Diboka Tša Tirelo Tša December
TLHOKOMEDIŠO: Tirelo ya Rena ya Mmušo e tla rulaganyetša Seboka sa Tirelo bakeng sa beke e nngwe le e nngwe dikgweding tša kopano. Diphuthego di ka dira dipeakanyo tše di nyakegago bakeng sa gore di kgone go ya kopanong ya selete gomme ka morago di be le poeletšo ya metsotso e 30 ya dintlha tše kgolo tša lenaneo Sebokeng sa Tirelo bekeng e latelago. Poeletšo ya letšatši le letšatši mo gongwe e ka abelwa banababo rena ba babedi goba ba bararo bao ba swanelegago e sa le pele, bao ba tlago go kgona go lebiša tlhokomelo dintlheng tša bohlokwa. Poeletšo ye e lokišeditšwego gabotse e tla thuša banababo rena go gopola dintlha tše kgolo bakeng sa go di diriša ka bobona le go di diriša tšhemong. Ditlhaloso tšeo di tšwago go batheetši le diphihlelo tšeo di anegwago e swanetše go ba tše kopana le tšeo di lebanyago.
Beke e Thomago ka December 7
15 mets:Ditsebišo tša phuthego le Ditsebišo tše di lego go Tirelo ya Rena ya Mmušo. Šišinya ditsela tša go tsoša kgahlego dimakasineng tšeo di tlago go bolelelwa tirelong ya tšhemo mafelo-bekeng a. Tsebiša dithulaganyo tšeo di dirilwego ke bagolo bakeng sa bafsa gore ba be le karolo bodireding nakong ya maikhutšo a sekolo. Ge a le gona, boledišana le mogoeledi o tee goba ba babedi bao ba tsenago sekolo bao ba tšeago karolo tirelong ya bobulamadibogo bja go thuša ka December. Kgothaletša bohle ka phuthegong go thekga le go šoma gotee le bafsa ba. Ka ge ba bantši mo gongwe ba tla ba ba le maikhutšong goba ba e-ya kopanong karolong ya mafelelo ya December, kgothaletša bagoeledi ka moka go tsenya dipego tša bona ka lepokising la dipego pele ga ge ba e-ya maikhutšong.
15 mets:“Kgothaletša ba Bangwe go Iša Mahlo go Jesu.” Polelo e kgothatšago yeo e hlalosago bohlokwa bja puku ya Motho yo a Phagamego tabeng ya go thuša batho go amogela borapedi bjo bo nepagetšego.
15 mets:Na o Phethile Merero ya Gago Bakeng sa go ya Kopanong ya Selete? Poledišano ya phišego magareng ga mogolo le mohlanka wa bodiredi. (Dirišang banababo rena bao ba tlago go ba ba e-ya kopanong le phuthego ya lena.) Hlalosang lebaka leo ka lona re yago dikopanong. (Doit. 31:12, 13) Bohle ba swanetše go theetša ka morero wa go lemoga kamoo ba ka dirišago tsebišo ka gona ka noši le tirelong ya tšhemo. Go nyakega gore go hlahlobje la mafelelo go bona gore bohle ba dirile dithulaganyo tša tša go sepela. Go na le ditemošo tšeo bohle ba swanetšego go di gopola. Ga go na motho yo a swanetšego go rulaganyetša boitapološo bja bošego nakong ya kopano, ka ge ka moka ga rena re nyaka go khutša ka mo go lekanego. Re swanetše go rulaganyetša go nea bohlatse. Go bomang? Batho bao go gahlanwago le bona dinamelweng tša batho bohle le mafelong a go tšhela peterole, mabenkeleng a dijo tše di apeilwego, dihoteleng, bjalo bjalo. Re lokišetše e sa le pele ka go ba le dipuku tše di lekanego bakeng sa go di neela go batho bao re tlago go boledišana le bona ge re le maikhutšong le ge re e-ya kopanong. (Gape re ka akaretša dikgopotšo tše di swanetšego tšeo di tšwago pampiring ya ka gare ya Tirelo ya Rena ya Mmušo ya October 1992.)
Kopelo 205 le thapelo ya go phetha.
