Modimo o Bonagatša Lerato la Gagwe go Rena

“Botho bjo bogolo bja Modimo bo [tla buša] e le kgoši ka toko go re lebiša bophelong bjo bo sa felego.”—BAROMA 5:21.

1, 2. Ke dimpho dife tše pedi tšeo di ka bapišwago, gona ke efe e bohlokwa kudu?

‘BOHWA bjo bogolo bja Baroma bao ba ilego ba tla ka morago, e be e le molao wa bona le pono ya gore motho o swanetše go phela go ya ka molao.’ (Dr. David J. Williams wa Yunibesithing ya Melbourne, kua Australia) Go sa šetšwe gore seo se be se le bohlokwa gakaakang, go na le bohwa goba mpho e bohlokwa go feta yeo. Mpho ye ke tokišetšo ya Modimo ya gore motho a be le boemo bjo bo amogelegago le bjo bo lokilego pele ga Modimo gotee le kholofelo ya go phološwa le go phela ka mo go sa felego.

² Ka tsela e itšego, go bile le dikarolo tša molao tšeo Modimo a ilego a di diriša gore mpho ye e hwetšagale. Go Baroma kgaolo 5, moapostola Paulo ga se a bolela ka dikarolo tše ka tsela e tšwafišago goba e le lenaneo le letelele la melao. Go e na le moo, o ile a thoma ka go bolela kgonthišetšo e kgahlišago, e rego: “Go boletšwe gore re lokile ka baka la tumelo, [ka gona] anke re thabeleng khutšo le Modimo ka Morena wa rena Jesu Kriste.” Bao ba amogelago mpho ya Modimo ba tutueletšega gore le bona ba mo rate. Paulo e be e le yo mongwe wa bona. O ngwadile gore: “Lerato la Modimo le tšholletšwe dipelong tša rena ka moya o mokgethwa.”—Baroma 5:1, 5.

3. Ke dipotšišo dife tše di kwagalago tšeo di rotogago?

³ Lega go le bjalo, ke ka baka la’ng go ile gwa nyakega mpho ye e lerato? Modimo o be a ka e nea bjang ka tsela ya go loka le e lekalekanego? Gona batho ba swanetše go dira’ng gore ba swanelegele go hwetša mpho ye? Anke re hwetšeng dikarabo tše di kgotsofatšago tša dipotšišo tše le go bona kamoo di bontšhago gore Modimo o na le lerato.

Lerato la Modimo ge le Bapišwa le Sebe

4, 5. (a) Jehofa o ile a bontšha bjang lerato la gagwe ka tsela e kgolo? (b) Ke selo sefe seo se diragetšego morago kua seo re swanetšego go se tseba gore re kwešiše Baroma 5:12?

⁴ Ge Jehofa a be a bontšha lerato le legolo, o ile a romela Morwa wa gagwe yo a tswetšego a nnoši gore a tle a thuše batho. Paulo o ile a bea taba ye ka tsela ye: “Modimo o bonagatša lerato la gagwe go rena ka gore, ge re be re sa le badiradibe Kriste o ile a re hwela.” (Baroma 5:8) Anke o nagane ka therešo e nngwe yeo go boletšwego ka yona mo, ya gore: “Ge re be re sa le badiradibe.” Bohle ba swanetše go tseba gore seo se tlile bjang.

⁵ Paulo o ile a bolela ka taba yeo, a thoma ka go bolela ntlha e rego: “Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Re ka kgona go kwešiša se ka ge Modimo a dirile gore go be le pego ya kamoo bophelo bja batho bo thomilego ka gona. Jehofa o bopile batho ba babedi, e lego Adama le Efa. Mmopi o phethagetše, e bile go be go le bjalo le ka batho bao ba mathomo, bona bagologolo ba rena. Modimo o ba neile feela thibelo e tee gomme a ba botša gore go se kwe molao woo go be go tla dira gore ba hwe. (Gen. 2:17) Lega go le bjalo, ba ile ba kgetha go senya, ba roba taelo e kwagalago ya Modimo, ka go re’alo ba hlanogela Monei wa Molao le Mmuši wa bona.—Doit. 32:4, 5.

6. (a) Ke ka baka la’ng ditlogolwana tša Adama di ile tša hwa pele Modimo a ka nea Molao wa Moshe le ka morago ga moo? (b) Ke’ng seo se ka bapišwago le bolwetši bja leabela?

