Na o ka Oketša go Tumiša ga Gago Jehofa ka April?
1 Mopsalme Dafida o be a e-na le kganyogo e tšwago pelong ya go tumiša Jehofa ka mo go amogelegago, gomme ka go rialo o itše: “Morêna ke tlo mo leboxa kudu ka molomo wa-ka, ke tlo mo rêta kè le xare xa lešaba.” (Ps. 109:30) April ke nako e botse ya go ‘atiša ditheto tša gagwe ka moka’ ka go oketša go tšea ga rena karolo bodireding bja tšhemo. (Ps. 71:14) Na o rera go ba gare ga ba bantši bao ba dirago se ka go tlatša dipalo tša babulamadibogo ba go thuša?
2 Rulaganya Gona Bjale: Re gopotšwa go Diema 21:5 gore, “’Kêlêllô tša serôtô di iša mokhoreng.” Se se nyaka gore o iše taba go Jehofa ka thapelo, o mo etiše pele mererong ya gago. (Die. 3:5, 6) Se se latelago hlahlobišiša lenaneo la gago la gona bjale bakeng sa go lekola moo go ka dirwago dipeakanyo gona gore o fetše tekanyo ya diiri tše pedi ka letšatši bodireding. Go “reka” ga gago nako medirong e mengwe go go dumelela go gafela nako e oketšegilego modirong wa boboledi.—Ba-Ef. 5:16, NW.
3 E-ba yo a Boledišanago le yo a Dirišanago: Moapostola Paulo o boletše ka ba bangwe bao e bego e le “badirišani” ba gagwe go phetheng bodiredi bja gagwe. (Ba-Kol. 4:11) Ahla-ahla dithulaganyo tša gago le ba bangwe bao ba nyakago go ngwadiša ka April. Thekgo ya bona le bogwera bja bona di ka le tlišetša mehola e swanago ya moya. Molebeledi wa tirelo a ka go thuša ge e ba o e-na le dipotšišo mabapi le dithulaganyo tša tirelo goba tšhemo yeo e šongwago. Na re ka ikemišetša gape go fihlelela tlhora e mpsha ya babulamadibogo ba go thuša ka April?
4 Tirišano le thekgo tše di tšwago ka lapeng di ka thuša setho se sengwe sa lapa go dira bobulamadibogo bja go thuša. Mešongwana ya ka gae e ka swanela go arolelanwa lefsa ka nakwana. Lenaneo la go šoma mediro ye le lona le ka nyaka go fetošwa. Go swara therišano ya lapa bakeng sa go ahla-ahla dinyakwa tše e ka ba mo go thušago go fihlelela pakane ya gago. Senotlelo se se išago katlegong ke poledišano e botse le tirišano.
5 Dula o E-na le Pono e Nepagetšego: O se ke wa akgofela go fetiša kgopolong kgonagalo ya bobulamadibogo bja go thuša ka baka la maemo ao a sa kgahlišego. Bafsa bao ba lego sekolong, batho bao ba rotšego modiro, basadi ba malapa bao ba nago le bana, dihlogo tša malapa tšeo di šomago ka nako e tletšego, ka moka ba ile ba kgona go dira boikgafo—gomme ba dira seo ka lethabo—gore ba dire bobulamadibogo bja go thuša ka April. Ba dumelelana le mopsalme ka gore “ba ba otlologilego ba swanetše go mo tumiša,” gomme ga se ba go lebelela e le mo go ka se fihlelelwego go dira boiteko bjo bo oketšegilego bjo bo nyakegago go diriša diiri tše 60 bodireding. (Ps. 33:1, PK) Ge e ba o sa kgone go ngwadiša, ke ka baka la’ng o sa be le karolo lethabong le ka go oketša modiro wa gago o le mogoeledi wa phuthego?
6 Go ba bantši, go dira ga bona bobulamadibogo bja go thuša ka April e bile moratho wo o išago tirelong ya bobulamadibogo bja ka mehla. Ge ba šetše ba okeditše modiro wa bona, ba ile ba hwetša gore go fetela modirong wa bobulamadibogo bja ka mehla go ipontšhitše go le bonolo kudu. Barutwana ba Beibele bao ba fihlelelago dinyakwa tšeo di hlalositšwego go matlakala 98 le 99 a puku ya Bodiredi bja Rena le bao ba kganyogago go tšea karolo bodireding bja phatlalatša ba swanetše go thušwa gore e be bagoeledi bao ba sa kolobetšwago. Ge e ba ka moka ga rena re e-ba le karolo ka mehla bodireding ka April, re thuša ba bafsa gore ba re tlatše gomme re bega tirelo ya rena ya tšhemo kapejana bofelong bja April, ga re bone lebaka leo ka lona re ka se kgonego go fihlelela tlhora e mpsha e kgolo ya bagoeledi ka April.
7 Ee, sehla se ke se se botse bakeng sa go oketša modiro wa pušo ya Modimo ka April. Bagoeledi ba bantši bao e lego bafsa ba maikhutšong a sekolo. Gape go na le matšatši a mantši a maikhutšo a batho bohle. April 9 ke Letšatši la rena le le kgethegilego la Dimakasine leo le tlago go dira gore bontši bja rena re kgone go fetša letšatši ka moka modirong wa go aba dimakasine, bobedi ka ntlo le ntlo le go neeng bohlatse setarateng. Re nyaka go dira sohle seo re ka se kgonago go tumiša Modimo wa rena, Jehofa. Go dira bobulamadibogo bja go thuša ka April ke tsela e botse ya go bontšha tebogo ya rena bakeng sa ditiro tša gagwe tše dintši tša botho bjo bo sa swanelago go rena.