Itlwaetše O E-na Le Pakane Ya Boineelo Go Modimo

1 Sekolo sa Bodiredi sa Pušo ya Legodimo se tšwela pele go re tlwaetša go “ratha Lentšu la therešô [re] sa kxopamiše.” (2 Tim. 2:15) Na o ngwadišitše? Ge e ba go se bjalo gomme o swanelega, ke ka baka la’ng o sa holwe ke tokišetšo ye e botse ka go ingwadiša gona bjale?

2 Karolo e bohlokwa ya sekolo ke lenaneo la beke le beke la mmalo wa Beibele. Lenaneo la gago la thuto ya motho ka noši le swanetše go akaretša go bala dikgaolo tšeo di abetšwego tša Beibele e le gore ge nako e dutše e e-ya o tla ba o šetše o badile Beibele ka moka.

3 Go thoma ka lenaneo la sekolo la 1993, mmalo wa Beibele wo o akaretšwago ke Polelo No. 2 o tla balwa ka moka ga wona ka ntle le go tsena-tsenwa ga dintlha tša tlhaloso. Se se bolela gore morutwana yo a neelago polelo ye o tla akaretša tsebišo e tlhalosago matsenong le phethong ya gagwe feela. Ngwanabo rena yo a abetšwego dintlha tše kgolo tša Beibele o swanetše go nea ditlhaloso tše kopana ditemaneng tšeo di abetšwego Polelo No. 2 e le gore seboledi sa polelo yeo se ka kgona go katološa tsebišo ya sona ka mo go tletšego mmalong wa Beibele.

4 Molebeledi wa sekolo o tla swaya pampišana ya Keletso ea Puo bakeng sa bao ba neago Dipolelo No. 2, 3 le 4. Ga se a letelwa gore a latele thulaganyo yeo e lego pampišaneng ya keletšo eupja a ka nea keletšo e lebanego dintlheng tšeo go tšona morutwana a swanetšego go kaonefatša. Ga go nyakege go swaya pampišana ya keletšo ya seboledi seo se neelago Kabelo No. 1, gaešita lege go ka newa keletšo ya ka thoko ge e ba go nyakega.

5 Bohle bao ba swanelegago ba swanetše go diriša ka mo go tletšego ditokišetšo tša moya tšeo di dirilwego ke Jehofa, go akaretša tlwaetšo yeo e newago Sekolong sa Bodiredi sa Pušo ya Legodimo. Tlwaetšo e bjalo e ka lebiša bodireding bjo bo enywago kudu.—1 Tim. 4:7.