⁶ Adama o bile le bana ka morago ga ge a dirile sebe, a fetišetša sebe le ditlamorago tša sona go bona ka moka. Go ba gona, ba be ba se ba tshela molao wa Modimo bjalo ka Adama, ka gona ga se ba ahlolelwa sebe se se swanago; le gona go be go se gwa tšwa go newa melao e itšego. (Gen. 2:17) Lega go le bjalo, ditlogolwana tša Adama di abetše sebe. Ka baka leo, sebe le lehu di bušitše batho go ba go fihla nakong ya ge Modimo a nea Baisiraele melao yeo e ilego ya bontšha gabotse gore ke badiradibe. (Bala Baroma 5:13, 14.) Ditlamorago tša sebe sa leabela di ka swantšhwa le bolwetši bjo bo itšego bjo re bo abetšego go batswadi ba rena. Gaešita le ge bana ba bangwe ka lapeng ba ka abela bolwetši bjoo go batswadi ba bona, ga se bana ka moka ka lapeng leo bao ba ka bo abelago. Eupša ga go bjalo ka sebe. Ka moka ga rena re abetše sebe go tšwa go Adama gomme ka baka la sona, ka moka ga rena re tlo hwa. Na re ka phema boemo bjoo bjo thata?

Seo Modimo a re Neilego Sona ka Jesu Kriste

7, 8. Tsela yeo banna ba babedi ba ba phethagetšego ba phetšego ka yona e bile bjang le mafelelo a sa swanego?

⁷ Jehofa ka lerato o ile a dira tokišetšo ya gore batho ba fenye sebe sa leabela. Paulo o hlalositše gore se se kgonegile ka baka la monna yo mongwe, yo a ilego a tla ka morago a phethagetše—ge e le gabotse, Adama wa bobedi. (1 Bakor. 15:45) Eupša tsela yeo banna ba ba babedi bao ba phethagetšego ba ilego ba phela ka yona e bile le mafelelo a sa swanego. Bjang?—Bala Baroma 5:15, 16.

⁸ Paulo o ngwadile gore: “Ditlamorago tša mpho ga di swane le tša karogo.” Adama o be a na le molato wa karogo yeo, gomme o ile a lebanwa ke kotlo e bohloko—o ile a hwa. Lega go le bjalo, go be go ka se hwe yena feela. Re bala gore: “Ka karogo ya motho [yoo] o tee go hwile ba bantši.” Kahlolo yeo e swanetšego ya Adama e ile ya fetela go ditlogolwana tša gagwe ka moka tšeo di sego tša phethagala, go akaretša le rena. Lega go le bjalo, re ka homotšwa ke go tseba gore monna yo a phethagetšego, Jesu, a ka tliša se se fapanego. Ke sefe? Re hwetša karabo mantšung a Paulo ge a be a re botša ka ‘go bolelwa ga batho ba mehuta ka moka gore ba lokile e le gore ba hwetše bophelo.’—Baroma 5:18.

9. Ke’ng seo Modimo a bego a se dira ge a be a bolela gore batho ba lokile, go etša ge go bontšhitšwe go Baroma 5:16, 18?

⁹ Ge e le gabotse mantšu a Segerika a rego “go bolelwe gore ba lokile” a ra go re’ng? Mofetoledi yo mongwe wa Beibele o ngwadile mabapi le mantšu ao gore: “Ke tshwantšhišo ya semolao yeo e dirago gore taba e kwagale eka ke ya molao. E bolela ka go fetoga ga boemo bja motho tswalanong ya gagwe le Modimo, e sego go fetoga ga motho ka gare . . . Tshwantšhišo ye e swantšha Modimo le moahlodi yo a fihleletšego phetho yeo e thekgago molatofatšwa, yo go ka thwego o be a tlišitšwe kgorong ya Modimo, a latofatšwa ka gore ga a loka. Eupša Modimo a se bone molatofatšwa yoo molato.”

