O na le Lebaka la go Thaba

TLHOLO e bontšha gore e rulagantšwe gabotse, go thoma seleng e nyenyane kudu go fihla melalatlading e megolo ya dinaledi yeo e lego ka dihlopha tše dinyenyane le tše dikgolo. Se ga se makatše, gobane Mmopi wa rena “ga se Modimo wa tlhakatlhakano.” (1 Bakor. 14:33) Thulaganyo ya borapedi yeo Modimo a e dirilego le yona e a kgahliša. Ela hloko dilo tšeo Jehofa a di dirilego. O dirile gore legohleng le letee go be le dibopiwa tše bohlale tše makgolo a dimilione—dibopiwa tša nama le tša moya—tšeo di nago le tokologo ya boikgethelo e bile di le boteeng borapeding bjo bo sekilego. Ruri se se a kgahliša!

Isiraeleng ya bogologolo, karolo ya lefaseng ya mokgatlo wa Modimo e be e emelwa ke Jerusalema, moo tempele ya Jehofa e bego e le gona e bile go dula le kgoši ya gagwe e tloditšwego. Ge Moisiraele yo a bego a le bothopša Babilona a be a bontšha kamoo a ikwago ka gona ka motse o mokgethwa, o itše: “Anke leleme la ka le nkgomarele magalagapa, ge e ba nka se go gopole, ge e ba nka se phagamiše Jerusalema ya feta lebaka la ka le legolo la go thaba.”—Ps. 137:6.

Na ye ke tsela yeo o ikwago ka yona ka mokgatlo wa Modimo lehono? Na o go thabiša go feta selo le ge e le sefe? Na bana ba gago ba kwešiša histori le morero wa karolo ya lefaseng ya mokgatlo wa Modimo? Na ba tseba le go kwešiša gore ba bopa karolo ya borwarre bja lefase ka bophara bja Dihlatse tša Jehofa? (1 Pet. 2:17) O re’ng o sa diriše ditšhišinyo tše di latelago mantšiboeng a lena a Borapedi bja Lapa go godiša tebogo yeo lapa la gago le nago le yona ka mokgatlo wa Jehofa?

Gopola ‘Mehla ya Kgalekgale’

Ngwaga le ngwaga, malapa a Baisiraele a be a bokana go keteka Paseka. Ge go be go thongwa go gopola monyanya wo, Moshe o ile a laela batho gore: “E tla re ge morwa wa gago ka morago a ka go botšiša a re: ‘Se se ra go reng?’ O mmotše o re: ‘Jehofa o re ntšhitše Egipita ka seatla se matla moo re bego re le makgoba gona.’” (Ek. 13:14) Tsela yeo Jehofa a bego a dirišana le Baisiraele ka yona ga se ya swanela go ba histori feela. Mohlomongwe botate ba bantši ba Baisiraele ba ile ba latela taelo ya Moshe. Melokong e mentši ka morago, Moisiraele yo mongwe o ile a rapela ka gore: “Wena Modimo, re kwele ka ditsebe tša rena, borakgolokhukhu ba rena bona ba re anegetše tša modiro wo o o dirilego mehleng ya bona, mehleng ya kgalekgale.”—Ps. 44:1.

Mofsa wa lehono a ka lebelela histori ya Dihlatse tša Jehofa ya nywageng e 100 e fetilego e le bjalo ka ‘mehla ya kgalekgale.’ O ka dira bjang gore bana ba gago ba kgahlišwe ke ditiragalo tše? Gore ba dire se, batswadi ba bangwe ba ile ba diriša puku ya Dihlatse tša Jehofa—Bagoeledi ba Mmušo wa Modimo, Yearbook, diphihlelo tšeo di lego dikgatišong tša rena le dipego tše dingwe tša histori ya pušo ya Modimo, go akaretša le DVD ya rena e mpsha ya mabapi le batho ba Modimo ba mehleng yeno. Dibidio tšeo di bolelago ka go tlaišwa ga bana babo rena kua Soviet Union le Jeremane ya Nazi ya kgale di ruta malapa go ithekga ka Jehofa dinakong tša diteko. Akaretša dilo tše mantšiboeng a lena a Borapedi bja Lapa. Se se tla dira gore tumelo ya bana ba gago e tie ge ba lebeletšana le ditlhohlo tšeo di lekago potego ya bona.

