Rapa Sebete Gore O Dire Maeto A Go Boela

¹ Na o thabela go dira maeto a go boela? Bagoeledi ba bantši ba thabela seo. Mohlomongwe ka lekga la pele o ile wa tšhoga, kudu-kudu ge o boela go beng ba dintlo bao ba ilego ba bontšha kgahlego e nyenyane feela ge ba be ba etelwa la mathomo. Eupša ge o dutše ‘o rapa sebete ka thušo ya Modimo wa rena gore o bolele ditaba tše di lokilego’ ka go dira maeto a go boela, mo gongwe o ka no makatšwa ke go hwetša kamoo modiro wo e ka bago o bonolo le o putsago ka gona. (1 Ba-Thes. 2:2, NW) Seo se bjalo bjang?

² Ge e le gabotse, go na le phapano e bohlokwa magareng ga leeto la go boela le ketelo ya mathomo. Leeto la go boela le dirwa go motho yo a tlwaetšwego, e sego motho yo a sa tsebjego, gomme ka kakaretšo go bonolo go bolela le motho yo o mo tlwaetšego go e na le go bolela le motho yo a sa tsebjego. Ge e le ka meputso e humilego yeo e bakwago ke go ba le karolo modirong wo, maeto a go boela a ka lebiša dithutong tša legae tša Beibele tše di tšweletšago dienywa.

³ Ge re šoma ka ntlo le ntlo, re etela leboelela go batho bao ba bego ba sa bontšhe kgahlego ge re be re ba etetše nakong e fetilego. Ka gona-ge, ke ka baka la’ng re tšwela pele re ba etela? Re lemoga gore maemo a batho a a fetoga le gore batho bao go bonagetšego ba se na kgahlego goba gaešita le go ba ba ganetšago ketelong ya nako e fetilego ba ka ba le kgahlego nakong e latelago ge re etela. Re gopola ka seo, re lokišetša gabotse gomme ra rapelela tšhegofatšo ya Jehofa e le gore selo se sengwe seo re se bolelago nakong ye se ka tsoša kgahlego.

⁴ Ge e ba modirong wa rena wa ntlo le ntlo re dira boboledi ka go rata bathong bao nakong e fetilego ba sa kago ba bontšha kgahlego le gatee, na ga se ra swanela go ikemišetša kudu le go feta go boela go yo mongwe le yo mongwe yo a bontšhago kgahlego molaetšeng wa Mmušo?—Dit. 10:34, 35.

⁵ Bontši bja rena re therešong lehono ka gobane mogoeledi yo a itšego ka go se fele pelo a ile a dira maeto a go boela go rena. Ge e ba o le yo mongwe wa ba, mohlomongwe o ka ipotšiša: ‘Ke maikwelo afe a mathomo ao ke ilego ka a nea mogoeledi yoo? Na ke ile ka amogela gatee-tee molaetša wa Mmušo ge ke be ke o kwa ka lekga la pele? Na e ka ba ke ile ka bonagala ke sa bontšhe kgahlego?’ Re swanetše go thabela gore mogoeledi yo a ilego a etela gape o ile a bona re swanelwa ke leeto la go boela, a ‘rapa sebete ka thušo ya Modimo,’ a re etela gomme a tšwela pele a re ruta therešo. Go thwe’ng ka batho bao ba bontšhago kgahlego e itšego ka lekga la mathomo eupša ka morago ba bonagala ba re tšhabela? Boemo bjo bo swanetšego bja kgopolo ke bja bohlokwa, bjalo ka ge phihlelo e latelago e bontšha.