10. Jesu o ile a dira’ng seo se ilego sa thea motheo wa gore go bolelwe gore batho ba lokile?

¹⁰ Ke motheong ofe ‘Moahlodi wa go loka wa lefase ka moka’ a bego a ka se bone modiradibe molato? (Gen. 18:25) Sa pele, Modimo ka lerato o rometše Morwa wa gagwe yo a tswetšego a nnoši gore a tle mo lefaseng. Jesu o dirile thato ya Tatagwe ka mo go phethagetšego, go sa šetšwe go lekwa, go tlaišwa o šoro le go swarwa gampe. O ile a dula a botega go fihla bokgoleng bja go hwa koteng ya tlhokofatšo. (Baheb. 2:10) Ge a be a gafa bophelo bja gagwe bjo bo phethagetšego, Jesu o ile a nea sehlabelo seo se bego se ka lokolla goba go lopolla ditlogolo tša Adama sebeng le lehung.—Mat. 20:28; Baroma 5:6-8.

11. Topollo e theilwe go lekaneng ga eng?

¹¹ Temaneng e nngwe, Paulo o ile a bitša seo gore ke “topollo e lekanago.” (1 Tim. 2:6) Se be se lekana le eng? Adama o tlišitše go se phethagale le lehu go ba dibilione, e lego ditlogolwana tša gagwe. Ke therešo gore Jesu, e lego monna yo a phethagetšego, a ka ba a bile le ditlogolwana tše dibilione tšeo di phethagetšego.a Ka gona, go be go kwešišwa gore bophelo bja Jesu le bja ditlogolwana ka moka tšeo di phethagetšego tšeo a bego a ka ba le tšona, bo be bo bopa sehlabelo se se lekanago le sebe sa Adama le sa ditlogolwana tša gagwe tše di sa phethagalago. Lega go le bjalo, Beibele ga e bolele gore setlogolo le ge e le sefe seo Jesu a bego a ka ba le sona se be se bopa karolo ya topollo. Baroma 5:15-19 e bolela ntlha ya gore lehu la “motho o tee” feela le re neile topollo. Ee, bophelo bjo bo phethagetšego bja Jesu bo lekana le bja Adama. Tabakgolo e go Jesu Kriste feela, e bile e swanetše go ba go yena. Go ile gwa kgonega gore batho ba mehuta ka moka ba hwetše mpho e sa lefelelwego le bophelo ka baka la “tiro e tee ya go loka” ya Jesu, go kwa ga gagwe le go botega ga gagwe go fihla lehung. (2 Bakor. 5:14, 15; 1 Pet. 3:18) Se se kgonegile bjang?

Go se Bonwe Molato Motheong wa Topollo

12, 13. Ke ka baka la’ng bao go bolelwago ka bona gore ba lokile ba nyaka kgaugelo le lerato la Modimo?

¹² Jehofa Modimo o ile a amogela sehlabelo sa topollo seo Morwa wa gagwe a se neilego. (Baheb. 9:24; 10:10, 12) Lega go le bjalo, barutiwa ba Jesu mo lefaseng, go akaretša le baapostola ba gagwe bao ba botegago, ba ile ba dula ba sa phethagala. Gaešita le ge ba be ba katanela go phema go dira diphošo, ba be ba sa atlege ka mehla. Ka baka la’ng? Ka ge ba be ba abetše sebe. (Baroma 7:18-20) Eupša Modimo o be a ka dira se sengwe ka taba yeo, e bile o ile a se dira. O ile a amogela “topollo e lekanago” gomme o be a ikemišeditše go e diriša go thuša bahlanka ba gagwe ba lefaseng.

¹³ Ga se gore Modimo o be a swanetše go diriša topollo go baapostola le go ba bangwe ka ge ba dirile dilo tše itšego tše dibotse. Lega go le bjalo, Modimo o ile a diriša topollo go ba thuša ka ge a na le kgaugelo le lerato le legolo. O ile a kgetha go se bone baapostola le ba bangwe molato wo ba pharilwego ka wona, a ba bona e le bao ba lebaletšwego molato wa leabela. Paulo o hlalositše se ge a re: “Le phološitšwe ka tumelo ka botho bjo bjo bogolo bja Modimo; se ga se ka baka la lena. Eupša ke mpho ya Modimo.”—Baef. 2:8.

14, 15. Bao go ilego gwa bolelwa gore ba lokile pele ga Modimo ba ile ba holofetšwa moputso ofe, eupša ba be ba sa dutše ba swanetše go dira’ng?

