Tsebišang Bohle Gore Polokego Ya Lefase Ka Bophara E Kgaufsi

1 Kgaufsinyana “Kxoši ya kaxišô” e tla hloma khutšo ya kgonthe le polokego lefaseng ka bophara. Tumelo ya rena kholofetšong ye ya Beibele e swanetše go re tutueletša go e abelana le ba bangwe. (Jes. 9:5, 6; Mika 4:3, 4) Dikgweding tša January le February, re tla be re sepetša puku ya O ka Hwetša Bjang Khutšo ya Kgonthe le Polokego?

2 Go letlakala 4 la tokollo ye ya Tirelo ya Rena ya Mmušo, re neile matseno a mmalwa ao le ka ratago go a diriša bodireding ka January. Mekgwa e meraro ya go fetela mphong yeo e ka bago e holago tabeng ya go lebiša tlhokomelo ya beng ba dintlo pukung ya Khutšo ya Kgonthe e šišintšwe dirapeng tše di latelago.

3 Mokgwa No. 1: Ka morago ga go bala Jesaya 9:5, 6, phetla letlakala 7 gomme o bale serapa 9. Ke moka botšiša gore: “Na o dumela se? Na o nagana gore Modimo o tla ka a phetha kholofetšo ya gagwe ya go fediša bokgopo?” Emela karabo, gomme o tšwele pele ka gore: “Puku ye e ahla-ahla ka mo go kwagalago kholofelo e nnoši yeo re nago le yona bakeng sa khutšo ya kgonthe le polokego le kamoo “Kxoši ya kaxišô” e tlago go tliša khutšo ya lefase ka bophara lefaseng mehleng ya rena. Na o rata go e bala, gomme na o ka rata go ithuta ka mo go oketšegilego ka lefase le lefsa leo le holofeditšwego?”

4 Mokgwa No. 2: Ka morago ga go bala Mika 4:3, 4, phetla letlakala 98 gomme o botšiše mong wa ntlo gore: “Ke maemo afe a khutšo ao o a bonago seswantšhong se?” Emela karabo, ke moka o tšwele pele ka gore: “Go na le khutšo gare ga batho ka bobona le khutšo le diphoofolo. Ba bangwe mo gongwe ba ka ba ba nagana gore mebušo ya batho e tla tliša khutšo e bjalo. Eupja khutšo ya kgonthe le polokego bjalo ka ge e boletšwe e sa le pele ka Beibeleng e swanetše go tlišwa ke Modimo, e sego batho. Na ga o dumelelane le se?” Emela karabo, gomme o bale serapa 16 go letlakala 100 gomme o hlalose gore puku ye e araba dipotšišo tše dintši mabapi le Mmušo le khutšo mo lefaseng. Hlalosetša mong wa ntlo gore o tla thabela go mo tlogelela puku ka moneelo wa R2,60.

5 Mokgwa No. 3: Mafelong ao go ona batho ba tlwaetšego go go tsena ganong gomme ba sa go dumelele gore o fetše thero ya gago, o ka diriša mokgwa wo: “Na nka go botšiša potšišo?” Ge e ba mong wa ntlo a dumela, tšwela pele ka gore: “Jesu o ile a re ruta go rapelela Mmušo wa Modimo gore o tle le gore thato ya gagwe e dirwe mono lefaseng bjalo ka ge e dirwa legodimong. Na o nagana gore thapelo ye e tla ka ya arabja mo e lego gore thato ya Modimo e tla dirwa mono lefaseng? Pono ya gago ke efe?” Emela karabo, gomme o re: “Karabo ya Beibele ya potšišo yeo e hwetšwa mo go letlakala 95.” Bjale bala serapa 5 go letlakala 95, gomme o bontšhe kamoo mangwalo ao a botšhitšwego ka pukung ye a arabago potšišo yeo le tše dingwe tše dintši ka khutšo le polokego tša lefase ka bophara.

6 Mo gongwe o ka ba o kgethile matseno ao o a ratago go letlakala 4 la Tirelo ya Rena ya Mmušo. Ka morago ga go hlahloba mekgwa ya go fetela mphong yeo e lego sehlogong se, o ka hwetša o mongwe ka mo go kgethegilego woo o ka thabelago go o diriša. Dira nako ya go itlwaetša matseno a gago le mokgwa wa go fetela mphong pele o e-ya tirelong ya tšhemo. Go lokišetša ga gago le go kgodišega ga gago ka noši gore khutšo ya kgonthe le polokego e tla tla ka “Kxoši ya kaxišô” le ka Mmušo wa gagwe go tla tlaleletša go phegeleleng le go fišegeng ga gago ge o sepetša puku ya Khutšo ya Kgonthe.