⁶ Ge ba be ba swaregile ka go nea bohlatse setarateng mesong e mengwe, bagoeledi ba babedi ba ile ba gahlana le mosadi yo a bego a kgarametša ngwana ka phorema. Mosadi o ile a amogela makasine gomme a laletša dikgaetšedi gore di tle legaeng la gagwe Sontaga se se latelago. Di ile tša fihla ka nako e beilwego, eupša mong wa ntlo o ile a di botša gore ga a na nako ya go bolela le bona. Lega go le bjalo, o ile a holofetša gore o tla hwetšagala bekeng e latelago. Dikgaetšedi di be di belaela ge e ba a tla boloka tumelelano yeo, eupša ge di boa mosadi o be a di letetše. Thuto e ile ya thongwa, gomme tšwelopele ya mosadi e be e le e tlabago. Ka nako e kopana, o ile a thoma go ba gona dibokeng ka mehla gomme a ba le karolo tirelong ya tšhemo. Mo nakong ye o kolobeditšwe.

⁷ Thea Motheo Ketelong ya Mathomo: Motheo bakeng sa leeto le le atlegilego la go boela gantši o thewa ketelong ya mathomo. Theetša ditlhaloso tša mong wa ntlo ka kelohloko. Di go botša’ng? Na o sekametše bodumeding? Na o tshwenyegile ka ditaba tša tša leago? Na o kgahlegela thutamahlale? histori? le tikologo? Bofelong bja ketelo, o ka rotoša potšišo e šišinyago kgopolo gomme o holofetše go ahla-ahla karabo ya Beibele ge o boa.

⁸ Ka mohlala, ge e ba mong wa ntlo a arabela kholofetšong ya Beibele ya lefase la paradeise, poledišano e tšwelago pele ka taba e ka ba e swanetšego. Pele ga ge o tloga, o ka botšiša gore: “Re ka kgodišega bjang gore Modimo o tla phethagatša kholofetšo ye?” Ke moka o ka oketša ka gore: “Mohlomongwe nka feta mo ge lapa ka moka le le gona gae, ka gona nka go bontšha karabo ya Beibele potšišong ye.”

⁹ Ge e ba mong wa ntlo a se a bontšha kgahlego ka taba le ge e le efe e itšego, o ka rotoša e nngwe ya dipotšišo tšeo di boleletšwego ditherong tšeo di lego letlakaleng la ka morago la Tirelo ya Rena ya Mmušo gomme o diriše seo e le motheo wa poledišano ya gago ya nakong e tlago.

¹⁰ Boloka Dipego tše di Nepagetšego: Pego ya gago ya ntlo le ntlo e swanetše go ba e nepagetšego le e feletšego. Ngwala leina le aterese ya mong wa ntlo gatee-tee ge o tloga ntlong. O se ke wa phopholetša nomoro ya ntlo le setarata—hlahloba tsebišo go kgonthišetša gore e nepagetše. Ngwala tlhaloso ya motho yoo. Ngwala taba yeo le boledišanego ka yona, mangwalo ao le a badilego, puku le ge e le efe yeo o e tlogetšego le potšišo yeo o tlago go e araba ge o boa. Akaretša letšatši le nako tša ketelo ya mathomo le nako yeo o itšego o tla etela gape ka yona. Ka ge bjale pego ya gago e feletše, o se ke wa e timetša! E bee lefelong le le bolokegilego e le gore o ka dira tšhupetšo go yona ka morago. Dula o nagana ka motho yoo le kamoo o tlago go swara ketelo ka gona nakong e tlago.

¹¹ Tseba Seo Dipakane tša Gago e Lego Sona: Sa pele, ka go ba yo borutho le yo a nago le bogwera, dira sohle seo se lego matleng a gago go dira gore mong wa ntlo a lokologe. Bontšha gore o a mo kgahlegela yena bjalo ka motho, ka ntle le go tlwaelana le yena ka mo go feteletšego. Se se latelago, mo gopotše ka potšišo le ge e le efe yeo o e rotošitšego ketelong ya nako e fetilego. Theetša kgopolo ya gagwe ka kelohloko gomme o bontšhe tebogo ya potego ya go leboga ditlhaloso tša gagwe. Ke moka, mmontšhe lebaka leo ka lona pono ya Beibele e lego e šomago. Ge e ba go kgonega, mo lebiše kgopolong e tswalanago le seo ka pukung ya Tsebo e Išago Bophelong bjo bo sa Felego. Dula o gopola gabotse gore pakane ya gago e kgolo maetong a go boela ke go thoma thuto ya Beibele.

