Go Neela Ditaba Tše Lokilego
Ka Dimakasine
1 Ga go na dimakasine lege e le dife tše dingwe tšeo di bilego le tutuetšo e matla gakaakaa ya go tutueletša go dira botse maphelong a batho go etša ge Morokami le Phafoga! di bile le yona. Tokollo e nngwe le e nngwe e tletše ka dijo tša moya tšeo di neago bophelo. Mafelelo a nyakišišo e tseneletšego yeo neilwego gotee le thekgo ya Mangwalo di gatelela molaetša wa therešo menaganong ya rena le dipelong.
2 Morokami ka matlakala a wona, o hlalosa dithuto tša Beibele gomme o lebiša tlhokomelo go phethagatšweng ga diporofeto tša Beibele. O kgothaletša bohle bao ba swerwego ke tlala ya moya gore ba fetoše kgopolo ya bona le go apara motho o mofsa. (Ba-Roma 12:2; Ba-Ef. 4:22-24) Phafoga! e phafoša babadi ba yona ge e le ka ditiragalo tša bohlokwa lefaseng. Diswantšho tša yona tše kgahlišago tše di bontšhago dimakatšo tša tlholo di fehla kgahlego ya go kgahlegela lefase le lefsa gomme tša tiiša tebogo ya go leboga Mmopi yo lerato.
GA DI SWANE LE DIMAKASINE TŠA LEFASE
3 Dimakasine tša lefase ga di bontšhe batho kamoo ba ka bago le maphelo a kgotsofatšago lefaseng le. Ga di nee kholofelo ya bokamoso gomme di palelwa ke go ruta batho kamoo ba ka hwetšago bophelo bjo bo sa felego. Dimakasine tšeo tša lefase di rulaganyeditšwe go tšwetša pele dilo tša lefase. Di tloga di fapana gakaakang le Morokami le Phafoga!—1 Joh. 2:15-17.
4 Ka ntle le pelaelo, wena ka noši o kwa o e-na le tebogo e tseneletšego ka tokollo e nngwe le e nngwe ya Morokami le Phafoga!—dimakasine tšeo di huperego menko e bosana ya therešo go tšwa go “molaki e a bôtêxaxo.” (Luka 12:42) Re ka dira’ng go kaonefatša go sepediša ga rena dimakasine gomme ka go rialo re thuše ba bantši go holwa ke dimakasine tša rena?
GO DIRA KAROLO YA RENA
5 Pele re ka kgothaletša ka tshwanelo batho ba dipelo tše botegago gore ba bale dimakasine tša rena, re swanetše go tseba seo makasine o mongwe le o mongwe o se huperego. Se se nyaka gore re bale tokollo e nngwe le e nngwe pele re e diriša bodireding. Ka go tlwaelana le dikagare tša wona ka botlalo, re ka diriša dithulaganyo tša bodiredi bja ntlo le ntlo, modiro wa setarata le go nea bohlatse bjo sa rulaganyetšwago bakeng sa go aba dimakasine.
6 Go feta moo, ka go sepela le dimakasine tša gona bjale ge re le mabenkeleng, ge re nametše senamelwa sa batho bohle, re le sekolong, lefelong la rena la mošomo, goba kae le kae mo re yago gona, re tla kgona go diriša dibaka tše swanetšego tša go nea bohlatse. Matseno a kgethilwego gabotse go tšwa pukung ya Go Boledišana ao a sepedišanago le ntlha e tšwago go se sengwe sa dihlogo mo gongwe a ka tsoša kganyogo ya motho ya go rata go bala dimakasine tša rena.
7 Gaešita lege poledišano ya rena e ka ba e kopana ge re sepediša dimakasine, ga se ra swanela go lekanyetša poledišano ya rena go mo e ka bago motsotso o tee feela. Re rata go diriša nako re kgonthišetša ge e ba motho a thabela molaetša e le ka kgonthe le ge e ba a tla bala makasine. Ge e ba potšišo e rotoga, re swanetše gore ka mehla re diriše Beibele ya rena goba puku ya Go Boledišana. Ka go ba ba itokišeditšego go emela tumelo ya rena, re ka buna ditšhegofatšo tše kgahlišago.—1 Pet. 3:15.
8 Ge e ba motho a dumela go bala dimakasine, re ka bolela ka sebopego sa modiro wa rena le kamoo dimakasine tše di gatišwago ka gona gabedi ka kgwedi e le karolo ya modiro wa lefase ka bophara wa go ruta ka Beibele. Tsebišo yeo e lego go letlakala 2 la Morokami goba letlakala 4 la Phafoga! e hlalosa se gabotse kudu. Ka ge dikagare tša tokollo e latelago di lokeletšwa ka mehla, re ka šišinya dipotšišo tše tswalanago le seo goba ra lebiša tlhokomelo dihlogong tše di tlago. Se mo gongwe se ka tsoša kganyogo ya motho gomme sa mo dira gore a bontšhe kganyogo ya gagwe ya go hwetša tokollo yeo ge e e-tšwa. Se e ka ba mathomo a tsejana ya dimakasine.
9 Ge bofelo bja tshepedišo ye ya dilo bo dutše bo batamela, eka re ka oketša lebelo la rena la go thuša batho ba dipelo tše botegago go khuduga go Babele o Mogolo gomme ba tle therešong. (Kut. 18:4) Morokami le Phafoga! di phetha karolo e matla modirong wa rena wa lefase ka bophara wa go ruta ka Beibele. Re leboga ge Jehofa a re neile tšona bakeng sa go di diriša bodireding bja rena. Eka Jehofa a ka tšwela pele a šegofatša go diriša ga rena ka tlhokomelo le ka matla dimakasine tše!