Letlolo la Dipotšišo

● Ke ka baka la’ng re swanetše go ela hloko ka mo go kgethegilego moaparo le go itokiša ga rena ge re etela Bethele ya Afrika Borwa le meago e mengwe ka moka ya lekala lefaseng ka moka?

Bakriste ba letetšwe gore ba kgomarele mekgwa e swanetšego. Moaparo le go itokiša ga rena ka dinako tšohle di swanetše go bontšha bothakga le seriti tšeo di swanetšego bahlanka ba Jehofa Modimo. Se se tloga se le bjalo kudu ge re etela Bethele le diofisi tše dingwe tša makala le meago e mengwe go dikologa lefase. Go Rulaganyetšwa go Dira Bodiredi bja Rena ge e ahla-ahla bohlokwa bja go apara le go itokiša ka mo go swanetšego, e bolela ka go nyakega ga go hlweka mmeleng, go apara le go itokiša ka mo go hlomphegago ge re e-ba le karolo bodireding bja tšhemo le ge re le dibokeng tša Bokriste. Ka gona, letlakaleng 131, serapa 2, e re: “Go tla ba bjalo le tabeng ya ge go etelwa legae la Bethele kua Brooklyn goba lekala lege e le lefe la diofisi tša Mokgatlo. Gopola, leina Bethele le bolela gore ‘Ntlo ya Modimo,’ ka gona go apara ga rena, bothakga le boitshwaro di swanetše go swana le seo se lebeletšwego go rena ge re le dibokeng tša borapedi Holong ya Mmušo.”

Moapostola Paulo o boletše gore re “seboxêlô sa lefase le sa Barongwa le sa batho.” (1 Ba-Kor. 4:9) Ka gona, moaparo le go itokiša ga rena go swanetše go ba le tutuetšo e botse go ba bangwe ge e le kamoo ba lebelelago borapedi bja therešo bja Jehofa ka gona. Lega go le bjalo, go lemogilwe gore banababo rena ba bangwe le dikgaetšedi, ge ba etela makala a Mokgatlo, ba apara diaparo tša bona tšeo di tlogago di se na seriti. Moaparo o bjalo ga se wa swanela ge go etelwa meago ya lekala. Tabeng ye, go swana le dibopegong tše dingwe ka moka tša bophelo bja Bokriste, re kganyoga go boloka boemo bjo bo swanago bjo bo phagamego bja ditekanyetšo tše di kgethollago batho ba Modimo lefaseng ka go dira dilo ka moka gore go tumišwe Modimo. (Ba-Roma 12:2; 1 Ba-Kor. 10:31) Ka gona ke mo go botse go bolela le baithuti ba rena ba Beibele le ba bangwe bao mo gongwe ba ka etelago Bethele ya Brooklyn goba e nngwe ya diofisi tša lekala tša Mokgatlo la mathomo e le go ba gopotša bohlokwa bja go ela hloko moaparo le go itokiša mo go swanetšego.

Ka gona ge o etela meago ya Mokgatlo, ipotšiše: ‘Na moaparo le go itokiša ga-ka go bontšha boipoetšo? (Mika 6:8) Na go bonagatša go emela Modimo yo ke mo rapelago gabotse? Na ba bangwe ba tshwenywa goba ba kgopišwa ke ponagalo ya-ka? Na ke bea mohlala o swanetšego bakeng sa bao mo gongwe ba etelago la mathomo?’ Anke ka mehla, ka moaparo le go itokiša ga rena, re ‘thakge thuto ya Modimo Mophološi wa rena dilong ka moka.’—Tito 2:10.