Lega go le bjalo, thuto e telele ya mabapi le histori e ka tena bana ka pela. Ka gona, dira gore bana ba tšee karolo. Ka mohlala, o ka kgopela ngwana wa gago gore a kgethe naga yeo a e ratago, a dire nyakišišo ka histori ya ditaba tša pušo ya Modimo tša nageng yeo gomme a tle a nee lapa pego ya seo a ithutilego sona. Phuthegong ya gabo lena, go ka ba le Bakriste bao ba nago le nako e telele ba hlankela ka potego bao ba ka ratago go ba le lena mantšiboeng a mangwe a borapedi bja lapa. Mohlomongwe ngwana wa lena a ka ba botšiša dipotšišo tšeo di ka dirago gore ba nabe ka diphihlelo tša bona. Goba le ka dira gore ngwana a thale diswantšho tša dilo tša pušo ya Modimo tšeo di fihleletšwego, tše bjalo ka go agwa ga lekala, batho ba le kopanong ya ditšhabatšhaba goba ge go be go dirišwa keramafomo bodireding bja ntlo le ntlo.

Ithute Kamoo ‘Setho se Sengwe le se Sengwe se Dirago Mošomo wa Sona’

Moapostola Paulo o ile a swantšha phuthego ya Bokriste le “mmele wohle wo o swaraganago wa thekgana dikarolong ka moka, [gomme] ge setho se sengwe le se sengwe se dira mošomo wa sona, mmele wohle o a gola wa imatlafatša ka lerato.” (Baef. 4:16, New International Version) Go ithuta kamoo mmele wa motho o šomago ka gona go dira gore re kgahlišwe kudu ke Mmopi wa rena e bile re mo hlomphe. Ka mo go swanago, ge re hlahloba kamoo diphuthego tša lefaseng ka bophara di šomago ka gona, re makatšwa ke “bohlale bja Modimo bja mehutahuta.”—Baef. 3:10.

Jehofa o hlalosa kamoo mokgatlo wa gagwe, go akaretša le karolo ya wona ya legodimong, o šomago ka gona. Ka mohlala, o re botša gore o thomile ka go tliša kutollo go Jesu Kriste, yo a ‘romilego morongwa wa gagwe gomme a e bontšha Johane mohlanka wa gagwe ka dipontšho, yo a e hlatsetšego.’ (Kut. 1:1, 2) Ge e ba Modimo a utolla kamoo karolo e sa bonagalego ya mokgatlo wa gagwe e šomago ka gona, na a ka se rate gore re kwešiše kamoo ‘setho se sengwe le se sengwe se dirago mošomo wa sona’ mo lefaseng?

Ka mohlala, ge e ba molebeledi wa tikologo a tla etela phuthego ya lena kgauswinyane, o re’ng o sa hlahlobe le lapa la gago maikarabelo le ditokelo tšeo balebeledi ba basepedi ba nago le tšona? Ba thuša yo motho le yo mongwe wa rena bjang? Tše dingwe tša dipotšišo tšeo le ka di hlahlobago ke tše: Ke ka baka la’ng go le bohlokwa go bega modiro wa rena wa tšhemo? Mokgatlo wa Modimo o thekgwa bjang ka tša ditšhelete? Sehlopha se Bušago se rulagantšwe bjang, gona se re nea bjang dijo tša moya?

Ge re kwešiša gore batho ba Jehofa ba rulagantšwe bjang, re holega bonyenyane ka ditsela tše tharo: Tebogo ya rena e a oketšega ka batho bao ba šomago ka thata bakeng sa go hola rena. (1 Bathes. 5:12, 13) Re tutueletšega go thekga dithulaganyo tša pušo ya Modimo. (Dit. 16:4, 5) Sa mafelelo, ge re bona gore diphetho le dithulaganyo tšeo bao ba etelelago pele ba di dirago di theilwe Mangwalong, tsela yeo re ba botago ka yona e a oketšega.—Baheb. 13:7.

“Lekolang Dintlo tša Yona tša Dibo”

“Gwantang go dikologa Tsione, le e potologe, le bale ditora tša yona. Šetšang merako ya yona. Lekolang dintlo tša yona tša dibo, e le gore tšeo le tle le di anegele ba molokong o tlago.” (Ps. 48:12, 13) Mopsalme o be a kgothaletša Baisiraele go bonela Jerusalema kgauswi. O nagana gore malapa a Baisiraele a be a ikwa bjang ge a nagana ka dilo tša bohlokwa tšeo a di bonego ge a be a etela motse o mokgethwa bakeng sa menyanya ya ngwaga le ngwaga gomme a bona bokgethwa bja tempele? A swanetše go ba a ile a tutueletšega go ‘anegela moloko o tlago.’

