Gopola Mmopi Wa Gago Yo Mogolo!

“Xopola Mmopi wa xaxo [yo Mogolo, NW] . . . , xò sešo xwa fihla matšatši a mabe.”​—MMOLEDI 12:1.

1. Bafsa bao ba ineetšego go Modimo ba swanetše ba rate go diriša bofsa bja bona le matla a bona bjang?

JEHOFA o nea bahlanka ba gagwe matla a go dira thato ya gagwe. (Jesaya 40:​28-31) Se ke sa therešo go sa šetšwe bogolo bja bona nywageng. Eupša bafsa bao ba ineetšego go Modimo ba swanetše ka mo go kgethegilego ba rate go diriša bofsa bja bona le matla a bona ka bohlale. Ka gona, ba ela hloko keletšo ya “mokgoboketši,” Kgoši Salomo wa Isiraele ya bogologolo. O kgothaleditše gore: “Xopola Mmopi wa xaxo [yo Mogolo, NW] Ò sa le yo mofsa, xò sešo xwa fihla matšatši a mabe, xò sešo xwa tla nywaxa ye O tl’o xo re: Xa e na tše di nthabišaxo!”​—Mmoledi 1:1; 12:1.

2. Bana ba Bakriste ba ineetšego ba swanetše go dira’ng?

² Keletšo ya Salomo mabapi le go gopola Mmopi yo Mogolo bofseng e thomile ka go lebišwa go masogana le makgarebe a Isiraele. Ba be ba belegelwa setšhabeng se se ineetšego go Jehofa. Go thwe’ng ka bana ba Bakriste ba ineetšego lehono? Ruri, ba swanetše go gopola Mmopi wa bona yo Mogolo. Ge ba dira bjalo, ba tla mo hlompha e bile ba tla ikhola.​—Jesaya 48:​17, 18.

Mehlala e Mebotse ya Nakong e Fetilego

3. Josefa, Samuele le Dafida ba ile ba bea mehlala ya mohuta mang?

³ Bafsa ba bantši ba lego pegong ya Beibele ba bea mehlala e mebotse e le bao ba ilego ba gopola Mmopi wa bona yo Mogolo. Go tloga bjaneng go ya pele, Josefa, morwa wa Jakobo, o ile a gopola Mmopi wa gagwe. Nakong ya ge mosadi wa Potifara a leka Josefa gore a kopanele le yena boitshwarong bjo bo sa hlwekago bja botona le botshadi, Josefa o ile a gana ka go tia gomme a re: “Nka dira bya’ng bobe byo boxolo byoo ka senya pele xa Modimo?” (Genesi 39:9) Samuele wa mo-Lefi o ile a gopola Mmopi wa gagwe e sego bjaneng bja gagwe feela eupša le bophelong bja gagwe ka moka. (1 Samuele 1:​22-28; 2:​18; 3:​1-5) Dafida wa mofsa wa Betlehema ruri o ile a dula a gopola Mmopi wa gagwe. Go bota ga gagwe Modimo go ile gwa bonagala nakong ya ge a be a lebane le senatla sa mo-Filisita Goliata gomme a re: “O tla fá ka thšoša le ka lerumô, le ka kôtsê. Xe e le nna ke tlile fá ka ’ina la Morêna wa Mašaba, Modimo wa dirá tša Isiraele tše O bexo O di roxa. Lehono Morêna ó tlo Xo xafêla ’atleng sa-ka, ka Xo bolaya ka Xo kxaola hlôxô. . . . Xore lefase ka moka le tsebê xe xo Isiraele xò na le Modimo. Le lešaba lé ka moka le tlo lemoxa xobane Morêna xa’ thuše ka thšoša le ka lerumô. Thlabanô yé ké ya Morêna. O tlo Le xafêla diatleng tša rena.” Go se go ye kae, ke ge Goliata a hwile gomme ba-Filisita ba ile ba tšhaba.​—1 Samuele 17:​45-51.

4. (a) Ke eng se se bontšhago gore Mmopi wa rena yo Mogolo o ile a gopolwa ke ngwanenyana wa lethopša wa mo-Isiraele kua Siria gotee le Kgoši Josia wa mofsa? (b) Jesu wa nywaga e 12 o ile a bontšha bjang gore o be a gopola Mmopi wa gagwe?