Beke e Thomago ka December 14
10 mets:Ditsebišo tša phuthego. Akaretša pego ya tša ditšhelete le ditebogo tša meneelo. Reta phuthego bakeng sa thekgo e kgolo ya dinyakwa tša phuthego gotee le Sekhwama sa Mokgatlo sa Diholo tša Mmušo le modiro wa Mokgatlo wa lefase ka bophara. Ge e ba nako e dumela, anega diphihlelo tše di kgethilwego ka go diriša puku ya Motho yo a Phagamego bakeng sa go thuša batho go amogela borapedi bjo bo nepagetšego. Tsebiša dithulaganyo tše kgethegilego tša go nea bohlatse ka December 25.
20 mets:“Abelana le ba Bangwe Tsebo e Nepagetšego ka Jesu Kriste.” Dipotšišo le dikarabo. Dira pontšho ya go dirišwa ga puku ya Motho yo a Phagamego bjalo ka ge go šišintšwe go serapa 2.
15 mets:“Dulang le Bolela ka Dilo Tšeo le di Bonego le go di kwa.” Polelo. Akaretša diphihlelo tšeo di kgethilwego tša lefelong leo tša bafsa bao ba dirago e le babulamadibogo ba go thuša goba bao ba dirišitšego maikhutšo a sekolo gabotse bakeng sa go ba le karolo e oketšegilego bodireding.
Kopelo 71 le thapelo ya go phetha.
Beke e Thomago ka December 21
8 mets:Ditsebišo tša phuthego; akaretša ditsebišo bakeng sa go nea bohlatse ka mo go kgethegilego ka January 1. Šišinya e tee goba tše pedi tša dintlha tšeo di ka bolelelwago tšeo di ka dirišwago ditlhalosong tša matseno mafelo-bekeng a tirelong ya tšhemo.
15 mets:“Latelela Kgahlego ka Temogo Matšatšing a Maikhutšo.” Poledišano le batheetši. Bontšha dintlha tše di lego go dirapa 3 le 4.
10 mets:Letlolo la Dipotšišo. Polelo ka mogolo.
12 mets:Ditlhaloso tšeo di Tšwago go Bagoeledi ba Banyenyane. Rola karolo ye ka go bolela palo ya batho bao ba tsenago sekolo bao ba lego gona ka phuthegong. Ke ba bakae ba bona bao ba kolobeditšwego? Ke ba bakae bao ba dirago e le bagoeledi ba ba sa kolobetšwago? Mo gongwe o ka ba wa rata go nea dipalo tša tirelo ya tšhemo go bontšha seo bafsa ba se phethago. Ba rete mo go swanetšego. Ka gona laleletša bafsa ba bangwe bao ba itokišitšego go hlalosa kamoo ba ilego ba swanelegela go ba bagoeledi bao ba sa kolobetšwago ka gona le lebaka leo ka lona ba thabelago tirelo ya tšhemo le go nyaka go ba le karolo e kgolwanyane. Dipakane tša bona ka bokamoso ke dife? Bao go boledišanwago le bona ba swanetše go nea ditlhaloso tša bona ka noši tše di agago gomme ba se ke ba boeletša mantšu ao ba kgopetšwego go a bolela ka hlogo.
Kopelo 128 le thapelo ya go phetha.
Beke e Thomago ka December 28
10 mets:Ditsebišo tša phuthego. Ditaba tša Pušo ya Legodimo. Bontšha kamoo go ka dirišwago dipuku tšeo di tlago go bolelelwa lefelong leo ka January.
10 mets:“Itlwaetše o E-na le Pakane ya Boineelo go Modimo.” Polelo e kgothatšago ka molebeledi wa Sekolo sa Bodiredi sa Pušo ya Legodimo. Hlalosa ka mo go kwalago kamoo Polelo No. 2 e swanetšego go neelwa ka gona gomme o gopotše bao ba abetšwego dintlha tše kgolo tša Beibele gore ga se ba swanela go dira ditlhaloso tše telele karolong ya Beibele yeo e abetšwego Polelo No. 2.
13 mets:“O ka Hwetša Khomotšo Dinakong tša Manyami.” (wSE92 7/15 matl. 19-22) Polelo e kgothatšago ka mogolo.
12 mets:Tše di nyakegago tša phuthego.
Kopelo 103 le thapelo ya go phetha.