Latelela Kgahlego Ka Ntle Le Go Dika-dika

1 “Tiego e tswala tahlego.” Ba bantši ba tseba seema se seo se kgothaletšago gore dilo tšeo dinyakegago di dirwe ka bjako. Taba ya gore re ka diriša molao wo wa motheo bodireding bja rena e bontšhwa ke phihlelo e latelago.

2 Kgaetšedi o ile a sepedišetša monna o mongwe puku gomme a holofetša go boa. Ka phošo kgaetšedi o mongwe o ile a etela ntlong yona yeo ka morago ga iri. Monna yoo o ile a tla mojakong a swere puku ka seatla gomme a mmotša gore: “Ge o be o re o tla boa, ke be ke sa nagane gore e tla ba ka pela gakaakaa, eupja tsena, ke itokišeditše go ithuta.”

3 Gaešita lege go boela ka pela ka mokgwa woo e se selo seo se tlwaelegilego, fela phihlelo ye e gatelela go nyakega ga go phafogela go latelela kgahlego yeo re e hwetšago bodireding bja rena ka ntle le go dika-dika ka mo go sa swanelago. Ka March re tla be re sepediša puku ya Seremo sa Kutollo. Ditiragalo tša lefase di dira gore go be molaleng gore puku ye yeo e hlalosago puku ya mafelelo ya Mangwalo a Bakriste a Segerika, e nakong go swana le kuranta ya lehono, radio le dipego tša ditaba tša thelebišene mabapi le ditiragalo tša lefase tšeo di bolelago ka go lebanya ka maphelo a batho ka moka.

4 Batho ba Nyaka Thušo e Oketšegilego: Gore re thuše batho go kwešiša tsebišo yeo e lego ka pukung ye le go lemoga gore ke e swanetšego bakeng sa bophelo le bokamoso bja bona, re swanetše go rulaganyetša leeto la go boela, e ka ba mo gobotse ge le ka dirwa matšatšing a sego kae ka morago ga leeto la mathomo. Re tla dira se bjang? Mo gongwe go tsebiša motho gore o tla boa go tla go thuša go bona bogolo bja kgahlego ya gagwe.

5 Kgora Tsela Bakeng sa Leeto la go Boela: Lefaseng la lehono ga se ka mehla go lego bonolo go dira tumelelano bakeng sa nako e itšego, gomme mong wa ntlo mo gongwe a ka se gopole go boloka nako yeo le e beelanego. Lega go le bjalo, ge e ba o ngwala nako ya leeto le lebjalo la go boela ka kelohloko gomme wa kgonthišega gore o etela—ka morago ga matšatši a sego kae ge e ba go kgonega—o tla be o phethagatša boikarabelo bja gago bja go lota nako yeo le e beelanego. Ge e ba motho a se gona gae, kgonthišega gore o tšwela pele o leka go ikopanya le yena. Mo gongwe a ka kgothaletšega gore a tšee ketelo ya gago e le ya bohlokwa ge a bona boikemišetšo bja gago bja go nyaka go mo hwetša gae.

6 Ka ge re ka se kgodišege ka mo go feletšego ka kgahlego yeo e bontšhwago ke motho ge re kopana le yena ka lekga la mathomo, gona ngwala gore o boele gaešita lege a bonala a kgomegile go se nene feela. Ke mo go holago go latelela kgahlego e bjalo ka ntle le go dika-dika. Mo gongwe o ka ba o tutueditše kgahlego ya motho ka puku ya Seremo sa Kutollo, gomme ge o boela o ka makatšwa kudu ke kamogelo e botse yeo o e hwetšago. Ka gona, kgonthiša gore o latelela kgahlego ka ntle le go dika-dika!