⁴ Mofsa yo mongwe yo a ilego a gopola Mmopi yo Mogolo ke ngwanenyana wa lethopša wa mo-Isiraele. O ile a nea bohlatse bjo bobotse kudu go mosadi wa tona ya madira a Siria Naamane mo e lego gore tona e ile ya ya go moporofeta wa Modimo, ya fodišwa lephera gomme ya ba morapedi wa Jehofa. (2 Dikxoši 5:​1-19) Kgoši Josia wa mofsa o ile a kgothaletša borapedi bjo bo sekilego bja Jehofa ka sebete. (2 Dikxoši 22:1–23:​25) Eupša mohlala o mobotse-botse wa motho yo a ilego a gopola Mmopi wa gagwe yo Mogolo e sa le yo monyenyane kudu ke Jesu wa Natsaretha. Ela hloko seo se ilego sa direga ge a be a e-na le nywaga e 12. Batswadi ba gagwe ba ile ba ya le yena Jerusalema Pasekeng. Ge ba le tseleng ya go boa, ba ile ba hlokomela gore Jesu o be a se gona; ka gona ba ile ba boela morago gore ba yo mo nyaka. Letšatšing la boraro, ba ile ba mo hwetša a ahla-ahla dipotšišo tša Mangwalo le barutiši ka tempeleng. Ge a arabela mmagwe yo a bego a tshwenyegile, Jesu o ile a botšiša gore: “Le be Le re’ng Lè nnyaka? A Le be Le sa tsebe xe ke swanetše xo ba mo xo tšé tša Tate?” (Luka 2:​49) E be e le mo go holago gore Jesu a hwetše tsebišo ya dilo tša moya tempeleng, ‘ngwako wa Tatagwe.’ (Bapiša le NW.) Lehono, Holo ya Mmušo ya Dihlatse tša Jehofa ke lefelo le lebotse kudu leo go ka hwetšwago tsebo e nepagetšego ya Mmopi wa rena yo Mogolo go lona.

Gopola Jehofa Gona Bjale!

5. O be o ka hlalosa bjang ka mantšu a gago seo se boletšwego ke mokgoboketši bjalo ka ge se ngwadilwe go Mmoledi 12:1?

⁵ Morapedi wa Jehofa yo a mo rapelago ka pelo ka moka o rata go tsenela tirelo ya Gagwe gatee-tee ge go kgonega le go hlankela Modimo matšatši ka moka a bophelo bja gagwe. Lega go le bjalo, motho yo a dirišetšago bofsa bja gagwe lefeela ka ge a sa gopole Mmopi o na le ditebelelo dife? Ka tlase ga pudulelo ya Modimo mokgoboketši o re: “Xopola Mmopi wa xaxo [yo Mogolo, NW] Ò sa le yo mofsa, xò sešo xwa fihla matšatši a mabe, xò sešo xwa tla nywaxa ye O tl’o xo re: Xa e na tše di nthabišaxo!”​—Mmoledi 12:1.

6. Go na le bohlatse bofe bja gore Simeone le Anna bao ba tšofetšego ba ile ba gopola Mmopi wa bona yo Mogolo?

⁶ Ga go na yo a thabelago “matšatši a mabe” a botšofadi. Eupša batšofadi bao ba dulago ba gopola Modimo ba thabile. Ka mohlala, Simeone yo a tšofetšego o ile a kuka lesea Jesu tempeleng gomme a goeletša ka lethabo gore: “Mong’a-ka! Ké xôna xe O hunolla mohlanka wa xaxo, xore a ikêlê à wile pelo byalo ka xe O boletše. Xobane mahlô a-ka a bone phološô ya xaxo, Ye O e beilexo ya tlo bônwa ke dithšaba tšohle. E le seetša se-iša-kutollô-xo-ba-ntlê, sa xo retiša sethšaba sa xaxo sa Isiraele.” (Luka 2:​25-32) Anna wa nywaga e 84 le yena o ile a gopola Mmopi wa gagwe. O be a phela a le tempeleng gomme o be a le gona ge lesea Jesu le be le išwa moo. “Le yêna a batamêla ka lôna lebaka leo, a êma, a rêta Morêna, a bolêla yêna ngwana eo xo bohle ba Jerusalêma ba bexo ba letetše khunoloxô.”​—Luka 2:​36-38.