¹⁴ Anke o nagane gore ke mpho e kaakang ge Ramatlaohle a lebalela motho sebe seo a se abetšego gotee le diphošo tšeo a di dirilego! Re ka se kgone go bala dibe tšeo batho ba di dirilego pele e eba Bakriste; eupša motheong wa topollo, Modimo a ka ba lebalela dibe tšeo. Paulo o ngwadile gore: “Mpho yeo e bilego gona ka morago ga dikarogo tše dintši e bile gore go bolelwe gore ba lokile.” (Baroma 5:16) Baapostola le ba bangwe bao ba ilego ba hwetša mpho ye e lerato (e lego go bolelwa gore ba lokile) ba be ba swanetše go tšwela pele ba rapela Modimo wa therešo ka tumelo. Ba be ba tla putswa ka’ng nakong e tlago? “Bao ba tlago go amogela ka boati botho bjo bogolo bja Modimo le bja mpho e sa lefelelwego ya toko ba tla buša kudu le go feta e le dikgoši bophelong ka motho o tee, e lego Jesu Kriste.” Ruri mpho ye ya toko e dirolla ditlamorago tša dikarogo tša Adama. Mafelelo a mpho ye ke gore go hwetšwe bophelo.—Baroma 5:17; bala Luka 22:28-30.

¹⁵ Bao ba amogelago mpho yeo, ka ge go bolelwa ka bona gore ba lokile, e ba barwa ba Modimo ba moya. Ka ge e le bajabohwagotee le Kriste, ba na le kholofelo ya go tsošetšwa legodimong e le barwa ba kgonthe ba moya gore ba ‘buše e le dikgoši’ le Jesu Kriste.—Bala Baroma 8:15-17, 23.

Lerato la Modimo le Bontšhwa ba Bangwe

16. Ke mpho efe yeo bao ba nago le kholofelo ya go phela lefaseng ba ka e amogelago gaešita le gona bjale?

¹⁶ Ga se bohle bao ba nago le tumelo e bile ba hlankela Modimo e le Bakriste ba botegago ba letetšego go ‘buša e le dikgoši’ le Kriste legodimong. Ba bantši ba bona ba na le kholofelo e theilwego Beibeleng yeo e swanago le ya bahlanka ba Modimo ba pele ga mehla ya Bokriste. Ba na le kholofelo ya go phela ka mo go sa felego lefaseng la paradeise. Na le bona ga bjale ba ka amogela mpho e lerato e tšwago go Modimo gomme ba lebelelwa e le ba lokilego ba na le kholofelo ya go phela lefaseng? Motheong wa seo Paulo a se ngwaletšego Baroma, karabo e kgothatšago ke ee!

17, 18. (a) Modimo o ile a lebelela bjang Aborahama ka baka la tumelo ya gagwe? (b) Go tlile bjang gore Jehofa a lebelele Aborahama e le yo a lokilego?

¹⁷ Paulo o ile a hlahloba mohlala o mogolo wa Aborahama, e lego monna wa tumelo yo a phetšego pele Jehofa a nea Baisiraele melao le nako e telele pele Kriste a bula tsela ya gore batho ba phele legodimong. (Baheb. 10:19, 20) Re bala gore: “Ga se ya ba ka baka la molao ge Aborahama goba peu ya gagwe a bile le kholofetšo ya gore o swanetše go ba mojabohwa wa lefase, eupša e bile ka baka la toko ka tumelo.” (Baroma 4:13; Jak. 2:23, 24) Ka gona Modimo o ile a lebelela Aborahama yo a botegago e le yo a lokilego.—Bala Baroma 4:20-22.

¹⁸ Se ga se bolele gore ge Aborahama a be a hlankela Jehofa ka nywagasome e mentši, o be a se na sebe. Aowa, o be a lokile ka kgopolo e nngwe. (Baroma 3:10, 23) Lega go le bjalo, ka bohlale bja gagwe bjo bo sa bapišwego le selo, Jehofa o ile a lemoga tumelo e kgolo ya Aborahama le mediro ya gagwe yeo e ilego ya tšweletšwa ke tumelo yeo. Ka mo go kgethegilego, Aborahama o ile a bontšha tumelo go “peu” e holofeditšwego yeo e bego e tla tšwelela molokong wa gagwe. Peu yeo e ile ya ba Mesia, goba Kriste. (Gen. 15:6; 22:15-18) Ka baka leo, motheong wa “topollo yeo e lefilwego ke Kriste Jesu,” Moahlodi yo a lego legodimong o kgona go lebalela dibe tšeo di dirilwego nakong e fetilego. Ka gona, Aborahama le banna ba bangwe ba tumelo ba pele ga mehla ya Bokriste ba tla tsošwa.—Bala Baroma 3:24, 25; Ps. 32:1, 2.