¹² Go lebanya ga puku ya Tsebo go tutueleditše ba bantši ba rena ‘go rapa sebete’ dithutong tša Beibele go kgothaletša barutwana gore ba be gona dibokeng le go kopanela le mokgatlo wa Jehofa. Nakong e fetilego, re be re na le tshekamelo ya go leta go ba go fihla ge batho ba ithutile nako e teletšana pele re ba laletša go kopanela le rena. Ga bjale, barutwana ba bantši ba ba gona dibokeng gatee-tee ge ba thoma go ithuta, gomme ka baka leo ba tšwela pele ka lebelo kudu.

¹³ Banyalani ba ile ba nea bohlatse ka mo go sa rulaganyetšwago go modiri-gotee le bona. Ge a bontšha kgahlego therešong, ba ile ba mo laletša gore a be le thuto ya Beibele ka puku ya Tsebo. Ka nako e swanago, ba ile ba mmotša gore o swanetše gore a be gona dibokeng, moo tše dintši tša dipotšišo tša gagwe di tlago go arabja gona. Monna ga se a amogela feela taletšo ya bona ya go ithuta ka go rata eupša gape o ile a ithuta gabedi ka beke gomme a thoma go ba gona dibokeng ka mehla Holong ya Mmušo.

¹⁴ Diriša Poroutšha ya Ke Eng Seo Modimo a se Nyakago go Rena?: Dikopanong tša Selete tša “Batseta ba Khutšo ya Modimo,” re amogetše poroutšha e rego Ke Eng Seo Modimo a se Nyakago go Rena? Poroutšha ye ke e holago tabeng ya go thoma dithuto tša Beibele le batho bao ba boifago Modimo go sa šetšwe kamoo ba rutegilego ka gona. E rwele lenaneo la thuto e rulagantšwego gabotse e akaretšago dithuto tša motheo tša Beibele. Pukwana e tla ba sedirišwa se se atlegago kudu sa go phatlalatša tsebo ya Modimo. E hlalosa therešo ka mo go kwagalago kudu le ka tsela e bonolo mo e lego gore mo e nyakilego e le yo mongwe le yo mongwe wa rena a ka kgona go e diriša go ruta ba bangwe dilo tšeo Modimo a di nyakago. Ka mo go bonalago ka gona, bagoeledi ba bantši ba tla ba le tokelo ya go swara thuto ya Beibele ka poroutšha ye.

¹⁵ Batho ba bangwe bao ba naganago gore ga ba na nako ya go ithuta puku ya Tsebo mo gongwe ba ka rata go ba le mananeo a makopana go ithuta poroutšha ya Seo Modimo a se Nyakago. Ba tla thabišwa ke seo ba ithutago sona! Matlakaleng a mabedi goba a mararo feela, ba tla hwetša dikarabo dipotšišong tšeo batho ba ilego ba akanya ka tšona ka nywaga-kgolo: Modimo ke mang? Sathane ke mang? Morero wa Modimo ka lefase ke ofe? Mmušo wa Modimo ke eng? O ka tseba bjang bodumedi bja therešo? Gaešita le ge poroutšha e nea therešo ka mantšu a bonolo, molaetša wa yona ke o matla kudu. E akaretša dintlha tša motheo tšeo bagolo ba tlago go di hlahloba le bao ba yago kolobetšong, gape e ka dira e le motheo bakeng sa thuto e tseneletšego kudu ka pukung ya Tsebo.