7. Boemo bja bao ba tšofaletšego tirelong ya Modimo ke bofe?

⁷ Dihlatse tša Jehofa tša mehleng yeno tšeo di tšofaletšego tirelong ya Modimo di ka tlaišwa ke dihlabi le mafokodi a go tšofala kudu. Lega go le bjalo, di thabile gakaakang, gomme re leboga gakaakang tirelo ya tšona e botegago! Di na le “lethabo la Jehofa,” ka gobane di tseba gore o diriša matla a gagwe ao a sa fenyegego lefaseng le e bile o hlomile Jesu Kriste e le Kgoši e matla ya legodimong. (Nehemia 8:​10, NW) Bjale ke nako ya gore ba bagolo le ba banyenyane ba kwe keletšo ye: “Lena masoxana le lena basetsana, ba baxolo le ba bafsa, bohle a ba rêtê ’ina la Morêna, xobane ’ina la xaxwe ké lôna ’ina-lephaxami lè le nnoši; letaxô la xaxwe le ukametše ’fase lé le maxodimo.”​—Psalme 148:​12, 13.

8, 9. (a) “Matšatši a mabe” ke ao a sa putsego go bomang, gomme ke ka baka la’ng go le bjalo? (b) O be o ka hlalosa bjang Mmoledi 12:2?

⁸ “Matšatši a mabe” a botšofading ga a putse​—mohlomongwe e bile ke ao a gateletšago—​go bao ba sa naganego ka Mmopi wa bona yo Mogolo e bile ba sa kwešiše merero ya gagwe ya letago. Ga ba na kwešišo ya moya yeo e ka leka-lekanyago diteko tša botšofadi le madimabe ao a wetšego batho ga e sa le ge Sathane a rakwa legodimong. (Kutollo 12:​7-12) Ka gona, mokgoboketši o re kgothaletša gore re gopole Mmopi wa rena “letšatši lè sešo la fifala moká xotee le seedi le kxwedi le dinaledi, xe xo tlo boa maru mola pula è fetile.” (Mmoledi 12:2) Ke eng seo se bolelwago ke mantšu a?

⁹ Salomo o swantšha matšatši a bofsa le lehlabula la Palestina nakong ya ge letšatši, kgwedi le dinaledi di hlabiša seetša sa tšona leratadimeng le le apogilego. Ka nako yeo dilo di bonala di tagile kudu. Lega go le bjalo, botšofading, matšatši a motho a swana le sehla sa marega se se tonyago le sa pula, moo mathata a tšhologago ka go latelelana. (Jobo 14:1) E tla ba mo go nyamišago gakaakang gore motho a tsebe ka Mmopi fela a palelwe ke go mo hlankela lehlabuleng la bophelo bja gagwe! Nakong ya bophelo ya marega ya botšofadi, dilo di a fsifala, kudu-kudu go bao ba ilego ba phaela ka thoko dibaka tša go hlankela Jehofa bofseng bja bona ka baka la go swarega ka tsela e se nago mohola go phegeleleng dilo tša lefeela. Lega go le bjalo, go sa šetšwe bogolo bja rena nywageng, a re ‘lateleng Morena ka botlalo,’ go etša ge Kalebe yo a botegago, e lego mogwera yo a botegago ka go se kwanantšhe wa moporofeta Moše a ile a dira.​—Jošua 14:​6-9.

Mafelelo a go Tšofala Kudu

10. Ke eng seo se emelwago ke (a) “baleti ba ngwako”? (b) “banna ba matla”?

¹⁰ Salomo gape o šupa mathata “mohlang o baleti ba ngwako ba tlog’o thothomela, gomme le banna ba matla ba tlog’o khokhoba, le basadi ba bašidi ba tlog’o hloka modiro, gobane ba diregile ba ba sego nene; gomme ba ukamelago ka difenstere ba fifala.” (Mmoledi 12:​3, PK) “Ngwako” o šupa mmele wa motho. (Mateo 12:​43-45; 2 Ba-Korinthe 5:​1-8) “Baleti” ba wona ke matsogo le diatla, tšeo di šireletšago mmele le go o nea tše o di nyakago. Botšofading gantši di a thothomela ka baka la go fokola, go tšhoga le go golofala. “Banna ba matla”​—maoto​—ga e sa hlwa e le dikokwane tše tiilego eupša ba gwahlafetše gomme ba kobegile mo e lego gore dinao di a gogwa. Lega go le bjalo, na ga o thabele go bona badumedi-gotee ba tšofetšego ba le gona dibokeng tša Bokriste?

