Tswalanya Dipampiša Le Dipuku Tše Dingwe

1 Go dimakasine ka moka tšeo di gatišwago lehono, ke feela Morokami le Phafoga! tšeo di ka thušago babadi ba botegago go hwetša tsela e iša bophelong bjo bo sa felego. Ge o dutše o boledišana le batho ka April le May, ba bangwe ba tla bontšha go thabela Mmušo ka tsela e sa belaetšego, gomme mo gongwe o ka tanya kgahlego ya bona ka go lebanya ka dimakasine tša morago-rago gomme wa ba diriša peeletšo. Ba bangwe ba ka thoma ba sa bontšhe kgahlego le gatee. Mabakeng a bjalo, o ka thoma ka go ahla-ahla ntlha goba tše pedi tše di lego pampišaneng; ke moka ge e ba mong wa ntlo a bontšha kgahlego e oketšegilego, sepediša pampišana le makasine goba pukwana (brochure) yeo o e sepedišago.

2 O ka re:

◼“Batho ba bantši ba ka dumela gore lefaseng la lehono go na le mathata a mantši kudu go feta ditharollo. Na o be o tseba gore a mantši a mathata a rena a magolo a boletšwe e sa pele ka Beibeleng?” Ke moka o ka phetla go matlakala 4 le 5 a pampišana ya Na Lefase le le tla Phologa? gomme o ahla-ahle mathata a mangwe.

3 Ge e ba o sepediša Morokami wa April 1 gomme mong wa ntlo a bontšha go thabela seo o se balago pampišaneng, gona o ka šupa sehlogong se se rego, “Latela Seetša sa Lefase” gomme o hlalose kamoo Jesu Kriste a tlago go rarolla mathata ka moka a motho ka gona mafelelong. Ke moka o ka sepediša peeletšo. Ge e ba e ganwa, tlogelela mongwe wa ntlo pampišana gotee le dimakasine gomme o ithapele go boela lebakeng le le swanetšego go tlo ahla-ahla taba ka mo go oketšegilego.

4 Ge e ba go lebišwa tlhokomelo go “Phafoga!” ya April 8, gona o ka diriša matseno a lego go serapa 2 sa sehlogo se, ke moka o oketše ka gore:

◼“Batho ba bantši ba belaela bokgoni bja bodumedi le dipolitiki bja go rarolla mathata a rena, eupja ba ipotšiša ge e ba thutamahlale e e-na le tharollo.” Ka gona bala ntlha e swanetšego sehlogong sa “Na Thutamahlale e ka Lebeletšana le Ditlhohlo tša Lekgolong la bo-21 la Ngwaga?” Go tloga go le molaleng gore sehlogo se se tla tanya tlhokomelo ya bafsa ba bantši, kudu-kudu barutwana.

5 Ge o bolelela pukwana ya ‘Bonang,’ mo gongwe o ka diriša matseno a fapanego:

◼“Batho ba bantši ba ipotšiša ka seo se diregago ge motho a e-hwa. Ba bangwe ba re re ya legodimong goba diheleng; ba bangwe ga ba kgonthišege. Karabo ya Beibele e a makatša e bile e bea pelwana-tšhwaana.” Ke moka o ka rotoša dintlha le go ahla-ahla dikarolo tša pampišana ya Kholofelo ke Efe ka Baratiwa Bao ba Hwilego? Ka morago ga moo o ka šupa go matlakala 16 le 17 ka pukwaneng ge e ba mong wa ntlo a bontšha go thabela pampišana.

6 Re tla hwetša batho ba bantši bao ba tshwenyegilego kudu ka maemo ao a mpefalago a lefase. Ke ka baka la’ng o sa lebiše tlhokomelo seswantšhong seo se lego pampišaneng ya Bophelo Lefaseng le Lefsa la Khutšo? O ka balela mong wa ntlo dipotšišo tše tharo tše di neetšwego serapeng sa pele sa pampišana. Ka morago ga karabelo, lebiša tlhokomelo serapeng sa pele ka tlase ga sehlogwana se se rego, “Bophelo Lefaseng le Lefsa la Modimo” go letlakala 3. Se se šupa Mmušo wa Modimo e le tsela yeo ka yona lefase le lefsa la khutšo le tlago go tla. Ge e ba mong wa ntlo a bontšha kgahlego e oketšegilego, diriša Morokami wa April 1 ka tsela yeo go šišintšwego ka yona go serapa 3 sa sehlogo se.

7 Ge e ba o le mogoeledi o mofsa, ga go na pelaelo gore o tla rata matseno a bonolo. Ke ka baka la’ng o sa hwetše sesola sa dipampišana tša Na Lefase le le tla Phologa? gomme o latele ditšhišinyo tše di lego ka mo godimo go serapa 2?

8 Re filwe tokelo ya go iša molaetša wa phološo magaeng a batho. Lesolong la rena la go tsoma ‘ba ba swanetšego,’ anke re diriše dipampišana tša rena ka mo go holago ka go di tswalanya le dipuku tše dingwe ge kgahlego e hwetšwa.—Mat. 10:13.