¹⁶ Ge o bolelela thuto leetong la go boela, o ka fo re: “Na o be o tseba gore ka go tšea metsotso e sego kae feela, o ka hwetša karabo potšišong e bohlokwa ya Beibele?” Ke moka, rotoša potšišo yeo e tšwelelago mathomong a e nngwe ya dithuto tšeo di lego ka gare ga poroutšha. Ka mohlala, ge e ba o etetše motho yo a godilego, mo gongwe o ka re: “Re a tseba gore nakong e fetilego Jesu o ile a fodiša batho. Eupša nakong e tlago ke eng seo Jesu a tlago go se dira go balwetši? batšofadi? le bahu?” Dikarabo di hwetšwa go thuto 5. Motho yo a sekametšego bodumeding a ka kgahlišwa ke potšišo e rego: “Na Modimo o theetša dithapelo ka moka?” E arabja go thuto 7. Ditho tša lapa di tla rata go tseba gore: “Ke’ng seo Modimo a se nyakago go batswadi le go bana?” Di tla hwetša seo ge di dutše di ithuta thuto 8. Dipotšišo tše dingwe ke tše di rego: “Na bahu ba ka gobatša ba ba phelago?” yeo e hlalositšwego go thuto 11; “Ke ka baka la’ng go e-na le madumedi a mantši gakaakaa ao a ipolelago gore ke a Bokriste?” yeo e ahla-ahlwago go thuto 13; le “Ke’ng seo o swanetšego go se dira gore o be mogwera wa Modimo?” seo se akareditšwego go thuto 16.

¹⁷ Thuša Bao ba Bolelago Leleme le Lengwe: Go ka thwe’ng ka beng ba dintlo ba ba bolelago leleme le lengwe? Ge e ba go kgonega, ba swanetše go rutwa ka leleme leo ba le tsebago gakaone. (1 Ba-Kor. 14:9) Nea molebeledi wa lena wa tirelo leina le aterese tša motho yo a thabelago, go akaretša ditaba ka botlalo le ge e le dife tše di sepedišanago le seo. O tla tsoma phuthego goba sehlopha seo se bolelago leleme leo le lešele lefelong leo, seo se ka hlokomelago motho yo a thabelago. Tsebišo ye e swanetše go romelwa go Mokgatlo ge feela phuthego e swanetšego e sa lotišege. Ge e ba go se na diphuthego goba dihlopha kgaufsi e bile go se na bagoeledi ba lefelong leo bao ba ka kgonago go bolela leleme la mong wa ntlo, mogoeledi a ka leka go ithuta le mong wa ntlo, a diriša poroutšha ya Seo Modimo a se Nyakago ka maleme a mabedi.

¹⁸ Mogoeledi yo a bolelago Seisemane o ile a thoma thuto le monna yo a bolelago se-Vietnam le mosadi wa gagwe yo a bolelago se-Thai. Go be go dirišwa dipuku le Dibeibele ka Seisemane, se-Vietnam le se-Thai. Gaešita le ge lepheko la polelo le ile la baka tlhohlo ka lekga la pele, mogoeledi o ngwala gore: “Kgolo ya moya ya banyalani e bile ya ka pela. Ba ile ba bona go nyakega ga gore ba thome go ba gona dibokeng le bana ba bona ba babedi, gomme ba bala Beibele bošego bjo bongwe le bjo bongwe e le lapa. Morwedi wa bona wa nywaga e tshelelago o swara thuto ya gagwe ka noši ya Beibele.”

¹⁹ Ge o ithuta le batho bao ba bolelago leleme le lengwe, bolela ka go nanya, bitša mantšu ka mo go kwalago gabotse gomme o diriše mantšu le mafokwana a bonolo. Lega go le bjalo, gopola gore batho ba ba bolelago leleme le lengwe ba swanetše go swarwa ka seriti. Ga se ba swanela go swarwa bjalo ka ge eka ke masea.

²⁰ Diriša ka mo go holago diswantšho tše dibotse tšeo di lego ka gare ga poroutšha ya Seo Modimo a se Nyakago. Ge e ba “seswantšho se lekana le mantšu a sekete,” gona diswantšho tše dintši ka poroutšheng ye di tla bolela go gontši go mong wa ntlo. Mo laletše gore a bale mangwalo ka Beibeleng ya gagwe ka noši. Ge e ba thuto e ka swarwa ka nako yeo ka yona setho sa lapa seo se tsebago leleme la tikologong se lego gona gore se fetolele, seo ka ntle le pelaelo e tla ba se se holago.—Bona Tirelo ya Rena ya Mmušo ya May 1984, letlakala 8.

