“Batalatša Tsela ya Lenao la Gago” Gore o Dire Tšwelopele

GE BATHO ba Modimo ba be ba tloga Babilona ka 537 B.C.E., Jehofa o ile a kgahlegela leeto la bona la go ya Jerusalema. O ile a ba botša gore: “Kgorelang batho tsela. Bulang tsela e kgolo, e buleng. Tlošang maswika go yona.” (Jes. 62:10) Akanya kamoo Bajuda ba bangwe ba ka bago ba ile ba dira seo ka gona. Go ka direga gore bao ba tlogilego pele ba ile ba kgora tsela, mohlomongwe ba khupetša meedi le go tswalela mekoti. Go dira seo go ka ba go ile gwa thuša bana babo bona bao ba ilego ba ba šala morago go boela nageng ya gabo bona.

Re ka swantšha seo le tsela e lebišago dipakaneng tša moya. Jehofa o nyaka gore bahlanka ba gagwe ka moka ba sepele tseleng yeo ba sa šitišwe ke dilo tše di sa hlokagalego. Lentšu la gagwe le re kgothaletša gore: “Batalatša tsela ya lenao la gago, le gona anke ditsela tša gago ka moka di tsepame.” (Die. 4:26) Go sa šetšwe gore o yo monyenyane goba o yo mogolo, o ka bona bohlale bja keletšo yeo ya Modimo.

KGORA TSELA KA GO DIRA DIPHETHO TŠE BOHLALE

O ka ba o kile wa kwa batho ba bolela selo sa go swana le se ka mofsa yo a itšego: ‘Bokamoso bja kgarebe ye bo a phadima’ goba, ‘Lesogana le le tla fihla kgole bophelong.’ Gantši bafsa ba phetše gabotse, ba kgona go nagana ka pela e bile ba tloga ba nyaka go atlega. Beibele e bolela ka mo go nepagetšego gore: “Boikgantšho bja masogana ke matla a ona.” (Die. 20:29) Mofsa yo a dirišago bokgoni le matla a gagwe go hlankela Jehofa a ka fihlelela dipakane tša moya gomme a hwetša lethabo la kgonthe.

Lega go le bjalo, o ka ba o lemogile gore bokgoni bja bafsa ba rena bo tšeelwa godimo kudu lefaseng. Ge mofsa wa Hlatse a kgona sekolong, moeletši wa tša thuto, morutiši goba morutwanagotee le yena a ka mo gapeletša go phegelela thuto e phagamego e le gore a tle a atlege tshepedišong ye ya dilo. Goba ngwanabo rena yo mofsa goba kgaetšedi yo a nago le bokgoni dipapading a ka hwetša gore batho ba bangwe ba mo phegelela gore a tsenele dipapadi. Na o kile wa ikhwetša o le boemong bjo bjalo goba na o tseba motho yo a lebeletšanego le kgateletšo e bjalo? Ke’ng seo se tlago go thuša Mokriste go dira diphetho tše bohlale?

Dithuto tša Beibele di ka go thuša go itokišeletša go sepela tseleng e di phalago tšohle bophelong. Mmoledi 12:1 e re: “Gopola Mmopi wa gago yo Mogolo matšatšing a bofseng bja gago.” Ke tsela efe e kaone yeo wena goba mofsa yo o tlwaelanego le yena le ka ‘gopolago Mmopi wa lena yo Mogolo’?

Anke o nagane ka seo se diragaletšego Erica wa kua Afrika Bodikela. O be a rata go bapala kgwele ya maoto. Ge a na le nywaga e 15, o be a šetše a kgethilwe gore a bapalele sehlopha sa setšhaba. Seo se be se bolela gore e se kgale o be a ka letela go hwetša tlwaetšo ya maemo a godimo kudu kua Yuropa, mohlomongwe seo sa dira gore a feleletše e le sebapadi sa kgwele ya maoto. Eupša keletšo ya gore “gopola Mmopi wa gago yo Mogolo,” e be e tla mo kgoma bjang? Le gona ke thuto efe yeo wena goba mogwera wa gago wa mofsa le ka ithutago yona go se?

