Go Goeletša ‘Mantšu a Boporofeta’
1Re phela mehleng yeo go yona diporofeto tša puku ya Kutollo di phethagalago. Ba bantši ba nyaka go kwešiša seo se bolelwago ke ditiragalo tše di hlobaetšago tšeo di diragalago. Ba ka holwa ke go ‘kwa mantšu’ a boporofeta bja Kutollo. (Kut. 1:3) Kgweding ya March, re na le sebaka sa go ba thuša ka go sepediša puku ya Seremo sa Kutollo. Ge re e sepediša re swanetše go gopola gore mathata ao batho ba lebanego le ona lehono a boletšwe e sa le pele ka pukung ya Kutollo. Ka gona, re ka re’ng?
2Mohlomongwe matseno a e ka ba a atlegago:
◼ “Ntwa, tlala le bolwetši di hlasetše batho lekgolong le la bo-20 la nywaga. Ke ka baka la’ng o nagana gore go bjalo mola motho a tšwetše pele gakaakaa ka tša thekinolotši? [Dumelela karabo.] Ba bantši ba makatšwa ke go tseba gore maemo a a boletšwe e sa le pele ka Beibeleng. Mohlomongwe o tlwaelane le polelwana e rego ‘banamedi ba dipitsi ba bane ba Kutollo.’ Seo Beibele e se bolelago ka banamedi ba ba bane ba dipitsi ge e le gabotse ke boporofeta bjo bo phethagalago ditiragalong tša lefase lehono. [Phetla puku ya Seremo sa Kutollo go kgaolo 16, gomme o šupe diswantšho tše di lego go matlakala 91-7.] Le ge boporofeta bjo bo bolelela pele nako ya tlalelo e kgolo, bo bile bo nea kholofelo. [Bala Kutollo 6:2 e lego go serapa 3.] Monamedi wa pitsi e tšhweu ke Jesu Kriste. O holofeditše gore o tla fenya bokgopo gomme a tliše lefase la lethabo le khutšo ka Mmušo woo a re rutilego gore re o rapelele.” Sepediša puku.
3 Mohlomongwe potšišo ye e ka hlohleletša poledišano e nago le morero:
◼ “O nagana gore go nyakega’ng bakeng sa go tloša maemo a mabe lefaseng? [Dumelela karabo.] Batho ba bantši ba dumela gore go nyakega diphetogo tša kapejana ge e ba lefase le le tla phologa. Beibele e bontšha gore Modimo o tseba kamoo a tlago go rarolla mathata a rena ka gona, gomme o holofeditše gore o tla re thuša.” Phetla go letlakala 171 la puku ya Seremo sa Kutollo, gomme o bale Kutollo 11:15 e lego go serapa 1. Phetla diswantšhong tše di lego go matlakala 302 le 308, ke moka o bontšhe ka ditšhegofatšo tšeo di tlago go ba gona ka tlase ga pušo ya Mmušo ka Kriste. Ka morago o hlalose kamoo mong wa ntlo ka boyena a ka holegago ka gona.
4Mo gongwe o ka ikwa o lokologile go bolela selo se se swanago le se:
◼ “Batho ba bantši bao ba badilego puku ya Beibele ya Kutollo ba hweditše go le thata go e kwešiša. E hlalosa ka ditiragalo tše fapa-fapanego tše di sa tlwaelegago le tšeo di lego bohlokwa. Puku ye ya Seremo se Segolo sa Kutollo se Batametše!, e nea tlhahlobo ya temana ka temana ya puku ka moka ya Kutollo e bile e bontšha kamoo rena ka noši re kgongwago ka gona ke go phethagala ga diporofeto tša yona.” Phetla puku go letlakala 15, serapa 2 gomme o mmontšhe Kutollo 1:1 yeo e ngwadilwego ka mongwalo o mokoto. Hlalosa gore dipolelo tše kgethegilego tša mohuta wo di neilwe temaneng e nngwe le e nngwe e lego ka pukung ya Kutollo le gore tsebišo ye e tla mo thuša go kwešiša diporofeto tše tše di sa tlwaelegago. Sepediša puku ka moneelo wa R10,50.
5 Ge e ba motho a swaregile goba a gana mpho ya puku ya Seremo sa Kutollo, mo gongwe o ka mo nea dimakasine tše pedi goba pampišana. Kgonthišetša gore o a boela e le gore o fehle kgahlego e oketšegilego molaetšeng wa Mmušo.
6 Molaetša wo o lego go Kutollo o kgoma batho ka moka. Yo mongwe le yo mongwe o swanetše go kwa mantšu a boporofeta. Anke re direng sohle se re ka se kgonago go goeletša molaetša wo o bohlokwa.