Na O Ka Kgona Go Ba Mmulamadibogo Wa Go Thuša?

1 Jesu o kgothaleditše balatedi ba gagwe go ikgafela bodiredi ka bolokologi, gomme a ba kgonthišetša gore go latela tsela yeo go be go tla ba tlišetša lethabo le ditšhegofatšo tše dintši. (Mat. 10:8b; Dit. 20:35) Ngwagola ka April batho ba fetago 6000 ba bile le phihlelo ya pele ya go latswa lethabo le le oketšegilego e le babulamadibogo ba go thuša. Na o ka kgona go ba le karolo ditšhefatšong tše ka go ngwadiša gore o be mmulamadibogo wa go thuša ka March goba ka April goba mohlomongwe dikgweding tše ka bobedi?—Ps. 34:8.

2 Go Hlahloba Maemo a Gago: Ge o dutše o nagana ka mehlala e bontšhitšwego ka mo tlase, ipotšiše: ‘Na ke ipona ke le go o mongwe wa mehlala ye? Nka dira bjang dipeakanyo tšeo di tlago go bula tsela ya go ba mmulamadibogo wa go thuša?’

3 Kgaetšedi o mongwe o kgonne go ba mmulamadibogo wa go thuša gaešita lege a be a e-na le bana ba bahlano a bile a šoma mošomo wa boiphedišo. O ile a putswa bjang? Monna wa gagwe le bana ba gagwe ba ile ba mo nea thekgo e botse kudu, gomme ka baka la mohlala o mobotse wa kgaetšedi yeo, monna wa gagwe o ile a tutueletšega gore e be mogoeledi yo a sa kolobetšwago kgweding e latelago.

4 Phuthegong e nngwe bagolo ka moka le bahlanka ba bodiredi ba ile ba dira e le babulamadibogo ba go thuša kgweding e tee. Ba bantši ba bona ba be ba šoma mešomo ya boiphedišo, eupja ba be ba swarega ka kudu ka mediro ya moya mafelo-bekeng. Go etelela pele ga bona mo gobotse boboleding le go rulaganyeng tirelo ya tšhemo go hotše phuthego ka moka. Go bagoeledi ba 77, ba 73 ba bile le karolo sebopegong se itšego sa tirelo ya bobulamadibogo kgweding yeo.

5 Ngwanenyana wa nywaga e 15 yo a tsenago sekolo o dirišeditše nako ya gagwe ya maikhutšo a dibeke tše pedi bakeng sa go tšea karolo modirong wa bobulamadibogo bja go thuša gomme o re: “Ruri ke bona phapano, kudu-kudu kaonefatšo poledišanong. Ke kgonne go boledišana le batho ba oketšegilego malapeng.”

6 Bao ba rotšego modiro wa boiphedišo gantši ba ba le dibaka tše dibotse kudu tša go phegelela dikgahlego tša Mmušo. Ka morago ga lehu la monna wa gagwe, kgaetšedi wa nywaga e 84 o ngwadile gore: “Bana ba-ka ka moka ba be ba gotše, ba tsene lenyalong ba bile ba e-na le malapa. Ga se ba ntahla, eupja go etela ga bona ga se gwa tloša maikwelo a go lahlegelwa le bodutu. Ka gona o mongwe wa bagolo ka phuthegong ya gešo o ile a šišinya gore ke leke bobulamadibogo bja go thuša. Ke ile ka dika-dika eupja mafelelong ka phetha ka go bo leka. A lethabo le le kaakang! Ke ile ka ikwa gore Jehofa o ntumeletše gore ke phele go fihla nywageng ye e le gore ke be le phihlelo ya bobulamadibogo bja go thuša. Ke tšwetše pele ke le mmulamadibogo wa go thuša kgwedi e nngwe le e nngwe ga e sa le go tloga moo.”

7 Ngwanabo rena yo a rekišago dithoto le dintlo o ile a lokiša lenaneo la gagwe la go dira pontšho ya dintlo e le gore a bule sebaka sa tirelo ya bobulamadibogo. Ba bangwe le bona ba ile ba dira dipeakanyo medirong ya bona gore ba bulele tirelo e oketšegilego sebaka.

8 Dira Dithulaganyo tša Gago Gona Bjale: Ke ka baka la’ng o sa dire dithulaganyo tše dibotse gona bjale gore o be mmulamadibogo wa go thuša ka March le April? Gore o atlege, go nyakega gore o rulaganye ka kelohloko. Se se bonala go tšwa diphihlelong tša bao ba ilego ba kgona go ba babulamadibogo ba go thuša gaešita lege ba be ba e-na le boikarabelo bja malapa, modiro wa ka mehla wa boiphedišo le boikarabelo bjo bongwe bja Mangwalo. Boledišana le ba bangwe bao ba ilego ba atlega go bula madibogo gore o holwe ke phihlelo ya bona. Le gona, batamela go Jehofa ka thapelo, o kgopele thušo.—Jes. 40:29-31; Jak. 1:5.

9 Ga go pelaelo gore bao ba rulaganyago ditaba tša bona gore ba dire e le babulamadibogo ba go thuša ba thaba kudu. Ge e ba o sešo wa ba tirelong ya nako e tletšego, na o ka thabela tokelo ye? Ge e ba o dira boiteko bja go godiša tokelo ya gago ya go abelana le ba bangwe ditaba tše di lokilego, ruri Jehofa o tla go tšhollela ditšhegofatšo tše dintši.—Mal. 3:10.