Go Bula Madibogo —Pontšho Ya Lerato

1 Go rata Jehofa le magagabo rena ke seo se ka re tutueletšago go ba le karolo ka mo go tletšego kudu modirong wa boboledi. Ge go rata ga rena Jehofa le batho go dutše go gola, ke gona moo re tutueletšwago go rulaganya go ba le karolo e kgolwanyane bodireding. Lerato la rena le a katologa ge re dutše re oketša ‘tsebo e nepagetšego’ ya Lentšu la Modimo. (Ba-Fil. 1:9, 10, NW) Ge re ithuta ka mo go oketšegilego ka thato ya Jehofa, ke gona moo re lemogago ka mo go oketšegilego go akgofa ga mehla yeo re phelago mo go yona. Se se godiša go tshwenyega ga rena ka ba bangwe. Ba bantši ba bontšha go kgomega ga bona ka lerato ka go tsenela tirelo ya bobulamadibogo.

2 Na o ka dira dipeakanyo tšeo di nyakegago gore o be mmulamadibogo wa go thuša goba wa ka mehla? Re a dumela gore re ka se kgone go ba babulamadibogo ka moka ga rena. Eupja o mongwe le o mongwe o swanetše go hlahloba maemo a gagwe ka thapelo.

3 Bakriste ba sego kae ba lemoga gore ba na le nako e ntši yeo ba ka e dirišetšago go bula madibogo; ka baka leo, e ba mo go nyakegago go ‘reka nako yeo e tšwelelago’ dilong tše e sego tša bohlokwa tšeo mo nakong ye di nyakago nako ya rena. (Ba-Ef. 5:15-17) Go rata ga rena Modimo le batho go swanetše go re dira gore re ikemišetše go gafa tše dingwe tša dilo tšeo re di ratago le boiketlo e le gore re bontšhe lerato la rena ka tekanyo e kgolwanyane. (Mar. 12:33) Dilo tše dingwe tše re bago le tšona, mohlomongwe tšeo re naganago gore ke tše tlwaelegilego, di lebelelwa e le matsaka dikarolong tše dingwe tša lefase.

4 Batswadi ba ka thuša bana ba bona go nagana ka se ka tsela ya go rata Modimo? Batswadi ba swanetše go etiša pele dipakane tša pušo ya legodimo go bana ba bona go tloga nywageng ya bonyenyane. Na bao ba fetšago dithuto tša marema-tlou ba nagana ka dipakane tša bophelo bja lefase le goba tša moya? Na ba ka se thome ka go bea tirelo ya bobulamadibogo e le pakane ya bona ya ka morago ga ge ba feditše sekolo? Re rata go thuša bafsa ba rena gore ba lemoge mehola ya nako e telele ya go tsenela tirelo nywageng ya bonyenyane. Go dira bjalo ke go boloka mahumo legodimong. (Mat. 6:19-21) Se se kgahla Modimo e bile se nea le bohlatse bja go mmotegela ga rena. Le gona, se phološa maphelo a ba bangwe.

5 Modimo o nyaka gore ‘mehuta ka moka ya batho e phološwe.’ (1 Tim. 2:4) Na re ka bontšha gore le rena re nyaka seo? Re ka dira bjalo ge e ba re etiša pele dikgahlego tša Mmušo. Le gona re ka dira se ka go ba le kholofelo ya go re Jehofa o tla re nea tšeo re di nyakago bophelong. (Mat. 6:31-33) Maemo a tša boiphedišo mo gongwe a ka mpefala, eupja kholofetšo ya Jehofa ya gore o tla re hlokomela le ka mohla ga e fetoge.—Ps. 37:25.

6 Go katanela ga rena go ba le karolo bodireding bja tšhemo go ya ka mo maemo a re dumelelago ka gona ke pontšho ya lerato. Go ba bangwe se se tla bolela go ba babulamadibogo ba ka mehla. Ke ka baka la’ng le sa leke ka matla gore ka moka ga lena le thome ka September 1, 1992?