Tšwelang Pele le Enya Dienywa ka Kgotlelelo

¹ Ge a be a ngwalela phuthego ya Kolose, e lego nywaga ya ka tlase ga e 30 ka morago ga lehu le tsogo ya Jesu Kriste, moapostola Paulo o be a ka bolela gore therešo ya ditaba tše di lokilego e enya dienywa le go ata lefaseng ka moka. (Ba-Kol. 1:5, 6) Dihlatse tša Jehofa di fihleletše e le ka kgonthe ‘magomo a lefase’ ka ditaba tše di lokilego tša Mmušo ka tekanyo e kgolo kudu lehono. (Dit. 1:8; Joh. 14:12) Ngwageng wa tirelo wa 1989, go bile le koketšego ya 5,6 lekgolong ya palo-gare ya bagoeledi ba Mmušo lefaseng ka bophara, gomme re fihleletše tlhora e mpsha ya bagoeledi ba 3 787 188 dinageng tše 212!

² Dinageng tšeo go bolela ka Mmušo wa Modimo go thibetšwego gomme dipego di sa felelago, go begilwe gaešita le koketšego e kgolo ya 7,6 lekgolong! Go sa šetšwe mathata a mantši ao a tšwelelago dinageng tšeo, bagoeledi ba tšwela pele “ba kxôtlêlêla xo bea dienywa.” (Luka 8:15) Mafelong a mangwe dikgateletšo di fokotšegile eupja maemo a thata a tšwela pele a sa fetoge dinageng tše dingwe.

³ Dinageng tšeo go tšona go nago le tokologo e oketšegilego ya go dira mediro ya go bolela ka Mmušo, re lebeletšana le mathata a fapanego. Go kopanwa le go se thabele, kudu-kudu moo go nago le katlego ya dilo tše di bonagalago. Bahlanka ba Jehofa ba swanetše go itiša gore ba se ke ba amogela dikgopolo tše bjalo. Ga re nyake gore go rata dilo tše di bonagalago, boithabišo, boitapološo le dilo tše dingwe tšeo di fapošago di šwahlele medirong ya rena ya pušo ya legodimo. Ge e ba go se bjalo, gona re tla ba bao ba sa hlokomelego gomme ra palelwa ke go lemoga bohlokwa bja go tšwela pele re enya dienywa ka kgotlelelo.—Luka 21:34-36.

GO NYAKEGA KGOTLELELO LE GO KATANA

⁴ Go nyakega kgotlelelo go sa šetšwe ge e ba re lebeletšane le go ganetšwa ga ditaba tše di lokilego goba re e-na le tokologo e lekaneditšwego ya go phetha mediro ya rena ya Bokriste. Dinageng tše dingwe, banababo rena ba be ba dutše ba šoma ka tlase ga maemo a sa kgahlišego ka nywaga-some e mentši. Go kgotlelela ga bona ka tlase ga mathata a bjalo go tšweleditše boemo bjo bo amogelwago, gomme bjale ba buna ditšhegofatšo tše di humilego. (Ba-Roma 5:3-5; Ba-Gal. 6:9) Go sa šetšwe mathata lege e le afe ao re ka gahlanago le ona, ruri re nyaka go tšwela pele re kgotleletše. Bohlatse bja Mmušo bo swanetše go newa, gomme ka moka ga rena re swanetše go tšwela pele re bontšha potego ya rena. Ka go kgotlelela, re tla šireletša maphelo a rena.—Mar. 13:10; Luka 21:19.

⁵ Re ka bontšha gore ga re tšeele dilo tša moya fase ka go katana ka matla tirelong ya Jehofa, re sa lape modirong wa go bolela. Dinageng tše dingwe moo go lego thata go hwetša dinamelwa, moo go se nago dinyakwa tša dilo tše di bonagalago le moo go nago le mathata a tša boiphedišo, ga go na go nyefiša boboleding bja ditaba tše di lokilego. Go tše sego kae tša dinaga tše bjalo, bagoeledi ba phuthego ka mehla ba fihlelela palo-gare ya diiri tše 14 go ya go tše 17 tirelong ya tšhemo kgweding e nngwe le e nngwe. Palo ya tšona ya babulamadibogo le yona e oketšega ka lenelo. Se se dira gore rena bao re nago le dilo tše dintši tše di bonagalago re eme gomme re nagane. Na re ka oketša karolo ya rena ya ka mehla modirong o bohlokwa-hlokwa wa go bolela ka Mmušo le go dira barutiwa?

NA RE KA DIRA MO GO OKETŠEGILEGO?

