Ba Thušeng go Gata Mogato ka go Dumelelana le Molaetša wa Mmušo
1 Modiro wa rena wa boboledi o nea batho sebaka sa go kwa ‘ditaba tše di lokilego tša Mmušo wa Modimo.’ (Mat. 24:14, NW) Eupja ge e ba ba tla phologa “tlaišexong e kxolo,” gape ba swanetše gore ba gate mogato ka go dumelelana le tšona gomme ba fetoge barutiwa ba Jesu Kriste. (Kut. 7:14; Mat. 28:19, 20) Maphelo a a akaretšwa! Ka gona kgonthišetša gore o boela go batho bao mathomong ba bontšhitšego kgahlego go e nngwe ya dithero tšeo o di dirišitšego kgweding ye.
2 Ge e ba o tlogetše puku ya “Dipotšišo tša Bafsa,” o ka re:
◼ “Go a thabiša go go bona gape. Nakong e fetilego ge re be re boledišana, re ile ra bolela ka mathata ao bafsa ba bago le ona. Ke go tlogeletše puku yeo e neago dikarabo tša bontši bja dipotšišo tšeo bafsa ba nago le tšona. Ge e ba o ile wa ba le nako ya go bala puku ye e botse, mohlomongwe o lemogile keletšo e šomago le yeo e lego nakong yeo e e rwelego. Ke tla rata go tšea metsotso e sego kae go gatelela bokamoso bjo bo kgahlišago bjo bo holofeditšwego ke Modimo.” Ke moka phetla go matlakala 306 le 307, o gatelela dikgopolo tše di swanetšego le mangwalo ge nako e dumela. Rulaganyetša go boa bakeng sa go tšwetša poledišano pele.
3 Ge e ba o tlogetše pampišana ya “Na Lefase le le tla Phologa?” ketelong ya mathomo, o ka bolela selo se sengwe se se swanago le se:
◼ “Ke thabela go go hwetša ka gae lehono. Ge ke be ke go etetše malobanyana mo, re ile ra boledišana ka ditiragalo tše di bopago pontšho yeo e bego e tla tšwelela pejana ga bofelo bja lefase. [Boeletša dibopego tše di swanetšego tša pontšho go Mateo 24:3-14.] Na o hlokometše tiragalo lege e le efe yeo e sa tšwago go direga morago bjale lefaseng goba tikologong ya rena, yeo o naganago gore e ka ba e le phethagatšo ya karolo ya pontšho yeo?” Lebiša tlhokomelo sehlogong seo se lego ka go o mongwe wa dimakasine tša morago bjale, seo se gatelelago go phethega ga tše dingwe tša diporofeto tše tša Beibele. Sepediša dimakasine tše pedi ka moneelo wa R1,60. Ge o ruma ketelo, bolela sehlogo sa polelo ya phatlalatša ya bekeng ye gomme o mo laletše gore a be le wena Holong ya Mmušo.
4 Ge e ba o laleleditše mong wa ntlo Segopotšong, e re:
◼ “Ge ke be ke go etetše la mafelelo, re ile ra boledišana mabapi le kamoo lehu la Jesu le lego bohlokwa ka gona bathong. Gape ke ile ka go laletša gore o be gona Segopotšong sa lehu la gagwe, seo se tlago go binwa ke Bakriste lefaseng ka moka ka March 26. Lehono ke tlile go go gopotša gore o laletšwa gore o be gona tiragalong yeo e bohlokwa. [Bolela nako le lefelo la monyanya.] Go ka go thuša go lemoga bohlokwa bja tiragalo ye ge e ba re hlahloba tše dingwe tša ditšhegofatšo tšeo re di thabelago mo nakong ye ka baka la seo Jesu a se diretšego batho, gotee le ditšhegofatšo tše di sa dutšego di tla tla.” Ge e ba go kgonega, dira dithulaganyo tša go thuša motho yo a thabelago go ba gona Segopotšong.
5 Ge e ba motho e be e fo ba motheetši yo botse, se mo gongwe se ka šoma:
◼ “Ke tloga ke thabetše poledišano yeo e sego kgale re bile le yona ka Beibele. Ke boile ka gobane ke rata go go bona o thabela seo Modimo a se holofeditšego bao ba nyakago go ithuta mo go oketšegilego ka yena.” Bala Johane 17:3, ke moka o šupe go pampišana ya Bophelo Lefaseng le Lefsa la Khutšo.
6 Eka lerato la gago la go rata bophelo le go leboga ga gago topollo di ka go tutuetša go dira maeto a go boela bathong bao ba thabelago. Ba thuše gore ba gate mogato ka go dumelelana le molaetša o kgahlišago wa Mmušo. Gopola, “lebaka le kxaufsi”!—Kut. 1:3.