Diphiri Tša Kutollo Di A Utologa

1 Puku ya Kutollo e bile sephiri ka nako e telele. Ka makgolo a mantši a nywaga baithuti ba Beibele ba ile ba leka go utolla diphiri tša yona, eupja ga se ba atlega. Eupja tsebišo yeo e buduletšwego ke Modimo yeo e lego ka go Kutollo e be e sa rerelwa gore e dule e le sephiri ka mo go sa felego. Ke karolo ya Lentšu la Modimo leo re swanetšego go le kwešiša. (2 Tim. 3:16, 17) Ka mo go thabišago, Modimo o utolla Kutollo ge diporofeto tša yona tše di kgahlišago di dutše di phethega mehleng ya rena. Bjalo ka ge Jehofa a ile a diriša Johane go fetišetša dipono tše go Bakriste-gotee le yena, lehono O diriša ‘molaki yo a botegago’ go utolla seo se bolelwago ke boporofeta bjo bjo bo kgahlišago.—Mat. 24:45-47; Kut. 1:1-3.

2 Mpho ya March: Puku ya Seremo se Segolo sa Kutollo se Batametše! e sedimošitše le go kgothatša batho ba Modimo kudu. Eupja ke ka baka la’ng e tla kgahla batho ba tšhemong ya gabo lena? Ka gobane puku ye e kgahlišago e bolela ka ditiragalo tša mafelelo tšeo di hlaloswago ka pukung ya Beibele ya Kutollo tšeo di diregago mehleng ye ya bofelo. Na batho ba naganago ga ba rate go tseba ka bokamoso bjalo ka ge bo utollwa ke Modimo? Gaešita lege puku ya Beibele ya Kutollo e bontšha dikahlolo tša go loka tša Modimo, gape e nea dikholofetšo tša ditšhegofatšo tše di kgahlišago tša nakong e tlago. (Kut. 21:1-5) Go kwešiša molaetša wa yona o buduletšwego go re thuša go bona moo re lego gona ge e le ka go sepela ga nako gomme go gatelela go rena go akgofa ga go dira thato ya Modimo.

3 Na puku ya Seremo sa Kutollo e thata kudu gore e ka kwešišwa ke batho ka kakaretšo? Go molaleng gore ba bantši ga se ba e hwetša e le e thata. Ela hloko ditlhaloso tše sego kae go tše dintši tšeo di ilego tša dirwa ke babadi ba puku ye. Monna o mongwe o itše: “Tsebišo ye ke e matla. Eupja e a kgahliša. Ke a e rata.” Modiredi o itše: “Ga se ka ka ka tseba goba ka bala selo le ge e le sefe se se kgahlišago kudu le sa therešo go swana le puku ye!” Monna o mongwe yo a badilego puku ye ka nako ya ka tlase ga beke o hlalositše gore: “Bjale mahlo a-ka a bona therešo gabotse. Ke nyaka go fetola bophelo bja-ka ka moka.” Ka mo go kwagalago, ba bantši ba hwetša lethabo ge ba bala puku ya Beibele ya Kutollo le go e kwešiša ka lekga la mathomo bophelong bja bona gomme ba thoma go boloka mantšu a yona.

4 Bolelela Seremo sa Kutollo go ba Bangwe ka go Botega: Ge o dutše o boledišana le ba bangwe ka March, o se ke wa dika-dika go bontšha batho ba thabelago puku ya Seremo sa Kutollo. Botša bao ba kganyogago go e bala gore ba ka swaya dikarolo tša puku ye tšeo ba sa di kwešišego, gomme ge o boa o tla boledišana le bona ka dintlha tšeo. Se e ka ba tsela ya go bona bogolo bja kgahlego ya bona, gomme sa nea motheo o mongwe gape wa go dira leeto la go boela.

5 Go okeletša tirelong ya ntlo le ntlo, ba bantši ba ile ba atlega go sepediša puku ya Seremo sa Kutollo ka tsela e sa rulaganyetšwago go metswalo, bao ba tlwaelanego le bona le bao ba gwebišanago le bona. Bontšha kamoo wena ka noši o hotšwego ke diswantšho tše dibotse, ditšhate tše holago gotee le dithušo tše dingwe tše kgahlišago tša go ruta tšeo di lego ka pukung ye. Se se ka kgothatša ba bangwe gore ba hlahlobe puku ya Kutollo, gaešita lege mo gongwe ba be ba nagana gore e raragane kudu go ka kwešišega.

6 Re lehlogonolo gakaakang ka go tseba ditiragalo tša nakong e tlago tšeo di utolotšwego ka pukung ya Kutollo gomme tša hlaloswa ka mokero wa Modimo lehono! Ka ge re neilwe tsebo e bjalo, re se etše bamangwalo ba mehleng ya Jesu le baruti lehono ka go se tsebiše goba go utollela bao ba tlago go theetša seo se bolelwago ke Lentšu la Modimo. (Bapiša le Luka 11:52.) Re holofela gore ge re dutše re dira bjalo ba bangwe ba bantši ba tla amogela kholofelo ya bophelo bjo bo sa felego lefaseng le lefsa la Modimo gomme ba re tlatša go direng thato ya Mmopi wa rena.—Kut. 4:11.