Tsošang Kgahlego Mmušong wa Modimo wa Khutšo
1 Kgweding ya February, re tla be re sepediša puku ya O ka Phela ka mo go sa Felego Paradeiseng mo Lefaseng. Boikemišetšo bja rena e swanetše go ba go thuša batho ba dipelo tše di botegago go mediša tebogo bakeng sa Mmušo wa Modimo le seo o tlago go se phetha. Dipotšišo tšeo di nyakago pono ya motho di ka re thuša go fihlelela se.
2 Pampišana ya “Bophelo Lefaseng le Lefsa la Khutšo” e ka dirišwa go rola mpho. Ka morago ga tumedišo ya bogwera, re ka bolela se sengwe se se swanago le se:
◼ “Diphetogo tšeo di makatšago mmušong di direga lefaseng ka bophara, gomme gantši go bolelwa ka pakane ya go fihlelela khutšo. Na o nagana gore khutšo ya kgonthe e tla ka ya fihlelelwa? [Dumelela tlhaloso.] Gaešita lege ba bantši ba lebelela ka kholofelo go babuši bao e lego batho gore ba tliše khutšo, ela hloko kamoo Modimo a holofetšago go tliša khutšo ka gona bjalo ka ge go boletšwe go Psalme 46:9. [Bala.] Ke diphetogo dife lefaseng tšeo o naganago gore mogato wo Modimo a tlago go o gata o tla di tliša? [Theetša karabelo ya mong wa ntlo gomme ka morago o mmontšhe pampišana ya Bophelo Lefaseng le Lefsa la Khutšo.] Na o kgona go bona ka mahlo a kgopolo seo se swantšhitšwego mo?” Hlahloba tsebišo yeo e lego ka tlase ga sehlogwana se se rego “Bophelo Lefaseng le Lefsa la Modimo.” Ge e ba boemo bo dumela, lebiša tlhokomelo ya mong wa ntlo tsebišong yeo e lego go matlakala 156-62 ka pukung ya Phela ka mo go sa Felego. Sepediša puku ka moneelo wa R9,00. Tlogelela mong wa ntlo pampišana go sa šetšwe gore o amogela mpho goba a sa e amogele. Re ka ruma poledišano ka go botšiša gore: “Na o nagana gore mmušo wa Modimo o tla tliša diphetogo tše?” Rulaganyetša go boela le tšwetše pele poledišano.
3 Goba re ka re:
◼ “Go bontšhwa go tshwenyega kudu mabapi le mathata ao a ferekanyago ao ka moka ga rena re swanetšego go lebeletšana le ona letšatši le letšatši. Na o nagana gore go na le kholofelo lege e le efe ya go hwetša kimollo mathateng a? [Dumelela tlhaloso.] Ba bangwe ba ka ba ba nagana gore Modimo ga a na taba le tlalelo yeo re lego go yona. Lega go le bjalo, ela hloko seo a se holofetšago go Kutollo 21:3, 4.” Bala ditemana. Ntlheng ye lebiša tlhokomelo ya mong wa ntlo pukung ya Phela ka mo go sa Felego. Mo gongwe o ka rata go rotoša potšišo ye e rego: “Ke ka baka la’ng Modimo a dumeletše tlaišego?” Šupa go kgaolo 11 ya puku ya Phela ka mo go sa Felego. Ge e ba nako e dumela, mo gongwe o ka rata go lebiša tlhokomelo ya mong wa ntlo ka boripana go dirapa 1 le 2 go letlakala 99. Neela mpho gomme o tsebiše mong wa ntlo gore o tla thabela kudu go tšwetša pele poledišano ye ketelong ye e latelago.
4 Ge e ba mong wa ntlo o šetše a e-na le puku goba a sa thabele go amogela mpho ka baka la mabaka a itšego, gona neela dimakasine tša morago bjale ka go hlalosa ntlha e itšego sehlogong seo se kgethilwego.
O ka rata go rola makasine ka go re:
◼ “Sehlogo se se hlalosa taba ye ka botlalo. [Bala lefoko le tee goba a mabedi ao o a kgethilego e sa le pele.] Sehlogo se nea dikgopolo tše di oketšegilego tšeo di tlago go ipontšha e le tše kgothatšago go wena le lapa la gago. Ka ge o bonala o e-na le kgahlego sehlogong se, re tla thabela go go tlogelela tokollo ye le makasine wo o sepedišanago le yona ka moneelo wa R1,60.”
5 Batho lehono gantši ba a gakanega ge go tliwa tabeng ya go tseba moo ba swanetšego go retologela gona bakeng sa ditharollo tša mathata ao batho ba lebeletšanego le ona. Re na le tokelo ya go abelana le bona kholofelo e kwalago ka bokamoso. (Dit. 17:27) Ka gona, eka re ka lebiša tlhokomelo ya batho ka mafolofolo Mmušong wa Modimo, e lego mothopo wa kgonthe wa khutšo.