Thabela Boemo bja go Loka Gona Bjale

19. Ke ka baka la’ng tsela yeo Modimo a bego a lebelela Aborahama ka yona e swanetše go kgothatša ba bantši lehono?

¹⁹ Taba ya gore Modimo yo lerato o ile a lebelela Aborahama e le yo a lokilego e swanetše go kgothatša Bakriste ba therešo lehono. Jehofa ga se a mo lebelela a lokile ka tsela e swanago le yeo a lebelelago bao a ba tlotšago ka moya gore e be “bajabohwagotee le Kriste.” Palo e lekanyeditšwego ya sehlopha seo ke yeo e “biditšwego gore e be bakgethwa” e bile e amogelwa e le “barwa ba Modimo.” (Baroma 1:7; 8:14, 17, 33) Go fapana le moo, Aborahama o ile a ba “mogwera wa Jehofa”—gomme seo se diregile pele go neelwa sehlabelo sa topollo. (Jak. 2:23; Jes. 41:8) Ka gona, go thwe’ng ka Bakriste ba therešo bao ba nago le kholofelo ya go phela Paradeiseng e tsošološitšwego mo lefaseng?

20. Modimo o letetše’ng go bao lehono a ba lebelelago ba lokile, go swana le kamoo a bego a lebelela Aborahama?

²⁰ Batho bao ga se ba amogela “mpho e sa lefelelwego ya toko” ka gore ba be le kholofelo ya go phela legodimong “ka go lokollwa ka topollo yeo e lefilwego ke Kriste Jesu.” (Baroma 3:24; 5:15, 17) Eupša ba bontšha tumelo e kgolo go Modimo le go ditokišetšo tša gagwe, e bile ba bontšha tumelo ya bona ka mediro e mebotse. O mongwe wa mediro yeo ke go “[bolela] ka mmušo wa Modimo le go ruta dilo tše di lego mabapi le Morena Jesu Kriste.” (Dit. 28:31) Ka gona, Jehofa a ka lebelela batho bao e le ba lokilego go swana le ka tsela yeo a ilego a lebelela Aborahama. Mpho yeo ba bjalo ba e hwetšago, e lego tswalano le Modimo, e fapana le “mpho e sa lefelelwego” yeo e amogelwago ke batlotšwa. Lega go le bjalo, ruri ke mpho yeo ba e amogelago ka diatla tše pedi.

21. Ke mehola efe e bulegilego ka baka la lerato la Jehofa le toka ya gagwe?

²¹ Ge e ba o na le kholofelo ya go phela ka mo go sa felego mo lefaseng, o swanetše go lemoga gore ga se gwa fo itiragalela gore mmuši wa batho a dire gore o bulegelwe ke sebaka seo. Go e na le moo, seo se utolla morero o bohlale wa Mmuši wa Legohle. Jehofa o gatile megato e tšwelago pele gore a phethe morero wa gagwe. Megato ye e sepedišana le toka ya kgonthe. Go feta moo, e bonagatša lerato le legolo la Modimo. Paulo o be a ka bolela ka mo go swanetšego gore: “Modimo o bonagatša lerato la gagwe go rena ka gore, ge re be re sa le badiradibe Kriste o ile a re hwela.”—Baroma 5:8.

[Mongwalo wa tlase]

Na o a Gopola?

• Ditlogolo tša Adama di hweditše bohwa bofe, gona bo bile le mafelelo afe?

• Topollo e lekanago e ile ya newa bjang, gona ke ka kgopolo efe e bego e le e lekanago?

• Mpho ya gore go bolelwe gore re lokile e go tlišeditše kholofelo efe?

[Seswantšho go letlakala 13]

Motho yo a phethagetšego Adama o dirile sebe. Motho yo a phethagetšego Jesu o neile “topollo e lekanago” le sona

[Seswantšho go letlakala 15]

Ruri ke ditaba tše dibotse gore ka baka la Jesu go ka bolelwa gore re lokile!