Kgonthišega Gore O A Boela
1 Bjalo ka badiredi ba ditaba tše di lokilego, re laetšwe gore re dire barutiwa. (Mat. 28:19, 20) Go dira maeto a go boela ke karolo e bohlokwa ya modiro wa rena wa go dira barutiwa. Re lemoga gore maphelo a a akaretšwa, ka gona re rata go dira boiteko bjohle gore re hlagolele kgahlego ya mathomo e bontšhitšwego.
2 Re swanetše go lebelela motho o mongwe le o mongwe yoo re mo šadišitšego le puku a swanelwa ke leeto la go boela. Lega go le bjalo, go sepetša dipuku ga se ya swanela go ba lebaka le nnoši la go dira leeto la go boela. Ba bantši ba ikemišeditše go bolela ka molaetša wa Beibele, eupja ba gana dipuku. Ka gona ge re lemoga gore o na le kgahlego re swanetše go bona gore re a boela gomme re leke go e hlagolela.
3 Go Latelela Moo go Sepedišitšwego Dipuku: Ka ge dipuku tšeo di sepedišwago di feta kgole palo ya maeto a go boela, gona go na le sekgoba se segolo sa go kaonefatša. Mmulamadibogo yo mongwe o ile sepediša puku gomme a lemoga gore mong wa ntlo o na le kgahlego e nyenyane kudu. Mathapameng a mangwe ka morago ga go dira maeto a gagwe ka moka, ngwanabo rena o ile a dira phetho ya gore a etele motho yo. Go ile gwa thongwa thuto ya Beibele.
4 Ngwanabo rena o ile a sepedišetša monna o mongwe dimakasine tše pedi eupja a lebala ka yena, a nagana gore o be a se na kgahlego e le ka kgonthe. Matšatši a sego kae ka morago, monna yoo o ile a ngwalela phuthego ya moo a kgopela go kolobetšwa. Kgaetšedi wa moromiwa o ile a botšišwa gore o nagana gore lebaka le legolo leo le dirilego gore a kgone go thuša batho ba 74 go ba bagoeledi ke lefe. O itše: “Re be re dira modiro wa dimakasine kudu, gomme ke be ke tšwela pele ke dira maeto a go boela go batho bao ba amogetšego dimakasine go fihlela ke kgona go thoma dithuto tša Beibele le bona.”
5 Mabakeng a mangwe re ka kgona feela go tlogelela mong wa ntlo dipampišana ketelong ya mathomo. Gantši dipampišana di ka dirišwa ka katlego maetong a go boela bakeng sa go bontšha kamoo thuto ya Beibele e swarago ka gona. Molebeledi ba tikologo yo a bego a šoma gotee le mogoeledi o mongwe o ile a tlogelela mosadi o mongwe pampišana. E be e le ketelo e kopana, eupja a kgothaletša kgaetšedi gore a etele gape. Kgaetšedi o ile a dira leeto la go boela gomme kapejana a thoma thuto ya Beibele.
6 Ge Kgahlego e Bontšhwa: Ge mong wa ntlo a sa tšee puku ketelong ya mathomo, ga se ka mehla go bolelago gore ga a na kgahlego. Ge a boela go banyalani ba babedi, mogoeledi o ile a lemoga gore ba be ba šetše ba e-na le dipuku tše dingwe tša rena le gore ba kile ba ithuta. Ba ile ba dumela go tsošološa thuto ya bona. Mmulamadibogo yo a kgethegilego o ile a lemoga kgahlego ye e iphihlilego go mosadi yoo ka mehla a bego a gana go amogela dimakasine. Mmulamadibogo o ile a beela dimakasine ka thoko gomme mosadi o be a ikemišeditše go boledišana ka dirapa tše sego kae ka go e nngwe ya dipukwana. Ka morago ga diketelo tše sego kae tše dingwe, o be a e-ba le thuto ya Beibele gabedi ka beke.
7 O mongwe le o mongwe yo a ineelago go Jehofa o swanetše go kwa a e-na le boikarabelo bja go kopanela modirong wa go dira barutiwa. Ge re dutše re boela ka mehla go batho bao ba bontšhitšego kgahlego, re tla buna dienywa tše di tlago tlišetša rena gotee ‘le bao ba re kwago’ ditšhegofatšo tše dintši.—1 Tim. 4:16.