²¹ Dira Maeto a go Boela ka Ntle le go Diega: O swanetše go leta nako e kaakang pele o dira leeto la go boela? Bagoeledi ba bangwe ba etela gape ka morago ga letšatši goba a mabedi ka morago ga ketelo ya mathomo. Ba bangwe ba boela ka moragonyana letšatšing lona leo! Na seo ke go boela ka pela kudu? Ka kakaretšo beng ba dintlo ga ba bonale ba tshwenyega. Gantši ke mogoeledi yo a dirago ketelo yo go nyakegago gore a hlagolele boemo bja kgopolo bjo bo swanetšego kudu gotee le sebete se oketšegilego. Ela hloko diphihlelo tše di latelago.

²² Mogoeledi wa nywaga e 13 o be a šoma ka ntlo le ntlo letšatši le lengwe ge a be a bona basadi ba babedi ba sepela gotee. Ka go gopola ka kgothatšo ya go bolela kae le kae moo re hwetšago batho, o ile a batamela basadi setarateng. Ba ile ba bontšha kgahlego molaetšeng wa Mmušo gomme yo mongwe le yo mongwe a amogela puku ya Tsebo. Ngwanabo rena yo mofsa o ile a hwetša diaterese tša bona, a boa matšatši a mabedi ka morago gomme a thoma thuto ya Beibele le yo mongwe le yo mongwe wa bona.

²³ Kgaetšedi yo mongwe o dira dithulaganyo tša go boela bekeng e latelago. Eupša letšatši goba a mabedi ka morago ga ketelo ya gagwe ya mathomo, o feta a tsena gomme a nea mong wa ntlo makasine wo o bolelago ka taba yeo ba e ahla-ahlilego nakong e fetilego. O botša mong wa ntlo gore: “Ke bone sehlogo se gomme ka nagana gore o tla rata go se bala. Ga bjale nka se ke ka ema ra bolela eupša ke tla boa gape ka Laboraro thapama go etša ge go rulagantšwe. Na nako yeo e sa dutše e go loketše?”

²⁴ Ge motho a bontšha go kgahlegela therešo, re ka kgodišega gore o tla lebeletšana le kganetšo ka sebopego se itšego. Go boela ga rena ka pela ka morago ga ketelo ya pele go tla mo matlafatša gore a emelane le dikgateletšo le ge e le dife tšeo a lebeletšanago le tšona go tšwa go ba leloko, bagwera ba kgaufsi le ba bangwe.

²⁵ Hlagolela Kgahlego go Bao ba Hweditšwego Mafelong a Batho Bohle: Ba bantši ba rena re thabela go bolela setarateng, mafelong a go phaka dikoloi, dinamelweng tša bohle, mafelong a mabenkele, diphakeng, bjalo bjalo. Go tlaleletša go sepedišeng dipuku, go nyakega gore re hlagolele kgahlego. Go fihlelela seo, go swanetše go dirwa boiteko bja gore re hwetše leina, aterese gomme ge e ba go kgonega le nomoro ya mogala ya motho yo mongwe le yo mongwe yo a nago le kgahlego yo re gahlanago le yena. Go hwetša tsebišo ye ga go thata go etša ka mo o ka naganago ka gona. Ge poledišano e batamela bofelong, tšea pukwana ya gago gomme o botšiše: “Na go na le tsela le ge e le efe e nngwe yeo re ka tšwetšago pele poledišano ye ka yona?” Goba e re: “Ke tla rata gore o bale sehlogo seo ke nago le kgodišego ya gore o tla se thabela. Na nka go tlišetša sona legaeng la gago goba ofising?” Ngwanabo rena yo mongwe o fo botšiša gabonolo gore: “O ka hwetšagala nomorong efe ya mogala?” O bega gore dikgweding tše tharo ke batho ba bararo feela bao ba sa kago ba thabela go mo nea dinomoro tša bona tša mogala.

