ba ile ba bontšhwa dikarolo tše di fapa-fapanego tša modiro tšeo di nyakago tlhokomelo ya tša molao lefaseng ka moka. Bidiong ba ile ba bona tsheko ya kgonthe yeo go yona ramolao wa Hlatse a bego a nganga ka molato o akaretšago tšhelo ya madi. Ba ile ba ba ba ithuta ka seo se dirwago tabeng ya go boloka tsela e bulegile bakeng sa go ruta ditaba tše di lokilego phatlalatša. (Ba-Filipi 1:7) Tlhokomelo e ile ya lebišwa phethong yeo e dirilwego ka March wona ngwageng wo ke kgoro ya selete ya mmušo ka go laela motse wa Oradell, New Jersey, U.S.A., gore o fetoše melao ya wona e le gore o tloše go nyakega ga go hwetša tumelelo le dipetšhe bakeng sa Dihlatse tša Jehofa tšeo di nyakago go tšea karolo bodireding bja tšona bja phatlalatša ka ntlo le ntlo setšhabeng seo.

Se e be e se sohle seo baeng ba se bonego. Ba ile ba lebeledišiša diswantšho tša meago Lefapheng la Meago yeo e sa agwago gomme ba bona le meago ya Tlhwekišo ya Meetse a Šilafetšego, Ngwako wa Matla a Mohlagase, Lefelo leo go Nolofatšwago Meetse go lona le mafapha a mmalwa a tša go lokiša, gare ga tše dingwe. Se e be e le sebaka sa moswana-noši.

Lenaneo la Kgakolo le Gatelela Thuto ya Modimo

Lenaneo la kgonthe la kgakolo le ile la swarwa ka Laboraro, May 19, go thoma ka 4:​00 thapama. Lešaba le le thabilego la ba 6 929 le be le akaretša ditho tša bašomi ba ntlong-kgolo, baeng ba Mokgatlo le ba 372 bao ba bego ba bokane lekaleng la Canada leo le bego le kgokagantšwe ka thulaganyo ya megala.

Batheetši ba be ba thabile e le ka kgonthe go kwa mantšu a ruthetšago pelo a kamogelo ka Milton G. Henschel, mopresidente wa Mokgatlo wa Watch Tower. Theodore Jaracz, setho sa Sehlopha se Bušago le yo e bego e le modula-setulo bakeng sa tiragalo yeo, ka morago o ile a rola William Malenfant. Ge a neela “Dintlha-kgolo tša Lenaneo la go Aga,” o ile a boledišana le banababo rena ba bararo bao ba kgathilego tema e bohlokwa kgatelo-peleng, thulaganyong le go agweng ga Lefelo la Thuto la Watchtower. Ge dipoledišano di dutše di tšwela pele, go ile gwa begwa gore nywageng ya ge go be go agwa, baithapi ba nakwana ba ka godimo ga 8 700 ba ile ba tla ka ditshenyagalelo tša bona ka noši bakeng sa go tla go šoma modirong woo. A bohlatse bjo bobotse gakaakang bja botee le go fa kudu moo go ilego gwa kgonega ka thuto ya Modimo!

Ka morago go ile gwa latela tšhiedišano e nago le sehlogo se se rego, “Thuto ya Modimo Tekanyong ya Lefase ka Bophara.” E ile ya neelwa ke ditho tše nne tša Sehlopha se Bušago. John E. Barr o ile a gatelela gore thuto ya Modimo e hwetša motheo wa yona Lentšung la Modimo, Beibele, leo le kgothaletšago Bakriste gore ba ‘enywe dienywa ka mediro e botse yohle, ba tšwelele pele tsebong ya go tseba Modimo.’ (Ba-Kolose 1:​10) Daniel Sydlik o ile a ahla-ahla kamoo thuto ya Modimo e rulagantšwego ka gona go ya ka pušo ya Modimo go tloga ka hlogo ya phuthego ya Bokriste, Jesu Kriste go theogela fase go fihla ka setho se sengwe le se sengwe sa borwarre bja lefase ka bophara. (1 Ba-Korinthe 12:​12-27) Dikarolo tše pedi tša go phetha tša tšhiedišano tšeo di neilwego ke Gerrit Lösch le Carey Barber, di bontšhitše kamoo thuto ya Modimo e kgontšhago badiredi gore ba swanelegele go fihlelela batho kae le kae le go ba ruta e le gore le bona ba ka sepela tseleng ya Modimo.​—Jesaya 2:​1-4; 2 Ba-Korinthe 3:5.

Bakeng sa go tsebiša batheetši ka dikolo tše di fapa-fapanego tšeo di swarwago lefelong le la thuto, dipoledišano di ile tša swarwa le bahlahli gotee le ba bangwe bao ba bego ba akaretšwa go šomeng ga tšona. Tema yeo e kgathwago ke sekolo se sengwe le se sengwe bakeng sa go tšwetša pele lenaneo la thuto ya Modimo tekanyong ya lefase ka moka e ile ya bontšhwa. Go ile gwa bontšhwa gore Sekolo sa Gilead se lebiša tlhokomelo go ithuteng puku e nngwe le e nngwe ya Beibele, historing ya mehleng yeno ya batho ba Jehofa le tokišetšo bakeng sa tirelo ya boromiwa. Sekolo sa makala ke thuto e nabilego ka mo go kgahlišago e nago le dikarolo tše dintši tša modiro tšeo ditho tša Dikomiti tša Makala di akaretšwago go tšona. Sekolo sa Balebeledi ba Basepedi se hlametšwe e sego feela go tlatša dinyakwa tša banababo rena ba basepedi eupša gape le go ba hlamela gore ba nee mohuta wa thušo ya moya yeo ka mo go kgethegilego e tlago go hola diphuthego.

Bakeng sa go phetha lenaneo le lebotse, Lloyd Barry wa Sehlopha se Bušago o ile a neela polelo ya kgakolo ka sehlogo se se rego, “Go Aga le Mmopi wa Rena yo Mogolo.” O ile a bontšha gore Mmopi, Jehofa o thabišwa ke tlholo ya gagwe ka moka gomme o re laletša go tla go thaba le yena. (Jesaya 65:​18) Ka ge ‘mo-aga-tšohle e le Modimo,’ tumišo yohle e swanetše go išwa go Jehofa Modimo bakeng sa modiro wo ka moka wa go aga. (Ba-Hebere 3:4) Ka morago ga go bolela dikgopolo tšeo, seboledi se ile sa rapela go tšwa pelong, sa neela Lefelo la Thuto la Watchtower go Jehofa, Mmopi wa rena yo Mogolo.a

Ga go na pelaelo gore monyanya wa beke ka moka o tla gopolwa ka nako e telele ke bao ba bilego gona go wona. Ke ka baka la’ng o sa rulaganyetše go etela Lefelo la Thuto la Watchtower? Re kgodišegile gore go etela le go boga meago e tla ba kgothatšo go wena maitekong a gago a go ithuta ka mo go oketšegilego ka Mmopi wa rena yo lerato le go phela ka ditekanyetšo tša gagwe tša go loka.

[Mengwalo ya tlase]

[Seswantšho go letlakala 10]

Lefelo la madulo leo le tletšego wa go falala le batheetši ba bantši-ntši phapošing ya bojelo

[Seswantšho go letlakala 10]

Go boga meago e be e le tiragalo e thabišago ka mo go kgethegilego