Ge Eric a be a sa tsena sekolo, o ile a thoma go ithuta Beibele le Dihlatse tša Jehofa. Ka gona o ile a ithuta gore Mmopi wa gagwe o tla rarolla mathata a batho sa ruri. Eric o ile a bona bohlokwa bja go diriša nako le matla a gagwe go dira thato ya Modimo. Ka go lemoga bohlale bja seo, Eric o ile a kgetha go se sa phegelela dipapadi. Go e na le moo, o ile a kolobetšwa gomme a dira tšwelopele moyeng. Ge nako e dutše e eya, o ile a ba mohlanka wa bodiredi ke moka ka morago a laletšwa Sekolong sa Bana Babo Rena ba Sego Lenyalong.

Ge nkabe Eric a ile a phegelela dipapadi, a ka be a ile a tuma le go huma. Eupša o ile a lemoga go rereša ga molao wa motheo wa Beibele wo o rego: “Dilo tša bohlokwa tša mohumi ke motse wa gagwe wa sebo, gomme ge a di akanya di etša morako o šireletšago.” (Die. 18:11) Ee, tšhireletšego yeo motho a ka naganago gore mahumo a tla mo tlišetša yona ke toro feela. Go feta moo, bao ba phegelelago mahumo gantši ‘ba itlhaba gohle ka mahloko a mantši.’—1 Tim. 6:9, 10.

Se se thabišago ke gore bafsa ba bantši ba hweditše lethabo le tšhireletšego ya sa ruri ka go tsenela tirelo ya nako e tletšego. Eric o re: “Ga bjale ke sehlopheng se segolo sa bahlanka ba Jehofa bao ba lego tirelong ya nako e tletšego. Ga go na sehlopha se se ka se phalago, le gona ke leboga Jehofa ge a mpontšhitše tsela e nnoši ya go lebiša lethabong la kgonthe le go atlega bophelong.”

Go thwe’ng ka wena? Go e na le go phegelela dipakane tša lefase, ke ka baka la’ng o sa batalatše “ditsela tša gago” pele ga Jehofa ka go tsenela tirelo ya bobulamadibogo?—Bona lepokisi le le rego, “Mehola Yeo e sa Hwetšagalego Yunibesithing.”

GO TLOŠA MAPHEKO TSELENG YA GAGO

Ge banyalani ba bangwe ba be ba etetše ofising ya lekala kua United States, ba ile ba bona lethabo la bana babo rena bao ba hlankelago Jehofa moo. Kgaetšedi ka morago o ile a ngwala gore: “Re be re nabile maoto bophelong bja rena.” Banyalani ba ba ile ba phetha ka gore ba tla diriša e nngwe ya nako ya bona le matla a bona tirelong ya Jehofa.

Lebakeng le lengwe, diphetogo tšeo banyalani ba ba bego ba nyaka go di dira di be di bonagala di se bonolo. Eupša ka letšatši le lengwe ba ile ba naganišiša ka temana ya letšatšing leo. E be e le Johane 8:31, moo re balago mantšu a Jesu ao a rego: “Ge e ba le dula lentšung la ka, gona le barutiwa ba ka e le ka kgonthe.” Ba naganne ka seo, ba ile ba re: “Re ka se tsoge re itsholetše boikgafo le ge e le bofe bjo re tlago go bo dira go nolofatša maphelo a rena.” Ba ile ba rekiša ntlo ya bona e kgolo le go lebala ka dilo tše dingwe tšeo di bego di ba šitiša gomme ba hudugela phuthegong yeo e hlokago thušo. Ga bjale ke babulamadibogo, e bile ba thuša le ka go aga Diholo tša Mmušo le go ithaopela go thuša dikopanong tša selete. Ba ikwa bjang ka seo? Ba re: “Re thabišwa ke go phela bophelo bjo bonolo, go dira seo mokgatlo wa Jehofa o re kgothaletšago gore re se dire.”

DULA TSELENG YEO E TLA GO THUŠAGO GO DIRA TŠWELO PELE MOYENG

Solomone o ngwadile gore: “Mahlo a gago ona a lebelele pele gomme mahlo a gago ao a phadimago a tsepelele pele ga gago.” (Die. 4:25) Go fo swana le mootledi yo a tsepeletšego tseleng, re swanetše go phema dilo tšeo di ka re šitišago go ipeela dipakane tša moya le go di fihlelela.

