Go Rola Go Tsoma Ga Batho Modimo

1 Batho ba bantši lehono ba nagana gore go kgetha bodumedi bja bona ke taba ya motho ka noši. Ka baka leo, go ka ba thata go boledišana le baagišani ba rena ka taba ye. Eupja mo nakong ye re na le puku ya Go Tsoma ga Batho Modimo, yeo e ipontšhitšego e le thušo e bohlokwa kudu ge go boledišanwa le batho ba ditlogo tše di fapa-fapanego tša bodumedi.

2 O tla re’ng gore o tsoše kgahlego ya mong wa ntlo ya go bala puku ye? Ke dintlha dife goba dikarolo tšeo o tlago go di gatelela tše di tlago go kgahla bao ba ipitšago Bakriste? bao ditumelo tša bona e sego tša Bokriste? goba bao ba se nago tumelo? Ditšhišinyo tše di latelago di tla re thuša go ba ba itokišeditšego go bontšha baagišani ba rena go nyakega ga go ‘nyaka Morena’ le ‘go mmitša a sa le kgaufsi.’ (Jes. 55:6) Ditšhišinyo di ka fetolwa go ya ka maemo a lefelo.

3 Ke ka ba La’ng re Swanetše go Hlahlobišiša Seo re Tlago go se Bolela?: Ka ge ba bantši ba ipolela gore ba kgotsofetše ka bodumedi bja bona gomme ga ba nyake go bo fetola, mo gongwe go nyakega gore re dire matseno a rena ka tsela yeo e thušago mong wa ntlo gore a hlahlobe seo re se bolelago ka monagano o bulegilego.

4 Mohlomongwe ka morago ga tumedišo e swanetšego o ka re:

◼“Ge re boledišana le baagišani ba rena re hwetša gore batho ba bantši ba kgotsofetše ka bodumedi bja bona gomme ga ba nyake go fetoga. Eupja o nagana gore ge e ba batho ba be ba ka ipha nako ya go hlahloba ditumelo tša ba bangwe, se se be se ka se lebiše kwešišong e kaone le go fokotšegeng ga lehloyo lefaseng? [Letela gore mong wa ntlo a arabe.] Ela hloko seo Beibele e se bolelago ka bao ba ratago Modimo le kamoo ba swanetšego go ikwa ka gona ka ba bangwe.” Ka morago ga go bala Ditiro 17:26, 27, lebiša tlhokomelo go dirapa 15 le 16 go letlakala 10 la puku ya Go Tsoma ga Batho Modimo.

5 Ba bantši ba hweditše gore go bula kgaolo e ahla-ahlago bodumedi bja mong wa ntlo ka pukung go tla tanya tlhokomelo ya gagwe. Ela hloko ka mo seo se ka dirwago ka gona.

6 Ka morago ga go itsebiša, mo gongwe o ka re:

◼“Ka ge go e-na le madumedi a mantši lehono, na o kile wa ipotšiša mabapi le kamoo re ka tsebago ka gona ge e ba bodumedi bja rena bo amogelwa ke Modimo?” Ka morago ga tlhaloso ya mong wa ntlo, lebiša tlhokomelo lepokising le le lego go letlakala 377 la puku ya Go Tsoma ga Batho Modimo, leo le bontšhago ditsela tše lesome tšeo go ka hlaolwago bodumedi bja therešo ka tšona, o lebiša tlhokomelo kudu-kudu ntlheng ya 7. Botšiša mong wa ntlo ge e ba a dumela gore motho yo a dirišago bodumedi bja therešo a swanetše go ikwa bjalo ka merafo le ditšhaba tše dingwe. Ge e ba nako e dumela, balang mangwalo ao a tsopotšwego. Ke moka o phethe ka go bolela gore mabaka a mangwe a senyane a neilwego a na le thekgo e bjalo e kwalago ya Mangwalo.

7 Dibopego tše Dingwe Tšeo di Holago: Tlhatlamano e nabilego ya dihlogo tša ditaba ka morago pukung le yona e ka dirišwa. Ka mohlala, go thwe’ng ge e ba batho ba bantši tšhemong ba ikwa gore madumedi ka moka e fo ba ditsela tše di fapa-fapanego tšeo di lebišago go Modimo? Gona, lebelela ka tlase ga sehlogo sa “Bodumedi” moo go nago le sehlogwana se se rego, “‘madumedi ka moka a a lekana’: 12.” Se se bontšha kamoo tlhatlamano e ka re thušago go hwetša dintlha tšeo di thekgago taba. Ge re bolela le bao ba sa dumelego go Modimo, mo gongwe re ka ba bontšha serapa 1 le 2 go letlakala 329, seo se ahla-ahlago taba ya go se dumele ga mehleng yeno. ‘Dipotšišo tše Hlano Tšeo di Nyakago Karabo’ go matlakala 17-18 di ka kgahla kudu-kudu ba belaelago ge e ba Beibele e ruta seo madumedi a mantši a se rutago.

8 Ka go diriša mekgwa e atlegago ya go fetela tabeng ya go rola puku ya Go Tsoma ga Batho Modimo, mo gongwe re ka thuša batho go tsoma Modimo o tee wa therešo, e lego Jehofa.