Nagana ka kgošigadi ya Sheba, yeo mathomong e bego e sa dumele seo e bego e se kwa ka pušo e kgahlišago le e bohlale ya Solomone. Ke’ng seo se ilego sa e kgodiša gore seo e se kwelego ke therešo? E itše: “Ga se ka ka ka dumela mantšu a bona go fihlela ke tlile gore ke iponele ka mahlo a ka.” (2 Dikor. 9:6) Ee, re ka kgongwa kudu ke dilo tšeo re ‘iponelago tšona ka mahlo a rena.’

O ka thuša bjang bana ba gago gore ba bone mediro e makatšago ya mokgatlo wa Jehofa ka ‘mahlo a bona’? Ge e ba go na le ofisi ya lekala ya Dihlatse tša Jehofa kgauswi le ga geno, lekang go e etela. Ka mohlala, Mandy le Bethany ba goletše tikologong yeo e lego kgole le Bethele ya nageng ya gabo bona ka dikhilomithara tše 1 500. Lega go le bjalo, batswadi ba bona ba ile ba rulaganya gore ba dule ba etela meago yeo, kudukudu ge barwedi ba bona ba be ba sa gola. Ba hlalosa gore: “Pele re ka etela Bethele, re be re nagana gore ke lefelo leo batho ba gona ba se nago nako ya go sega e bile ke lefelo la batho ba bagolo. Eupša re ile ra kopana le bafsa bao ba bego ba hlankela Jehofa ka thata e bile ba thabela seo! Re ile ra bona gore mokgatlo wa Jehofa ga se feela tikologo e nyenyane yeo re phelago go yona, e bile re be re matlafala moyeng nako le nako ge re be re etela Bethele.” Go bonela ditiragalo tša mokgatlo wa Modimo kgauswi go tutueditše Mandy le Bethany gore ba thome go bula madibogo gomme ba ile ba ba ba laletšwa gore ba tle go hlankela Bethele e le baithaopi ka nakwana.

Re na le selo se sengwe seo se ka re thušago go ‘bona’ mokgatlo wa Jehofa, selo seo se bego se se gona Isiraeleng ya bogologolo. Nywageng e sa tšwago go feta, batho ba Modimo ba hweditše dibidio le di-DVD tšeo di bolelago ka dilo tše di fapafapanego tša mokgatlo wa Modimo, tše bjalo ka: Jehovah’s Witnesses—Organized to Share the Good News, Our Whole Association of Brothers, To the Ends of the Earth le United by Divine Teaching. Ge wena le ba lapa la gago le bona go šoma ka thata ga ditho tša lapa la Bethele, bašomi ba tlhakodišo, baromiwa le bana babo rena bao ba lokišetšago le go rulaganya dikopano, ruri dipelo tša lena di tla leboga borwarre bja lefase ka bophara.

Phuthego e nngwe le e nngwe ya batho ba Modimo e kgatha tema e bohlokwa go boleleng ditaba tše dibotse le go thekga Bakriste bao ba lego tikologong ya gabo bona. Lega go le bjalo, iphe nako le lapa la gago go gopola ‘mokgatlo ka moka wa bana babo lena lefaseng.’ Se se tla go thuša gotee le bana ba gago gore le dule le “tiile tumelong,” le lemoga gore le na le lebaka la go thaba.—1 Pet. 5:9.

[Lepokisi/​Seswantšho go letlakala 18]

Mokgatlo wa Modimo​—Sehlogo Seo re ka Ithutago ka Sona

Re na le dilo tše dintši tšeo di ka re thušago go ithuta ka histori ya mokgatlo wa Jehofa le tsela yeo o šomago ka yona. Dipotšišo tše di latelago di ka go thuša go thoma go ithuta ka wona:

☞ Modiro wa mehleng yeno wa balebeledi ba basepedi o thomile bjang?—Dihlatse tša Jehofa—Bagoeledi ba Mmušo wa Modimo, matlakala 222-227.

☞ Ke’ng seo se bego se kgahliša kudu ka “Letšatši la Bana” Kopanong ya Pušo ya Modimo ka 1941?—Dihlatse tša Jehofa—Bagoeledi ba Mmušo wa Modimo, matlakala 86, 88.

☞ Sehlopha se Bušago se dira diphetho bjang?—“Go Nea Bohlatse bjo bo Tletšego” ka Mmušo wa Modimo, matlakala 108-114.