11. Ge go bolelwa ka tsela ya seswantšhetšo, “basadi ba bašidi” le “ba ba ukamelago ka difenstere” ke bomang?

¹¹ ‘Basadi ba bašidi ba tlo hloka modiro ka ge e le ba sego nene’​—eupša bjang? Meno a ka be a bodile goba a tšwile gomme go šetše a sego kae feela ge e ba go šala gona a sa šetše. Go sohla dijo tše tiilego go direlwa thateng goba go kgaotša ka mo go feletšego. “Ba ba ukamelago ka difenstere”​—mahlo ao a sepedišanago le matla a monagano ao re bonago ka ona​—a a fsifala, ge e ba a sa timele sa ruri.

12. (a) “Dimati tša mejako ya ka ntle” di tswalelwa bjang? (b) O nagana’ng ka bagoeledi ba Mmušo ba ba tšofetšego?

¹² Mokgoboketši o tšwela pele ka gore: “Ge dimati tša mejako ya ka ntle di tswalelwa, le go kwala ga lwala go fokola, ge motho a tsoga, nonyana e sa lla, le basetsana ba baopedi ba kwalela thateng.” (Mmoledi 12:​4, PK) Mabati a mabedi a molomo​—dipounama​—ga a sa bulega kudu goba le gona go bulega gore a bolele seo se lego ka ‘ngwakong’ goba mmeleng wa bao ba tšofetšego kudu bao ba sa hlankelego Modimo. Ga go na seo se romelwago “ka ntle” moo go phelago batho bohle. Lega go le bjalo, go thwe’ng ka bagoeledi ba ba tšofetšego ba mafolofolo ba Mmušo? (Jobo 41:​14) Ba ka ba ba sepela ka go nanya ba e-ya ka ntlo le ntlo gomme ba bangwe ba ka ba ba thatafalelwa ke go bolela, eupša ruri ba reta Jah!​—Psalme 113:1, bapiša le NW.

13. Mokgoboketši o hlalosa bjang mathata a mangwe a batšofadi, eupša therešo ke efe ka Bakriste ba godilego?

¹³ Modumo wa lwala o a fokola ka ge dijo di sohlwa ka marinini. Motšofadi ga a robale ka go iketla malaong a gagwe. O hlobaetšwa le ke go tswirinya ga nonyana. Ga a sa na dikoša tše dintši tšeo a di opelago, gomme ga a sa kgona go hlaba molodi le ge e le ofe. “Basetsana ba baopedi”​—melodi​—“ba kwalela thateng.” Tsela ya motšofadi ya go kwa mmino le melodi yeo e ntšhwago ke ba bangwe e a fokola. Lega go le bjalo, batšofadi ba tloditšwego gotee le bagwera ba bona, bao ba bangwe ba bona ka mo go swanago e sego ba bafsa gakaalo, ba tšwela pele ba hlabeletša mantšu a bona dikošeng tša tumišo go Modimo dibokeng tša Bokriste. Re thabela gakaakang go ba le bona hleng ga rena, ba godiša Jehofa phuthegong!​—Psalme 149:1.

14. Batšofadi ba tshwenywa ke dipoifo dife?

¹⁴ Bophelo bja batšofadi, kudu-kudu bao ba ilego ba hlokomologa Mmopi, ke bjo bo nyamišago gakaakang! Mokgoboketši o re: “Mokonya ké xe o boifya, tsela e na le tše di šiišaxo, mohlare wa Mokxóba o palexile matšobana; tšiê xa e sa pharuma [“e a ikgoga,” NW], motsefô wa senokô xa o sa kwêlêla. Ké tša mehla motho à e-ya ngwakong wa xaxwe e lexo wa neng le neng; baledi ba šetše ba potoloxa le mekxôba.” (Mmoledi 12:5) Bontši bja batšofadi ge ba le manamelong a godimo-godimo ba boifa gore ba tla wa. Gaešita le go lebelela selo se se lego godimo go ba swariša samadikwe. Ge ba swanetše go tšwela ka ntle ditarateng tšeo di hlokago le botshwelo bja mare, ba a tšhoga ge ba nagana ka go gobala goba go hlaselwa ke mahodu.