²⁶ Diriša Mogala go Hwetša le go Godiša Kgahlego: Kgaetšedi wa mmulamadibogo o diriša mogala go fihlelela batho bao ba dulago meagong yeo e šireleditšwego kudu. O bile o dira le maeto a go boela ka tsela e swanago. Poledišanong ya gagwe ya mathomo ya mogala o re: “Ke a tseba gore ga o ntsebe. Ke dira boiteko bjo bo kgethegilego go ikgokaganya le batho tikologong ya gabo lena gore ke abelane le bona kgopolo e tšwago ka Beibeleng. Ge e ba o na le motsotswana, ke tla rata go go balela kholofetšo e hwetšwago go . . .” Ka morago ga go bala lengwalo kgaetšedi o re: “Na e be e ka se be mo go kgahlišago go bona nako yeo e e-tla? Ke thabetše go go balela se. Ge e ba le wena o thabetše seo, ke tla rata go go leletša mogala gape gomme re ahla-ahle lengwalo le lengwe.”

²⁷ Ge a letša mogala gape, o gopotša mong wa ntlo ka poledišano ya bona ya nakong e fetilego gomme a re o tla rata go mmalela go tšwa Beibeleng seo maemo a tlago go ba sona ge bokgopo bo fedišitšwe. Ke moka o ba le poledišano e kopana ya Beibele le mong wa ntlo. Ka morago ga dipoledišano tše dintši tša mogala, batho ba 35 ba ile ba mo laletša magaeng a bona gomme dithuto tša legae tša Beibele tše šupa di ile tša thongwa! Na ka dinako tše dingwe go thata go wena gore o dire maeto a go boela go batho bao ba thabelago nakong ya maemo a sa kgahlišego a leratadima goba go babja? Ge e ba go le bjalo, ke ka baka la’ng o sa ikgokaganye le bona ka mogala?

²⁸ Latelela Kgahlego e Hweditšwego Mafelong a Kgwebo: Go akaretšwa go gontši go šoma lebenkele le lebenkele go e na le go fo sepediša dimakasine. Bo-ramabenkele ba bantši ba na le kgahlego ya kgonthe ka therešo, gomme kgahlego yeo e swanetše go hlagolelwa. Mabakeng a mangwe, go ka kgonega go ba le poledišano ya Beibele goba gaešita le thuto gona moo lefelong la lebenkele. Mabakeng a mangwe, wena gotee le motho yo a thabelago le ka kgona go kopana ka nako ya go khutša ya dijo tša mosegare goba ka nako e nngwe e swanetšego.

²⁹ Molebeledi wa tikologo o ile a etela mong wa lebenkele le lenyenyane la korosari gomme a ithapela go mo direla pontšho ya thuto ya Beibele. Ge a botšišwa gore pontšho e tlo tšea lebaka le lekaakang, molebeledi wa tikologo o itše e tlo tšea metsotso e 15 feela. Ka lebaka leo, ralebenkele o ile a kgwaetša leswao le le rego: “Ke tla Boa ka Morago ga Metsotso e 20” lebating, a goga ditulo tše mmalwa, gomme bobedi bja bona ba ile ba ahla-ahla dirapa tša pele tše hlano tša puku ya Tsebo. Monna yo yo a botegago o ile a kgahlišwa kudu ke seo a ithutilego sona mo a ilego a ba gona Sebokeng sa Phatlalatša le Thutong ya Morokami ka Sontaga sona seo gomme a dumela go tšwetša pele thuto bekeng e latelago.

³⁰ Gore o nee thuto lefelong la kgwebo, mo gongwe o ka bolela se: “Pontšho ya lenaneo la rena la thuto ya Beibele le tšea metsotso e 15 feela. Ge e ba se se go loketše, ke tla thabela go go bontšha kamoo e dirwago ka gona.” Ke moka kgomarela nako yeo e beilwego. Ge e ba go sa kgonege gore o be le poledišano e teletšana lefelong la kgwebo, e ka ba mo go swanetšego kudu go etela ralebenkele legaeng la gagwe.

