Tlhohlo Ya Go Dira Maeto A Go Boela

1 Ka ge re le badiredi ba ditaba tše di lokilego, re laelwa gore re dire barutiwa. (Mat. 28:19, 20) Se se akaretša go dira maeto a go boela. Na o na le kgopolo e nepagetšego ka karolo ye e bohlokwa ya bodiredi bja rena bja Bokriste? Go ba le bokgoni tabeng ya go dira maeto a go boela e ka ba tlhohlo e kgahlišago.—Die. 22:29.

2 Mokriste o mongwe le o mongwe yo a ineetšego o swanetše go tseba gore o na le boikarabelo bja go ba le karolo modirong wa go dira barutiwa. Se mo gongwe se ka nyaka gore re beele ka thoko boipshino bjo bongwe bja rena e le gore re nee ba bangwe kholofelo ya Mmušo. Go dira maeto a go boela go re fa sebaka sa go thuša batho ba ba botegago gore ba hwetše tšeo ba di hlokago moyeng.

3 Latelela Bohle ba ba Bontšhitšego Kgahlego: Batho ka moka ba ba bontšhitšego kgahlego molaetšeng wa Mmušo ba swanetše go etelwa gape, gaešita lege ba ka gana dipuku tša rena. Go na le batho ba bantši bao ba bontšhago kgahlego ka go dumela ga bona go boledišana le rena ka ditaba tša Beibele. Jesu le baapostola ba bontšhitše kamoo go thabela molaetša wa Mmušo go ka godišwago ka gona ka go boledišana le batho ka go lebanya ka Mangwalo.—Mar. 10:21; Dit. 2:37-41.

4 Morero wa rena wa go boela e swanetše gore e be go thoma thuto ya Beibele. Mo gongwe re ka kgona go bontšha mong wa ntlo mokgwa woo thuto ya Beibele e swarwago ka wona. Kgonthišega gore Jehofa o tla araba thapelo ya gago ya go kgopela thušo gore o hwetše motho yo a nago le pelo e botegago yo o ka mo rutago. Jehofa o tla šegofatša boiteko bja gago bjo bo botegago tirelong ya gagwe. Ke ka baka la’ng o sa kgopele thušo ya Jehofa gomme o be le pakane ya go thoma thuto ya Beibele?

5 Šomiša Dipampišana Gabotse: Dipampišana di ka dirišwa gabotse bakeng sa go thoma dithuto tša Beibele. Batho ba bantši ba kgonne go thoma poledišano gabonolo ka go hlalosa seswantšho se se lego karolong ya ka ntle. Bala serapa se setee ka nako le mong wa ntlo. Ge go botšišwa potšišo, ema gomme o kgopele mong wa ntlo gore a hlalose. Bala mangwalo gomme o a hlalose. Poledišano bjale e ka lebišwa pukung yeo thuto e ka swarwago ka yona.

6 Diriša Puku ya Go Boledišana: Ma- eto a atlegago a go boela a ka dirwa ka puku ya Go Boledišana. Go hlahloba lelokelelo la dihlogo tše kgolo goba tlhatlamano go ka go thuša go kgetha taba e swanetšego yeo o ka bolelago ka yona ge o latelela dipoledišano tše le bilego le tšona nakong e fetilego. Karolo ya “Mangwalo ao Gantši a Dirišwago ka mo go se gwa Swanelago” e ka thuša bakeng sa go araba dikganetšo tšeo di ka rotogago. Babulamadibogo ba bega gore ba bile le katlego e kgolo ya go thoma dithuto tša Beibele ka go diriša tsebišo e bjalo ka yeo e hwetšagalago pukung ya Go Boledišana go letlakala 154 ka tlase ga sehlogo se se rego “Dihlatse tša Jehofa ba kgona bjang tabeng ya go hlalosa ga bona Beibele?” Ba bontšha motho yo a thabelago kamoo re dirago gore Beibele ka noši e itlhalose. Se se šoma gabotse gomme se ile sa dira gore go thongwe dithuto tše dintši tša Beibele.

7 Bjalo ka Jesu le baapostola, re swanetše go bontšha kgahlego ya rena ya kgonthe ka dinku tša Jehofa. (Luka 9:11) Go rata batho go tla re thuša go ba fihlelela ka ditherešo tša Mmušo. (2 Ba-Kor. 2:17) Ge e ba re hlokomela kudu taba ya go ikgafa ga rena gore ba bangwe ba holege moyeng, gona re tla kgona go lebeletšana le tlhohlo ya go dira maeto a go boela.