Tsebatša Ditiro Tša Jehofa

1 “’Tirô tša xaxwe, Le di bêxêlê dithšaba; Le di lemošê boxolo bya ’ina la xaxwe. . . . matete a a dirilwexo ke Morêna.” (Jes. 12:4, 5) O arabela bjang kgothatšong ye? Ge re naganišiša ka kelohloko ka ditirišano tša Jehofa le rena re le batho le ge re le batho ka o tee ka o tee, na dipelo tša rena ga di tutueletšege gore re botše ba bangwe? Nywageng e 73 e fetilego Jehofa o ile a lokolla batho ba gagwe bothopja kua Babele. Ga e sa le go tloga ka 1919 borapedi bja therešo bo ile bja thewa ka go tia gomme mo nakong ye bo phatlaletše le dikarolo ka moka tša lefase. Bogolo bjoo ka bjona Jehofa a dirilego dilo tše bo fetiša seo re bego re se letetše. Wena ka noši, o leboga tlhahlo, tšhireletšo le tšhegofatšo ya Jehofa gakaaka’ng? Na o ka dira mo go oketšegilego go tsebatša ditiro tša gagwe gomme wa phagamiša leina la gagwe?

2 Nako ya Segopotšo e re gopotša tiro ya Modimo yeo re tlago go e leboga ka mo go sa felego. Kgwedi ya April e tla ba nako e swanetšego ka mo go kgethegilego ya go bontšha Jehofa tebogo ya rena ka go ngwadiša bjalo ka babulamadibogo ba go thuša. Le gona, ge e ba o le mmulamadibogo wa go thuša nakong ya ketelo ya molebeledi wa tikologo, o tla holwa kudu ke thušo ya gagwe le kgothatšo ya gagwe bodireding.

3 Gantši dithulaganyo di sepela gabotse ge dihlopha tša bagoeledi di ngwadišetša go ba babulamadibogo ba go thuša. Go ka dirwa thulaganyo e botse e le gore bohle ba tle ba be le yo ba ka šomago le yena, gomme dikgaetšedi tšeo di nago le bana ba banyenyane di ka thušana. Ge go dirilwe thulaganyo e botse, ba bantši ba hweditše gore ga go thata kudu go fihlelela pakane ya diiri tše 60. Se se bolela go diriša palo-gare ya diiri tše 2 ka letšatši goba diiri tše 15 ka beke bodireding. Babulamadibogo ba bangwe ba go thuša ba nea bohlatse ka iri e tee goba tše pedi pele goba ka morago ga modiro wa bona wa boiphedišo gomme ba šoma nako e telele tirelong ya tšhemo mafelo-bekeng.

4 Gaešita lege o sa kgone go ba mmulamadibogo wa go thuša, o ka kgona go oketša modiro wa gago wa tirelo ya tšhemo. Le gona, ka go thuša ka senamelwa goba go šoma le ba bangwe bao ba bulago madibogo, o ka ba kgothatša. Sohle seo re ka se dirago bakeng sa go tsebatša leina la Jehofa le ditiro tša gagwe se ka se ke sa hlokomologwa ke Modimo wa rena yo a nago le tebogo.—Mal. 3:16.