Go Neela Ditaba Tše Lokilego
Ka Mokgwa wa Thapelo
1 Moapostola Paulo o ile a ngwalela ba-Filipi ka go kgothatša gore, “Ke kxôna tšohle ka Eo a mphaxo matla.” (Ba-Fil. 4:13) Gape re swanetše go bota Jehofa ka mo go feletšego bakeng sa matla a go neela ditaba tše di lokilego ka sebete. Re ka dira bjang se?
2 Jesu o gateletše bohlokwa bja gore re ‘fele re rapela re sa lape.’ (Luka 18:1) Paulo o kgothaditše ka gore, “Le se kxaotše xo rapêla.” (1 Ba-Thes. 5:17) Ee, matla a tšwa thapelong. Re swanetše go neela ditaba tše di lokilego ka mokgwa wa thapelo. Mo gongwe re ka rapelela dibaka tša go nea bohlatse go ba bangwe, ra rapelela bohlale le temogo modirong wa ntlo le ntlo, le bakeng sa go atlega tabeng ya go fihlelela dipelo tša barutwana ba rena ba Beibele. Ka ge go e-na le go nyakega mo go akgofilego ga gore ditaba tše di lokilego tša Mmušo di bolelwe pele ga ge bofelo bo e-tla, gona re swanetše go rapelela gape go tšwetšwa pele ga dikgahlego tša Mmušo lefaseng ka bophara. (Mat. 24:14) Re swanetše ‘go dula re phakgame’ thapelong e le gore re pheme go otsela moyeng gomme re oketše tebogo ya rena ya go leboga tokelo ya go bolela le ba bangwe ka merero ya Jehofa.—Ba-Kol. 4:2; w62 letl. 497.
DITHUTONG TŠA BEIBELE
3 Ke ka baka la’ng thapelo e le ya bohlokwa ge re swara thuto ya Beibele? Go thoma thuto ka thapelo go re bea boemong bjo bobotse bja kgopolo, gomme go thuša morutwana go lemoga bohlokwa bja seo se bolelwago. O ithuta go lebelela go Jehofa bakeng sa tlhahlo. Morutwana le gona o ithuta kamoo a ka rapelago ka gona ka mohlala wa rena.—Luka 11:1.
4 Ke dilo dife tše dingwe tšeo e tla bago mo go swanetšego go di akaretša dithapelong ge re le dithutong tša magae tša Beibele? Thapelo ya Jesu ya mohlala le thapelo ya Paulo ya go rapelela ba-Filipi ke mehlala e mebotse. (Mat. 6:9-13; Ba-Fil. 1:9-11) Dithapelo tša rena ga se tša swanela go ba tše telele, eupja di swanetše go akaretša dilo tše itšego tše lebanego. Ke gabohlokwa gore re akaretše dipolelo tše swanetšego tša tumišo go Jehofa bakeng sa mediro ya gagwe e mebotse kudu yeo e sa balegego. Re ka bontšha go lemoga ga rena bogolo bja gagwe, bophagamo bja gagwe le dika tša gagwe tše phethagetšego. (Ps. 145:3-5) Go bolela morutwana wa Beibele ka leina, mohlomongwe re bolela maemo a gagwe, gomme re rapelela gore a dire tšwelopele ya moya e tla ba mo go holago. Ge a dutše a tšwela pele, re ka kgopela tšhegofatšo ya Jehofa maitekong a gagwe a go ba gona dibokeng le go abelana le ba bangwe therešo yeo a ithutago yona. Akaretša ditopo tša go lopa tšhegofatšo ya Jehofa modirong wa boboledi wa lefase ka bophara.
BAKENG SA BANABABO RENA LE DIKGAETŠEDI
5 Batho ka moka ba Jehofa ke badirišani ba rena. (1 Ba-Kor. 3:9) Ka gona, ge babuši ba lefase ba tsoma go šitiša go bolelwa ga ditaba tše di lokilego, re tutueletšega go rapelela “marêna le bohle ba e lexo ba baxolo.” Bakeng sa morero ofe? “Xore re phelê rè wile dipelo rè iketlile, rè le ba borapedi ruri, rè le batsebalexi.” (1 Tim. 2:1, 2) Dithapelo tše bjalo ge e le gabotse ke tša go rapelela banababo rena go dikologa lefase. Re rapelela gore babuši e be bao ba nago le kgopolo e botse ka modiro wa rena.
6 Ka thapelo, re ka kgopelela banababo rena matla a go bolela ka tlase ga maemo a thata le bao ba ka bago ba babja moyeng, e le gore ba ka ba le karolo e tletšego bodireding. (2 Ba-Thes. 3:1, 2) Le gona ke mo gobotse go rapelela bagolo ba phuthego, balebeledi ba basepedi le Sehlopha se Bušago—bohle “bao ba šomago ka thata gare ga lena.”—1 Ba-Thes. 5:12, NW.
7 Re swanetše go lahlela dipelaelo tša rena ka dinako tšohle go Jehofa. (Ps. 55:22; 1 Pet. 5:7) Re kgonthišetšwa gore go sa šetšwe selo lege e le sefe seo re se kgopelago ka go dumelelana le thato ya gagwe, o tla re kwa. (1 Joh. 5:14) Ka gona, ge e ba re rapelela thušo ya Jehofa go phetheng bodiredi bja rena ka botlalo, re swanetše go kgodišega gore o tla theetša gomme a dira gore tsela ya rena e atlege.—2 Tim. 4:5.