15. Ke bjang go ka thwego “mokxóba o palexile matšobana,” gomme tšie e ‘ikgoga’ bjang?

¹⁵ Tabeng ya motšofadi, “mokxóba o palexile matšobana,” seo mohlomongwe se bontšha gore meriri ya gagwe e a pudufala ke moka e šweufale. Meriri e mepududu e wa bjalo ka matšobana a mašweu a mokgoba. Ge a dutše ‘a ikgoga,’ mohlomongwe a kobegile gomme a lekeleditše matsogo goba a itshwere dinoka gomme ditšu di lebeletše godimo, o etša tšie. Lega go le bjalo, ge e ba le ge e le mang wa rena a bonagala bjalo ganyenyane, ba bangwe a ba lemoge gore re madireng a Jehofa a ditšie tše matla le tše nago le lebelo!​—Bona Morokami wa May 1, 1998, matlakala 8-13.

16. (a) Ke eng seo se bolelwago ke ‘go se kwelele ga senoko’? (b) ‘Ngwako wa neng le neng’ wa motho ke eng, gomme ke ditšhupo dife tša lehu leo le batamelago tšeo di thomago go bonagala?

¹⁶ Kganyogo ya dijo ya motšofadi ga e sa le e matla, gaešita le ge dijo tše di lego ka pele ga gagwe di tsefa wa senoko. Dinoko tše ke kgale di dirišetšwa go tsoša kganyogo ya dijo. ‘Go se kwelele ga senoko’ go bolela gore ge kganyogo ya dijo ya motšofadi e hwelela, gaešita le senoko se se palelwa ke go tsoša kganyogo ya gagwe ya go kganyoga dijo. Dilo tše bjalo di bontšha gore o ukametše ‘ngwako wa gagwe wa neng le neng,’ e lego lebitla. E tla ba legae la gagwe ka mo go sa felego ge e ba a ile a palelwa ke go gopola Mmopi wa gagwe gomme a phegeletše tsela e kgopo mo e lego gore Modimo ga a mo gopole tsogong. Ditšhupo tša lehu le le batamelago di bonagatšwa ke mantšu a maswabi le go tsetsela a go ngongorega ao a tšwago mejakong ya molomo wa motšofadi.

17. “Lenti la gauta” le kgaoga bjang, gomme “sebjana sa gauta” se ka ba se emela’ng?

¹⁷ Re kgothaletšwa gore re gopole Mmopi wa rena “pele ga ge lenti la silifera le sešo la kgaoga, le sebjana sa gauta se sešo sa pšhatlwa, le moeta o sešo wa phumega sedibeng, le lebile la go goga meetse le sešo la šogaganela ka sedibeng.” (Mmoledi 12:​6, PK) “Lenti la silefera” e ka ba e le mongetsane. Go hwa go kgonthišeditšwe ge e ba tsela ye e kgahlišago ya go fetišetša maikwelo bjokong e senyegela sa ruri. “Sebjana sa gauta” se ka no šupa bjoko bjo bo rwelwego ke legata le le swanago le sebjana, bjo mongetsane o kgomagantšwego le bjona. Go ba ga bjona bjo bohlokwa wa gauta, bjoko ge bo senyegile bo feleletša ka lehu.

18. ‘Moeta wa sedibeng’ wa seswantšhetšo ke eng, gomme go direga eng ge o phumegile?