⁶ Go diriša nako e oketšegilego tirelong ya tšhemo mo gongwe go ka nyaka gore re beakanye dithulaganyo tša rena go se nene. Ge e ba re be re diriša iri bodireding bja tšhemo ka Sontaga, na mo gongwe re ka oketša nako yeo ka go diriša iri e nngwe re dira dipoelo goba re swere thuto ya Beibele? Goba ge e ba re swara thuto ya Beibele, na re ka akaretša iri goba go feta moo bakeng sa tirelo ya ntlo le ntlo goba re dire dipoelo tše sego kae pele re e-ya thutong? Ka Mokibelo ka morago ga go fetša diiri tše pedi modirong wa dimakasine, mo gongwe re ka iša dimakasine tsejaneng yeo re e thomilego ya dimakasine goba ra leka go dira dipoelo tše sego kae. Bao ba dulago metseng ya ditoropong mo gongwe ba ka hwetša e le mo go kgonegago go diriša nako e kgolwanyane go neeng bohlatse setarateng. Ka ditsela tše goba tše dingwe, mo gongwe re ka kgona go oketša go ba ga rena le karolo tirelong ya tšhemo. Mafelelo a mabotse a swanetše go oketšega ka go leka-lekana.

⁷ Go dirišwa ga nako e oketšegilego go dirwa dipoelo ga go pelaelo gore go tla feleletša ka go swarwa ga dithuto tše dintši tša Beibele. Ge nako e dutše e e-ya se se tla bolela go tla ga batho ba bantši therešong le go re thuša go phetha modiro wa go bolela ka Mmušo.—Mat. 28:19, 20.

THAPELO KE YA BOHLOKWA

⁸ Ge e ba re tla tšwela pele re enya dienywa ka kgotlelelo, re swanetše go tsoma tšhegofatšo ya Jehofa gomme re ithekge ka tlhahlo ya moya wa gagwe. Re swanetše go rapelela bodiredi bja rena go Jehofa. Ge re rapelela modiro wa rena wa tšhemo go Jehofa, re gopotšwa gore re bašomi-gotee le yena. (1 Ba-Kor. 3:9) Ka thušo ya Jehofa, re ka kgona go kgotlelela bodireding bja rena gaešita lege re sa bone mafelelo a kapejana. Mafelong a mangwe, go bile le koketšego feela ka morago ga nywaga e mentši ya go kgotlelela ka potego ga bagoeledi ba Mmušo. Ge re lebelela bokamosong, ruri ke gabohlokwa gore ka mehla re tsome tlhahlo ya Modimo le thušo e le gore re se lape eupja re phethe bodiredi bja rena ka botlalo. (2 Tim. 4:5) Go sa dutše go e-na le dienywa tše dintši tšeo di tšweletšwago modirong wa go bolela ka Mmušo le go dira barutiwa.

⁹ Jesu o gateletše bohlokwa bja gore re rapele ka mehla. (Luka 18:1) Paulo o eleditše ka gore: “Le se kxaotše xo rapêla.” (1 Ba-Thes. 5:17) Go na le mabaka a akgofilego a gore re phegelele go rapela mo nakong ye. Go akaretšwa boikarabelo bjo bogolo tabeng ya go hlokomela mohlape wo o golago ngwaga ka ngwaga. Re nyaka go thuša ba bangwe gore ba enye dienywa ka kgotlelelo. Go swanetše go lebišwa tlhokomelo go dinyakwa tše di fapa-fapanego tša mogoeledi o mongwe le o mongwe le tša phuthego ka moka. Ka go bona go nyakega ga meneelo ya go thekga modiro wo le go dira gore go kgonege go tšwela pele go gatišwa dipuku tšeo di theilwego Beibeleng, re nyaka go rapela Jehofa gore a tšwele pele go tutuetša batho bao ba boifago Modimo gore e be bao ba fago kudu tabeng ye.—2 Ba-Kor. 9:8-11.

¹⁰ Ka ge tšhemo ya lefase ka bophara e bulegela kgolo e kgolo kudu ya pušo ya legodimo go feta lege e le neng pele, ruri keletšo ya Mangwalo e lego go Ba-Kolose 4:2 e ba e bohlokwa ka kudu: “Tiišang thapêlô. Le phakxamê mo xo yôna Lè leboxa.” Re swanetše go rapelela banababo rena mafelong ka moka gore ba tšwele pele ba enya dienywa, ba thuša ba bangwe bao ba swanago le dinku bao ba hwetšwago tšhemong yeo go yona go nea bohlatse go bego go le thata kudu nakong e fetilego.

BONTŠHA TEBOGO

¹¹ Re leboga gakaakang ditokišetšo tše dintši tša moya tšeo re di thabelago gakaakaa! Re nyaka go leboga Jehofa ka baka la tšona, le gona re rapelela tšhegofatšo e tšwelago pele modirong wa molaki yo a botegago le Sehlopha sa gagwe se Bušago. Boiteko bja bona bja boikokobetšo le bja go se lape ka baka la rena le ka baka la batho bao ba swanago le dinku go dikologa lefase bo lebogwa e le ruri.