1. Dihlatse tša Jehofa di diriša bofsa bja tšona go fihlela dipakane tša moya; 2. Tsela yeo e se nago mapheko

Ke dipakane dife tša moya tšeo o ka ipeelago tšona le go di fihlelela? Go tsenela tirelo ya nako e tletšego ke pakane e botse kudu. E nngwe e ka ba go hlankela phuthegong ya kgauswi yeo e hlokago bagoeledi bao ba nago le phihlelo gore ba thuše go akaretša tšhemo ya yona e kgolo. Goba phuthego e itšego e ka ba e na le bagoeledi ba bantši bao ba nago le phihlelo, eupša e se na bagolo le bahlanka ba bodiredi bao ba lekanego. Na o ka thuša ka e nngwe ya ditsela tšeo? Ke ka baka la’ng o sa boledišane le molebeledi wa tikologo go bona ge e ba o ka thuša? Ge e ba o nyaka go hlankela kgojana le gae, o ka kgopela boitsebišo mabapi le diphuthego tšeo di lego kgole tšeo di nyakago thušo.b

Anke re boeleng morago tiragalong yeo e hlalositšwego go Jesaya 62:10. Go ka direga gore Bajuda ba bangwe ba ile ba šoma ka thata go kgora le go lokiša tsela ya go boela nageng ya gabo bona e le gore batho ba Modimo ba kgone go fihla mo ba yago. Ge e ba o šoma ka thata go fihlelela dipakane tirelong e kgethwa, o se ke wa fela matla. Ka thušo ya Modimo, le wena o ka fihlelela dipakane tšeo tša gago. Tšwela pele o kgopela Jehofa gore a go nee bohlale ge o dutše o leka go tloša mapheko tseleng ya gago. Ka nako e swanetšego, o tla bona kamoo a tlago go go thuša go “batalatša tsela ya lenao la gago.”—Die. 4:26.

a Leina le fetotšwe.

b Bona puku ya Go Rulaganyetšwa go Dira Thato ya Jehofa, matlakala 111-112.

Mehola Yeo e sa Hwetšagalego Yunibesithing

GE Flavia e be e sa le yo monyenyane, makgolo wa gagwe yo e bego e le yo mongwe wa Dihlatse tša Jehofa, o ile a bolela le yena ka Beibele. Lega go le bjalo, tatagwe e be e le morutiši gomme a mo kgothaletša go ithuta ka tlhago le go hwetša thuto e phagamego. Batho ba bangwe ba be ba mmotša gore: “Moloko wa lena ke wona o ka phološago polanete ye gore e se senyege.” Ka thekgo ya tatagwe, o ile a ya yunibesithing ya maemo, moo a ilego a thoma go nyakišiša ka ditsela tše kaone tša go tšweletša peterole yeo e sa šilafatšego moya.

Go se go ye kae, Flavia o ile a lemoga gore barutwana ba bantši ga ba na taba le go ‘phološa polanete.’ Le gona, mananeo a mangwe yunibesithing a be a hwetša thekgo ya ditšhelete go borakgwebo, ka gona banyakišiši ba be ba thekga dikgwebo tšeo. Se se ile sa tshwenya Flavia. Ge Dihlatse tša Jehofa di be di mo etetše, di ile tša tsošološa kganyogo ya gagwe ka seo Beibele e se bolelago ka Modimo le ka bokamoso.

Flavia o ile a amogela therešo ya Beibele gomme a kolobetšwa. Eupša ka ge a be a ithutela gore a hwetše degree, o be a se na nako ya go bolela ditaba tše dibotse. Ka letšatši le lengwe o ile a theetša ge molebeledi wa tikologo a be a ahlaahla lengwalo la Jakobo 4:17, leo le rego: “Ge e ba motho a tseba go dira seo se lokilego, fela a sa se dire, gona o dira sebe.” Seo se ile sa dira gore Flavia a naganišiše ka boemo bja gagwe. O re: “Ke be ke nyaka gore Jehofa a ntšhegofatše, e bile ke nyaka le go atlega dithutong tša ka tša thutamahlale. Ke ile ka swanelwa ke go kgetha.”

Flavia o ile a kgetha go tlogela dithuto tša gagwe tša yunibesithi. Na o a itshola? O re:

“Tirelong ya Jehofa, ke hweditše mehola yeo e sa hwetšagalego yunibesithing. Jehofa o be a dutše a ntšhegofatša. O nthutile go ba botho, go bontšha lerato le go thuša ba bangwe moyeng. Ke thabile lenyalong gomme ke na le bokamoso bjo bo kgahlišago kudu go phala bjo thutamahlale e bo holofetšago. Ke Jehofa feela yo a ka phološago polanete ye. Nka se mo hlanogele.” Flavia le monna wa gagwe ba hlankela ntlongkgolo ya lefase ya Dihlatse tša Jehofa kua New York.