¹⁸ ‘Moeta sedibeng’ ke pelo, yeo e amogelago moela wa madi gomme ya o romela ka ntle gape gore o dikologe le mmele ka moka. Lehung, pelo e etša moeta o phumegilego, o pšhatlaganego sedibeng ka gobane ga e sa hlwa e kgona go amogela, go rwala le go pompela madi ao a nyakegago ka ntle bakeng sa go fepa mmele le go o lapološa. ‘Lebile la go goga meetse le le šogaganego’ le kgaotša go dikologa, gomme le kgaosetša modikologo wa madi ao a thekgago bophelo. Ka go rialo Jehofa o ile a utollela Salomo ka modikologo wa madi lekgolong la bo-17 la nywaga pele ga ge ngaka William Harvey a bontšha gore madi a dikologa.

19. Mantšu a Mmoledi 12:7 a šoma bjang lehung?

¹⁹ Mokgoboketši o okeditše ka gore: “Lerole le boêla fase mo le tšwaxo xôna; môya o boêla xo Modimo E a o neilexo motho.” (Mmoledi 12:7) Ka ge “lebile la go goga meetse” le šogagane, mmele wa motho, woo mathomong o bopilwego ka lerole la lefase, o boela leroleng. (Genesi 2:7; 3:​19) Moya (soul) o a hwa ka gobane moya (spirit) goba matla a bophelo woo o newago ke Modimo o boela go Mmopi wa rena e bile o dula le yena.​—Hesekiele 18:​4, 20; Jakobo 2:26.

Bokamoso Bakeng sa Bao ba Gopolago ke Bofe?

20. Moše o be a kgopela eng ge a be a rapela ka mo go ngwadilwego ka gona go Psalme 90:12?

²⁰ Salomo o ile a bontšha gabotse kudu kamoo go gopola Mmopi wa rena yo Mogolo go lego bohlokwa ka gona. Ee, bophelo bjo bokopana kudu le bjo bo tletšego mathata ga se bjona feela bjo bo lego gona bakeng sa bao ba dulago ba gopola Jehofa gomme ba dira thato ya gagwe ka pelo ka moka. E ka ba e le ba bafsa goba ba bagolo, ba na le boemo bja kgopolo bjo bo swanago le bja Moše yo a rapetšego ka gore: “Re rutê xo bala matsatši a rena, re fiwê pelo tše bohlale.” Moporofeta wa Modimo yo a ikokobeditšego o be a kganyoga e le ka kgonthe gore Jehofa a bontšhe goba a rute yena le batho ba Isiraele go diriša bohlale tabeng ya go hlompha ‘nywaga ya bona’ le go e diriša ka tsela yeo e amogelwago ke Modimo.​—Psalme 90:​10, 12.

21. Re swanetše go dira eng ge e ba re nyaka go bala matšatši a rena bakeng sa go tumiša Jehofa?

²¹ Bafsa ba Bakriste ba swanetše ka mo go kgethegilego ba ikemišetše go kwa keletšo ya mokgoboketši ya go gopola Mmopi. Ba na le dibaka tše di kgahlišago gakaakang tša go nea Modimo tirelo e kgethwa! Lega go le bjalo, go sa šetšwe bogolo bja rena nywageng, ge e ba re ithuta go bala matšatši a rena bakeng sa go tumiša Jehofa ‘mehleng ye ya bofelo,’ re ka kgona go dula re a baletše sa ruri. (Daniele 12:4; Johane 17:3) Ee, go nyakega gore re gopole Mmopi wa rena yo Mogolo gore re dire bjalo. Gape re swanetše go phetha tlamo yohle ya rena go Modimo.

O be o tla Araba Bjang?

◻ Ke ka baka la’ng bafsa ba kgothaletšwa gore ba gopole Mmopi wa bona?

◻ Mehlala e mengwe ya ka Mangwalong ya bao ba ilego ba gopola Mmopi wa bona yo Mogolo ke efe?

◻ Mafelelo a mangwe a botšofadi ao a hlaloswago ke Salomo ke afe?

◻ Ke bokamoso bofe bjo bo lego gona bakeng sa bao ba gopolago Jehofa?

[Seswantšho go letlakala 15]

Dafida, ngwanenyana wa lethopša wa mo-Isiraele, Anna le Simeone ba ile ba gopola Jehofa

[Seswantšho go letlakala 16]

Dihlatse tša Jehofa tše di tšofetšego di nea Mmopi wa rena yo Mogolo tirelo e kgethwa ka lethabo