Kamoo o ka Dirago Gore go Ithuta Beibele go go Thabiše le go go Hola

Joshua o bala Molao; maboto a Jeriko a a wa gomme ntlo ya Rahaba yona ga e we; Joshua o emišetša matsogo a gagwe godimo a rapela

JOSHUA o ile a swanelwa ke go etelela Baisiraele pele gore ba fihle Nageng ya Kholofetšo. Eupša go be go ka se be bonolo go dira bjalo. Ka gona, Jehofa o ile a mo kgothatša ka gore: ‘Eba le sebete gomme o tie matla. Ela hloko molao wa ka. O o bale mosegare le bošego, gore o ele hloko go sepela ka tšohle tšeo di ngwadilwego ka go wona. Ke mo o tla atlegišago tsela ya gago ke moka wa dira ka bohlale.’—Josh. 1:7, 8.

Ka ge re phela mehleng yeo “go lego thata go lebeletšana le [yona],” le rena re welwa ke mathata a magolo. (2 Tim. 3:1) Go swana le Joshua, le rena re ka kgona go fenya mathata ge e ba re diriša keletšo yeo Jehofa a ilego a e nea Joshua. Re ka dira seo ka go bala Beibele ka mehla, gomme ge re na le mathata ra diriša seo e se bolelago.

Ba bantši ba rena re a dumela gore ka tlhago ga re kwane le go bala. Eupša go ithuta Beibele go bohlokwa. Ka gona bala lepokisi leo le rego “Leka Ditšhišinyo tše” gore o hwetše dintlha tšeo di ka go thušago gore o thabele go bala Beibele le gore o holege.

Mopsalme o ile a re: “Ntshepediše tseleng ya ditaelo tša gago, gobane e a nkgahla.” (Ps. 119:35) Ge o ithuta Beibele o tlo thaba. Le gona, ge o dutše o epa matlotlo a moya, o tlo a hwetša.

Le ge o sa etelele setšhaba pele go swana le Joshua, eupša le wena o na le mathata. Ka gona go swana le Joshua, ithute Beibele gomme o diriše seo e se bolelago gore o holege. Ge o ka dira bjalo, le wena o tla atlega le go dira diphetho tše dibotse.

LEKA DITŠHIŠINYO TŠE

Rapela pele o ithuta Beibele. Beibele e na le dikgopolo tša Modimo Ramatlaohle tšeo di ngwaletšwego go re hola. Ka gona, gore o kwešiše seo e se bolelago, kgopela tlhahlo ya Jehofa, o naganišiše ka seo o ithutilego sona gomme o se diriše.—Esera 7:10.
Ipotšiše dipotšišo ge o dutše o bala Beibele goba kgatišo yeo e theilwego Beibeleng. O ka ipotšiša gore: ‘Taba ye ke e balago e nthuta’ng ka Jehofa? E sepedišana bjang le molaetša o mogolo wa Beibele? Nka diriša bjang seo ke ithutago sona go thuša ba bangwe?’
Naganišiša ka seo o ithutago sona. Emanyana, ke moka o naganišiše. O ka ipotšiša gore: Ke ikwa bjang ka seo ke se balago? Ke ka baka la’ng ke ikwa ka tsela yeo? Se se sepedišana bjang le seo se kilego sa ntiragalela, seo se ntiragalelago gona bjale, goba seo se ka ntiragalelago nakong e tlago? Nka diriša bjang keletšo ye bophelong bja ka? (Jobo 23:5; Ps. 49:3) Leka go kwešiša gore ke ka baka la eng Jehofa a re re pheme mekgwa e itšego le gore ditlamorago tša gona e tla ba dife.—Doit. 32:28, 29.
Leka go bona ditiragalo tša seo o se balago. Ka mohlala, na o ka leka go bona ge bana babo Josefa ba be ba mo rekiša go Baishimaele? (Gen. 37:18-28) O bona’ng, o kwa’ng gona o kwa monkgo wa eng? Ipone o le baanegwa bao. Ba nagana’ng le gona ba ikwa bjang? Go nagana ka dilo tšeo go tla dira gore o thabele go ithuta Beibele le gore o holege.
Šomiša didirišwa tša go ithuta tšeo di ka go thušago go dira nyakišišo. Itlwaetše go diriša didirišwa tšeo di lego gona ka Sepedi, e ka ba tšeo di lego Inthaneteng goba tšeo di gatišitšwego. O se ke wa tšhaba go kgopela ba bangwe gore ba go bontšhe kamoo di dirišwago ka gona. Ka mohlala, puku ya Tlhahlo ya go Dira Nyakišišo ya Dihlatse tša Jehofa, e ka go thuša gore o hwetše ditaba mabapi le dihlogo tša go fapafapana le go hwetša ditlhaloso tša ditemana tša Beibele. Diriša pukwana ya Tlhahlo ya go Ithuta Lentšu la Modimo yeo e nago le mebepe, ditšhate, dikelo le tše dingwe.
Akaretša dintlha tše bohlokwa gore di tle di go thuše go gopola seo o ithutilego sona. Le gona go ka ba kaone gore o botše ba bangwe seo o ithutilego sona. Na go na le seo o ka se dirišago tšhemong? Ge o ka dira dilo tše, o tlo gopola dintlha tšeo o ithutilego tšona gomme seo se tla hola le ba bangwe.