Go Boela Ka Morero Wa Go Thoma Thuto Ya Beibele

1 Ka morago ga go hwetša motho yo a thabelago mathomong, go nyakega kelohloko e tletšego go rena gore re boloke kgahlego ye e phela. Go dira maeto a go boela go ka lebiša thwii dipoledišanong tša Beibele le dithutong tša Beibele tšeo di phološago bophelo. Ela hloko ditšhišinyo tše bakeng sa go dira maeto ao a atlegago a go boela.

Bofelong bja ketelo ya pele, mo gongwe o ka thea motheo wa leeto la go boela ka gore:

◼“Na o kile wa ipotšiša gore ke ka baka la’ng go e-na le madumedi a mantši gakaakaa?” Ge o boetše, mo gongwe o ka re: “Nakong e fetilego ge ke be ke le mo, go ile gwa rotoga potšišo yeo e lego mabapi le lebaka leo ka lona go nago le madumedi a mantši gakaakaa. Go na le mabaka a mantšinyana a se. Ke rata go go balela se sengwe seo se kgahlišago seo ke se hweditšego ge ke be ke hlahloba potšišo ye.” Phetla go letlakala 62 la puku ya Go Boledišana gomme o bale karolo ye e lego ka tlase ga sehlogwana se se rego, “Ke ka baka la’ng go e-na le madumedi a mantši gakaakaa?”

2 Na Modimo a ka hwetšwa madumeding ka moka? Gore Modimo a be ka gare ga bodumedi, bo swanetše go tšweletša dienywa tše di lokilego.

Mo gongwe o ka thoma leeto la go boela ka go botšiša:

◼“Bodumedi bo swanetše go kgoma boitshwaro bja motho bjang? Seo Jesu Kriste a se boletšego go Mateo 7:17-20 se re nea tlhahlo mabapi le seo bodumedi bja therešo bo swanetšego go se latela.” Bala lengwalo leo ka go lebanya mafelelong a serapa 19 go letlakala 12 la puku ya Go Tsoma ga Batho Modimo. Ke moka, botšiša mong wa ntlo gore o bona’ng seswantšhong go letlakala 13. “Gaešita lege batho ba dimilione ba ipolela gore ba dumela go Modimo, ba bantši ba mo latola ka mediro ya bona.” Ka morago ga fao, bala mafoko a mabedi a pele go serapa 20. “Ditiro tše tše šoro di hlaola madumedi ao a sa latelego tlhahlo yeo Kriste a e neilego, e lego ya go ratana, le go rata gaešita le manaba a rena. Ketelong e latelago mo gongwe re ka ahla-ahla seo bodumedi bo swanetšego go ba bo se dira ge e ba bo tšweletša dienywa tše botse.”

3 Bokamoso bo swaretše’ng bao ba tsomago Modimo wa therešo? Go ahla-ahlwa ga potšišo pukung ya Go Tsoma ga Batho Modimo go ka lebiša thutong ya Beibele.

Mo gongwe o ka thoma poledišano ka gore:

◼“Ka ge go e-na le mathata a mantši a tša boiphedišo gona bjale, batho ba bantši ba a ipotšiša ge e ba ba ka holofela bokamoso bjo bo botse. Ke hweditše Beibele e le e khothatšago kudu ge e bolela ka bokamoso. Anke ke go nyetlele kholofetšo e nngwe ya Modimo go Jesaya 65:21, 22, 25. [Bala gomme o hlalose lengwalo ka boripana] Puku ya Go Tsoma ga Batho Modimo e araba dipotšišo tše dingwe tšeo di kgahlišago mabapi le se, go thoma go serapa 17 go letlakala 372.” Ke moka bontšha thulaganyo ya thuto ya Beibele e swarwago ka go diriša serapa 17-20. “Bekeng e tlago ke tla rata go ahla-ahla potšišo e rego, Motheo wa lefase le lefsa leo le holofeditšwego ka Beibeleng ke ofe?”

4 Diriša ka bohlale nako e šetšego ka go ba le karolo go neeng bohlatse ka botlalo mo go dirwago ditšhabeng ka moka tša lefase. (Bapiša le Ditiro 20:21.) Go dira maeto a go boela ka morero wa go thoma thuto ya Beibele go ka bolela bophelo bjo bo sa felego go bao re ba botšago ditaba tše di lokilego.