¹² Tabeng ya go bjala peu ya Mmušo, go sepedišitšwe dipuku tše dintši kudu. (Mat. 13:3-8, 18-23) Lega go le bjalo, go na le go nyakega mo go tšwelago pele ga Dibeibele le dipuku tša Beibele tšhemong. Pego ya lefase e bontšha gore go dirilwe mo gogolo kudu ka go bjala le go nošetša ka sebopego sa dipoelo le dithuto tša Beibele. Ge re dutše re tšwela pele go dira karolo ya rena dibopegong tše tša bodiredi bja rena, re leboga Jehofa ka baka la tšhegofatšo ya gagwe yeo e tšwelago pele yeo e medišago. Ka kgonthe, re rapelela tšhegofatšo yeo.—1 Ba-Kor. 3:6, 7.

DINYAKWA TŠE DINGWE

¹³ Ka baka la go ba lefaseng gaešita lege ba se karolo ya lona, Bakriste ba tla tšwela pele ba lebeletšane le meleko le diteko, gomme tše di sa dutše di tla ata mehleng ye ya bofelo. Mo nakong ye ba bangwe ba kgotlelela tlaišo goba mathata a mangwe. Ba bangwe ba swanetše go tšwetša pele modiro wa bona wa Bokriste dinageng tšeo di ripitlilwego ke ntwa. Banababo rena ba ile ba welwa ke manyami ao a swanago le ditšhišinyego tša lefase, madimo le disasedi. Ge tše di direga, gona re swanetše go rapelela banababo rena bao ba lego mafelong a bjalo. (Bapiša le Ditiro 12:5; 2 Ba-Korinthe 1:11.) Ka dinako tše dingwe e ba mo go nyakegago go ya goba go ngwalela bahlankedi ba mmušo bao ba lego maemong a phagamego mabapi le dithibelo modirong wa rena, go tlaišwa ga banababo rena, goba ditaba tše dingwe tšeo di kgomago dikgahlego tša Mmušo. Maemong a bjalo, re dira seo re ka se kgonago ka borena, gomme re rapelela batho ba gore mo gongwe ba ka kwela bahlanka-gotee le rena bohloko.—1 Tim. 2:1, 2.

¹⁴ Go na le dikgateletšo tše dintši tšeo di tlišwago malapeng ao a phelago lefaseng le kgopo la Sathane. (2 Ba-Kor. 4:4) Banyalani mo gongwe ba ka kopana le mathata a mašoro. Ba swanetše go kgothaletšwa go rapelela tlhahlo ya Modimo, le gona mo gongwe re ka ba rapelela. (1 Ba-Kor. 7:5; 1 Pet. 3:7) Dihlogo tša malapa di swanetše go lemoga gore Jehofa o tla theetša dithapelo tša tšona tšeo di tšwago pelong tša go rapelela tlhahlo tabeng ya go buša malapa a tšona gabotse. (Baa. 13:8; B-a-Fil. 4:6, 7) Ba banyenyane le ba bagolo ba lebeletšane le maemo a lekago. E ka ba sekolong, mošomong wa boiphedišo, ge go sepelwa ka dinamelwa, goba maemong a mangwe. Thapelo e re thuša go gana moya wa lefase le le kgopo le gore re tšwele pele re enya dienywa ge re dutše re dira seo se kgahlišago mahlong a Modimo.—Mat. 6:13; Ba-Ef. 6:13-18; 1 Joh. 3:22.

¹⁵ Jehofa ke Mokwi o mogolo wa thapelo. (Ps. 65:2) Re swanetše go lahlela dipelaelo tša rena go yena ka dinako tšohle. (Ps. 55:22) Re na le dibaka tša go bontšha go kgomega ga rena ka go rapelela dikgahlego tša Mmušo le ka go rapelela katlego ya banababo rena mafelong ka moka. Ge re ela hloko mošomo wa bao ba etelelago pele ka phuthegong gotee le bao ba laolago lenaneo la koketšego ya lefase ka bophara, ge re dirišana le bao ba fokolago moyeng, goba ge re rarolla mathata a mangwe a magolo goba a manyenyane, ka moka ga rena re swanetše go iša ditaba tše bjalo go Jehofa ka thapelo. (1 Ba-Thes. 5:25; Jak. 5:14-16) Ee, dipelaelo tša rena di swanetše go lahlelwa go Jehofa ka kgodišego e tletšego ya gore go sa šetšwe selo lege e le sefe seo re se kgopelago ka go dumelelana le thato ya gagwe, o tla re kwa. (1 Pet. 5:7; 1 Joh. 5:14) Eka re ka ba mafolofolo tirelong ya Mmušo gomme re lebelele ka go se kgaotše gore Jehofa a re thuše go tšwela pele re enya dienywa ka kgotlelelo.