³¹ Boela Gaešita le ge go se Puku e Sepedišitšwego: Tlhasenyana e nngwe le e nngwe ya kgahlego e swanelwa ke leeto la go boela, go sa šetše ge e ba go sepedišitšwe dipuku go ba go se bjalo. Go ba gona, ge e ba go bonagala gabotse gore mong wa ntlo o tloga a se na kgahlego molaetšeng wa Mmušo, ke mo go botse kudu gore o lebiše maiteko a gago felo go gongwe.

³² Ge a le modirong wa ntlo le ntlo, kgaetšedi o ile gahlana le mosadi yo a bego a le botho kudu eupša yo a bego a gana ka go tia mpho ya dimakasine. Mogoeledi o ngwala ka gore: “Ke ile ka nagana ka yena ka matšatši a mantši gomme ka dira phetho ya gore ke swanetše go bolela le yena gape.” Mafelelong, kgaetšedi o ile a rapela, a rapa sebete, gomme a kokota lebating la mosadi yoo. Se se mo thabišitšego ke gore mong wa ntlo o ile a mo laletša gore a tsene ka gare. Thuto ya Beibele e ile ya thongwa, gomme e ile ya swarwa gape letšatši le le latelago. Ge nako e dutše e e-ya, mong wa ntlo o ile a tla therešong.

³³ Rulaganya e sa le Pele Gore o Phethe go Gontši: Go kgothaletšwa gore go dirišwe nako e itšego beke e nngwe le e nngwe go dirwa maeto a go boela. Go ka phethwa go gontši ge go e-na le thulaganyo e botse. Rulaganya diketelo lefelong lona leo o tlago go ba o šoma ka ntlo le ntlo go lona. Ge le šoma le le ka koloi, sehlopha se swanetše go dula e le se senyenyane e le gore yo mongwe le yo mongwe a be le sebaka se se tletšego gore a dire maeto a go boela. Mootledi o swanetše go tseba e sa le pele moo maeto a go boela a tlago go dirwa gona e le gore go phengwe go sepela ka koloi mo go sa nyakegego.

³⁴ Bao ba atlegago go dira maeto a go boela le go thoma dithuto tša legae tša Beibele ba re go bohlokwa go bontšha kgahlego ya kgonthe ya motho ka noši bathong le go dula re nagana ka bona gaešita le ka morago ga ge re ba etetše. Le gona go nyakega gore go be le sehlogo sa Beibele seo se ipiletšago seo o se ahla-ahlago le gore o thee motheo bakeng sa leeto la go boela pele o tloga ketelong ya mathomo. Go oketša moo, go bohlokwa go boela e sa le ka pela go latelela moo kgahlego e bontšhitšwego. Pakane ya go thoma thuto ya Beibele e swanetše go gopolwa kudu ka mehla.

³⁵ Seka sa bohlokwa bakeng sa katlego leetong la go boela ke sebete. Se hwetšagala bjang? Moapostola Paulo o araba ka gore re ‘rapa sebete bakeng sa’ go tsebatša ditaba tše di lokilego go ba bangwe “ka thušo ya Modimo wa rena.” Ge e ba o nyaka go gola karolong ye, rapela Jehofa bakeng sa thušo. Ke moka, ka go dumelelana le dithapelo tša gago, latelela kgahlego ka moka e bontšhitšwego. Jehofa ka ntle le pelaelo o tla šegofatša maiteko a gago!

[Seswantšho go letlakala 3]

Kamoo o ka Atlegago ka Gona go Direng Maeto a go Boela

■ Bontšha kgahlego ya kgonthe ya motho ka noši bathong.

■ Kgetha sehlogo sa Beibele se se ipiletšago gore le se ahla-ahle.

■ Thea motheo bakeng sa ketelo e nngwe le e nngwe e latelago.

■ Dula o nagana ka motho ka morago ga ge o tlogile.

■ Boela ka morago ga letšatši le tee goba a mabedi bakeng sa go latelela kgahlego.

■ Gopola pakane ya gago ya go thoma thuto ya Beibele.

■ Rapelela thušo gore o rape sebete bakeng sa modiro wo.